አትሌት ሃጎስ፡ ''ምን እንደተፈጠረ አልገባኝም። ይህ ግን የህይወቴ ትልቁ ገጠመኝ ነው"

አትሌት ሃጎስ ገ/ሕይወት Image copyright IAAF
አጭር የምስል መግለጫ አትሌት ሃጎስ ገ/ሕይወት

ባለፈው አርብ በስዊዘርላንድ በተደረገው የዳይመንድ ሊግ የ5 ሺህ ሜትር ውድድር አንድ አስገራሚ ነገር ተከስቷል።

ውድድሩን በሰፊ ርቀት ሲመራ የነበረው ኢትዮጵያዊው አትሌት ሃጎስ ገብረሕይወት ገና አንድ ዙር ሲቀረው ጨርሶ ያሸነፈ መስሎት ሩጫውን በማቆም ደስታውን ሲገልጽ ከኋላ በነበረው ዮሚፍ ቀጄልቻ ተቀድሟል።

አትሌት ሃጎስ ''የጨረስኩ ነው የመሰለኝ፤ ምን እንደተፈጠረ አልገባኝም። ይህ የህይወቴ ትልቁ ገጠመኝ ነው" ሲል ለቢቢሲ ስለ ነበረው ሁኔታ ተናግሯል።

"ሥልጣን ለደም ግፊት አጋልጦኛል" ኃይሌ ገብረሥላሴ

የ25 ዓመቱ አትሌት ሃጎስ ገ/ሕይወት በአትሌቲክሱ ልምድ ካላቸው የወቅቱ አትሌቶች መካከል የሚጠቀስ ነው። በሪዮው ኦሎምፒክ በ5 ሺህ ሜትር የነሃስ ሜዳልያ ባለቤት ሲሆን በዓለም ሻምፒዮና በርካታ አመርቂ ውጤቶችን አስመዝግቧል።

ከዚህ በተጨማሪም ሃጎስ በሃገር አቋራጭ እና በዳይመንድ ሊግ ውድድሮች ድልን ተጎናጽፏል፤ ዓርብ ዕለት ያጋጠመው ግን ለእርሱም ትንግርት ሆኖበታል።

ሃጎስ ውድድሩን እንደማሸንፍ ''በራሴ ተማምኜ ነበር። ስሜት ውስጥ ገብቼ ነበር። የሆነው ነገር ለእኔም ግራ ገብቶኛል" በማለት የተፈጠረው ነገር ለእርሱም ጥያቄ እንደሆነበት ደጋግሞ ተናግሯል።

"ሰው ሲደግፈኝና ሲያበረታታኝ፣ ጭብጨባውም ሲደምቅ ውድድሩን የጨረስኩ መሰለኝ። ከዚያ ሩጫውን አቋረጥኩት" ብሏል አትሌቱ።

"አንድ አትሌት በህይወቱ የሚያስደስተው የአለም ሪከርድን መስበር ነው" ዮሚፍ ቀጀልቻ

ሃጎስ አንድ ዙር እየቀረው ያሸነፈ መስሎት ደስታውን እየገለጸ ሳለ የውድድሩን ዳኞች እና ከመሮጫ መሙ አቅራቢያ ያሉ ሰዎች ውድድሩ እንዳላለቀ ሲነግሩትና እሱም የተቀሩት ተወዳዳሪዎች ሩጫቸውን መቀጠላቸውን ሲመለከተ ነው እንደገና ወደ ሩጫው የተመለሰው።

በዚህ ምክንያት በቅርብ ርቀት ሲከተለው የነበረው አትሌት ዮሚፍ ቀጄልቻ አንደኛ ሆኖ ሲጨርስ ሃጎስ የአስረኛ ደረጃን ይዟል።

''ውድድሩን ያሸነፈውን ዮሚፍ ቀጄልቻን እንኳን ደስ ያለህ ብዬዋለሁ። አሰልጣኞቹም 'ሊፈጠር የሚችል አጋጣሚ ነው' በማለት አበረታተውኛል'' ብሏል ሃጎስ።

በዋግ ኸምራ አስተዳደር 7 የዳስ ት/ቤቶች አሉ

"ቢሳካልኝ አሪፍ ነበር፤ አልተሳካም፤ በጸጋ መቀበል ነው" የሚለው ሃጎስ ከክስተቱ በኋላ በርካታ የስልክ ጥሪዎች እየደረሱት እንደሆነ እና አብኛዎቹም 'አይዞህ በርታ የሚያጋጥም ነው' የሚሉ ናቸው" ሲል ለቢቢሲ ተናግሯል።

በቀጣይ ሁለት የዳይመንድ ሊግ ውድድሮች ይቀሩኛል የሚለው ሃጎስ፤ ለእነዚህ ውድድሮች ኢትዮጵያ ውስጥ ልምምድ እያደረገ መሆኑን ተናግሯል።

ተያያዥ ርዕሶች