ሕንድ፡ ቀብሩን አዘጋጅቶ ራሱን ያጠፋው አርሶ አደር

ራሱን ከማጥፋቱ በፊት ለቀብር አስፈላጊ ቁሳቁሶችን ገዝቷል Image copyright Umesh
አጭር የምስል መግለጫ ራሱን ከማጥፋቱ በፊት ለቀብር አስፈላጊ ቁሳቁሶችን ገዝቷል

ሕንዳዊ አርሶ አደር ነው። ማላፓ ይባላል። ባለፈው ዓመት ነሀሴ ወር ላይ ቤተሰቦቹን "እቃ ገዝቼ እመለሳለሁ" ብሎ ከቤት ወጣ።

ቤተሰቦቹም ለቤት የሚያስፈልግ እቃ ገዝቶ ይመለሳል ብለው ጠበቁ። ሆኖም ማላፓ ራሱን ሊያጠፋ ወስኖ ነበር። የሸመተውም ለቀብር ስነ ስርዐቱ የሚሆኑ ቁሳ ቁሶችን ነበር።

ቻይናና ህንድ በውሃ ምክንያት ተፋጠዋል

ከሞተ በኋላ ሰውነቱ የሚሸፈንበት ነጭ ጨርቅ ከገበያ ገዝቷል። ለባለቤቱ የእጅ ጌጥ፣ እጣን እንዲሁም ከሞተ በኋላ በቤቱ የሚለጠፍ ፎቶግራፍም አሰናድቶ ነበር።

የሸመታቸውን ቁሳቁሶች በእርሻ መሬቱ ላይ በሚገኝ የአባቱ መቃብር ላይ አስቀመጠ። ከነዚህ እቃዎች ጋር ራሱን ለማጥፋት መወሰኑን የሚገልጽ ጽሁፍም አስቀምጦ ነበር።

ሕንድ ውስጥ ህንፃ ተደርምሶ ሰባት ሰዎች ሞቱ

አርሶ አደሩ ያለምክንያት ራሱን አላጠፋም። 285,000 ሩፒ (110 ሺህ ብር ገደማ) ከግለሰብ አበዳሪዎችና ከባንክ ወስዶ ነበር። ነገር ግን መመለስ አልቻለም።

ራሱን ከማጥፋቱ በፊት ለቀብር ስነ ስርዐቱ የሚሆኑ እቃዎችን የገዛው፤ ቤተሰቡን ለተጨማሪ የቀብር ወጪ ላለመዳረግ ብሎ እንደሆነ በጽሁፉ ገልጿል።

ማላፓ ራሱን ባጠፋበት ዕለት ቤቱ አቅራቢያ ወደሚገኝ አንድ አነስተኛ ጎጆ አመራ። ጎጆዋ ቀድሞ ከሥራ በኋላ እረፍት የሚወስድባት ነበረች። የዛን ዕለት ግን እስከወዲያኛው የሚያሸልብበት ሆነ።

Image copyright Niyas Ammed
አጭር የምስል መግለጫ አርሶ አደሩ ራሱን ያጠፋበት ጎጆ

ራሱን ባጠፋ በነጋታው፤ ልጁ ማድሀቫያ ከብቶችን ወደ ግጦሽ እየወሰደ ሳለ በቅድመ አያቱ መቃብር ላይ የተቀመጡትን ቁሳቁሶች ተመለከተ። የአባቱን ፎቶግራፍ ሲያይ ስሜቱ መረበሹን ይናገራል።

"አንዳች ክፉ ስሜት ወረረኝ። ወደ ጎጆው እየሮጥኩ ሄድኩ። ያልጠበቅኩት ሆኖ የአባቴን ሬሳ አገኘሁ" ሲል እያነባ ለቢቢሲ ተናግሯል።

ለሴቶች የተከለከለ ተራራን የወጣችው የመጀመሪያ ሴት

ይህ ታሪክ የማላፓ ብቻ አይደለም። የበርካታ የሕንድ አርሶ አደሮች እውነታ ነው።

ባለፉት ጥቂት ዓመታት የተከሰተው ድርቅና የሰብል ዋጋ ማሽቆልቆል ህይወታቸውን እንዳልነበረ አድርጎታል።

በእዳ ስለተዘፈቁና ምርታቸው ስለከሸፈባቸው ራሳቸውን የሚያጠፉ አርሶ አደሮች ቁጥር እየጨመረ ነው። እንደ አውሮፓውያኑ ከ1995 ጀምሮ በመላው ሕንድ ወደ 300,000 አርሶ አደሮች ራሳቸውን አጥፍተዋል።

ማላፓ በድርቅ ሳቢያ የለውዝ ምርታቸውን ካጡ አንዱ ነው።

የሕንድ 21 ሚሊዮን 'ያለተፈለጉ' ሴት ልጆች

"ስድስት ጋሻ መሬት ነበረን። ሰብላችን በአራት ቱቦ ውሀ እንዲያገኝ ለማድረግ ሞክረናል። ሆኖም ከሦስቱ ቱቦ አንዳችም ውሀ ጠብ አላለም።" ይላል ልጁ ማድሀቫያ።

ሟቹ አርሶ አደር የቲማቲምና የለውዝ እርሻ ነበረው። ቲማቲሙ የተሻለ ውጤታማ ይሆናል ብሎ ስላሰበ፤ የውሀ ቱቦውን ወደ ቲማቲሙ አዞረ። ውጤታማ መሆን ግን አልቻለም።

በሀገሪቱ የቲማቲም ዋጋ በእጅጉ አሽቆለቆለ። ማላፓ ቲማቲም ሸጦ እዳዎቹን ለመክፈል የሰነቀው ተስፋም ጨለመ።

የሕንድ የቲማቲም አምራቾች፤ በአንድ ሄክታር ቲማቲም ምርት ወደ 1,000 ሩፒ ገደማ ከስረዋል። ተቃውሟቸውን የገለጹት አዳባባይ ወጥተው ቲማቲም በመጣል ነበር።

የማላፓ ቤተሰቦች፤ ማላፓ ራሱን ሊያጠፋ እንደሚችል የሚጠቁም ምንም ምልክት አለማሳየቱን ይናገራሉ። "ከቤት ሲወጣ ካለበት እዳ ወለድ ጥቂቱን እንደሚከፍልና ማዳበሪያ እንደሚገዛም ነግሮን ነበር" ይላል ልጁ።

ማሪካ የማላፓ ባለቤት ናት። ሦስት ሴት ልጆቻቸው በትዳር ከቤት ወጥተዋል። ወንድ ልጃቸውም የተሻለ ሥራ ፍለጋ ቤቱን ጥሎ ሄዷል።

ባለቤቱ እንደምትለው "ለሰብሉ ሲል ደጋግሞ ብድር ይወስድ ነበር። ነገር ግን በድርቅ ምክንያት ሰብሉ ምርታማ ሳይሆን ቀረ"።

አጭር የምስል መግለጫ የማላፓ ባለቤት ማሪካ

ማሪካ፤ ለማላፓ ገንዘብ ካበደሩት ሰዎች መካከል አንዳንዶቹ ያስፈራሩት እንደነበረ ትናገራለች። ሀገሪቱ የተጋረጠባት ድርቅ ባለፉት 54 ዓመታት ከተከሰተው የከፋ ነው ተብሏል።

አንድ የሰብአዊ መብት ተሟጋች "የማላፓ ሞት የድርቁ ስር መስደድ ማሳያ ነው። " ሲል ተናግሯል።

መንግሥት በበኩሉ ለማላፓ ቤተሰብ 500,000 ሩፒ ካሳ እንደሚሰጥ አሳውቋል። የባንክ ብድሮቹም ይከፈሉለታል ተብሏል።

ልጁ ማድሀቫያ ግን አሁንም ተስፋ የጣለው በቲማቲም ምርቶቻቸው ላይ ነው። በቀጣይ የሚያፈሩት ቲማቲም ለሚመጣው ዓመት በተሻለ ዋጋ ይሸጣል የሚል ተስፋ ሰንቋል።