በሞት የተለዩት የአርቲስት ለማ ጉያ ድንቅ የቆዳ ላይ ሥዕሎች

አርቲስት ለማ ጉያ
የምስሉ መግለጫ,

አርቲስት ለማ ጉያ

ክብር ዶክተር አርቲስት ለማ ጉያ በ92 ዓመታቸው ከዚህ ዓለም በሞት ተለዩ።

የሰዓለዊ የቤተሰብ አባላት ለቢቢሲ እንደተናገሩት፤ አርቲስት ለማ ባጋጠማቸው ሕመም ምክንያት በአገር ውስጥ እና በውጪ የሕክምና ክትትል ሲያደርጉ ነበር።

ታዋቂው ሰዓሊ በህክምና ሲረዱ ቆይተው በተወለዱ በ92 ዓመታቸው ከዚህ ዓለም በሞት ተለይተዋል።

አርቲስት ለማ ጉያ ከሶስት ዓመታት በፊት በቢሾፍቱ ከተማ በሚገኘው 'ለማ ጉያ የሥነ-ጥበብ ማዕከል' ውስጥ የተመረጡ ሥራዎቻቸውን እንደሚከተለው አስጎብኝተውን ነበር።

ለማ ጉያ ይህን ሥዕል ከሠሩት 42 ዓመታት ተቆጥረዋል። በዚህ ሥራቸው አፍሪካ እና ችግሮቿን ያሳዩበት እንሆነ ይናገራሉ።

የአፍሪካ መሪዎችን በድመቶቹ መስለው የሀገራቸውን ሃብት በሙስና ሲመዘብሩ፣ በአልጋው ሥር የሚታዩት የአህጉሪቷ ጠላት አይጦች ደግሞ የአፍሪካን ሃብት ሲቀራመቱ ይታያሉ፤ እየፈሰሰ ያለው ወተትም ያለጥቅም ለዘመናት የሚፈሱት የአፍሪካ ወንዞች ምሳሌ ነው።

ይህ የሥዕል ስራ 'እናት ኦሮምያ' የሚል ስያሜ እንዳለው ይናገራሉ።

ስዕሉ በክልሉ ያለውን የሃይማኖቶች መቻቻል፣ ኢሬቻ፣ የተፈጥሮ ሃብትና የሕዝቡን አኗኗር ያሳያል።

ከፍ ብላ ከፊት የምትታየው ሴትም ያሰረችው ነጭ ሻሽ ነፃነትን የሚያሳይ ሲሆን መቀነቷ ላይ ያለው ቀይ ጥለት ደግሞ ሕዝቡ ያሳለፈው ውጣ ውረድ ተምሳሌት ነው ይላሉ።

ለማ ጉያ በዚህኛው ሥራቸው ኦዳ የኦሮሞ ህዝቦች መለያ መሆኑን እና ያለውን ክብር ያሳያሉ።

ከዚህም በተጨማሪ ከኢሬቻ ከክብረ በዓል ጋር ተያያዥነት ያላቸውን ሌሎች ባህላዊ ተግባራትን ያሳያል።

ከፊት ለከፊት ጎልተው የሚታዩት አዛውንት ሴት 'አደ ነፍሶ' የሚባሉ የቢሾፍቱ ከተማ ነዋሪ የነበሩና በ120 ዓመታቸው ያረፉ ባልቴት ናቸው።

አርቲስት ለማ ጉያ ላለፉት 68 ዓመታት ከ10 ሺህ በላይ ሥዕሎችን በፍየል ቆዳ ላይ መሳላቸውን ይናገራሉ።

ይህኛው ስዕል ደግሞ አርቲስቱ የተወለዱበትና ያደጉበትን የገጠር አካባቢ የሚያሳይ መሆኑን ይናገራሉ።

ከዚህም በተጨማሪ የግብርና ሥራ የገጠሩና የከተማው ማኅበረሰብ የኑሮ መሰረት መሆኑንም ያሳያል ይላሉ።

ይህን የቢሾፍቱን ሀይቅ ስዕል የሳሉት የአየር ኃይል አባል በነበሩበት ወቅት የሃይቁን ዙሪያ ከአየር ላይ ሙሉ ለሙሉ ለመመልከት በመቻላቸው መሆኑን አርቲስት ለማ ጉያ ይናግራሉ።

በሥዕሉ ላይ የሚታየውን በሃይቁ ዙሪያ ያለውን መልክዓ-ምድራዊ አቀማመጥን በዘመናዊ የፎቶ ካሜራ ሙሉውን ለማንሳት በጣም አስቸጋሪ እንደሚሆን ይናገራሉ።