የሌሶቶ ቀዳማዊት እመቤት በፖሊስ እየተፈለጉ ነው

ቀዳማዊት እመቤት ማይሲያህ ታባኔ

የፎቶው ባለመብት, CHINA TV

የሌሶቶ ፖሊስ ከሀገሪቱ ጠቅላይ ሚኒስትር የቀድሞ ባለቤት ግድያ ጋር በተያያዘ የአሁኗን ቀዳማዊ እመቤት ለጥያቄ እንደሚፈልጋቸው ቢገልጽም ቀዳማዊ እመቤት ማይሲያህ ታባኔ ግን የገቡበት አልታወቀም ተብሏል።

በአውሮፓውያኑ 2017 የተገደሉት የቀድሞዋ ቀዳማዊት እመቤት ጉዳይን ለማጣራትና የአሁኗ ቀዳማዊት እመቤት የት እንደሚገኙ ለማወቅ የሌሴቶ ፖሊስ የዓለማቀፍ ሕግ አስከባሪ ተቋማትን እርዳታም ጠይቋል።

ፖሊስ እንዳለው ቀዳማዊት እመቤት ማይሲያህ ታባኔ ክስ ባይቀርብባቸውም ለጥያቄ ይፈለጋሉ። የቀድሞዋ ቀዳማዊት እመቤት ሊፖሌሎ ታባኔ እንቆቅልሽ በሆነ መልኩ መሞት ከተሰማ በኋላ የሀገሬው ዜጎች ሆን ተብሎ የተሸፋፈነ ጉዳይ እንደሆነ ሲገልጹ ቆይተዋል።

ሟች ቀዳማዊት እመቤት ከባለቤታቸው ጠቅላይ ሚኒስትር ታባኔ ጋር በወቅቱ ተለያይተው የነበረ ቢሆንም ፍቺ ግን አልፈጸሙም። ጠቅላይ ሚኒስትሩም ከአሁኗ ቀዳማዊት እመቤት በወቅቱ ግን እጮኛቸው ከነበሩት ማይሲያህ ታባኔ ጋር ግንኙነት መስርተው ነበር።

ሁለቱም ሴቶች እኔ ነኝ ቀዳማዊት እመቤት በሚል ፍርድ ቤት እስከ መካሰስ የደረሱ ሲሆን ፍርድ ቤቱም ጉዳዩን ካጣራ በኋላ ጠቅላይ ሚኒስትሩ ከቀድሞ ባለቤታቸው ጋር ይፋዊ ፍቺ እስካልፈጸሙ ድረስ ሊፖሌሎ ታባኔ ቀዳማዊት እመቤት ሆነው እንዲቀጥሉ ብይን አስተላልፏል።

በአውሮፓውያኑ 2017 ቀዳማዊት እመቤት ሊፖሌሎ ታባኔ ሞታቸው ከተሰማ ከሶስት ወራት በኋላም የአሁኗ ቀዳማዊት እመቤት ማይሲያህ ታባኔ ከጠቅላይ ሚኒስትሩ ጋር ትዳር መስርተዋል።

ጠቅላይ ሚኒስትሩ የሚመሩትና ገዢው ፓርቲ ' ኦል ቦሳቶ ኮንቬንሽን' በበኩሉ ፖሊስ ከጀመረው ምርመራ ጋር በተያያዘ ጠቅላይ ሚኒስትሩ ከስልጣናቸው እንዲወርዱ ፍላጎት እንዳለው እየተዘገበ ነው።

ፖሊስ ጠቅላይ ሚኒስትሩ የቀድሞ ባለቤታቸው በተገደለችበት አካባቢ ከነበረ ተንቀሳቃሽ ስልክ ጋር የተደዋወሉበት ማስረጃ እንዳለው የገለጸ ሲሆን እሳቸውንም ቢሆን ለጥያቄ እንደሚፈልጋቸው አስታውቋል።

በጉዳዩ ላይ ጠቅላይ ሚኒስትሩም ሆነ ቀዳማዊት እመቤቷ ያሉት ነገር የለም።