በዓለም አቀፍ የኢንተርኔት መቋረጥ ብዙ ጎብኚ ያላቸው ድረ-ገጾች እክል ገጠማቸው

ኮምፒዩተር

የፎቶው ባለመብት, Getty Images

በዓለም አቀፍ የኢንተርኔት የአገልግሎት መቋረጥ ምክንያት ብዙ ጎብኚ ያላቸው ድረ-ገጾች ሐሙስ ዕለት ከሥራ ውጭ ሆነው ነበር።

አንዳንድ ድረ ገጾች ለመጎብኘት የሞከሩ ጎብኚዎች የዲ ኤን ኤስ ችግር መኖሩን መልዕክት ደርሷቸዋል።

ጉዳት ከደረሰባቸው ድረ-ገጾች መካከል ኤርቢኤንቢ፣ ዩፒኤስ፣ ኤችኤስቢሲ ባንክ፣ ብሪቲሽ ኤርዌይስ እና የፕሌይስቴሽን ድረ-ገጾች ይገኙባቸዋል፡፡

ከታዋቂዎቹ የዲ ኤን ኤስ አቅራቢዎች አንዱ የሆነው አካማይ ቴክኖሎጂስ በዲ ኤን ኤስ አገልግሎቱ ላይ "አንድ ችግር መከሰቱን" ተከስቷል ካለ በኋላ ችግሩ መቀረፉን አስታውቋል።

የበይነመረብ መቋረጥን የሚቆጣጠረው ዳውንዴክተር በሺህዎች የሚቆጠሩ ችግሮችን በተመለከተ ከተጠቃሚዎቹ ሪፖርት እንደደረሰው አስታውቋል።

የዲ ኤን ኤስ አግልገሎት አቅራቢዎች አንዱ የሆነው አካማይ ቴክኖሎጂስ ቀደም ሲል ጉዳዩ "ከፊል መቋረጥ" እንደነበረ አስታውቆ ነበር።

በአውሮፓ እና በአሜሪካ አንዳንድ ድረ-ገጾች እንደገና መሥራት ጀምረዋል። በእስያ ሃገራት ያሉት ግን ችግሮች መኖራቸውን ሪፖርት ማድረጋቸውን ቀጥለዋል።

ዲ ኤን ኤስ የምንጠቀምባቸውን በሰው-ተነባቢ የሆኑ እንደ bbc.com ያሉ የድረ-ገጽ አድራሻዎችን ወደ ኮምፒውተር ሰርቨር አመላካች አድራሻዎች ይለውጣል።

በሂደቱ ላይ ችገር ሲገጥም አንድ ሰው የሚፈልገውን ይዘት ማግኘት አይችልም ማለት ነው።

ዳውንዲቴክተር ችገር እንደገጠማቸው ሪፖርት ካደረጋቸው አገልግሎቶች መካከል

  • ባንኮች- ባርክሌይስ፣ ሎይድስ፣ ቲ ኤስ ቢ እና ሃሊፋክስ
  • የጌም አገልግሎት ሰጪዎች- ስቲም፣ ኮል ኦፍ ዲዩቲ እና ኢኤ
  • መገናኛ ብዙሃን- ቻናል 4 እና አይቲቪ ይገኙባቸዋል

እንደዚህ ያለ ሰፊ የአገልግሎት መቋረጥ ሲያጋጥም በሁለት ወራቶች ውስጥ ይህ ለሁለተኛ ጊዜ ነው።

በሰኔ ወር የክላውድ ኮምፒውቲንግ አገልግሎት አቅራቢው ፋስትሊ የአገልግሎት መቀወረጥ ገጥሞት ነበር። ይህን ተከትሎም በርካታ ዓለም አቀፍ መገናኛ ብዙሃንን እና የመንግሥት ጨምሮ ብዙ ቁጥር ያላቸውን ድረ-ገጾች ሥራ እንዲያቋርጡ አስገድዶ ነበር።