ပစ်ခတ်သူကို အသေဖမ်းမိပေမယ့် စစ်ဆင်ရေးအသေးစိတ်ကိုမသိရသေး

သေနတ်သမား ကျကဖန်းထုံမန်း ဘာကြောင့်ခုလိုလုပ်တယ်ဆိုတဲ့ရည်ရွယ်ချက်ကိုတော့မသိရသေး

ဓာတ်ပုံ ရင်းမြစ်, AFP

ဓာတ်ပုံ ပုံစာ,

သေနတ်သမား ကျကဖန်းထုံမန်း ဘာကြောင့်ခုလိုလုပ်တယ်ဆိုတဲ့ရည်ရွယ်ချက်ကိုတော့မသိရသေး

ထိုင်းနိုင်ငံ၊ နခွန်ရတ်ချစီမာမြို့မှာ လူ ၂၆ ဦး သေဆုံးပြီး လူအများအပြား ဒဏ်ရာရစေခဲ့တဲ့ သေနတ်သမားကို လုံခြုံရေးတပ်ဖွဲ့ဝင်တွေက အသေပစ်ခတ်ဖမ်းဆီးခဲ့တယ်လို့ ထိုင်းအာဏာပိုင်တွေက ဒီကနေ့ ဖေဖော်ဝါရီ ၉ ရက်မှာ အတည်ပြုပြောကြားလိုက်ပါတယ်။

ဒီပစ်ခတ်မှုကြောင့် လူ ၂၀ ဦးသေဆုံးပြီး လူအများအပြား ဒဏ်ရာရခဲ့တယ်လို့ ထိုင်းအာဏာပိုင်တွေက အစောပိုင်းမှာအတည်ပြုထားပေမယ့် သေဆုံးမှုအရေအတွက်ဟာ ဒီကနေ့ တနင်္ဂနွေမနက်ပိုင်းမှာ တိုးလာခဲ့တာဖြစ်ပါတယ်။

ဒါ့အပြင် ဒဏ်ရာရသူအရေအတွက်လည်း ၅၇ ဦးထိ ရှိလာပါတယ်။

ကျကဖန်း ထုံမန်းဆိုတဲ့ အသက် ၃၂ နှစ်အရွယ် ထိုင်းစစ်တပ်က တပ်သားတစ်ဦးဖြစ်တဲ့ သေနတ်သမားဟာ မနေ့က ဖေဖော်ဝါရီ ၈ ရက်မှာ စစ်စခန်းကနေ လက်နက် ခဲယမ်းတွေ ခိုးယူမသွားခင်သူ့ရဲ့ တပ်မှူးကို ပစ်သတ်ခဲ့ပြီးတဲ့နောက် နခွန်ရတ်ချစီမာမြို့တွင်း(ခိုရတ်မြို့လို့လည်းလူသိများ) က လမ်းမပေါ်တွေနဲ့ ဈေးဝယ် စင်တာတစ်ခုတွင်း ပစ်ခတ်မှုတွေ ကျူးလွန်ခဲ့တာဖြစ်ပါတယ်။

သေနတ်သမားဟာ သူ့ရဲ့ လူမှုကွန်ရက်အကောင့်မှာ ပို့စ်တွေလည်း တင်ခဲ့တာတွေ့ရပြီး ဘာအတွက် ကြောင့် အခုလို ပစ်ခတ်ရတာလဲဆိုတဲ့ သူ့ရဲ့ ရည်ရွယ်ချက်ကိုတော့ ရှင်းရှင်းလင်းလင်းမသိရေသေးပါဘူး။

"သူဘာကြောင့် ခုလိုလုပ်ရတယ်ဆိုတာ ကျွန်တော်တို့မသိပါဘူး။ ကြည့်ရတာတော့ သူရူးသွားပုံပဲ" လို့ ထိုင်းကာကွယ်ရေးဌာန ပြောခွင့်ရသူ Kongcheep Tantrawanit က ရိုက်တာကို ပြောကြားခဲ့ပါတယ်။

ထိုင်းပြည်သူ့ကျန်းမာရေးဝန်ကြီးက ဒီကနေ့ တနင်္ဂနွေမနက်စောပိုင်းမှာ ထိုင်းအရှေ့တောင်ပိုင်းမှာ ဖြစ်ပွားခဲ့ တဲ့ အဲဒီပစ်ခတ်မှုမှာ သေနတ်သမားကို အသေပစ်ခတ်ဖမ်းဆီးနိုင်ခဲ့တဲ့ လုံခြုံရေးတပ်ဖွဲ့ဝင်တွေကို ကျေးဇူး တင်တဲ့အကြောင်း သူ့ရဲ့ ဖေ့စ်ဘွတ်စာမျက်နှာမှာ ရေးသားထားပါတယ်။

ဈေးဝယ်စင်တာမှာဘာတွေဖြစ်ခဲ့သလဲ

ပစ်ခတ်မှုတွေဖြစ်ပွားပြီးတဲ့နောက် ဒေသစံတော်ချိန် ဒီကနေ့တနင်္ဂနွေ မနက် ၃ နာရီမှာ လုံခြုံရေး တပ်ဖွဲ့ဝင်တွေဟာ သေနတ်သမား ပုန်းအောင်းနေတဲ့ ဈေးဝယ်စင်တာကို ဝင်ရောက်စီးနင်းခဲ့ပြီး သေနတ်သမားကို ဖမ်းဆီးဖို့ ကြိုးစားခဲ့ပါတယ်။

ဓာတ်ပုံ ရင်းမြစ်, Reuters

ဓာတ်ပုံ ပုံစာ,

စင်တာထဲကလူတွေကို ဒီမနက် အစောပိုင်းမှာ ရဲတွေက ကယ်ထုတ်ခဲ့

စစ်ဆင်ရေးအတွင်း လူအတော်များများကို ဈေးဝယ်စင်တာထဲကနေ ခေါ်ထုတ်လာနိုင်ပေမဲ့ လူအများစု ဓားစားခံအဖြစ် ဆက်ဖမ်းဆီးခံထားရတယ်လို့ စိုးရိမ်မှုတွေလည်း ရှိခဲ့ပါတယ်။

အဲဒီနောက် ဒေသစံတော်ချိန် မနက် ၉ နာရီခွဲမှာတော့ သေနတ်သမားကို အသေပစ်ခတ် ဖမ်းဆီးမိတယ်လို့ ရဲတပ်ဖွဲ့က အတည်ပြုပြောကြားပါတယ်။ ဒါပေမဲ့ နာရီပေါင်း ၁၇ နာရီနီးပါးကြာမြင့်ခဲ့တဲ့ အဲဒီ စစ်ဆင်ရေး အသေးစိတ်အချက်အလက်တွေကိုတော့ မသိရသေးပါဘူး။

အစောပိုင်းသတင်းတွေအရ အသက် ၃၂ နှစ်အရွယ်ရှိ သေနတ်သမားဟာ ဈေးဝယ်စင်တာ အနောက် ဘက်ကနေ ထွက်ပြေးဖို့ ကြိုးစားခဲ့တယ်လို့ ဆိုပါတယ်။

ဒါ့အပြင် သေနတ်သမား လက်နက်ချဖို့ နားချစည်းရုံးဖို့ဆိုပြီး သူ့မိခင်ကိုလည်း အဲဒီ ဈေးဝယ်စင်တာကို ခေါ်ဆောင်ခဲ့တယ်လို့လည်း သတင်းတွေက ဆိုပါတယ်။

ဓာတ်ပုံ ရင်းမြစ်, AFP/THAI ROYAL POLICE

ဓာတ်ပုံ ပုံစာ,

စင်တာထဲကလူတွေကို ဒီမနက် အစောပိုင်းမှာ ရဲတွေက ကယ်ထုတ်ခဲ့

လွတ်မြောက်လာသူတွေထဲက တစ်ဦးကတော့ သူဘယ်လို လွတ်မြောက်လာတယ်ဆိုတာကို ဘီဘီစီကို ခုလို ပြောပြပါတယ်။

သူမနဲ့ တခြားသူတချို့ဟာ စင်တာရဲ့လေးလွှာက ရေချိုးခန်းထဲမှာ ပုန်းအောင်းနေခဲ့ရပြီး နှစ်လွှာကို ထွက်မပြေးနိုင်သေးခင်နဲ့ စားသောက်ဆိုင် တစ်ဆိုင်ရဲ့ စားပွဲခုံ အောက်မှာ သုံးနာရီကြာ ပုန်းအောင်းနေခဲ့ရတယ်လို့ ဆိုပါတယ်။

ဓာတ်ပုံ ရင်းမြစ်, LILLIAN SUWANRUMPHA

ဓာတ်ပုံ ပုံစာ,

ဒီပတ်ခတ်မှုကြောင့် လူ ၂၆ သေဆုံးပြီး ၄၀ ကျော်ဒဏ်ရာရထားသလို အရေအတွက် ထပ်တိုးလာနိုင်ခြေရှိနေပါတယ်

စစ်သားတချို့ကို မတွေ့ရခင် အနည်းဆုံးပစ်ခတ်သံလေးချက်လောက် ကြားခဲ့ရပြီး အဲဒီနောက်တော့ သူတို့ဘေးကင်းရာရောက်ခဲ့တယ်လို့ ဆိုပါတယ်။

ပစ်ခတ်ခံရလို့ ဆေးရုံရောက်နေသူတွေကို ထိုင်းဝန်ကြီးချုပ် ပရာယွတ်ချန်အိုချာက ဒီကနေ့ ဖေဖော်ဝါရီ ၉ ရက် မနက်ပိုင်းမှာ သွားရောက်ကြည့်ရှုခဲ့ ပါတယ်။

"ဒါဟာ ထိုင်းနိုင်ငံမှာမကြုံစဖူးအခြေအနေပါ။ ဒီလိုအကြမ်းဖက်မှုကို နောက်ဆုံးအကြိမ်ပဲ ဖြစ်စေချင်ပါတယ်" လို့ ဝန်ကြီးချုပ် ပရာယွတ်က ဆေးရုံမှာ ပြောကြားခဲ့ပါတယ်။

ဓာတ်ပုံ ရင်းမြစ်, AFP

ဓာတ်ပုံ ပုံစာ,

ထွက်မပြေးနိုင်သေးခင်မှာစင်တာထဲက စားပွဲခုံအောက်တွေမှာပုန်းအောင်းခဲ့ရသူတွေလည်းရှိ

အင်္ဂလိပ်စာပြဆရာတစ်ဦးဖြစ်တဲ့ ချာလီခရိုဆန်ကတော့ ပုံမှန်အားဖြင့် အေးချမ်းတဲ့မြို့လေးမှာ ခုတော့ လမ်းပေါ်မှာ အလောင်းတွေရှိနေခဲ့တယ်လို့ ဘီဘီစီကိုပြောပါတယ်။ ဒီပစ်ခတ်မှုကြောင့် သေဆုံးသူတွေ ထဲမှာ သူ့ချစ်သူရဲ့ ကျောင်းသားဟောင်းတစ်ဦးလည်း ပါဝင်တယ်လို့ သူက ဆက်ပြောပါတယ်။

ဒီတိုက်ခိုက်မှု ဘယ်လိုဖြစ်ပွားခဲ့တာလဲ။

ဖေဖော်ဝါရီ ၈ ရက် ဒေသစံတော်ချိန် ညနေ ၃ နာရီခွဲမှာ သေနတ်သမားဟာ စစ်စခန်းက တပ်မှူး ဗိုလ်မှူး ကြီး အာနန်သို ရောကရာဆေးကို ပစ်ခတ်သတ်ဖြတ်ခဲ့ပြီး အဲဒီတပ်စခန်းမှာပဲ ဗိုလ်မှူးကြီးရဲ့ ယောက္ခမဖြစ် သူ အသက် ၆၃ နှစ်အရွယ် အမျိုး သမီးကြီးတစ်ဦးအပါအဝင် အခြားစစ်သားတစ်ဦး ပစ်ခတ်သတ်ဖြတ်ခံရတယ်လို့ ဘန်ကောက်ပို့စ် သတင်းစာက ဖော်ပြပါတယ်။

ဓာတ်ပုံ ရင်းမြစ်, EPA

ဓာတ်ပုံ ပုံစာ,

ရိုင်ဖယ်သေနတ်ကိုင်ပြီး စင်တာထဲ သွားလာနေတဲ့ သေနတ်သမား

သေနတ်သမားဟာ အဲဒီစစ်စခန်းကနေ လက်နက်နဲ့ ခဲယမ်းတွေကို ယူဆောင်သွားပြီးတဲ့နောက် လမ်းတစ် လျှောက်တွေ့သမျှလူတွေနဲ့ ယာဉ်တွေကို ပစ်ခတ်ခဲ့သလို Terminal 21 ဈေးဝယ်စင်တာရှေ့မှာ ကားတစ်စီး ထဲက ထွက်လာတဲ့လူတွေကို စက်သေနတ်နဲ့ စတင်ပစ်ခတ်ပြီး အဲဒီမှာ လူတွေ ထွက်ပြေးနေပုံကိုလည်း တွေ့ရပါတယ်။

ဓာတ်ပုံ ရင်းမြစ်, AFP

ဓာတ်ပုံ ပုံစာ,

အခင်းဖြစ်ပွားရာပြမြေပုံ

စီစီတီဗီမှတ်တမ်းတွေအရ ဈေးဝယ်စင်တာအတွင်းမှာ ရိုင်ဖယ်သေနတ် ကိုင်ပြီးသွား နေတဲ့သေနတ် သမား ကို မြင်တွေ့ရပြီး သေနတ်သမားဟာ အဲဒီဈေးဝယ်စင်တာအတွင်းမှာပဲ ခိုအောင်းနေတယ်လို့ ထိုင်းစစ် ဘက်အာဏာပိုင်တွေက ပြောကြားခဲ့ပြီးတဲ့နောက် ဒီကနေ့တနင်္ဂနွေ မနက်အစော ပိုင်းမှာတော့သူ့ကိုခုလို ပစ်ခတ်ဖမ်းဆီးနိုင်ခဲ့တယ်လို့ အတည်ပြုခဲ့တာဖြစ်ပါတယ်။

သေနတ်သမား တင်ခဲ့တဲ့ ဆိုရှယ်ပို့စ်တွေ

သေနတ်သမားဟာ ပစ်ခတ်မှု ကျူးလွန်နေစဉ်မှာပဲ အဲဒါကို သူ့ဖေ့စ်ဘွတ်ကနေ တိုက်ရိုက်လိုက်ဖ်ဗီဒီယို ထုတ်လွှင့်ခဲ့ပါတယ်။

ဓာတ်ပုံ ရင်းမြစ်, fb

ဓာတ်ပုံ ပုံစာ,

သေနတ်သမားဟာ သူ လက်နက်ချသင့်သလားဆိုတဲ့ ပို့စ်တစ်ခုတင်ခဲ့

ပစ်ခတ်မှုဖြစ်နေစဉ်အတွင်းမှာပဲ သေနတ်သမားဟာ သူ လက်နက်ချသင့်သလားဆိုတဲ့ ပို့စ်တစ်ခုကို သူ့ရဲ့ လူမှုကွန်ရက်အကောင့်မှာ တင်ခဲ့ပါတယ်။

ဒါ့အပြင် အစောပိုင်းပို့စ်တစ်ခုမှာ ပစ္စတိုတစ်လက်နဲ့ကျည်ကတ်သုံးခုပုံနဲ့အတူ "စိတ်လှုပ်ရှားစရာ ကောင်းတော့မယ့်အချိန်"၊ "သေခြင်းတရား ကိုဘယ်သူမှ မရှောင်လွှဲနိုင်"ဆိုတဲ့စာသားတွေနဲ့အတူ ရေးသားခဲ့ပါတယ်။

အခုတော့ ဖေ့စ်ဘွတ်ကနေ သူ့အကောင့်ကို ပိတ်သိမ်းဖယ်ရှားလိုက်ပြီဖြစ်ပါတယ်။