"ውስኪ ጠጪ ኢህአዴጎች እባካችሁ ውሃ የናፈቀው ሕዝብ እንዳለ አትርሱ" ጠ/ሚ ዐብይ

ጠቅላይ ሚኒስትር ዐብይ በመጽሐፋቸው ምረቃ ላይ Image copyright Office of the Prime Minister-Ethiopia

ለረጅም ጊዜ ሲጠበቅ በነበረው 'መደመር' የተሰኘው መጽሐፋቸው ምርቃ ሥነ ሥርዓት ማብቂያ ላይ ንግግር ያደረጉት ጠቅላይ ሚኒስትር ዐብይ አህመድ ከወትሮው በተለየ ሁኔታ ለተቺዎቻቸው ጠንከር ባሉ ቃላት ምላሽ ሰጥተዋል።

"የፓርቲ ውህደት ጉዳይ አላለቀም" በማለት "የመደመር ፍልስፍናን የምናምን ሰዎች በውይይት ስለምናምን ምንም እንኳን ሰነዱ አንድ ዓመት ከስድስት ወር ሙሉ ተጠንቶ ያለቀ ቢሆንም ላለመበተን ስንለማመን፣ ስንወያይ ከርመናል" ብለዋል።

ጠቅላይ ሚኒስትሩ "አሁንም ውይይቱ አልተቋጨም" በማለት አንዳንዶች "ይህ የፓርቲ ውህደት መጨፍለቅ ነው፤ ኢትዮጵያን ከፌደራል ሥርዓት ወደ አሃዳዊ ሥርዓት የሚወስድ ነው በማለት የሚሰጡት መግለጫ በእኛ ውስጥ ታስቦና ታልሞ የማያውቀውን መርዶ አረዱን" ብለዋል።

የጠቅላይ ሚኒስትር ዐቢይ "መደመር" መጽሐፍ ተመረቀ

ጠቅላይ ሚኒስትሩ አክለውም ውህደትን በተመለከተ ሲናገሩ "እኛ ኢህአዴጎች ለ30 ዓመታት አንድ መሆን ተስኖን እንዴት ነው ኢትዮጵያን አንድ ማድረግ የምንችለው?" ሲሉ በድርጅታቸው ውህደት ላይ ትችትን የሚሰነዝሩ ወገኖችን ጠይቀዋል።

"ኢህአዴግ ባለፉት ዓመታት ሕገ መንግሥቱን በብዙ መንገድ ሲጥሰው ቆይቷል" ያሉት ጠቅላይ ሚኒስትር ዐብይ "ከዚያ ውስጥ አንዱ ሕገ መንግሥቱ አንድ የኢኮኖሚና የፖለቲካ ማህበረሰብ መፍጠፈር ቢልም እንኳን፤ ፓርቲው ኢትዮጵያን አንድ ሊያደርግ ቀርቶ ራሱ አንድ መሆን ተስኖት ቆይቷል" ብለዋል።

ጠቅላይ ሚኒስትሩ መደመር ፍልስፍና ከሆነና ፓርቲውን ወደ ውህደት ካመራ ወደ እልቂት እናመራለን የሚለውን ሀሳብም በማንሳት "እልቂትን ምን አመጣው?" በማለት ጥያቄ ሰንዝረዋል።

"አንድ ፓርቲ መሆንና መደመር የማያዋጣ ከሆነ ጀግና ሰው ውስኪውን አስቀምጦ 'መባዛት' የሚል አማራጭ ሃሳብ ይዞ ይመጣል" በማለት "ያኔ መደመርና መባዛት የሚለውን ለኢትዮጵያ ሕዝብ ጎን ለጎን በማስቀመጥ 'መደመር አያስፈልገንም' ይላል እንጂ በ21ኛው ክፍለ ዘመን ምን ያገዳድለናል?" ሲሉም ተናግረዋል።

የቅማንት የማንነትና የራስ አስተዳደር ጥያቄ ከየት ወደ የት?

እኔ ያልኩት ካልሆነ የሚቀጥለው አማራጭ መገዳደል ነው የሚለው አሮጌ አስተሳሰብ ነው በማለት ካጣጣሉ በኋላ፤ " እኛ ውስኪ ጠጪ ኢህአዴጎች፤ እባካችሁ ውሃ የናፈቀው ሕዝብ እንዳለ አትርሱ ይላል መደመር" ብለዋል ጠቅላይ ሚኒስትሩ።

"መደመር ሌብነትን ቀይ መስመር ነው ያለበት ምክንያት" በሀገር ውስጥ ብቻ ሳይሆን ከሀገር ውጪም ቤት ደርድሮ ለህዝብ አስባለሁ ማለት ስላቅ ነው ብለዋል።

አስከትለውም ሆቴል ተቀምጦ ዳቦ የራበውን ሕዝብ ለአንተ ቆሜልሃለሁ ማለት ተረት ተረት ነው ካሉ በኋላ በመላው ኢትዮጵያ ለሚገኙ ወጣቶች "የምንቀልድባችሁን ቀላጅ ፖለቲከኞች ወደጎን አራግፋችሁ አገራችሁን ጠብቁ" ሲሉ ጥሪ አስተላልፈዋል።

ጠቅላይ ሚኒስትር ዐብይ አህመድ በተጨማሪ "በተሰጠው እድል መጠቀም ሳይችል፤ እድል ሲነጠቅ በትውልድ እድል መቀለድ አይቻልም" ሲሉም በጠንካራ ድምጸት ተናግረዋል።

ኢህአዴግ እንዴት ይዋሃዳል? ምን ስምና ግብር እኖረዋል የሚለውን እኔ አልወስንም ያሉት ጠቅላይ ሚኒስትሩ "እኔ ዲሞክራት መሪ ስለሆንኩ ለውይይት ሃሳቤን አቀርባለሁ" ብለዋል።

ተማሪዎች በተመደቡበት ዩኒቨርስቲ ብቻ ነው መማር የሚችሉት- የሳይንስና ከፍተኛ ትምህርት ሚኒስቴር

የተሻለ እና የኢህአዴግ ብዙኀን አባል ድርጅቶች ሃሳብ የሆነውን ግን በቅርቡ ለሕዝባችን እንገልፃለን።

'መደመር' እያንዳንዱ ኢትዮጵያዊ ተስፋ የሚያደርግባት ሀገር ትኑር ይላል በማለትም እያንዳንዱ ዜጋ ሀገሬን ልመራ እችላለሁ ብሎ የሚዘጋጅባት ለሁሉም እኩል የሆነች ኢትዮጵያን መፍጠር ያስባል ብለዋል።

ጠቅላይ ሚኒስትሩ በዚህ ዓመት የሚካሄደውን ምርጫ በተመለከተም ሲናገሩ "ምርጫው የምናላግጥበት ሳይሆን ሀሳብ ይዘን ቀርበን፤ በሃሳብ ተወያይተን አብዛኛው ወጣት የሚያድግበት አማራጭ ተሰንዶ የምንወዳደርበት ብቻ ይሆናል" ብለዋል።

"ኢትዮጵያዊያን በፍፁም መገዳደል የለብንም ሀሳብ ብቻ ነው ማፍለቅ ያለብን በሀሳብ ብቻ ነው መሟገት ያለብን" ሲሉም ተናግረዋል።

'መደመር' የተሻለ ሀሳብ ለመምረጥና ለመቀበል የኢትዮጵያዊያን ጭንቅላት ያንሳል ብሎ በፍፁም አይምንም ያሉት ጠቅላይ ሚኒስትር ዐብይ "ይህችን ታላቅ ሀገር መልሰን ታላቅ ብቻ ሳይሆን፤ የበለጸገች እናድርጋት ብሎ ያምናል ደግሞም ያደርጋል።"

ኢትዮጵያ የወደፊት ተስፋ እንዳላት ያነሱት ጠቅላይ ሚኒስትሩ፤ ብዙዎች የብልፅግና ጉዞው የሚደናቀፍና የሚቆም ይመስላቸዋል በማለት "ላረጋግጥላችሁ የምፈልገው ኢትዮጵያ ትበለፅጋለች... ካለችበት ሁኔታ ከፍ ትላለች ኢትዮጵያ እንዳትበለጽግ የሚፈልጉ ይጠፋሉ አንጂ የኢትዮጵያ ብልፅግና አይጠፋም" ብለዋል።

ጠቅላይ ሚኒስትር ዐቢይ በቅርቡ ያገኙትን የኖቤል ሽልማት አስመልክቶ ሲናገሩም "እኔ ከበሻሻ የወጣሁ፣ ጥሩ የምስክር ወረቀት እንኳ ያላየሁ ነኝ፤ ይህ የእናንተ ውጤት ነው" በማለት ልትጠብቁት ይገባል ካሉ በኋላ "አሁን በሌሎች ዘርፎችስ እንዴት ነው ኖቤሎችን የምናመጣው የሚለውን ማሰብ አለብን" ሲሉ መልዕክታቸውን አስተላልፈዋል።

በዚህ ዘገባ ላይ ተጨማሪ መረጃ