အဆိုတော် ဖြိုးပြည့်စုံဆီက မိတာ သကြားလုံးလား

ဖြိုးပြည့်စုံ ဓာတ်ပုံ မူပိုင် ဖြိုးပြည့်စုံ FB
Image caption "ဖမ်းမိတဲ့ ပစ္စည်း တွေက မူးယစ်ဆေးဝါးမဟုတ်ပါ" - ရဲမှူးသိန်းဝင်း

အဆိုတော် ဖြိုးပြည့်စုံ နဲ့ လူငယ်နှစ်ဦးကို မြန်မာပလာဇာမှာ ရဲတပ်ဖွဲ့က အောက်တိုဘာ လ ၇ ရက်က ဝင်ရောက်ဖမ်းဆီးခဲ့ပြီး ဖမ်းမိတဲ့ ပစ္စည်းတွေက မူးယစ်ဆေးဝါးမဟုတ်တာကြောင့် အောက်တိုဘာလ ၉ရက်နေ့ မှာ ပြန်လွှတ်လိုက်တယ်လို့ ဗဟန်းမြို့မရဲစခန်းက ရဲမှူးသိန်းဝင်းက သတင်းထောက်တွေကို ပြောပါတယ်။

သူတို့ကို မြန်မာနိုင်ငံ မူးယစ်ရဲတပ်ဖွဲ့က ဖမ်းဆီးခဲ့တာ ဖြစ်ပြီးတော့ ဗဟန်းရဲစခန်းမှာ အောက်တိုဘာလ ၇ ရက်ကလာပြီး အမှုဖွင့်ခဲ့တာလည်း ဖြစ်ပါတယ်။

"ဖမ်းမိတဲ့ပစ္စည်းတွေက မူးယစ်ဆေးဝါး မဟုတ်ပါ။ ဒါကြောင့် တရားစွဲဆိုဖို့ မသင့်ပါလို့ ဥပဒေအကြံပြုချက်က ပြန်ကြားပါတယ် "လို့ ဖြိုးပြည့်စုံကို ပြန်လွှတ်ပေးခဲ့တာနဲ့ ပတ်သက်လို့ ဗဟန်းမြို့မရဲစခန်းက ရဲမှူးသိန်းဝင်းက သတင်းထောက်တွေကို ပြောခဲ့တာ ဖြစ်ပါတယ်။

အောက်တိုဘာ ၇ ရက် ညနေပိုင်းက မြန်မာပလာဇာက ကော်ဖီဆိုင်တစ်ဆိုင်မှာ ရှိနေတဲ့ ဖြိုးပြည့်စုံနဲ့ တေးရေးနှစ်ဦးကို မူးယစ်ရဲတပ်ဖွဲ့က ဖမ်းဆီးခဲ့တာဖြစ်ပြီး ကျပ်တစ်သောင်းကျော်တန်ဖိုးရှိ ကက်တမင်းဆေးပြား ၁၀ပြားနဲ့အတူ ဖမ်းမိတာဖြစ်တယ်လို့ မူးယစ်ဗဟိုတပ်ဖွဲ့ ဖေ့စ်ဘွတ်စာမျက်နှာက အောက်တိုဘာ ၈ ရက်မနက်ပိုင်းက ထုတ်ပြန်ခဲ့ပါတယ်။

ဓာတ်ပုံ မူပိုင် NAy Myo
Image caption ဖြိုးပြည့်စုံ ဆီကမိတာ နဲ့တူတဲ့ ငုံဆေးပြား

အဆိုတော် ဖြိုးပြည့်စုံ၊ တေးရေး ငြိမ်းချမ်းကို နဲ့ ရော်နီစန်းလွင်တို့ဟာ ကျောပိုးအိတ်အတွင်းမှာ ပလတ်စတစ်ဘူးနဲ့ ထည့်ထားတဲ့ ကတ်တမင်းဆေးပြား ၁၀ ပြား လို့ ယူဆရတဲ့ ဆေးပြားနဲ့ လက်ကိုင်ဖုန်း ၃ လုံးတို့နဲ့အတူတွေ့ရှိ သိမ်းဆည်းရမိခဲ့လို့ ဗဟန်းမြို့မရဲစခန်းမှာ မူးယစ်ဆေးဝါးနှင့် စိတ်ကိုပြောင်းလဲ စေသော ဆေးဝါးများဆိုင်ရာ ဥပဒေနဲ့ အမှုဖွင့်အရေးယူပြီး ဖော်ထုတ်စစ်ဆေးခဲ့တာ ဖြစ်ပါတယ်။

အခုအဖမ်းခံရတဲ့ အခြေအနေနဲ့ပတ်သက်လို့ အောက်တိုဘာလ ၁၀ရက်နေ့မှာ အဆိုတော် ဖြိုးပြည့်စုံ က ရန်ကုန်မှာ စာနယ်ဇင်းရှင်းလင်းပွဲ လုပ်သွားမယ်လို့ အဆိုတော် ဖြိုးပြည့်စုံနဲ့ နီးစပ်သူတစ်ဦးက ဘီဘီစီကို ပြောပါတယ်။

ဖြိုးပြည့်စုံတို့ဆီက ဖမ်းမိတာဟာ ထိုင်းနိုင်ငံထုတ် ငုံဆေးပြား သကြားလုံးနဲဆင်တူတဲ့ ဆေးပြားတွေဖြစ်ပြီးတော့ ဗဟန်းမြို့မရဲစခန်းက ရဲမှူးသိန်းဝင်းကတော့ သူကိုယ်တိုင် ဒီဆေးပြားတွေကို မမြင်ဖူးဘူးလို့လည်း သတင်းထောက်တွေကို ပြောပါတယ်။

မူးယစ်ဆေးဝါးတွေအများကြီးကျွန်တော်ဖမ်းဖူးပါတယ်။ ဒီလိုပုံစံ ဆေးပြားတော့မတွေ့ဖူးပါဘူးလို့လည်း ရဲမှူးသိန်းဝင်း ကပြောခဲ့ပါတယ်

ဖြိုးပြည့်စုံ ကိုယ်တိုင်ကလည်း ဒီဟာတွေကို ထိုင်းက သူကိုယ်တိုင် ဝယ်လာတာလို့ ပြောပါတယ် ။

ဗဟန်းမြို့မရဲစခန်းကတော့ အောက်တိုဘာလ ၇ရက်က မူးယစ်ရဲတပ်ဖွဲ့ရဲ့ တိုင်ကြားချက်အရ ပုဒ်မ ၁၉ က /၂၁ နဲ့ အမှုဖွင့်ခဲ့တာ ဖြစ်ပါတယ်။

အမှုဖွင့်ထားတဲ့ တေးသံရှင် ဖြိုးပြည့်စုံအပါအဝင် သုံးဦးကို ပြန်လွှတ်တဲ့ အကြောင်းနဲ့ပတ်သက်ပြီး ဓာတုဗေဒဝန်ရုံးက ပြန်ကြားချက်အရ မူးယစ်ဆေးဝါး မဟုတ်ခြင်း အရသော်လည်းကောင်း၊ ဥပဒေရုံးက တရားစွဲဆိုရန် မသင့်ကြောင်း အကြံပြုချက်အရလည်းကောင်း အောက်တိုဘာ လ ၉ ရက် ညနေ ၄ နာရီလောက်က အချုပ်က လွှတ်လိုက်ပြီ လို့လည်း ရဲတပ်ဖွဲ့က ပြောပါတယ်။

အဆိုတော် ဖြိုးပြည့်စုံဆီက ရဲတွေမိတာဟာ မူးယစ်ဆေးဝါးမဟုတ်ဘူးလို့သာ ပြောပြီး ဆင်တူတဲ့ ထိုင်းနိုင်ငံထုတ် သကြားလုံး ဟုတ်မဟုတ်ကိုတော့ ရဲတပ်ဖွဲ့က မပြောခဲ့ပါဘူး။

အဆိုတော်ဖြိုးပြည့်စုံ ဟာ လူငယ်တွေ အကြားမှာ လူသိများတဲ့ ဆရာဝန် အဆိုတော်တစ်ဦးဖြစ်ပြီး မယ်လိုဒီဝေါ အစီစဉ်မှာ လူသိများတဲ့ အစီစဉ်တင်ဆက်သူတစ်ဦးလည်းဖြစ်ပါတယ်။