በባቲ ከተማ ብሔርን መሰረት ያደረገ ጥቃት እንደደረሰባቸው ነዋሪዎች ገለፁ

የኢትዮጵያ ካርታ

በአማራ ብሄራዊ ክልላዊ መንግስት በባቲ፣ ከሚሴና ሮቢት ከተሞች ብሔርን መሰረት ያደረገ ጥቃት እንደተፈፀመባቸው የትግራይ ተወላጆች ለቢቢሲ ተናግረዋል።

ነዋሪዎች ብሄርን መሰረት ያደረገ ነው ባሉት ጥቃት የሰዎች ህይወት መጥፋቱን እና ለአካል ጉዳት መዳረጋቸውን አስታውቀዋል።

ከጠቅላይ ሚኒስትር አብይ አህመድ ድጋፍ ሰልፍ ጋር ተያይዞ በደረሰው በዚህ ጥቃት ቤቶች መቃጠላቸውንንና ዝርፊያ መፈፀሙንም ጨምረው ገልፀዋል።

ጉዳት የደረሰባቸው ግለሰቦች በደሴና በመቀሌ ሆስፒታል የህክምና እርዳታ እየተደረገላቸው ሲሆን፤ ሌሎች ወደ መቀሌ ከተማ እንደደሄዱ ቢቢሲ ያናገራቸው ነዋሪዎች ገልፀዋል።

የአማራ ክልል መንግስት የህዝብ ግንኙነት ኃላፊ አቶ ንጉሱ ጥላሁን በከተማዋ ውስጥ ግጭት መፈጠሩን ካረጋጋጡ በኋላ ፣የከተማዋን መረጋጋት ለመመለስ ብሎም የግጭቱን መንስኤ እና የጉዳት መጠን ለማጥናት በክልሉ የፀጥታ ቢሮ ሃላፊ የሚመራ ቡድን ወደ ከተማዋ ማምራቱን ተናግረዋል።

በተጨማሪም በተጠቀሱት አካባቢዎች የደረሱትን ጥቃቶች ኮንነዋል።

ስሙ እንዳይጠቀስ የፈለገ ግለሰብ ለቢቢሲ ጥቃቱ ከጠቅላይ ሚኒስትሩ የድጋፍ ሰልፍ ጋር ተያይዞ በትግራይ ተወላጆች ላይ ያነጣጠረ እንደሆነ ተናግሯል።

የአካባቢው ማህበረሰብ ድጋፍ እያደረገላቸው መሆኑን ገልፆ የጥቃቱን አድራሾች ማንነት እንደማያውቅ ጭምር ተናግሯል።

ተያያዥ ርዕሶች