မင်းပြားမှာ ရေတပ်နဲ့ အေအေကြား တိုက်ပွဲကြောင့် အရပ်သားတစ်ဦးသေ၊ ငါးဦးဒဏ်ရာရ

မင်းပြားမှာ ရေတပ်နဲ့ အေအေကြား တိုက်ပွဲကြောင့် အရပ်သားတစ်ဦးသေ၊ ငါးဦးဒဏ်ရာရ
ဓာတ်ပုံ ပုံစာ,

မင်းပြားမှာ ရေတပ်နဲ့ အေအေကြား တိုက်ပွဲကြောင့် အရပ်သားတစ်ဦးသေ၊ ငါးဦးဒဏ်ရာရ

ရခိုင်ပြည်နယ် ၊ မင်းပြားမြို့ရဲ့ တောင်ဘက် လေးမြို့မြစ် အတွင်းမှာ တပ်မတော် ရေနဲ့ အေအေရခိုင့်တပ်တော် အကြား ဖေဖော်ဝါရီလ ၂၈ ရက်နေ့ ည ၂ နာရီကျော်လောက်မှာ အပြန်အလှန် ပစ်ခတ်မှု ဖြစ်ပွားခဲ့ပါတယ်။

ဒီလိုပစ်ခတ်မှုတွေကြောင့် လက်နက်ကြီး လက်နက်ငယ်ရဲ့ ကျည်တွေဟာ မင်းပြားမြို့ပေါ် နေရာတွေကို ကျရောက်ခဲ့တဲ့အတွက် အမျိုးသမီးတစ်ဦး သေဆုံးခဲ့ပြီး အရပ်သား ၅ ဦးဒဏ်ရာရခဲ့ပါတယ်။

မင်းပြားမြို့နယ်ထဲမှာရှိတဲ့ အေအေနဲ့ တိုက်ပွဲဖြစ်ပွားနေတဲ့ တပ်စခန်းတွေကို စစ်ကူအဖြစ် လက်နက်ခဲယမ်း ပို့ဆောင်တဲ့ ရေတပ်သင်္ဘောသုံးစီးကို အေအေဘက်က ပစ်ခတ်ခဲ့တာကြောင့် အခုလို နှစ်ဖက် အပြန်အလှန် ပစ်ခတ်တာတွေ ဖြစ်ခဲ့ကြောင်း အေအေရဲ့ ပြောရေးဆိုခွင့်ရှိသူ ခိုင်သုခက ဘီဘီစီကို ပြောပါတယ်။

အဲဒီတိုက်ပွဲတွေ အတွင်းက ပစ်ခတ်လိုက်တဲ့ ကျည်တွေဟာ လေးမြို့မြစ်ကမ်းစပ်အနီးမှာ ရှိတဲ့ မင်းဘာကြီး ရပ်ကွက်အတွင်းက နေအိမ်တွေမှာ ကျရောက်ခဲ့ပြီး အသက် ၄၅ နှစ်အရွယ် ဒေါ်သန်းနုရီ သေဆုံးကာ အမျိုးသား လေးယောက် နဲ့ အမျိုးသမီးတစ်ယောက်တို့ ဒဏ်ရာတွေ ရခဲ့တာဖြစ်တယ်လို့ မင်းပြားမြို့ခံတစ်ဦးက ဆိုပါတယ်။

တိုက်ပွဲဟာ ကြပ်စင်တံတားအနီးမှာ ဖြစ်ပွားခဲ့တာဖြစ်ပြီး လူနေရပ်ကွက် ထဲကို ပစ်ခတ်တာတွေ ရှိခဲ့တဲ့အတွက် မင်းဘာကြီးရပ်ကွက်အပြင် မြို့ပေါ်က တချို့နေရာတွေမှာလည်း ကျည်တွေ ကျရောက်တာ ရှိခဲ့တယ်လို့ မင်းပြားမြို့ခံတွေက ပြောပါတယ်။

ဒါနဲ့ ပတ်သက်လို့ အတည်ပြုချက်ရရယူနိုင်ဖို့ အနောက်ပိုင်းတိုင်း စစ်ဌာနချုပ်နဲ့ တပ်မတော် သတင်းမှန် ပြန်ကြားရေး အဖွဲ့တို့ကို ဘီဘီစီက ဆက်သွယ်မေးမြန်းပေမယ့် ဆက်သွယ်လို့ မရခဲ့ပါဘူး။

ဒဏ်ရာရရှိတဲ့ သူတွေကတော့ ဒဏ်ရာ ပြင်းပြင်းထန်ထန် ရတာမဟုတ်တဲ့ အတွက် စိုးရိမ်ရတဲ့ အနေအထားမရှိကြောင်းနဲ့ သေုံးသူ ဒေါ်သန်းနုရီကတော့ ရင်ဘတ်ကို ကျည်ဖောက်ဝင်သွားတာ ဖြစ်တယ်လို့ ဒေသခံတွေက ဆိုပါတယ်။

အဲဒီလို ပစ်ခတ်မှုတွေဟာ ညဘက်ဖြစ်တာကြောင့် မနက်ပိုင်းမှာ ရေတပ်သင်္ဘောတစ်စီးမှာ မီးခိုးတွေ ထွက်နေတာ မြင်တယ်လို့ မင်းပြားမြို့ခံက ဆိုပါတယ်။

ပစ်ခတ်မှုတွေ ဖြစ်ပွားတဲ့ ကြပ်စင်တံတားနဲ့ ကျည်တွေ ကျရောက်လူသေဆုံးတဲ့ မင်းဘာကြီးရပ်ကွက်ဟာ ၁ မိုင်နဲ့ လေးဖာလုံ ကွာဝေးပါတယ်။

ဗီဒီယို ပုံစာ,

ရက္ခိုင့်တပ်မတော် အေအေ စစ်ဦးစီးချုပ် နဲ့ ဘီဘီစီ တွေ့ဆုံမေးမြန်းခန်း

မင်းပြားမြို့နယ်အတွင်းမျာပဲ တပ်မတော်နဲ့ ရက္ခိုင့်တပ်တော် အေအေတို့အကြား ဖေဖော်ဝါရီ လဆန်းပိုင်းကနေ စတင်ကာ တိုက်ပွဲတွေ အပြင်းအထန် ဖြစ်ပွားနေကြတာဖြစ်ပြီး အဓိက တိုက်ပွဲ ပြင်းထန်နေတဲ့ ရာမောင်တံတားအနီးက တပ်စခန်းကို စစ်ကူတွေ လာရောက် ပို့ဆောင်တာပဲဖြစ်ပါတယ်။

တိုက်ပွဲတွေကြောင့် မင်းပြား၊ မြေပုံ၊ စစ်တွေ ပြေးဆွဲနေတဲ့ ရွှေပြည်တန် အမြန်ရေယာဉ်လိုင်းကတော့ ရပ်နားထားရပြီး မင်းပြားနဲ့ ပေါက်တော၊ မြေပုံ၊ မြောက်ဦးတို့ကို ပြေးဆွဲနေတဲ့ အဝေးပြေးလမ်းတွေကတော့ ပုံမှန်သွားလာနေတယ်လို့ ဒေသခံတွေက ဆိုပါတယ်။