အိန္ဒိယပြန် သံဃာ ၂ ပါးမှာကိုရိုနာပိုးတွေ့

မေလ ၂၇ ရက်နေ့ ကပြန်ရောက်လာကြပြီး စစ်ကိုင်းမှာ ကွာရန်တင်းဝင်နေ
ဓာတ်ပုံ ပုံစာ,

မေလ ၂၇ ရက်နေ့ အိန္ဒိယကပြန်ရောက်လာကြပြီး စစ်ကိုင်းမှာ ကွာရန်တင်းဝင်နေ

ကျန်းမာရေးဝန်ကြီးဌာနက ဇွန်လ ၄ရက်နေ့ ထုတ်ပြန်တဲ့ မြန်မာနိုင်ငံက ထပ်တိုးလူနာ အမှတ် ၂၃၅ နဲ့၂၃၆ လူနာ ၂ ဦးဟာ သံဃာတော်တွေ ဖြစ်တယ်လို့ စစ်ကိုင်းမြို့နယ် အထွေထွေအုပ်ချုပ်ရေးမှူးဦးစီးဌာနရဲ့ ထုတ်ပြန်ချက်အရ သိရပါတယ်။

အဲဒီ သံဃာတော် နှစ်ပါးဟာ သီတဂူ ဝိပဿနာ အကယ်ဒမီမှာ ကွာရန်တင်းထားရှိတဲ့ အိန္ဒိယပြန် သံဃာတော်၂ ပါးဖြစ်ပြီးတော့ သူတို့ဆီမှာ ကိုဗစ် ၁၉ ရောဂါ ပိုး တွေ့ရှိတာဖြစ်တယ်လို့ လည်း ဇွန်လ ၄ရက် ကျန်းမာရေးဝန်ကြီးဌာန ထုတ်ပြန်ချက်ကို ကိုးကားပြီး စစ်ကိုင်းမြို့နယ် အထွေထွေအုပ်ချုပ်ရေးမှူး ဦးစီးဌာန ထုတ်ပြန်ချက်မှာ ပါရှိပါတယ်။

ပြီးခဲ့တဲ့မေလ ၂၈ ရက်က စစ်ကိုင်း သီတဂူ ဝိပဿနာ အကယ်ဒမီကို အိန္ဒိယ ကနေ လေကြောင်းခရီးနဲ့ ပြန်လည်ရောက်ရှိလာသူတွေ ရှိပြီး သံဃာတော် ၅၈ ပါး၊ သီလရှင် ၈ ပါးနဲ့ အမျိုးသမီး ၁ ဦး၊ စုစုပေါင်း ၆၇ ဦးဖြစ် တယ်လို့လည်း သိရပါတယ်။

အဲဒီ့ ကိုရိုနာပိုးတွေ့ လူနာတွေကို စစ်ကိုင်းမြို့၊ ပြည်သူ့ဆေးရုံကြီး အထူးကြပ်မတ်ကုသဆောင် Isolated Ward ကို ပြောင်းရွှေ့ပြီး သီးသန့် ဆက်လက်ကုသသွားမယ်လို့လည်း ထုတ်ပြန်ချက်မှာပါ ရှိပါတယ်။

ဓာတ်ပုံ ပုံစာ,

အိန္ဒိယနိုင်ငံက တတိယအသုတ် နဲ့ပြန်လာကြ

ရဟန်းသံဃာနဲ့ သီလရှင် ၆၇ ဦးဟာ အိန္ဒိယနိုင်ငံက တတိယအသုတ်အဖြစ် ပြန်လည် ရောက်ရှိလာခဲ့ကြသူတွေ ဖြစ်ပါတယ်။

ပြီးခဲ့တဲ့ရက်ပိုင်းကလည်း မြန်မာနိုင်ငံကို ပြန်ရောက်လာတဲ့ အိန္ဒိယပြန် ၃ ဦးမှာ ကိုရိုနာ ဗိုင်းရပ်စ်ပိုး တွေ့တယ်လို့ ကျန်းမာရေးနဲ့ အားကစား ဝန်ကြီးဌာနက မေလ ၂၆ ရက်နေ့က ထုတ်ပြန်ခဲ့ပါတယ်။

မေလ ၂၅ ရက်နေ့ကလည်း အိန္ဒိယပြန် တစ်ဦးမှာ ကိုရိုနာ ဗိုင်းရပ်စ် တွေ့ရတယ်လို့ ထုတ်ပြန်ခဲ့ပါတယ်။

အခုထပ်တွေ့ရသူ နှစ်ဦးက မေလ ၂၇ ရက်နေ့က တတိယ အသုတ်ဖြစ် ပြန်ရောက်လာသူတွေ ထဲကဖြစ်ပြီးတော့ အိန္ဒိယပြန် သံဃာ တွေထဲ မှာ အခုကိုရိုနာ ဗိုင်းရပ်စ်ပိုးတွေ့တဲ့ သံဃာနှစ်ပါးဟာ ပထမဆုံးပိုးတွေ့တာလည်း ဖြစ်ပါတယ်။

ဓာတ်ပုံ ပုံစာ,

မေလ ၂၄ ရက် နေ့ က ရန်ကုန်လေဆိပ်ကနေ အိန္ဒိယပြန် တစ်ရာကျော်ပြန်ဝင်လာ

နိုင်ငံခြားရေးဝန်ကြီးဌာနဟာ မြန်မာသံရုံး၊ နယူးဒေလီမြို့နဲ့ မြန်မာနိုင်ငံက သက်ဆိုင်ရာ ဝန်ကြီးဌာနတွေနဲ့ ပူးပေါင်းညှိနှိုင်း ပြီး အိန္ဒိယနိုင်ငံ မှာ အခက်အခဲ ကြုံတွေ့နေကြတဲ့ မြန်မာနိုင်ငံသားတွေကို ကယ်ဆယ်ရေး လေယာဉ်တွေနဲ့ ပြန်လည်ခေါ်ဆောင်လျက်ရှိရာမှာ မေလ ၁၉ ရက်နေ့ က ပထမအသုတ်အဖြစ် မြန်မာနိုင်ငံသား ၉၅ ဦး ခေါ်ဆောင်ခဲ့ပြီးဖြစ်ပြီး မေလ ၂၄ ရက်နေ့ ဒုတိယသုတ်အဖြစ် မြန်မာနိုင်ငံသား ၁၂၃ ဦး ကို မြန်မာအမျိုးသားလေကြောင်းလိုင်း (Myanmar National Airlines-MNA) ကယ်ဆယ်ရေးလေယာဉ်နဲ့ ပြန်လည်ခေါ်ဆောင်ခဲ့တာ ဖြစ်ပါတယ်။

မေလ ၂၇ ရက်မှာ တတိယအသုတ်အဖြစ် လည်း အိန္ဒိယနိုင်ငံ၊ ဂါယာမြို့နဲ့ အနီးအနားဒေသတွေမှာ ရှိတဲ့ မြန်မာနိုင်ငံသားတွေကို ပြန်လည်ခေါ် ဆောင်ခဲ့တယ်လို့လည်း သိရပါတယ်။

ဇွန် ၄ရက် ညပိုင်းအထိ မြန်မာနိုင်ငံမှာ ကိုဗစ်ရောဂါ ဓာတ်ခွဲ အတည်ပြုလူနာ ၂၃၆ ဦး ရှိပြီး ရောဂါပိုးကင်းစင်လာသူ ၁၄၈ ဦး၊ သေဆုံးသူ ၆ ဦး ရှိ တယ်လို့ ကျန်းမာရေး နဲ့ အားကစားဝန်ကြီးဌာနက သတင်းထုတ်ပြန်ထားပါတယ်။