Şəkillərdə: Şimali Koreyada böyümək

Şimali Koreyada böyümək nə deməkdir? Fotoqraf Tariq Zaidi ötən il Şimali Koreyaya səfər edəndə valideynlərlə uşaqları, ailə səhnələrini lentə almağı qarşısına məqsəd qoyub.

Fotoqraf Şimali Koreyanın doqquz vilayətindən səkkizində olub və məktəblərə, bağçalara, musiqi akademiyalarına baş çəkib.

Xaricilərin Şimali Koreyaya səfəri nadir hallarda baş verir, buna nail olanlara isə ciddi nəzarət edilir və onların fotoşəkil çəkmək imkanı məhdud olur.

Tariq Zaidi Çinlə sərhəddə yerləşən Dandonq-dan şimaldakı Kaesonqa qədər, Pxenyandan şərq sahilində yerləşən Vonsana qədər, Çonqcindən Çin və Rusiya ilə həmsərhəd olan Hoeronqa qədər səyahət edib.

Səyahət marşrutu boyu ilk növbədə məktəblərə baş çəkib. Şimali Koreyada müxtəlif növ məktəblər və görməli yerlər var.

Xeyli sayda tələbə ingilis dilində necə yaxşı danışdıqlarını nümayiş etdirmək istəyirdilər və bəzi məktəblərdə turistlərə şagirdlərlə istənilən mövzularda söhbət etmək imkanı verilirdi.

Tariq Zaidinin baş çəkdiyi məktəblərdən bəziləri istedadlı şagirdlər üçün nəzərdə tutulmuşdu və ən müasir avadanlıqla təchiz olunmuşdu.

Şimali Koreyada həmin növ məktəblərə məktəbli sarayı deyilir.

Ölkədə digər növ məktəblər də var, lakin turistlər elə məktəblərə aparılmamışdı.

Məktəblərdə idmana, musiqiyə, mədəniyyətə diqqət verildiyi nəzərə çarpırdı.

Şagirdlərin çoxu turistlərlə futbol, basketbol kimi oyunlar oynamağa həvəs göstərirdilər.

Səyahət edərkən Tariq Zaidi nəqliyyatda və ya digər yerlərdə uşaqları ilə gəzintiyə çıxmış valideynlərin şəkillərini çəkə bilib - misal üçün, metro qatarında uşağını qucaqlamış ata və ya uşaq meydançasında uşaqları ilə oynayan ana səhnələrini.

Bütün bunlar onu göstərir ki, hansı hakimiyyətin olmasından asılı olmayaraq ailə hər yerdə ailə olaraq qalır, məktəbli də, qarşısına qoyduğu hədəflər və ambisiyaları ilə, elə hər yerdə məktəblidir.