የኢንጅነር ስመኘው ሥርዓተ ቀብር ተፈጸመ

አጭር የምስል መግለጫ የኢንጅነር ስመኘው ስርዓተ ቀብር

የኢንጅነር ስመኘው በቀለ ስርዓተ ቀብር ትናንት ሐምሌ 22 ቀን 2010 ዓ. ም. በቅድስት ስላሴ ካቴድራል ቤተክርስትያን ተፈጸመ።

የታላቁ ሕዳሴ ግድብ የፕሮጀክት ኃላፊ የነበሩት ኢንጅነር ስመኘው ስርዓተ ቀብር ከመፈጸሙ አስቀድሞ በርካታ ሰዎች የኢንጅነሩ ህይወት አልፎ በተገኘበት መስቀል አደባባይ ተገኝተው መራር ሀዘናቸውን ገልጸዋል።

ትናንት ረፋድ የኢንጅነሩ አስክሬን በፖሊስ ማርሽ ቡድን ታጅቦ መስቀል አደባባይ ሲደርስ የተሰባሰበው ሰው ሀዘኑን መቆጣጠር አልቻለም ነበር።

በመስቀል አደባባይ የተገኙ ሰዎች ጥቁር በጥቁር ለብሰው፣ የኢትዮጵያን ሰንደቅ አላማ ይዘው መፈክር እያሰሙ ያለቅሱ ነበር። መንግስት ሳይውል ሳያድር ለኢንጅነሩ ሞት ተጠያቂ የሆነውን አካል ያሳውቅ የሚል መልእክት ይስተጋባም ነበር።

በእድሜ የገፉ እናቶች ነጠላቸውን አዘቅዝቀው አምርረው ያለቅሱም ነበር።

"የእሱ አባት ኩራዝ የላቸውም፤ እሱ ግን ኢትዮጵያን ሊያበራ ነው የሞተው"

የኢንጂነር ስመኘው በቀለ ሞትን ተከትሎ በጎንደር ረብሻ ተከሰተ

ስለኢንጂነር ስመኘው አሟሟት እስካሁን ምን እናውቃለን?

"ጀግና አይሞትም"፣ "ኢንጅነር ህያው ነው"፣ "ፍትህ ለኢንጅነር"፣ " የሚሉ መፈክሮችም ይነበቡ፣ ይደመጡም ነበር። በርካታ ወጣቶችም "የኢትዮጵያ አምላክ ይፍረድ" የሚል ካናቴራ ለብሰው "ፍትሕ ለኢንጅነር" ሲሉ ተደምጠዋል።

የብዙሀኑ ጥያቄ መንግስት ለኢንጅነሩ ህልፈት ተጠያቂ የሆኑትን መርምሮ ለህዝቡ ያሳውቅ የሚል ነበር። ተመሳሳይ ጥያቄ የተስተጋባው ከመስቀል አደባባይ ብቻ ሳይሆን ከኢንጅነሩ የትውልድ ቀዬ ጭምርም ነበር።

አጭር የምስል መግለጫ የኢንጅነር ስመኘው ቤተሰቦች

በመስቀል አደባባይ ሀዘናቸውን ይገልጹ ከነበሩት አንዷ "የነበረበትን የአባይን በረሀ የሚያውቅ ያውቀዋል። ልጆቹን እንኳን አስተምሮ ሳይጨርስ ያውም በመስቀል አደባባይ በቀን መገደሉ አሳዝኖኛል" ስትል ለቢቢሲ ተናግራለች።

የታላቁ ሕዳሴ ግድብ አስተባባሪ ኮሚቴ ዳይሬክተር ወ/ሮ ሮማን ገብረስላሴ "የኢንጅነር ዋናው መገለጫ ህዝባዊነቱና ለሀገር እድገት ቁርጠኛ ሆኖ የሚሰራ የልማት ጀግና መሆኑ ነው። የሱ ካሳ የጀመረውን ነገር ዳር ማድረስ ነው" ብለዋል።

የሀገር መከላከያ ሚንስቴር ሚንስትር አቶ ሞቱማ መቃሳ በበኩላቸው ''ከኢንጅነር ስመኘው ጋር አብረን ሰርተናል። ስመኘው የፕሮጄክቱን ፍጻሜ ለማየት ከቤተሰቡ እና ከኑሮ አስቀድሞ ህይወቱን ሰጥቶ ሲሰራ የነበረ ሰው ነው። አሁን ኢንጂነር አርፏል። ትልቁ ነገር እሱ የጀመረውን በእልህ መጨረስ ነው'' ብለዋል።

አጭር የምስል መግለጫ በርካቶች በመስቀል አደባባይ ተገኝተው ሀዘናቸውን ገልጸዋል

የቀድሞው የውሀ እና የመስኖ ልማት ሚንስተር አለማየሁ ተገኑ ደግሞ ''ስመኘው በጣም ጠንካራ ሰው ነበር። ደከመኝ ሳይል 24 ሰዓት የሚሰራ ኢንጂነር ነበር። የእሱ ሞት ከፍተኛ ድንጋጤን ፈጥሮብኛል። ሀገራችንን ከድህንት ለማውጣት ሲሰራ የነበረ ሰው ነው። ይህ ለአገር ትልቅ እጦት ነው'' ብለዋል።

የኢንጅነር ስመኘው ስርዓተ ቀብር በተከናወንበት ወቅት በቤተክርስትያኑ መገኘት የፈለጉ በርካቶች ነበሩ። ሆኖም 'ቤተክርስቲያኑ ከሚችለው በላይ' ነው በሚል ወደ ቅድስት ስላሴ ሊያደርጉ የነበረው ጉዞ በመገታቱ ከጸጥታ ኃይሎች ጋር እሰጣ ገባ ተፈጥሮም ነበር። በዚህም ፖሊስ አስለቃሽ ጭስ በመተኮስ በርካቶች ወደ ቤተክርስቲያኗ ቅጥር ግቢ እንዳይገቡ ከልክሏል።

በቀብር ስነ ስርዓቱ ላይ ፕሬዘዳንት ሙላቱ ተሾመ፣ ምክትል ጠቅላይ ሚንስትር ደመቀ መኮንን እና አዲሱ የአዲስ አበባ ከንቲባ አቶ ታከለ ኡማን ጨምሮ ሌሎችም ከፍተኛ አመራሮች ተገኝተዋል።

በዚህ ዘገባ ላይ ተጨማሪ መረጃ