ወደ አሥመራ ለመጓዝ ማወቅ የሚገባዎ 6 ነጥቦች

ቦይን 787 Image copyright AFP

የኢትዮጵያ አየር መንገድ ለሃያ ዓመታት ተቋርጦ የነበረውን የአሥመራ በረራውን ማክሰኞ ሐምሌ 17/2010 ዓ.ም ሊጀምር መሆኑን አሳውቋል።

ጠቅላይ ሚኒስትር ዐብይ አህመድ በኤርትራ ያደረጉትን ይፋዊ ጉብኝት ተከትሎ የሁለቱ አገራት መሪዎች ከደረሱባቸው ስምምነቶች መካከል አንዱ የሆነው የአየር ግንኙነትን የመጀመር ውሳኔን ተከትሎ ነው ይህ ይፋ የሆነው።

"ዛሬ ትግርኛ የለ፣ አማርኛ የለ! ቋንቋው ጠፍቶብኛል" ዐብይ አሕመድ

ኢትዮጵያና ኤርትራ፦ ከእራት በኋላ ምን ተወራ?

የኢትዮጵያ አየር መንገድ እንዳሳወቀው ከሁለት አስርት ዓመታት በኋላ ለሚያደርገው ለዚህ በረራ በአሁኑ ወቅት ተጠቃሽ ከሆኑት ዘመናዊ አውሮፕላኖቹ መካከል አንዱ የሆነው ቦይንግ 787ን እንደሚያበር አሳውቋል።

የጠቅላይ ሚኒስትር ዐብይ አህመድ አዲስ ምዕራፍ

በአሁኑ ወቅት ወደ ኤርትራ ለመጓዝ ያሰበ ሰው ምን ማድረግ ይጠበቅበታል?

1. ቪዛ

ኢትዮጵያዊያን ኤርትራ ሲደርሱ ቪዛ ይሰጣቸዋል። በተመሳሳይ መልኩ ኤርትራውያን ኢትዮጵያ ሲገቡ የመዳረሻ ቪዛ ይሰጣቸዋል። ከቀናት በፊት በአዲስ አበባ የሚገኙ የኤርትራ ዲፕሎማቶች ''ለጉብኝት የሚሄዱ ኢትዮጵያዊያን አሥመራ ሲደርሱ ቪዛ ማግኘት ይችላሉ። ከጉዞ በፊትም የተጓዦች የፓስፖርት ኮፒ ወደ አሥመራ ይላካል'' ብለው ነበር።

2. የአውሮፕላን ቲኬት

የኢትዮጵያ አየር መንገድ በመጀመሪያ በረራው ከአዲስ አበባ ቦሌ ዓለም አቀፍ አየር ማረፊያ ከጠዋቱ 3 ሰዓት በመነሳት በቀጥታ ወደ አሥመራ ጉዞ ያደርጋል።

ለምሳሌ ሐምሌ 13 2010 ዓ.ም ጉዞውን ወደ አሥመራ አድርጎ ሐምሌ 18 ወደ አዲስ አበባ የሚመለስ ተጓዥ ለአየር ቲኬት 7106 ብር እንዲከፍል ይጠየቃል።

የጉዞ ቲኬት ከኢትዮጵያ አየር መንገድ የሞባይል መተግበሪያ አሊያም ከአየር መንገዱ ድረ-ገጽ ላይ አሁን መግዛት ይቻላል።

1 ሰዓት ከ 10 ደቂቃ በሚፈጀው በረራ ጥቅም ላይ ይውላል የተባለው 787 ድሪም ላይነር ከ250 መንገደኞች በላይ የማሳፈር አቅም አለው።

3. የገንዘብ ምንዛሬ

አሥመራ ላይ በብር መገበያየት አይቻልም። የኤርትራ መገበበያ ገንዘብ ናቅፋ ይባላል። 1 የአሜሪካን ዶላር በ15 ናቅፋ ይመነዘራል።

4. ሆቴል

ከአዲስ አበባ ጋር ሲነጻጻር በአሥመራ በርካታ የሆቴል አማራጮች ላይገኙ ይችላሉ።

በአሥመራ መሃል ከተማ ለአንድ ቀን አዳር በአማካይ ከ45 - 70 የአሜሪካን ዶላር ሊጠየቁ ይችላሉ። ይህን ያህል ዋጋ የሚጠየቅባቸው አብዛኛዎቹ ሆቴሎች ቁርስ የተካተተባቸው ሲሆን ነጻ የኢንተርኔት አገልግሎትም የሚሰጡ ናቸው።

ከላይ ከተጠቀሰው ዋጋ የሚያንሱ የአንግዳ ማረፊያዎች (ፔኒሲዮኖች) በአሥመራ ከተማ ውስጥ ይገኛሉ።

5. ምግብ እና መጠጥ

አማካይ በሆነ የአሥመራ ምግብ ቤት ውስጥ አንድ ጥብስ ከ100-125 ናቅፋ (6-8 የአሜረካ ዶላር) ድረስ ሊሸጥ ይችላል።

የለስላሳ መጠጦች 8 ናቅፋ ገደማ ይጠየቅባቸዋል።

በኤርትራ ''አሥመራ ሜሎቲ'' የሚባል አንድ የቢራ አይነት ብቻ ነው ያለው። ለአንድ አሥመራ ሜሎቲ ቢራ 18 ናቅፋ ይከፍላሉ።

6. የትራንስፖርት አገልግሎት

ከአሥመራ ዓለም አቀፍ አየር ማረፊያ እሰከ መሃል ከተማ ለመጓዝ የህዝብ አውቶብስ ወይም ታክሲዎችን መጠቀም ይችላሉ። የህዝብ አውቶብስ ከተጠቀሙ 2 ናቅፋ ብቻ የሚከፍሉ ሲሆን 4 ሰው የምትይዘውን ታክሲ ከመረጡ ግን 100 ናቅፋ ሊጠየቁ ይችላሉ።

በኤርትራ ቆይታዎ ከአሥመራ በሰሜን ምሥራቅ አቅጣጫ 113 ኪ.ሜ ርቀት ላይ የምትገኘውን ምፅዋንም መጎብኘት የሚሹ ከሆነ የህዝብ አውቶብስ በመያዝ ከሁለት ተኩል ጉዞ በኋላ መድረስ ይችላሉ።

ከላይ የተጠቀሱት ዋጋዎች አማካይ ግምት ወይም ከሦስተኛ አካል የተገኙ ናቸው። ዋጋዎቹ ግብር ያካተቱ ቢሆንም በአንዳንድ ቦታዎች ላይ የዋጋ ልዩነት ሊኖር ይችላል።

የትናንትናዋ እለት- በኢትዮ ኤርትራ ግጭት ቤተሰባቸው ለተለያየ?

በዚህ ዘገባ ላይ ተጨማሪ መረጃ