မြန်မာ့ရုပ်ရှင် - မင်းသား သိန်း ၆၀၀၊ မင်းသမီး သိန်း ၃၀၀၊ မင်းသမီးတွေ ဘာကြောင့် အရနည်းသလဲ

Image caption နာမည်ကြီး မင်းသမီး ဝတ်မှုန်ရွေရည်က လက်ရှိ မင်းသမီးတွေထဲမှာ အနုပညာကြေး အများဆုံးလို့ ပြောကြပါတယ်။

မြန်မာ့ရုပ်ရှင်လောကမှာ ဇာတ်ဆောင်မင်းသားက မင်းသမီးထက် ကားရိုက်ခ ပိုရကြတယ်လို့ ရုပ်ရှင် လောကသားတွေက ပြောပါတယ်။

ခေတ်အဆက်ဆက် မင်းသမီးတွေရတဲ့ အနုပညာကြေးထက် မင်းသားတွေက ပိုရခဲ့ကြတာပါ။

အခုခေတ်မှာဆိုရင် အရင်ခေတ်တွေထက်တောင် မင်းသားက မင်းသမီးထက် ကားရိုက်ခ ပိုရကြပါတယ်။

ရုပ်ရှင် သရုပ်ဆောင် အကယ်ဒမီ ဒေါ်ဆွေဇင်ထိုက်က သူ့ခေတ်သူ့အခါကဆိုရင် နာမည်ကြီးသရုပ်ဆောင်ချင်း အတူတူ မင်းသားက မင်းသမီးထက် ၃၀ ရာခိုင်နှုန်း ပိုရပြီး အခုခေတ်မှာ အဲဒီထက်တောင် မင်းသားက ပိုရတယ်လို့ သိရကြောင်း ပြောပါတယ်။

Image caption ၂၀၁၈ ခုနှစ်က အကယ်ဒမီရတဲ့ မင်းသား မြင့်မြတ်က လက်ရှိ မင်းသားစျေးကွက်မှာ ဦးဆောင်နေပါတယ်။

မင်းသားနဲ့ မင်းသမီး ဘယ်လောက်ကွာ

ခေတ်အလိုက် မင်းသားရော မင်းသမီးပါ သရုပ်ဆောင်ခတွေ တိုးလာပေမယ့် ပရိသတ် အကြိုက်ဆုံး နာမည်အကြီးဆုံး မင်းသားနဲ့ မင်းသမီးရဲ့ ဝင်ငွေတွေက အခုချိန်ထိ တန်းတူ မရကြသေးပါဘူး။

ဒီနေ့ခေတ်မှာ ရုပ်ရှင်ဇာတ်ကားကြီးတစ်ကား ရိုက်ဖို့ ကုန်ကျစရိတ်က သိန်း ၁၅၀၀ ကနေ သိန်း ၂၀၀၀ အထိ ရှိတတ်ပြီး ထိပ်တန်း မင်းသားတစ်ယောက်ရဲ့ ကားရိုက်ခက တစ်ကားကို ကျပ်သိန်း ၄၀၀ ကနေ သိန်း ၆၀၀ လောက် အထိရှိတယ်လို့ ကြားရကြောင်း ဒေါ်ဆွေဇင်ထိုက်က ပြောပါတယ်။

မင်းသမီး ကျတော့ သိန်း ၂၀၀ ကနေ သိန်း ၃၀၀ ကျော်လောက် အထိပဲရတယ်လို့ သူက ပြောပါတယ်။

လက်ရှိ အများဆုံးရတဲ့ မင်းသား မင်းသမီးတွေထဲမှာ မြင့်မြတ်၊ ဝတ်မှုန်ရွှေရည်နဲ့ ဖွေးဖွေးတို့ ပါဝင်ပါတယ်။

ရုပ်ရှင်လောကသားတွေရဲ့ အပြောအရ ဝတ်မှုန်ရွှေရည်တို့လို ထိပ်တန်း မင်းသမီးတွေက ဇာတ်ကားတစ်ကားကို သိန်း ၃၀၀ ကျော် ရတဲ့အချိန်မှာ မြင့်မြတ်အပါအဝင် တချို့ ထိပ်တန်း မင်းသားတွေက သိန်း ၈၀၀ ကနေ ၁၀၀၀ လောက်အထိ ရတယ်လို့ ဆိုပါတယ်။

ဓာတ်ပုံ မူပိုင် Grace Swe Zin Hteik Facebook
Image caption နာမည်ကြီးတာချင်း၊ ပါဝင်သရုပ်ဆောင်ရတဲ့ အနေအထားချင်း တူရင် မင်းသား မင်းသမီး အတူတူရသင့်တယ်လို့ အကယ်ဒမီဆွေဇင်ထိုက်က ယူဆပါတယ်။

မင်းသားစျေးကွက်

မြန်မာ့ရုပ်ရှင်လောကမှာ စျေးကွက်ကို ဖော်ဆောင်သူက မင်းသားတွေ ဖြစ်တယ်လို့ ကျယ်ကျယ်ပြန့်ပြန့် ခံယူထားကြတာ ဖြစ်ပါတယ်။

၁၉၉၀ ပြည့်လွန် နှစ်တွေတုန်းက လျှမ်းလျှမ်းတောက် ကျော်ကြားခဲ့တဲ့ အကယ်ဒမီ မို့မို့မြင့်အောင်က သူ သရုပ်ဆောင် မဖြစ်ခင်ကတည်းက မြန်မာရုပ်ရှင်လောကမှာ မင်းသားဦးစားပေး ဇာတ်ကားတွေ ပိုရိုက်ခဲ့ကြတယ်လို့ ပြောပါတယ်။

"မမို့တို့ မပေါ်ခင် ဟိုးအရင်ခေတ်ကဆို မင်းသားအားနည်းတဲ့ ဇာတ်ဆိုရင် မုဆိုးမဇာတ်လို့ ခေါ်ကြတယ်၊ မမို့က အဲဒီ တစ်ခေတ်ကို လှန်ချလိုက်တာပဲ" လို့ ဒေါ်မို့မို့မြင့်အောင်က ဘီဘီစီကို ပြောပါတယ်။

သူ့ခေတ်မှာတော့ မင်းသမီး ဇာတ်တွေကို ပိုဦးစားပေး ရိုက်ကူးခဲ့ပြီး မင်းသားနဲ့ တွဲပေးရုံ ဇာတ်လမ်းမျိုးဆို သိပ်မရိုက်ဘဲ ကိုယ်ကြိုက်တဲ့ ဇာတ်လမ်းတွေကိုသာ လက်ခံ ပြီး ကြိုးကြိုးစားစား ရိုက်ခဲ့တဲ့ အတွက် မင်းသားနဲ့ တန်းတူနီးပါး အနုပညာကြေး ရခဲ့တယ် လို့လည်း သူက ပြောပါတယ်။

မင်းသားကြီး ဦးကျော်ဟိန်းက စတင် စင်တင်ပေးခဲ့ပြီး ၁၉၇၉ ခုနှစ်လောက်က စလို့ သရုပ်ဆောင် ဖြစ်လာခဲ့တဲ့ ဒေါ်မို့မို့မြင့်အောင်က သူ့ခေတ် သူ့အခါက နာမည်ကြီး မင်းသားတွေနီးပါး အနုပညာကြေး ရတယ်ဆိုတာတောင် ပမာဏက အတော် ကွာခြားပါသေးတယ်။

ရွှေတစ်ကျပ်သားကို ၈၀၀၀ ကျပ် စျေး ရှိခဲ့တဲ့ ၁၉၈၉- ၁၉၉၀ ခုနှစ်တွေတုန်းက ခေတ်ပြိုင် နာမည်ကြီး မင်းသား ကိုကျော်သူက ရုပ်ရှင် တစ်ကားကို ၄ သိန်း ရတဲ့ အချိန်မှာ သူက ၃ သိန်းသာ ရခဲ့တယ်လို့ ဒေါ်မို့မို့မြင့်အောင်က ပြောပါတယ်။

အဲဒီ အချိန်က ကျန်တဲ့ မင်းသမီးတွေဆို နှစ်သိန်းအောက်သာ ရကြတယ်လို့ သူက ပြောပါတယ်။

Image caption သူ့ခေတ် သူ့အခါက မင်းသားတွေ နီးနီး အနုပညာကြေးရခဲ့ပေမယ့် မင်းသားတွေနဲ့တန်းတူ ရဖို့က မဖြစ်နိုင်ဘူးလို့ အကယ်ဒမီ မို့မို့မြင့်အောင်က ပြောပါတယ်။

မင်းသမီးတွေ ဘာကြောင့် အရနည်း

အနုပညာကြေး တန်းတူမရတာက အမျိုးသား အမျိုးသမီး တန်းတူညီမျှမှု မရှိတာကြောင့်လို့ ထင်မြင် ယူဆကြသူတွေ ရှိပေမဲ့ မင်းသမီးတွေ ကိုယ်တိုင်က တန်းတူရဖို့ မတောင်းဆို ကြတာလည်းပါတယ်လို့ တချို့က သုံးသပ်ပါတယ်။

ဒါဟာ ကိုယ့်အနုပညာကို ငွေကြေးနဲ့ တန်ဖိုး မဖြတ်ချင်တာက တစ်ကြောင်း၊ အလုပ်ဖြစ်ပါစေ ဆိုတဲ့သဘောနဲ့ ထုတ်လုပ်သူတွေ ပေးတဲ့ ကြေးကိုပဲ မင်းသမီးတွေက လက်ခံလိုက်ကြတာက တစ်ကြောင်းကြောင့် ဖြစ်တယ်၊ ဒါက အစဉ်အလာ ဖြစ်သွားတာလို့ အကယ်ဒမီ ဒေါ်ဆွေဇင်ထိုက်က ပြောပါတယ်။

မင်းသမီးတွေ ကိုယ်တိုင်က အမျိုးသမီး ဦးဆောင်တဲ့ စျေးကွက်တစ်ခု ဖြစ်အောင် မလုပ်ခဲ့မိသလို ကိုယ့်အခွင့်အရေးကို ကိုယ်မတောင်းခဲ့မိဘူးလို့ ဒေါ်ဆွေဇင်ထိုက်က ပြောပါတယ်။

တစ်ဘက်မှာလည်း ရုပ်ရှင်ကြည့် ပရိသတ် အများစုက မိန်းကလေးတွေ ဖြစ်လို့ မင်းသားကို အားပေးသူများတယ်လို့ ဒါရိုက်တာ ကြည်ဖြူသျှင်က ဘီဘီစီကို ပြောပါတယ်။

ဒါကြောင့် ထုတ်လုပ်သူတွေ ကလည်း ဇာတ်လမ်းရွေးတာကအစ မင်းသားဦးဆောင်တဲ့ ဇာတ်ကို ရွေးကြတာများတယ်လို့ သူ ကပြောပါတယ်။

ဒီလိုအစဉ်အလာ ဖြစ်နေတဲ့ စျေးကွက်မှာ မင်းသားတွေနဲ့ အနုပညာကြေး တန်းတူရဖို့ က ဖြစ်နိုင်ခြေ မရှိဘူးလို့ အကယ်ဒမီ မို့မို့မြင့်အောင် ကလည်း ပြောပါတယ်။

တန်းတူရဖို့ ဘာအပြောင်းအလဲ လုပ်ဖို့လိုလဲ

သရုပ်ဆောင်တဲ့ အပိုင်းမှာ တာဝန်ယူရတာချင်း အတူတူ ဆိုရင် မင်းသားနဲ့ မင်းသမီး တန်းတူ ညီမျှ အနုပညာကြေးရသင့်တယ်လို့ ဒေါ်ဆွေဇင်ထိုက်က ပြောပါတယ်။

တချိန်က သူနဲ့ မင်းသား ဦးကျော်ဟိန်း ရုပ်ရှင်ကား အတူ ရိုက်ခဲ့ရာမှာ "ကျွန်မတို့က အထိုး အခုတ် ဆိုတဲ့ ကားမျိုးကိုလည်း ရိုက်ကြတာပဲ၊ အပြေးအလွှား ကားမျိုးကိုလည်း ရိုက်ကြတာပဲ၊ သီချင်းလည်း ဆိုရတယ်၊ တခါတရံ စိတ်ဆိုးရင် အိမ်မှာ ပြောဖြစ်တယ်လေ၊ ငါလည်းပဲ သူ့လိုပဲ ထိုးဟယ်၊ ခုတ်ဟယ် ပြေးဟယ် လွှားဟယ်၊ သီချင်း ဆိုတော့လည်း ဆိုတာပဲ၊ ရယ်စရာပြောတော့လည်း ပြောရတာပဲ၊ အဲဒီလို လုပ်ရက်သားနဲ့ သူက ဘာတစ်ခု ငါ့ထက်ပိုသာ နေတာလဲ၊ ဘာလို့ သူက အခွင့်အရေးတွေ ပိုရနေတာလဲလို့ ငယ်ငယ်က စိတ်နဲ့ ပြောခဲ့ဖူးပါတယ်"လို့ ဒေါ်ဆွေဇင်ထိုက်က ပြောပါတယ်။

အမျိုးသမီးတွေရဲ့ အခန်းကဏ္ဍကို လေးစားတဲ့ ဝန်းကျင် အသိုင်းအဝိုင်းတစ်ခု ထူထောင်နိုင်မယ်ဆိုရင်တော့ တန်းတူညီမျှမှုရှိလာလိမ့်မယ်လို့ ဒေါ်ဆွေဇင်ထိုက်က ပြောပါတယ်။

''အခုလည်း တဖြည်းဖြည်းနဲ့ အမျိုးသမီး ထုတ်လုပ်သူတွေ ပေါ်လာတယ်၊ အမျိုးသမီး ဒါရိုက်တာတွေ ပေါ်လာတဲ့ အတွက် နောင် ၁၀ နှစ်လောက်မှာတော့ ဖြစ်လာနိုင်မယ်''လို့ သူက မျှော်လင့်ပါတယ်။

Image caption လက်ရှိ နာမည်အကြီးဆုံး မင်းသား မင်းသမီးတွေထဲမှာ ဖွေးဖွေးနဲ့ နေတိုးတို့လည်း ပါဝင်ပါတယ်။

ရိုက်ကူးထုတ်လုပ်ရေးပိုင်းမှာ ပုံသေကုန်ကျတဲ့ စရိတ်နဲ့ ညှိနှိုင်းလို့ရတဲ့ အနုပညာကြေးပိုင်း ကုန်ကျစရိတ်ဆိုပြီး ရှိပါတယ်။

အဲဒီ အနုပညာကြေးပိုင်းမှာ မင်းသားကို ကုန်ကျစရိတ်ရဲ့ ဘယ်လောက် ရာခိုင်နှုန်းပေးမယ်လို့ သတ်မှတ်ထားတဲ့ တွက်ချက်မှုပုံစံကို ပြောင်းလဲဖို့ လိုတယ်လို့ ဒေါ်ဆွေဇင်ထိုက်က ပြောပါတယ်။

အဲဒီလို ပုံစံထက် ကန်ထရိုက်ထဲမှာ မင်းသားနဲ့မင်းသမီး ပါဝင်ရိုက်ကူးရမယ့် ဇာတ်လမ်းဇာတ်ကွက် အခန်းစဉ်ကို အတိအကျဖော်ပြပြီး အခန်းဘယ်လောက်ပါရင် ဘယ်လောက် ပေးရမယ်ဆိုတဲ့ အလေ့အကျင့်မျိုး လုပ်ဖို့ ကောင်းတယ်လို့ လည်း သူက ပြောပါတယ်။

အရင်ခေတ်က မင်းသမီးတွေအတွက် ညီအစ်မတွေနဲ့ မိခင်တွေကသာ မန်နေဂျာတွေ အဖြစ် ဆောင်ရွက်ပေးကြပေမဲ့ အခုခေတ်မှာတော့ မန်နေဂျာတွေ ခန့်ထားလာတာ ရှိပါတယ်။

အဲဒီ မန်နေဂျာတွေက စာချုပ် ချုပ်တဲ့ အချိန်မှာ မင်းသမီးတွေ တာဝန်ယူရိုက်ပေးရမယ့် အခန်းတွေ၊ ငွေကြေးကိစ္စတွေကို ညှိနှိုင်း ဆောင်ရွက်သင့်တယ်လို့ လည်း ဒေါ်ဆွေဇင်ထိုက်က အကြံပြုပါတယ်။

ဒါပေမယ့် အဲဒီမန်နေဂျာတွေရဲ့ အရည်အသွေးပိုင်း မြင့်တက်အောင် လုပ်ဆောင်ကြဖို့လည်း လိုတယ်လို့ သူက ပြောပါတယ်။

ဆက်စပ် အကြောင်းအရာများ