አሠሪዎ እየሰለለዎ መሆኑን እንዴት ያውቃሉ?

ቢሮ Image copyright Getty Images

ባርክሌስ ባንክ ሠራተኞቹ ምን ያህል ሰዓት ወንበራቸው ላይ እንደተቀመጡ የሚያሰላ የስለላ መረብ ዘርግቶ ነበር። ይህ መረጃ ይፋ ሲደረግ ወቀሳ የበዛበት ባርክሌስ ሠራተኞቹን መሰለል ቢያቆምም፤ ድርጊቱ አለቆች ተቀጣሪዎቻቸው ላይ መሰለል አለባቸውን? የሚል ጥያቄ አጭሯል።

ባርክሌስ ተቀጣሪዎቹ ለሥራ ከተመደበላቸው ሰዓት በላይ እንዳይሠሩ ለመከላከል እንዲሁም ውጤታማነታቸውን ለማሳደግ የኮምፒውተር ሥርዓት ዘርግቶ እንደነበረ ተናግሯል።

ድርጅቱ የተጠቀመውን መተግበሪያ የፈጠረው ሳፒየንስ የተባለ ድርጅት ነበር። ሠራተኞች ኮምፒውተራቸው ላይ ምን እንደሚያደርጉ፣ መቼ የኢንተርኔት አገልግሎት መጠቀም እንደሚያቆሙም የሚመዘግብ አሠራርም ፈጥሯል።

ባርክሌስ ሠራተኞቹ ላይ እየሰለለ እንደሆነ ይፋ ሲደረግ መተግበሪያው ሠራተኞች እረፍት እንዳያደርጉ እና በቂ ጊዜ እንደሌላቸው እንደሚጠቁም ተገልጿል።

በእርግጥ ባርክሌስ ሠራተኞቹን ሲሰልል ይህ የመጀመርያው አይደለም። እንደ ጎርጎሮሳውያኑ አቆጣጠር በ2017፤ ሠራተኞች ከዴስካቸው መነሳት አለመነሳታቸውን በሙቀት እና በእንቅስቃሴ የሚለካ መሣሪያ አስገጥሞ ነበር።

ተቋሙ ድርጊቱን "የቢሮ አጠቃቀምን ለመረዳት ያለመ ነው" ሲል ገልጾት ነበር።

ሥራ ቀጣሪና አባራሪ እየሆነ የመጣው ሮቦት

ሴት ተመራቂዎች ለምን ሥራ አያገኙም?

ድርጅቶች ተቀጣሪዎቻቸውን እንዴት ይሰልላሉ?

በርካታ ድርጅቶች በዘልማዳዊ መንገድ ሠራተኞቻቸውን ይሰልላሉ። የተቀጣሪዎቸን ኢሜል ማየት፣ ኮምፒውተር ላይ ያሳለፉትን ጊዜ መለካት እና ሠራተኞች ቢሮ ውስጥ የሚያደርጉትን እንቅስቃሴ መከታተል ዘልማዳዊ የስለላ ዘዴዎች ናቸው።

ተቋሞች "የምንሰልለው የከፋ ነገር አስበን አይደለም" ቢሉም፤ አካሄዳቸው በስፋት ይተቻል።

ቴሌግራፍ ጋዜጣ ሠራተኞቹ ዴስክ ላይ መቆጣጠሪያዎች ገጥሞ የነበረ ሲሆን፤ ወቀሳ ሲገጥመው እንደ ጎርጎሮሳውያኑ 2016 ላይ መሣሪያዎቹን አንስቷል። በተመሳሳይ አማዞን መጋዘኖቹ ውስጥ ሠራተኞችን መሰለሉ አስተችቶታል።

እንደ ጎርጎሮሳውያኑ 2013 ላይ የወጣ ጥናት እንደሚያሳየው፤ አማዞን የሠራተኞችን ፍጥነት ለመለካት መጋዘኖቹ ውስጥመሣሪያ አስገጥሟል።

ሠራተኞችን መሰለል ይፈቀዳል?

ዩናይትድ ኪንግደምን እንደምሳሌ ብንወስድ የሰዎች የግል መረጃ የሕግ ከለላ አለው። መረጃ መሰብሰብ ያለበት ግልጽና ፍትሀዊ በሆነ መንገድ ሲሆን፤ መረጃን ያለምክንያት ማስቀመጥ ወይም ከተወሰነ ጊዜ በላይ በክምችት ክፍል ማቆየት ሕገ ወጥ ነው።

በሕጉ መሰረት ሠራተኞች የግል መረጃቸው እየተሰበሰበ እንደሆነ ሊነገራቸው ይገባል።

ሥራ ቦታ ጋደም ማለት መፈቀድ አለበት?

ሥራ የማዘግየት ልማድን ለመቅረፍ የሚረዱ 8 ነጥቦች

የሕግ ባለሙያው ማክስ ዊንትሮፕ እንደሚሉት፤ ቀጣሪዎች የሠራተኞቻቸውን ውጤታማነት ለመመዘን ወይም በሌላ ምክንይትም መረጃ መሰብሰብ ካስፈልጋቸው፤ ሂደቱን በሥራ ስምምነት ሰነድ ውስጥ ማካትተት እና ከተቀጣሪዎች ይሁንታ መጠየቅ ይገባቸዋል።

ሠራተኞች ምን ይላሉ?

አንድ የሠራተኞች ማኅበር እንደሚለው፤ ተቀጣሪዎች መጸዳጃ ቤት ሲሄዱ ጨምሮ አጠቃላይ እንቅስቃሴያቸውን መከታተል ተጠራጣሪነት እንዲሁም ፍርሀት ይፈጥራል።

ሠራተኞች ላይ የሚደረግ ማንኛውም ክትትል በሠራተኞች ፍቃድ ሊደረግ እንደሚገባ ያክላሉ።

ከሦስት ዓመታት በፊት የወጣ ጥናት እንደሚያሳየው፤ ወደ 2,000 የሚጠጉ ሠራተኞች የቀጣሪዎችን ስለላ በተለያየ መንገድ ያዩታል።

ለምሳሌ የመሥሪያ ቤት ንብረት የሆነ መኪና፣ ስልክ ወይም ኮምፒውተር ላይ የሚደረግ ክትትልን የማይቀበሉ ጥቂቶች ናቸው። በሌላ በኩል ከሥራ ሰዓት ውጪ የተቀጣሪዎችን የማኅበራዊ ሚዲያ እንቅስቃሴ መከታተል እና የሠራተኞችን ፊት የሚለይ (ፌስ ሪኮግኒሽን) ቴክኖሎጂ መጠቀምን በርካቶች ተችተዋል።

ሰራተኞች በፈቀዳችሁ ሰዓት ሥራ ገብታችሁ ውጡ ተብለዋል

ሥራ እና ፍቅር፡ ከሥራ አጋርዎ ጋር የፍቅር ግንኙነት መጀመር ሊያስባርር ይገባል?

የሠራተኞች ማኅበሩ እንደሚለው፤ ድርጅቶች ሠራተኞቻቸውን መከታተላቸው በበጎ የሚታይባቸው አጋጣሚዎች አሉ። ሠራተኞች ያሉበትን ቦታ ተቋሙ ማወቁ ተቀጣሪዎቹ ደህንንት እንዲሰማቸው ሊያደርግ ይችላል።

ስልክ ላይ ክትትል ማድረግ፤ በመሥሪያ ቤቱ ስልክ ደውለው ቅሬታ ከሚያቀርቡ ደንበኞች ሠራተኞችን ለመጠበቅ የሚረዳም ይሆናል።

የግለሰብ መረጃ ጥበቃ ላይ የሚሠሩት ኤድዋርድ ሆውተን በበኩላቸው፤ ሠራተኞችን መሰለል ከጥቅሙ ጉዳቱ ያመዝናል ይላሉ።

"ሠራተኞች፤ ቀጣሪያቸው እምነት እንዳልጣለባቸው ሊሰማቸው ይችላል" ሲሉ ያስረዳሉ።