တိုက်ပွဲကြောင့် ရသေ့တောင်ထဲ ရွာသားတချို့ စစ်တွေမြို့ပေါ် ထွက်ပြေးလာရ

ထွက်ပြေးလာခဲ့ကြသူတွေထဲမှာ ကလေးတွေ ပါဝင်သလို အမျိုးသမီးတွေ၊ သက်ကြီးရွယ်အိုတွေလည်း ပါ၀င်ပါတယ်။ ဓာတ်ပုံ မူပိုင် Myint Lwin
Image caption ထွက်ပြေးလာခဲ့ကြသူတွေထဲမှာ ကလေးတွေ ပါဝင်သလို အမျိုးသမီးတွေ၊ သက်ကြီးရွယ်အိုတွေလည်း ပါ၀င်ပါတယ်။

ရသေ့တောင်မြို့နယ်ထဲက သမီးလှကျေးရွာသားတွေဟာ ဖေဖော်ဝါရီ ၂၀ ရက်ညနေပိုင်းမှာ သူတို့အတွက် လုံခြုံမယ်လို့ထင်ရတဲ့ ရခိုင်ပြည်နယ်ရဲ့မြို့တော် စစ်တွေကို ထွက်ပြေးရောက်ရှိလာခဲ့ကြပါတယ်။

သမီးလှကျေးရွာမှာ သူတို့အတွက် ရုပ်ပိုင်းစိတ်ပိုင်းဆိုင်ရာ လုံခြုံမှုမရှိတော့ဘူးလို့ ခံစားရတဲ့အတွက် အခုလို ထွက်ပြေးလာကြတာလည်း ဖြစ်တယ်လို့ ဆိုပါတယ်။

အခုဖေဖော်ဝါရီ ဒုတိယပတ်အတွင်း တပ်မတော်နဲ့ ရက္ခိုင့်တပ်တော် အေအေတို့အကြား ပြန်လည်ပြင်းထန်လာတဲ့ တိုက်ပွဲတွေအတွင်း လက်နက်ကြီး ပစ်ခတ်မှုတွေကြောင့် သူတို့ဟာ ရွာကို စွန့်ခွာခဲ့ရပါတယ်။

ဓာတ်ပုံ မူပိုင် Myint Lwin
Image caption မွေးကင်းစကလေးလည်း စစ်ရှောင်ရ

ထွက်ပြေးလာတဲ့ အယောက် ၆၀ လောက်ဟာ အုန်းချောင်း၊ ကျောက်ဆည်၊ တောင်ရင်းတန်း၊ ရေခေါင်း ချောင်းစတဲ့ကျေးရွာတွေမှာ ခိုလှုံနေခဲ့ကြပေမယ့် သူတို့ခိုလှုံခဲ့ကြတဲ့ ကျေးရွာတွေမှာလည်း မလုံခြုံတာကြောင့် စစ်တွေမြို့ကို သင်္ဘောနဲ့ ထပ်မံတိမ်းရှောင်ထွက်ပြေးလာခဲ့ကြတာဖြစ်ပါတယ်။

"(ဖေဖော်ဝါရီ ၂၀ ရက်မနက်) ၁ နာရီလောက်မှာ အုန်းချောင်းရွာကို ပြေးပါတယ်။ တစ်ညအိပ်ပြီး ကျောက်ဆည်၊ တောင်ရင်းတန်းရွာတွေကို ပြေးပါတယ်။ အဲ့ဒီမှာ မလုံခြုံလို့ ရေခေါင်းချောင်းကို ပြေးပါတယ်။ အဲ့ဒီက သင်္ဘောနဲ့လိုက်လာတာပါ။ တိုက်ပွဲဖြစ်လို့ လမ်းမှာ ကင်းပုန်းတွေလည်း ဝပ်နေခဲ့ရပါတယ်။ ရွာမှာလည်းမနေရ၊ ဟိုထွက်ပြေးဒီထွက်ပြေး၊ ဟိုမှာတစ်ညအိပ်၊ ဒီမှာတစ်ညအိပ်၊ မြို့ကိုလာဖို့လည်း အဆင်မပြေ၊ ပိုက်ဆံလည်း မရှိ၊ ပတ်ပြီးတော့ပြေးနေခဲ့ရတယ်။ ကျွန်မတို့ အိမ်မှာက နေလို့မရတော့ဘူး။ အခင်းတွေလည်း မရှိတော့ဘူး။ ခေါင်မိုးတွေလည်း ပေါက်ကုန်ပြီ။ ဒီမှာဆိုရင် အကူညီတွေဘာတွေရမလား လုံခြုံမယ် ထင်လို့ လာကြတာပါ" လို့ ထွက်ပြေးလာတဲ့ သမီးလှရွာခံ ဒေါ်မယေက ဘီဘီစီကိုပြောပါတယ်။

ဒီလို ထွက်ပြေးလာခဲ့ကြသူတွေထဲမှာ မွေးကင်းစကလေးတွေ ပါဝင်သလို အမျိုးသမီးတွေ၊ သက်ကြီးရွယ်အိုတွေလည်း ပါပါတယ်။

စစ်တွေမြို့ပေါ်ကို သမီးလှကျေးရွာက ထွက်ပြေးလာသူတွေအပြင် ပြီးခဲ့တဲ့ရက်ပိုင်းအတွင်းက ရောက်နှင့်နေတဲ့ ရသေ့တောင်မြို့နယ်က စစ်ဘေးရှောင် ၂၀ ကျော်လည်း ရှိနေပြီး ထပ်မံလာရောက်မယ့်သူတွေလည်း အများအပြား ရှိနေတဲ့အခြေအနေပါ။

ရသေ့တောင်မြို့နယ်အတွင်းမှာ စစ်ဘေးရှောင်စခန်းပေါင်း ၂၀ ကျော်ရှိနေပြီး လူဦးရေ လေးသောင်းလောက်ထိ တိုးလာတဲ့အတွက် စားရေးသောက်ရေး၊ နေရေးထိုင်ရေးအပြင် သောက်သုံးရေးအခက်အခဲတွေနဲ့လည်း ရင်ဆိုင်နေကြရလို့ အကူအညီတွေ အများကြီး လိုအပ်နေတယ်လို့ သိရပါတယ်။

"ပြေးခဲ့တဲ့ရွာတွေမှာလည်း ဇက်တို့ နေဗီတို့က အမြဲတမ်း လှမ်းပစ်နေပါတယ်။ ရွာကိုမီးလောင်တဲ့အချိန်မှာ ဇေယျာမြေကို ရောက်နေပါတယ်။ မီးခိုးတွေထွက်နေတာကို မြင်ခဲ့ရပါတယ်။ ရွာကိုလည်းသွားလို့မရဘူး။ အိမ်ကိုလည်း သွားမကြည့်ခဲ့ရသေးဘူး။ ဆန်တွေလည်း မီးထဲပါသွားပါပြီ။ ခါးဝတ်တစ်တည်နဲ့ ပြေးလာခဲ့ရတာပါ"လို့ သမီးလှကျေးရွာခံတစ်ဦးဖြစ်တဲ့ ဒေါ်ခင်ဝင်းချေက ထွက်ပြေးလာရတဲ့အခြေအနေကို ပြောပြပါတယ်။

ဓာတ်ပုံ မူပိုင် Myint Lwin
Image caption ရွာထဲမှာ နေအိမ်တွေမီးလောင်နေတာကို အဝေးကပဲကြည့်ပြီး ထွက်ပြေးလာခဲ့ကြရတာဖြစ်ပါတယ်။

သမီးလှရွာသားတွေ ရသေ့တောင်မြို့နယ်တွင်းက တခြား ရွာသုံးလေးရွာလောက်ဆီကို ရွှေ့ပြောင်းတိမ်းရှောင်ခဲ့ကြပေမယ့် လုံခြုံရေးနဲ့ စားရေးနေရေး အဆင်မပြေတာကြောင့် စစ်တွေအထိ လာခဲ့ကြတာပါ။

တိုက်ပွဲတွေအတွင်း သမီးလှကျေးရွာဟာ လက်နက်ကြီးတွေ ကျရောက်ပေါက်ကွဲခဲ့တဲ့အတွက် အိမ် ၁၇ လုံး မီးလောင်ကျွမ်းသွားခဲ့သလို ရွာထဲမှာ စစ်ကြောင်းတွေ ရှိနေသေးတာကြောင့် သူတို့ နေအိမ်တွေ မီးလောင်သွားတာကို အဝေးကပဲ ကြည့်နေခဲ့ကြရတယ်လို့ ပြောပါတယ်။

ရခိုင်ပြည်နယ်အတွင်း တိုက်ပွဲတွေကတော့ ဒီလထဲမှာ နေ့စဉ်လိုလို ပြင်းထန်နေပါတယ်။ လက်နက်ကြီးတွေ မကြာခဏ ကျရောက်ပေါက်ကွဲတာကြောင့် ကလေးငယ်တွေအပါအဝင် အရပ်သားတွေ ထိခိုက်ဒဏ်ရာ ရမှုတွေလည်း တိုးလာနေပါတယ်။

ငြိမ်းချမ်းရေးဆွေးနွေးပွဲတွေ လုပ်ဖို့ တစ်ဖက်မှာနိုင်ငံရေးဆွေးနွေးပွဲတွေစတင်တော့ဖို့ အစိုးရနဲ့ အပစ်ရပ်အဖွဲ့တွေ ဆွေးနွေးနေပြီဆိုပေမယ့် အခု တိုက်ပွဲဖြစ် နေတဲ့ အေအေအပါအဝင် မြောက်ပိုင်းအဖွဲ့တွေနဲ့ အစိုးရ၊ တပ်မတော်တို့ အလွတ်သဘောတွေ့ဆုံပွဲတွေကတော့ ပြီးခဲ့တဲ့နှစ်ကုန်ပိုင်းတည်းက ရပ်တန့်နေ ခဲ့တာဖြစ်ပါတယ်။

မြောက်ပိုင်းလေးဖွဲ့ရဲ့ တစ်ဖက်သတ်အပစ်ရပ်ကြေညာချက်ဟာလည်း ဒီဖေဖော်ဝါရီလကုန်မှာ သက်တမ်းပြည့်မှာဖြစ်ပြီး အပစ်ရပ်ထားတဲ့အတောအတွင်း လေးဖွဲ့ထဲက အေအေနဲ့ တိုက်ပွဲတွေ ဆက်တိုက် ဖြစ်ပွားနေခဲ့တာဖြစ်ပါတယ်။

ဒီသတင်းနဲ့ပတ်သက်သမျှ