5 fotoda: Növbədənkənar seçkilər, jurnalist müvəqqəti azadlıqda, aktrisa vəfat etdi...

Keçdiyimiz həftə baş vermiş mühüm hadisələr 5 fotonun diliylə.

Prezident İlham Əliyev

1. Azərbaycanda 11 aprel növbədənkənar prezident seçkilərinin keçiriləcəyi elan edilib.

Hakim Yeni Azərbaycan Partiyası öz qurultayında İlham Əliyevin prezidentliyə namizədliyini irəli sürüb. Müxalif Azərbaycan Xalq Cəbhəsi Partiyası seçkiyə qatılmamaq qərarı verib.

2. Jurnalist Əfqan Muxtarlı ailə üzvlərinin yas mərasimində iştirak etmək üçün müvəqqəti azadlığa buraxılıb.

Dekabrın 31-də Əfqan Muxtarlının bacısı, onun və qardaşının azyaşlı uşaqlarının meyiti Zaqatalada yaşadıqları evdə ölü tapılmışdı. İlkin ehtimallara görə, onlar dəm qazından zəhərləniblər.

3. Azərbaycanın xalq artisti Zərnigar Ağakişiyeva 72 yaşında vəfat edib.

Aktrisanın cəsədi Bakıda, Yasamal rayonu ərazisində yaşadığı mənzildə Fövqəladə Hallar Nazirliyinin xilasediciləri tərəfindən aşkarlanıb.

4. Fevralın 22-də Bakıda, martın 12-də Abşeron, Gəncə və Sumqayıtda ümumi təhsil müəssisələrində 2018/2019-cu dərs ili üçün 1-ci sinfə şagird qəbulu başlayır.

Qəbul həm elektron, həm də alternativ qeydiyyat mərkəzləri yolu ilə aparılacaq.

5. Həftənin çərşənbə axşamı amerikalı sahbkar Elon Musk-ın Space X şirkətinin hazırladığı Falcon Heavy raketi kosmosa uğurlu uçuş edib.

Marsa istiqamətlənən raket özü ilə Elon Musk-ın Tesla Roadster qırmızı kabrioletini də aparır. Sürücü oturacağına skafandr geyinmiş maneken otuzdurulub.