በአዶላ ከተማ ተቃውሞ የሰው ህይወት ጠፋ

የሚድሮክ ኩባንያ

የለገደንቢ ሚድሮክ ወርቅ ማምረት ፍቃድ ለ 10 ዓመታት የሚዘልቅ እድሳትን ተከትሎ ትናንት በአዶላ ከተማ የተቃውሞ ሰልፍ ላይ በተፈጠረ ግጭት የሰው ህይወት መጥፋቱን የአዶላ ከተማ ምክትል ከንቲባው አቶ ጫላ ዋሬ ለቢቢሲ ገለፀዋል።

ባለቤትነቱ የሼህ ሙሃመድ ሁሴን አሊ አላሙዲን የሆነው ሚድሮክ ኢትዮጵያ ቴክኖሎጂስ ግሩፕ የለገደንቢን የወርቅ ሃብት እንዲያመርት ፍቃድ ከተሰጠው 21 ዓመታት ተቆጥረዋል።

በእነዚህ ዓመታት ውስጥ ድርጅቱ ለአካባቢው ማህበረሰብ ጥቅም አላመጣም፤ ማዕድናቱን ለማፅዳት የሚጠቀማቸው ኬሚካሎችም በነዋሪዎች እና በእንስሳት ላይ ጉዳት እያስከተለ ነው በሚል ከፍተኛ ተቃውሞን ሲያስተናግድ ቆይቷል።

ተቃውሞውንም ተከትሎ የቀድሞ የማዕድን እና ኢነርጂ ሚንስትር አቶ ሞቱማ መቃሳ ህዝቡን እንዳወያዩ የሻኪሶ ከተማ ነዋሪ አቶ ጉኖ ሻቦላ ይናገራሉ።

በኬሚካሉ ጉዳት የደረሰባቸው የህብረተሰብ ክፍሎች ለሚኒስትሩ ድርጅቱ ይዘጋልን የሚል ጥሪም እንዳቀረቡ አቶ ጉኖ ገልፀዋል።

"ከባለስልጣነቱ የተገኘው መልስ አጥጋቢ ስላልነበር ከትናንት ጀምሮ የሦስት ቀን የሥራ አድማ ላይ እንገኛለን" ብለዋል።

በድርጅቱ ላይ የሚነሱ ተደጋጋሚ ተቃውሞዎችንም እንደሚያውቋቸው የሚናገሩት የጉጂ ዞን የኮሚዩኒኬሽን ጉዳዮች ሃላፊ ወ/ሮ ራሂማ አብዱላሂ ናቸው።

"ህዝቡ ፍቃዱ ይሰረዝ ነው የሚለው። በእኛ በኩል ፍቃድ የሰጠው አካል ድርጅቱ አደረሰ የተባለውን ጉዳት እያጣራ ሲሆን ውጤቱን እስኪያሳውቀን እየጠበቅን ነው" ሲሉ ተናግረዋል።

ጨምረውም "በዞናችን ለህዝብ የማይጠቅም ኢንቨስትመንት በሥራ ላይ አይውልም የሚል አቋም አለን"ብለዋል።

ስማቸው እንዲጠቀስ ያልፈለጉ ለጉዳዩ ቅርበት ያላቸው ግለሰብ ከፌደራል ባለስልጣናት ጋር ውይይት በተካሄደበት ጊዜ የአካባቢው ማህበረሰብ ድርጅቱ ሙሉ በሙሉ ሥራውን እንዲያቆም ጥያቄ እንዳቀረቡና የማዕድን ማውጫው የመብራት አገልግሎት እንደተቋረጠበት ገልፀዋል።

ግለሰቡ ጨምረውም በአዲስ አበባ ዩኒቨርሲቲ እና በአውሮፓ በሚገኝ እርሳቸው ገለልተኛ ባሉት ቤተ-ሙከራ ምርመራ ተደርጎ "የድርጅቱ ተግባር በአካባቢው በሚኖሩ ማህብረሰብ ላይ የሚያስከትለው ጉዳት እንደሌለ ተረጋግጧ" ሲሉ ለቢቢሲ ተናግረዋል።

የሚድሮክ ኢትዮጵያ ቴክኖሎጂስ ግሩፕ ሃላፊዎች በጉዳዩ ላይ አስተያየታቸውን እንዲሰጡ ቢጠየቁም ፍቃደኛ ሳይሆኑ ቀርተዋል።

ተያያዥ ርዕሶች