ጀዋር መሐመድ ከ"ቲም ለማ" ጋር ምስጢራዊ ግንኙነት ነበረው?

ጀዋር መሃመድ Image copyright Getty Images

ጀዋር መሃመድ ከአገር ከወጣ 15 ዓመታትን አስቆጥሯል። ይሁን እንጂ የኢትዮጵያን መሬት ከረገጠ ዐስር ዓመታትን ደፍኗል።

ገጠር አካባቢ ተወልዶ እንዳደገ የሚናገረው ጀዋር ለአዲስ አበባ ብዙም ትውስታ ባይኖረውም ያደገበት ገጠር ወንዙ ተራራው ከህሊናው አልጠፉም።

ልጅ ሳለ ባደገበት ቀዬ በኦነግና በኢህአዴግ መካካል ግጭት የነበረበት በመሆኑ "የልጅነት ትውስታዬ ከሌሎች ልጆች የተለየ ነው" ይላል። ትግል ውስጥ የገባውም ይህንን ሁነት ለመቀየር እንደሆነ ይናገራል። "ልጆቼ እኔ ባደኩበት ሁኔታ እንዲያድጉ አልሻም"

በእርሱ ላይና በሚመራው ሚዲያ ላይ ተመሥርቶ የነበረው የሸብርተኝነት ውንጀላ ከተነሳ ጀምሮ የጃዋር ወደ አገር ቤት ማቅናት ሲጠበቅ ነበር። ያ ቀን ነገ ቅዳሜ ሆኗል።

ጀዋር እና ዐብይ ምን ተባባሉ?

በሰኔ 16ቱ ፍንዳታ የተጠረጠሩ 5 ግለሰቦች ላይ ክስ ሊመሰረት ነው

ጉዞውን አስመልክቶ ብዙዎች ስለ ደኅንነቱ ስጋት ገብቷቸው "የአትመለስ" ማኅበራዊ ሚዲያ ዘመቻ ጭምር ከፍተው ነበር። ይህ የወዳጆቹ ሥጋት የኢንጂነር ስመኘውን ግድያ ተከትሎ እየተጋጋመ መጥቶ ነበር።

"የእኔም ውሳኔ፣ የእነርሱም ስጋት ልክ ነው" የሚለው ጃዋር መንግሥት ለደኅንነቱ ዋስትናና ጥበቃ እንደሚያደርግለት አልሸሸገም።

የእርሱን ወደ አገር ቤት የመመለስ ፋይዳ ሲያጠናክርም "በኢትዮጵያ የመጣውን ለውጥ በመቃወም ኢትዮጵያ አሁንም ብጥብጥ ውስጥ እንዳለች በማሳየት በአመራርና በሕዝቡ ላይ ያለውን በራስ መተማመን ለመሸርሸር ጥረት የሚያደርጉ ቡድኖች እንዳሉ ይናገራል።

ስለሆነም ይህንን አስተሳሰብ ለማዳከም የእርሱ ወደ አገር ቤት መመለስ አዎንታዊ ድርሻ እንደሚኖረው በጽኑ ያምናል።

በሕይወቱ ላይ የሚደርስ አደጋ ካለ እስከዛሬ የለፋበት በጎ ዓላማ ማራመጃ በመሆኑ እንደኪሳራ እንደማያየው ያስረዳል።

"ሕይወታችን በፈጣሪ እጅ እንጂ በፖሊስ እጅ ስላልሆነ፤ አደጋ ይመጣል ብለን ትግል አናቆምም" የሚለው ጀዋር ባለፉት አራት ዓመታት በእርሱ ላይ ሙከራዎች ተደርገው እንደነበርና አያሌ የሥራ ባልደረቦቹ እንደተሰው አስታውሶ የርሱ ነፍስ ከሌሎች የተለየች እንዳልሆነች ይጠቅሳል።

ሐምሌ 30 ለጀዋር

የዛሬ ሁለት ዓመት ሐምሌ 30 በኦሮሚያ የተጠራው የተቃውሞ ሰልፍ አቶ ለማ መገርሳ ሥልጣን እንዲይዙ ከፍተኛ አስተዋፅኦ ነበረው ይላል። ያቺ ቀን ታሪካዊ እንደሆነች በመጥቀስ።

በዚያች ዕለት ከሁለት መቶ በላይ ሰዎች ሕይወታቸውን እንዳጡ ይናገራል።

ባለፉት አራት ዓመታት 5 ሺህ ሰው እንደተሰዋ ገልፆ ለሚመጣው ለውጥ ክብሩን እንደሚያገኝ ሁሉ ለጠፋውም ቢኾን ኃላፊነቱን እወስዳለሁ ብሏል። ወደ ኢትዮጵያ የሚመለስበት ቀን ሃምሌ 30 መሆኑም ለዚሁ መታሰቢያ ይሆን ዘንድ የታቀደ ነው።

በዚሁ ዕለት የትግሉ እምብርት ሆና ወደምትወሰደው አምቦ፣ እንዲሁም ጊንጪና ጉደር አካባቢ በመሄድ በትግሉ ሕይወታቸውን ያጡ ቤተሰቦችን የማግኘትና የማወያየት ፕሮግራም፤ እንዲሁም በእስር ቤት የተጎዱትን የማቋቋምና የመርዳት ሥራ ለመሥራት እቅድ ይዟል።

ጀዋር ትግራይን ያውቃታል?

ከአገር ከመውጣቱ በፊት በአንድ ወቅት ለአፍታ አክሱም ይሂድ እንጂ የትግራይ ክልልን እንደማያውቀው ይናገራል።

ላለፉት 27 ዓመታት ህወሓት በሠራው ስህተት በትግራይና በሌሎች ክልሎች መራራቅ ተፈጥሯል ብሎ የሚያምነው ጀዋር ጉዞው ህወሓት የበላይነቱን በማጣቱ በኢህአዴግም ሆነ በክልሉ የተፈጠረውን ውጥረት የማርገብ ዓላማ እንዳለው አስታውቋል።

ከሕወሓት አመራሮች፣ ከክልሉ ምሁራንና አዛውንቶች ጋር በመወያየት የመፍትሄ ሐሳብ ለማቅረብ እንደሚፈልግም ጨምሮ ተናግሯል ።

"ልባቸውን ከፍተው ካናገሩኝና ጆሯቸውን ሰጥተው ካዳመጡኝ፤ ጉዞዬ ከፍተኛ ስኬት እንደሆነ እቆጥረዋለሁ" ብሏል። ቁጭ ብሎ ከመነጋጋር በተለየ የማዳመጥ ሥራ መሥራት እፈልጋለሁ የሚለው ጀዋር "ሐሳባቸው ምንድን ነው" የሚለው ላይ ትኩረት እንደሚያደርግ ጠቅሷል። "በተለያዩ ማኅበራዊ ሚዲያዎች የመስጋትና የመከፋት ስሜቶችን ስለማይ ስጋታቸው ምን እንደሆነ በማዳመጥ የመፍትሔ ሐሳብ ለማቅረብ እሞክራለሁ" ብሏል

ጉዞው በዚህ ብቻ የሚጠናቀቅ ሳይሆን ከአማራ ሕዝብ ጋር የተጀመረው የእርቅ ብቻ ሳይሆን የትግል አጋርነት ለማጠናከር ከክልሉ አመራርና ምሁራን ጋርም ውይይት ያደርጋል።

በምሥራቅ ኢትዮጵያ በሚኖረው ጉዞም በተለይ ባለፉት ሁለት ዓመታት በኦሮሚያና በሶማሌ ክልል ተፈጥሮ የነበረውን ግጭት ለመፍታት ከአገር ሽማግሌዎችና ምሁራን ጋር ውይይት እንደሚያደርግም ገልጿል።

ጃዋር ራሱን እንደ ነጻ አውጪ ይመለከታል?

ሰላማዊ ትግልን በሚመለከት ውጭ አገር በሚገኙ በተለያዩ የትምህርት ተቋማት ለትግሉ የሚረዳውን ዕውቀት እንደቀሰመ ይናገራል።

ወጣቶችንም በዚህ ጉዳይ ላይ በማሰልጠን ትግሉ ላይ እንዲሰማሩ አብቅቷል።

ይሁን እንጂ ራሱን አንደለውጡ ቁልፍ መሪ ሳይሆን ሌት ተቀን በመሥራት ኃላፊነቱን እንደተወጣ አንድ ተራ ወጣት እንደሚቆጥር በጽኑ ይናገራል።

"ለውጡን ያመጡት የታገሉት ወጣቶች ናቸው" ይላል፣ ደጋግሞ።

ይህን የሚለው "ለፖለቲካዊ ትክክልነት" ፍጆታ ይሆን ወይስ በእርግጥም ይህ የሚያምንበት ሐሳብ እንደኾነ ከቢቢሲ የተጠየቀው ጃዋር ይህንኑ ደጋግሞ አረጋግጧል።

የነለማ ወደፊት መምጣትና ከነ ገዱ ጋር በመቆራኘት የሠሩት ሥራ አገሪቷን እንዳዳነም ጨምሮ አብራርቷል።

ከ "ቲም ለማ" ጋር ምስጢራዊ ግንኙነት?

አሁን ካሉት አመራሮች ጋር በትግሉ ወቅት የቀደመ ትውውቅና ግንኙነት ስለመኖሩ የተጠየቀው ጀዋር ቀጥተኛ ምላሽ ለመስጠት ባይፈቅድም አሁን ያለው አመራር ወደፊት ገፍቶ እንዲመጣ ውስጥ ውስጡን ላለፉት ዐሥርታት በደኅንነትም በወታደራዊ ክንፍ በርካታ ሥራ ሲሠራ መቆየቱን ለቢቢሲ ተናግሯል።

ነገር ግን ከእነርሱ ጋር ከመነጋገርና ከግንኙነቱ ይልቅ መናበቡ ያይል እንደነበር ያስታውሳል።

ወደፊት ከመጣው አመራር በተለይም ከ"ቲም ለማ" ጋር በቀደመው ጊዜ እነማን ተሳትፎ እንደነበራቸው ጀዋር በስም መጥቀስ ባይፈቅድም ወደፊት ታሪክ የሚያወጣው ነገር ይኖራል ሲል ጥያቄውን በደምሳሳው አልፎታል።

ዋር ገቢ ምንጭ ምንድን ነው?

ጀዋር በምን ይተዳደራል? የገቢ ምንጩስ ምንድነው?

የቀድሞ ጠቅላይ ሚንስትር ኃ/ማሪያም ደሳለኝን የአንድ ወቅት ንግግር ጠቅሶ " መቼም በጆንያ የሚሰጠኝ የለም" ሲል ከቀለደ በኋላ ዲያስፖራው የኦሮሞ ማኅበረሰብ የሚያደርገውን ድጋፍ በስተቀር ከሌላ መንግሥትም ሆነ ቱጃር ግለሰብ የተገኘ ምንም ዓይነት ድጋፍ እንደሌለ ተናግሯል። ከአንዳንድ መንግሥታት ጭምር ችሮታዎች ይቀርቡ እንደነበር፣ ነገር ግን ለመቀበል ፍቃደኛ ሳይሆኑ መቆየታቸውን ያስታውሳል።

ጀዋር ከቢቢሲ ጋር በነበረው ዘለግ ያለ ቆይታ አገር ቤት ከገባ በኋላ በአጭር ጊዜ ውስጥ በአማርኛ ፣ በኦሮምኛ፣ በእንግሊዝኛና በሌሎች ቋንቋዎች ዕለታዊ ጋዜጣ እንዲሁም የራዲዮ ጣቢያ ለመክፈት በመጨረሻው ምዕራፍ እንደሚገኝም ጠቁሟል።

በዚህ ዘገባ ላይ ተጨማሪ መረጃ