ሰሜን ኮሪያ የጦር ትዕይንት ልታካሂድ ነው

Rows and rows of North Korean soldiers, stretching as far as the eye can see, march in full tactical gear Image copyright KCNA / STR
አጭር የምስል መግለጫ የሰሜን ኮሪያ የጦር ትዕይንት ብዙዎችን ትኩረት ይስባል

በደቡብ ኮሪያ ከሚካሄደው የክረምት ኦሎምፒክ ቀደም ብሎ 70ኛውን የኮሪያ የጦር ሃይል ምስረታን በማስመልከት ሰሜን ኮሪያ የጦር ትዕይንት ልታካሂድ ነው።

የጦሩን ምስረታ በማስመልከት የሚካሄደው ዓመታዊው የጦር ትዕይንት በሚያዝያ የሚካሄድ ቢሆንም ዘንድሮ በየካቲት ወር እንዲካሄድ ተወስኗል።

ከትዕይንቱ ቀደም ብሎ የኮሪያ ማዕከላዊ ቴሌቭዥን ስለ ቀድሞ መሪዎች፤ ስለ ሃገሪቱ መልክአ ምድር እና ፕሮፖጋንዳ ፊልሞችን በማሳየት ላይ ይገኛል።

ትዕይንቱ የሚጀምርበት ሰዓት ግን አልታወቀም።

ከክረምት ኦሎምፒክ ቀደም ብሎ ትዕይንቱ ለመካሄድ በመታቀዱ የቀረበባትን ትችት በጉዳዩ ላይ ማንም መብት ለውም በሚል ሰሜን ኮሪያ አጣጥላዋለች።

Image copyright KCNA / STR
አጭር የምስል መግለጫ በቀድሞው መሪ ኪም ኢል-ሱንግ 105ኛ የልደት በዓል ላይ የነበረው ትዕይንት

"ማንኛውም በዓለም ላይ የሚገኝ ሃገር ጦሩ የተመሰረተበትን በዓል በትኩረት እና በታላቅ ዝግጅት ማክበሩ የተለመደ ጉዳይ ነው" ሲል የገዢው የሠራተኞች ፓርቲ ጋዜጣ የሆነው ሮዶንግ ሲንሙን አስነብቧል።

አሜሪካ በበኩሏ ትኩረት ሁሉ በኦሎምፒክ ጨዋታዎች ላይ በሆነበት ወቅት የጦር ትዕይንቱ መካሄድ አልነበረበትም ብላለች።

እንደሰሜን ኮሪያ ብሄራዊ የዜና ወኪል ኬ ሲ ኤን ኤ ከሆነ የሃገሪቱ ልዑካን በኦሎምፒኩ ላይ ከአሜሪካ ተወካዮች ጋር የመነጋገር ዕድል የላቸውም ብሏል።

የደቡብ ኮሪያ ባለስልጣናት ባለፈው ወር 13 ሺህ የሚደርሱ ወታደሮች እና 200 መሣሪያዎችን በፒዮንግያንግ አውሮፕላን ማረፊያ አካባቢ ማየታቸውን የገለጹ ሲሆን ይህም የጦር ትዕንቱ ልምምድ ነው ተብሏል።

እንደባለሙያዎች ገለጻ ከሆነ ሰሜን ኮሪያ በትዕይንቱ ላይ ረዥም ርቀት የሚወነጨፉ ሚሳኤሎቿን ታሳያለች።

በጀምስ ማርቲን ማዕከል የሰሜን ኮሪያ አጥኚ የሆኑት ዴቪድ ሽመርለር "በትዕይንቱ ላይ ሚሳኤል ተሸካሚ መኪኖች እና አዲስ ሚሳኤል እንደሚሸከሙ የሚያሳይ ዝግጅት እንጠብቃለን" ብለዋል።

"ሆኖም አዲስ ነገር አሳዩን ማለት ይሰራሉ ማለት አይደለም። ሰሜን ኮሪያ ከዚህ ቀደም ወደ ምርት ያልገቡ ሚሳኤሎችን በጦር ትዕንቶቿ ላይ አቅርባለች" ሲሉ ገልጸዋል።