"ከጄ/ል አሳምነው ጋ በምንም ጉዳይ ያወራሁበት አጋጣሚ የለም" እስክንድር ነጋ

እስክንድር ነጋ Image copyright YONAS TADESSE

ቅዳሜ የደረሰውን ጥቃት ተከትሎ የአዲስ አበባ ባለአደራ ምክር ቤት አባላት እየታሰሩ እንደሆነ ጋዜጠኛና የመብት ታጋይ እስክንድር ነጋ ገልጿል። በዚህ ጉዳይ ላይ ቢቢሲ ከእስክንድር ጋር አጭር ቆይታ አድርጓል።

ቢቢሲ፦ የባልደራስ አባላት ታስረዋል የሚባል መረጃ አለ ምን ያህል እውነት ነው?

እስክንድር፦የባላደራው ምክር ቤት የህዝብ ግንኙነት ኃላፊ ከሆነው ስንታየሁ ቸኮል ጀምሮ በአራዳ ክፍለ ከተማ የአመራር አባል የሆኑት በኃይሉ ማሞና መርከቡ ኃይሉ የተለያዩ የአመራር አባላት ታስረዋል፤ እስሩም ቀጥሏል። እኔም ጉዳያቸውን ለማጣራት አዲስ አበባ ፖሊስ ኮሚሽን ሄጄ ሞክሬያለሁ፤ ነገር ግን በወቅታዊ ጉዳዮች ሳቢያ ታስረዋል ከሚል ውጭ ምንም ዓይነት መረጃ የሚሰጠኝ ሰው አላገኘሁም። የታሰሩት እዛው አዲስ አበባ ውስጥ ነው።

ቢቢሲ፦ እስክንድር ታስሯል የሚሉ መረጃዎች እየወጡ ነበር። የባህርዳር ቆይታህን ልትነግረን ትችላለህ?

የጄኔራሎቹና የአዴፓ አመራሮች ግድያ፡ እውነቱን ማን ይንገረን?

ከሃገር እንዳይወጣ ተከልክሎ የነበረው እስክንድር ነጋ እገዳው ተነሳለት

እስክንድር፦ እሑድ ዕለት ሕዝባዊ ስብሰባ ስለነበረን ወደ ባህርዳር የሄድኩት ቅዳሜ 11 ሰዓት አካባቢ ነበር፤ ስብሰባው እሑድ ነበር፤ የአምሳ ደቂቃ በረራ ናት፤ አየር ላይ በነበርኩበት ሰዓት ነው ይሄ የተከሰተው። አውሮፕላኑ ሲያርፍ ይሄ ነገር ተከስቶ ነው የጠበቀኝ፤ ወደ ውጭ መውጣትም ስላልቻልኩኝ "ለደህንነትህ" ብለው እዛው አየር ማረፊያ ነው ያደርኩት። እዚያው እንድናድር የተደረገው የአዲስ አበባ ባልደራስ ምክር ቤት አባላት ብቻ ነን።

እሑድ ግን ማን እንደከለከለ ባናውቅም ተመልሰን ወደ አዲስ አበባ በአየር እንዳንሄድ ተከልክለናል። በኋላ መመለስ ትችላለችሁ ተብለን ተጨማሪ ገንዘብ ከፍለን፤ ትኬት ገዝተናል፤ ፍተሻ አልፈን፣ ከገባን በኋላ አውሮፕላን ልንገባ ስንል አትሄዱም ተብለን ተጠርተን ተመልሰናል። እዛው ኤርፖርት የተወሰነ ጊዜ ከተቀመጥን በኋላ ወደ አዲስ አበባ መመለስ ባትችሉም ወደ ባሕር ዳር መግባት ትችላላችሁ ተባልን።

ከዚያ በኋላ ወደ ባህርዳር ከተማ ገብተን 30 ደቂቃም ሳንቆይ ተለያየን። እኔና ስንታየሁ በመኪና ወደ አዲስ አበባ ተመልሰናል። እኛ ከተመለስን በኋላ ግን ሌሎች ሦስት አባላት በአየር እንዲመለሱ ተፈቅዶላቸው በአየር ተመልሰዋል።

የአዲስ አበባ ጉዟችን አስቸጋሪ ነበር፤ 22 ሰዓት ሳያቋርጥ ያለምንም እረፍት መንገድ ላይ ቆይተን ነው አዲስ አበባ የገባነው። ዝርዝር ውስጥ አልገባም፤ ግን በጣም አስቸጋሪ በሆነ ሁኔታ ውስጥ ተጉዘን ነው ዛሬ ሌሊት 10፡30 ሰዓት የገባነው። ጠዋት ላይ ስንታየሁና ሌሎች አባላት ተይዘዋል።

"ቤቶች ከመፍረሳቸው በፊት ዜጎች መጠለያ የማግኘት መብታቸው መከበር አለበት" ባለአደራ ምክር ቤት

ቢቢሲ፦ ባህርዳር አየር ማረፊያ በነበራችሁበት ወቅት አዲስ አበባና ባህር ዳር እየሆነ ስላለው ነገር መረጃ ታገኙ ነበር?

እስክንድር፦ አዎ እዚያው ሎቢ ወስጥ ቴሌቪዥን ስለነበር።

ቢቢሲ፦ ጀኔራል አሳምነው ጋር አውርታችኋል ወይ? ንግግር ነበራችሁ ወይ? ምክንያቱም በአማራ ክልል አስተዳደር ውስጥ ለናንተ ሕዝባዊ ስብሰባ ፍቃድ ይሰጥ ወይስ አይሰጥ የሚል ልዩነት ነበር የሚል ነገር ስለሚወራ ነው።

እስክንድር፦ አላወራንም። በፍጹም፤ እኔ እኮ ተጋባዥ ነኝ። የጋበዘኝ ባሕርዳር ውስጥ ያለ ኮሚቴ አለ። ለዚያ ነው የሄድኩት፤ አዘጋጅ ስላልሆንኩ ስለስብሰባው የማስፈቅደው ነገር የለም። እኔንም ከእሳቸው ጋር ሊያገናኘን የሚችል ቅንጣት ነገር የለም። ከጄኔራሉ ጋ ተገናኝቼ በምንም ጉዳይ ያወራሁበት አጋጣሚ የለም። እዚያ ላይ የተፈጠረው ነገር ፓርቲው ላይ የተፈጠረ ነው። ይህን አሳቦ እኛን ማሳደድ ግን ተገቢም አይደለም፤ ፍትሃዊም አይደለም።

ቢቢሲ፦ መንግስት አጋጣሚውን በመጠቀም እያጠቃን ነው ብለህ ታምናለህ?

እስክንድር፦በግልጽ እየታየ ነው እኮ። እኛን ከዚህ ጉዳይ ጋር የምንገናኝበት ቅንጣት ታክል ግንኙነት የለም። ቅንጣት ታክል ነው የምልህ። አጠቃላይ ፓርቲው ጋር የተፈጠረ ነገር ነው። እኛ እንኳን አሁን እና ድሮም በጨለማው ዘመን በሰላማዊ መንገድ ነው ስንታገል የነበረው። አሁንም ተልዕኮ የሰጠን ሕዝብ በዚሁ እንድንቀጥል ነው የሚፈቅድልን። ለተፈጠረው ችግር የፓርቲው ሰዎች ማብራሪያ እየሰጡ ነው። እነሱን ማዳመጥ ነው። የቴሌቪዥን ጣቢያዎችም ጉዳዩን በዝርዘር ለህዝብ አቅርበዋል፤ እነሱን መከታተል ብቻ ተጨማሪ መረጃ ሳያስፈልግ ጉዳዩን መረዳት ይቻላል። እኛን ቅንጣት ታህል ከዚህ ጉዳይ ጋ የሚያገናኘን ነገር የለም። ይህ ግልጽ በሆነበት ሁኔታ እኛን በዚህ አሳቦ ለእስር መዳረግ ኢፍትሃዊ ነው።

ቢቢሲ፦እስክንድር በግልህ አደጋ ይደርስብኛል ብለህ ትሰጋለህ? በመንግስት በኩልስ ጥበቃ ይደረግልሃል?

እስክንድር፦በመንግስት በኩል ጥበቃ አይደረግልኝም፤ አልፈልግምም። ጥበቃ የሚያስፈልገኝ ሰውም አይደለሁም። እኔ ሙሉ ለሙሉ ጠባቂዬ እግዚአብሔር ነው ብዬ ስለማምን። በተለያየ አጋጣሚ ከፍተኛ አደጋ አለ። ሌላው ቀርቶ መንገድ ስንመጣ እጅግ አስጊ ነገሮችን አይተናል። ስጋቶች የሉብኝም፤ ምንም አይሰማኝም ብዬ ብናገር ትክክል አይሆንም፤ በማህበራዊ ሚዲያዎች በቪዲዮ ጭምር የሚሆነውን ታያለህ፤ አሁን ደግሞ የእስር እርምጃዎች እየተወሰዱ ነው። ከዚህ ከዚህ አኳያ ምንም አይሰማኝም ልልህ አልችልም፤ ሰው ነኝ፤ የልጅ አባት ነኝ፤ ሚስት አለኝ፤ ቤተሰብ አለኝ፤ ቢያንስ ለነርሱ ለቤተሰቤ ብዬ ለህይዎቴ ዋጋ እሰጣለሁ፤ ከዚያ ባለፈ ግን ጥበቃ አያስፈልገኝም።

ቢቢሲ፦ምናልባት እንቅስቃሴህን መገደብ እንዳለብህ ይሰማሃል፤ አሁን ካለው ነባራዊ ሁኔታ አንጻር?

እስክንድር፦ ምን አጠፋንና ነው ረገብ ማለት የሚያስፈልገን? ወደ ኃይል እርምጃ አልገባን? ወይም ሰላም የሚያደፈርስ ነገር አልሰራን? አቋም መወሰድ ባለባቸው ጉዳዮች ላይ ግን አቋም እንወስዳለን። ከእውነት ጋር እንሞግታለን። ከዚህ በፊትም እኮ ከእውነት ጋር ወግነን ነው ዋጋ የከፈልነው። አሁንም ከእውነት ጋር መወገን ዋጋ የሚያስከፍል ከሆነ ዋጋ እንከፍላለን። ቀይ መስመር አለ፤ እሱን አናልፍም። ሰላማዊ ነን። እንኳን የኃይል ርምጃ ልንወስድ ጠጠር እንኳ አንወረውርም። ይሄንን እንዴት ማለዘብ እንደሚቻል እኔ አይገባኝም።

ተያያዥ ርዕሶች