ጋዜጠኛ ተመስገን ደሳለኝ ተፈታ

ተመስገን ደሳለኝ

የፎቶው ባለመብት, Facebook/Tariku Desalegn

በትናንትናው ዕለት (ረቡዕ )በቁጥጥር ስር ውሎ የነበረው የፍትህ መፅሄት ዋና አዘጋጅና ባለቤት ጋዜጠኛ ተመስገን ደሳለኝ በዛሬው እለት መፈታቱን ቢቢሲ ከወንድሙ ታሪኩ ደሳለኝ መረዳት ችሏል።

በዛሬው ዕለት፣ ጥቅምት 5፣ 2013 ዓ.ም ጥዋት በእስር ላይ የነበረበት አዲስ አበባ ፖሊስ ኮሚሽን ተመስገንን ለመጠየቅም ሲያመራ መግባት አይቻልም ተብሎ እንደነበረና ፍርድ ቤት ሊያቀርቡት ይችላሉ በሚል እሳቤም እዛው እየጠበቁ የነበረ ቢሆንም ተፈትቶ ማየቱን አስረድቷል።

ከሱ በተጨማሪ የፍትህ መፅሄት አዘጋጁ ምስጋናው ዝናቤም መፈታቱን ታሪኩ አክሎ ገልጿል።

ለምን በቁጥጥር ስር እንደዋለም ይሁን የተፈታተበትንም ምክንያት በተመለከተ ምንም አይነት መረጃ እስካሁን እንዳላገኙም ታሪኩ ያስረዳል።

በትናንትናው ዕለትም ታሪኩ ለጥቂት ደቂቃዎች እንዳገኘውና ለምን እንደታሰረ በጠየቀው ወቅት "የሐሰት ወሬ በማሰራጨት ትፈለጋለህ ከሚል ውጪ የነገሩኝ ነገር የለም።"

"እኔም ጠበቃዬ ሳይመጣ ቃል አልሰጥም ብዬ ቁጭ ብያለሁ። ይልቅ ብርድ ልብስ እንዲገባልኝ ሞክር" ማለቱንም ታሪኩ በፌስቡክ ገፁ አስፍሯል።

ረቡዕ ዘጠኝ ሰዓት አካባቢ አዲስ አበባ ስምንት የሚሆኑ ፖሊሶች አቧሬ የሚገኘው የፍትህ ቢሮ መጥተው እንደነበርና በወቅቱም ቢሮ ያልነበረው ተመስገን የመፅሄቱ አዘጋጆች ደውለው ሁኔታውን እንዳስረዱት ከታሪኩ የተገኘው መረጃ ጠቁሟል።

ተመስገን በስልክ ከፖሊሶቹ ጋር የተነጋገረ ሲሆን መጥሪያ ወይም የክስ ወረቀት ይዘው ከሆነ ቢሮው እንዲተዉለት ነግሯቸው እንደነበርም ተገልጿል።

ፖሊሶቹ በበኩላቸው እሱን ማናገር እንደሚፈልጉና ያለበትን እንዲነግራቸው በጠየቁት መሰረት እራሱ ፖሊሶቹን በአካል ለማግኘት ወደ ቢሮው መመለሱን ታሪኩ ጠቅሷል።

ፖሊሶችም መኪናቸው ውስጥ አስገብተው ወደ አዲስ አበባ ፖሊስ ኮሚሽን በተለምዶ ሦስተኛ ፖሊስ ጣቢያ መወሰዱንም አክሎ ገልጿል።

የፍትህ መፅሄት አዘጋጅ ምስጋናው ዝናቤም ከተመስገን ጋር እንደተወሰደ ታሪኩ ለቢቢሲ ተናግሯል።

ከሰሞኑ ተመስገን እታሰራለሁ የሚል ፍራቻ ነበረው ወይ ተብሎ ከቢቢሲ ለቀረበለት ጥያቄ ምንም አይነት ስጋት እንዳልነበረው ወንድሙ አስረድቷል።

የአዲስ አበባ ፖሊስ ስለጋዜጠኛው መታሰር ተጠይቆ ጉዳዩ የፌደራል ፖሊስን እንደሚመለከተው በመግለጽ ምላሽ ከመስጠት ተቆጥቧል።

ቢቢሲ ጉዳዩን ለማጣራት ወደ ፌደራል ፖሊስ ቢደውልም በተመሳሳይ መልኩ ምላሽ ማግኘት አልቻለም።

በሳምንታዊው ፍትህ መጽሔት ላይ በቅርቡ የተሾሙትን የአዲስ አበባ ከተማ ምክትል ከንቲባ አዳናች አቤቤን በሚመለከት ከወጣው ጽሁፍ ጋር በተያያዘ መጽሔቱን በተመለከተ፤ ለኢትዮጵያ ብሮድካስት ባለስልጣን የተጻፈ ደብዳቤ በማኅበራዊ ሚዲያዎች ላይ ሲዘዋወር በመቆቱ እስሩ ከዚሁ ጉዳይ ጋር ሊያያዝ እንደሚችል ተገምቷል።

ከዚህ ቀደም ለሦስት ዓመታት በማረሚያ ቤት የቆየው ጋዜጠኛ ተመስገን ደሳለኝ የእስር ጊዜውን አጠናቅቆ መውጣቱ ይታወሳል።

ጋዜጠኛ ተመስገን በወቅቱ ለእስር የተዳረገው የፍትህ ጋዜጣ ላይ በጻፋቸውና ባሳተማቸው ጽሁፎች ምክንያት ነበር።

በጋዜጠኛው ላይ የቀረቡት ክሶችም በሐሰት የመወንጀል፣ ስም የማጥፋት፣ የሐሰት ወሬዎች የመዘገብ እና ማሰራጨት፣ የሕዝብን አስተሳሰብ ማናወጥ እንደዚሁም ሕዝብ እንዲያምጽ መገፋፋት የሚሉ ነበሩ።

ተመስገን ጉዳዩን በፍርድ ቤት ሲከታተል ቆይቶ በአንደኛው ክስ ብቻ ጥፋተኛ ሆኖ በመገኘቱ ለሦስት ዓመት እስራት ተፈርዶበት እንደነበር ይታወሳል