አዲሱ የዚምባብዌ ፕሬዝዳንት ምናንጋግዋ ቃለ-መሃላ ፈጸሙ

የእርሶ መሳሪያ ሚዲያ ፕሌይ ባክን ማጫወት ኣልተቻለም።
ምናንጋግዋ መሠሪና ጨካኝ ናቸው በሚል 'አዞው' የሚል ቅጽል ሰም ወጥቶላቸዋል።

በዚምባብዌ መዲና ሃራሬ ስታዲያም ኤመርሰን ምናንጋግዋ የሀገሪቱ ፕሬዝዳንት በመሆን ቃለ -መሃላ ፈጽመዋል።

ከ37 ዓመታት የስልጣን ዘመን በኋላ በተደረገባቸው ጫና ሥልጣን የለቀቁትን ሙጋቤን በመተካት ኤመርሰን ምናንጋግዋ አዲሱ የዚምባብዌ መሪ ሆነዋል።

ባለፈው ረቡዕ ተሸሽገው ከቆዩበት ደቡብ አፍሪካ የተመለሱት የቀድሞ ምክትል ፕሬዝዳንት ምንንጋግዋ ዛሬ በሃራሬ ስታዲያም ቃለ-መሃላ ሲፈጽሙ በርካቶች በስነ-ስርዓቱ ላይ ታድመዋል።

የምናንጋግዋ ከምክትል ፕሬዚደንትነት መባረር ገዢው ፓርቲና የሃገሪቱ ጦር ኃይል ተባብረው የሙጋቤን የ37 ዓመታት የሥልጣን ዕድሜ እንዲቋጩት ምክንያት ሆኗል።

ሙጋቤ በገዛ ፈቃዳቸው ሥልጣን መልቀቃቸውን በሃገሪቱ ፓርላማ አፈ-ጉባኤ በኩል ካሳወቁ በኋላ ብዙዎች ደስታቸውን ሲገልፁ ነበር።

በቃለ-መሃለው ስነ-ስርዓት ላይ ምናንጋግዋ በባለቤታቸው ኦግዚሊያ ታጅበው ነበር የተገኙት። የተለያዩ አፍሪካ ሀገራት መሪዎች እና ተወካዮች የዝግጅቱ ተካፋይ ሆነዋል።

ካለፈው እሁድ ጀምሮ የቀድሞ ፕሬዝዳንት ሮበርት ሙጋቤም ሆኑ ባለቤታቸው ግሬስ ሙጋቤ በአደባባይ አልታዩም፤ ያሉበትም አይታወቅም።

የዚምባብዌ ባለስልጣናት ግን ሙጋቤ በአደባባይ ያልታዩት እረፍት ስለሚያስፈልጋቸው ነው ብለዋል።

ትናንት የወጡ ሪፖርቶች ሙጋቤ ያለመከሰስ መብት እንደተሰጣቸው ጠቁመዋል።

ኤመርሰን ምናንጋግዋ ለደጋፊዎቻቸው ባደረጉት ንግግር ሙስናን እና ሥራ አጥነትን ለመቅረፍ እንደሚሰሩ ተናግረዋል።

''ኢኮኖሚያችንን ማሳደግ እንፈልጋለን፣ ሰለም እንፈልጋለን፣ ከምንም በላይ ደግሞ ሥራ'' ሲሉ ለደጋፊዎቻቸው ተናግዋል።

ተያያዥ ርዕሶች