ቻይና፡ በኮሮና የሚያዙ አዳዲስ ሰዎች ቁጥር እየቀነሰ ነው ተባለ

የኮሮና ቫይረስን የሚያክም ግለሰብ Image copyright Reuters

በኮሮና ቫይረስ የሚያዙ አዳዲስ ሰዎች ቁጥር እየቀነሰ መሆኑን ቻይና አስታውቃለች። ይህም ሁኔታ የታየው በባለፉት ሶስት ቀናት መሆኑም ተዘግቧል።

ባለፈው ሳምንት እሁድ ባለስልጣናቱ 2ሺ 9 አዳዲስ ሰዎች በቫይረሱ መያዛቸውን እንዲሁም በመላው ሃገሪቱ 142 ሰዎች መሞታቸውን ተናግረው ነበር።

በሳምንቱም መጀመሪያ በቫይረሱ የሚያዙ ሰዎች ቁጥር ማሻቀብ አሳይቶ የነበረ ቢሆንም ከቀናት በኋላ መረጋጋት እንዲሁም ማሽቆልቆል አሳይቷል ብለዋል።

እስካሁን ባለው መረጃ 68 ሺ ሰዎች በቫይረሱ የተያዙ ሲሆን የሟቾች ቁጥር ደግሞ 1665 ደርሷል።

ኢትዮጵያውያን፡ የአስወጡን ድምጽ በጎሉባት የቻይናዋ ዉሃን

በሽታውን ለመደበቅ ባለስልጣናት ዶክተሮችን ያስፈራሩ ነበር

ከቻይና ውጭ ባሉ ሃገራት 500 ግለሰቦች በሰላሳ ሃገራት ውስጥ የተያዙ ሲሆን፤ አራት ሞቶችም ተከስተዋል። እነዚህም በፈረንሳይ፣ ሆንግ ኮንግ፣ ፊሊፒንስና ጃፖን ናቸው።

የቻይና የውጭ ጉዳይ ሚኒስትር ዋንግ ይ በቫይረሱ የሚያዙ ሰዎች ቁጥር መቀነስን አስመልክቶ " ወረርሽኙን መቆጣጠር እንደቻልን ማሳያ ነው" ብለዋል።

"የቫይረሱን መዛመት ለመቆጣጠር ያላሰለሰ ጥረት አድርገናል፤ በውጤቱም ከፍተኛ እመርታ አሳይተናል። እኛ ያከናወንነውን ተግባር መስራት የሚችል ሃገር የለም" ብለዋል።

እስካሁን ባለው መረጃ

  • በኮሮና ቫይረስ የተያዙ ሰዎችን አሳፍራለች ተብላ እንዳትንቀሳቀስ እንዲሁም በለይቶ ማቆያ ያለችው መርከብ በጃፖን ወደብ የምትገኝ ሲሆን፤ በቫይረሱ የተያዙ ሰዎች ቁጥር በከፍተኛ ሁኔታ እያሻቀበ ነው ተብሏል። ዳይመንድ ፕሪንሰስ የሚል መጠሪያ ያላት መርከብ ካሳፈረቻቸው መንገደኞች ውስጥ በኮሮና የተያዙ ሰዎች ቁጥር 355 ደርሷል። ይህም ቁጥር በቻይና ውጭ ከተመዘገቡት ከፍተኛ ነው። አሜሪካና ካናዳ ዜጎቻቸውን ከመርከቡ ለማውጣት አውሮፕላኖች የመላክ እቅድ እንዳላቸው ተገልጿል።
  • የቻይና ማዕከላዊ ባንክ የመገበያያ ገንዘቦችን በኬሚካል የመርጨት እቅድ እንዳለው አስታውቋል። ይህም ቫይረሱ እንዳይዘመት ይረዳዋልም ተብሏል።
  • የፈረንሳይ ባለስልጣናት ቅዳሜ እለት አንድ የቻይና ቱሪስት በኮሮና ቫይረስ መሞቱን አሳውቀዋል። ይህንንም ለመጀመሪያ ጊዜ ከእስያ ውጭ የተመዘገበ ሞት ያደርገዋል።
  • በተለያዩ ሃገራት ማረፍ ተከልክላ የነበረች አንዲት መርከብ በካምቦዲያ ማረፏን ተከትሎ አንዲት አሜሪካዊት በቫይረሱ መያዟ ታውቋል። ግለሰቧ ወደ ማሌዥያ በአውሮፕላን በረራ ባደረገችበት ወቅት ነው ሁኔታው የታወቀው።
  • በእንግሊዝ ዘጠኝ በቫይረሱ የተያዙ ሰዎች ህክምና ተደርጎላቸው ከሆስፒታል ወጥተዋል ተብሏል።
  • በሲንጋፖር አዲስ አምስት ሰዎች መያዛቸው የተዘገበ ሲሆን ቁጥሩንም 72 ያደርሰዋል። ከነዚህም ውስጥ 18ቱ ህክምና አግኝተው ወደቤታቸው ተመልሰዋል።

ኮሮና ቫይረስ መጠሪያ ስሙን አገኘ

ስለአዲሱ ኮሮና ቫይረስ ማወቅ የሚገባዎ ነጥቦች

ቅዳሜ እለት የአለም አቀፉ የጤና ድርጅት ኃላፊ ዶር ቴድሮስ አድሃኖም ቻይና ለወረርሽኙ የሰጠችውን ትኩረት አድንቀዋል።

"ቻይና የቫይረሱን መዛመት በመቆጣጠር ሌላው ዓለም እንዲዘጋጅ ጊዜን መለገስ ችላለች፤ ምን ያህል ጊዜ እንዳለን ባናውቅም። ከቻይና ውጭ ባሉ ሃገራት ያለው የመዛመት ሁኔታ ዝቅተኛ መሆኑንም ማየት ተስፋ የሚሰጥ ነገር ነው" ብለዋል።

ከአስር ሚሊዮን በላይ የሚሆኑ ቻይናውያን የቫይረሱን መዛመት ለመቆጣጠር በሚል ከእለት እለት እንቅስቃሴያቸው ተገድበዋል።

ከፍተኛ ትኩረት የተሰጣት የቫይረሱ መነሻ የሆነቸው የሁቤ ግዛት ውሃን ከተማ ስትሆን፤ በውሃን እንቅስቃሴ ከተገደበ ሳምንታት ተቆጥረዋል፤ ከተማዋም ከሌሎች የሃገሪቱ ክፍሎች ተቆራርጣለች።