တပ်ချုပ်ကို ဆုပေးသင့်ပေးထိုက်လို့ ဖော်ထုတ်ပြီးပေးတာပါလို့ YMBAအသင်းကရှင်း

ဓာတ်ပုံ မူပိုင် တပ်မတော်ကာကွယ်ရေးဦးစီးချုပ်ရုံး
Image caption တိုင်းပြည်ငြိမ်းချမ်းရေးကိစ္စတွေကို တစိုက်မတ်မတ် ဆောင်ရွက်နေတာကလည်း အကဲဖြတ်ချက်မှာပါတယ်လို့ဆို

တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ကို မဟာမင်္ဂလဓမ္မဇောတိကဓဇဘွဲ့ ပေးအပ်ချီးမြှင့်ခဲ့တာဟာ ပေးသင့်ပေးထိုက်လို့ ဖော်ထုတ်ပြီးပေးတာပါလို့ ဗုဒ္ဓဘာသာကလျာဏယုဝအသင်း YMBAအထွေထွေအတွင်းရေးမှူး ဦးသောင်းဝင်းက ဘီဘီစီကို ပြောပါတယ်။

တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကို ဆုပေးဖို့အတွက် အမှုဆောင် အဖွဲ့ ဆုံးဖြတ်ချက် အပါအဝင်၊ အသင်းရဲ့ စည်းမျဉ်း ဥပဒေနဲ့အညီ ပေးခဲ့တာ ဖြစ်တယ်လို့ အောက်တိုဘာလ ၁၀ရက် ရန်ကုန်မှာ ပြုလုပ်တဲ့ သတင်းစာရှင်းလင်းပွဲ မတိုင်မီမှာ ဘီဘီစီကို ပြောခဲ့တာဖြစ်ပါတယ်။

ဗိုလ်ချုပ်မှူးကြီး မင်းအောင်လှိုင်ဟာဒီဆုကို ပြီးခဲ့တဲ့ အောက်တိုဘာလ ၇ ရက်မှာ ရန်ကုန်မြို့မှာ လက်ခံခဲ့ပါတယ် ။

ဓာတ်ပုံ မူပိုင် တပ်မတော်ကာကွယ်ရေးဦးစီးချုပ်ရုံး
Image caption အချက် ၆ ချက် အရ အကဲဖြတ်ပြီးပေးခဲ့တာလို့ (YMBA)အသင်း က ပြော

ရခိုင်ပြည်နယ် မြောက်ပိုင်းက မွတ်ဆလင်တွေကို လူမျိုးတုံးသတ်ဖြတ်မှုနှင့် ဥပဒေမဲ့ ရှင်းလင်းဖယ်ရှားမှုတွေ အပါအဝင် ဆိုးရွားတဲ့ လူ့အခွင့်အရေးချိုးဖောက်မှု လုပ်ရပ်တွေကြောင့်ဆိုပြီး ဗိုလ်ချုပ်မှူးကြီး မင်းအောင်လှိုင်အပေါ် နိုင်ငံတကာက ဝေဖန်ဖိအားပေးတာတွေ ရှိနေပါတယ်။

တပ်ချုပ်ကို ဆုပေးတာဟာ အချက် ၆ ချက် အရ အကဲဖြတ်ပြီး ပေးခဲ့တာလို့လည်း ဗုဒ္ဓဘာသာကလျာဏယုဝအသင်း YMBAအသင်း က အထွေထွေအတွင်းရေးမှူး ဦးသောင်းဝင်း ကပြောပါတယ်။

ဘွဲ့တံဆိပ်ပေးအပ်ရတဲ့ အကြောင်းအရင်းတွေထဲမှာ အမျိုး၊ဘာသာ၊သာသနာနဲ့ ပညာကို စောင့်ရှောက်တာ၊ တိုင်းပြည်ငြိမ်းချမ်းရေးကိစ္စတွေကို တစိုက်မတ်မတ်ဆောင်ရွက်နေတာ၊ ခေတ်မီတပ်မတော် တည်ဆောက်နိုင်တာ၊၊ သာသနာရေးဆိုင်ရာကိစ္စ၊ တိုင်းပြည်တည်ငြိမ်ရေး၊ ပြည်သူတွေရဲ့ အသက်အိုးအိမ်ကို စောင့်ရှောက်တာနဲ့ ဘာသာ၊လူမျိုး မခွဲခြားဘဲ လူသားချင်းစာနာတဲ့ ခေါင်းဆောင်ဖြစ်တာ စတဲ့ အချက်အလက်တွေ ပါဝင်တယ်လို့ သူကပြောပါတယ်။

နိုင်ငံတကာကဝေဖန်တဲ့ ရခိုင်မြောက်ပိုင်း မျိုးတုံးသတ်ဖြတ်မှုနဲ့ ဥပဒေမဲ့ ရှင်းလင်းဖယ်ရှားမှုများ နဲပတ်သက်လို့ တပ်ချုပ်မှာ တာဝန်ရှိတယ်ဆိုတာတွေကိုတော့ နိုင်ငံရေးကိစ္စတွေဖြစ်တယ် လို့လည်း ဦးသောင်းဝင်းကပြောပါတယ်။

ဓာတ်ပုံ မူပိုင် တပ်မတော်ကာကွယ်ရေးဦးစီးချုပ်ရုံး
Image caption ၁၉၉၀ နောက်ပိုင်း ပထမဆုံးစစ်ဘက်ခေါင်းဆောင် တစ်ဦးကို(YMBA)အသင်းကပေးအပ်တာဖြစ်ပါတယ်။

အဓိကကတော့ တပ်ချုပ်ဟာ ဘာသာခြားတွေ ရော အကုန်လုံးလှူတာတွေ လုပ်နေတာတွေ့ ရလို့ပေးတာဖြစ်ပါတယ်လို့လည်း ဦးသောင်းဝင်းကပြောပါတယ်။

YMBAအသင်းဟာ ဘာသာ၊သာသနာထွန်းကားအောင် ဆောင်ရွက်ပေးတဲ့ လူပုဂ္ဂိုလ်နဲ့ သံဃာတော်တွေကို ရွေးချယ် ပေးအပ်တာဖြစ်ပြီး အခု တပ်မတော် ကာကွယ်ရေးဦးစီးချုပ်ကို ပေးတာကတော့ ၁၉၉၀ နောက်ပိုင်း ပထမဆုံးစစ်ဘက်ခေါင်းဆောင် တစ်ဦးကိုပေးအပ်တာဖြစ်ပါတယ်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ကို ဗုဒ္ဓကလျာဏယုဝအသင်းကြီးYMBA က 'မင်္ဂလဓမ္မ ဇောတိကဓဇဘွဲ့နဲ့ အသင်းရဲ့ ရာသက်ပန် နာယကကြီးဘွဲ့ကို ရန်ကုန်မြို့မှာ အောက်တိုဘာ၇ရက်က ပေးအပ်ခဲ့တာလည်း ဖြစ်ပါတယ် ။

YMBA က အခုလိုမျိုး ဆုတွေပေးလာတာဟာ ရဟန်း၊ သံဃာနဲ့ လူ၊ ပုဂ္ဂိုလ် စုစုပေါင်း၇၀ လောက်ရှိပြီ ဖြစ်ပါတယ် ။

ဓာတ်ပုံ မူပိုင် တပ်မတော်ကာကွယ်ရေးဦးစီးချုပ်ရုံး
Image caption YMBA အသင်းကို ဝေဖန်မှုတွေ ကတော့ နိုင်ငံရေးထိုးနှက်တာဖြစ်တယ်လို့ပြော

တပ်ချုပ်ကို ဆုပေးတာတွေနဲ့ ပတ်သက်ပြီး YMBA အသင်းကို ဝေဖန်မှုတွေကတော့ နိုင်ငံရေးထိုးနှက်တာ ဖြစ်တယ်လို့ လည်း YMBA က ပြောပါတယ်။

ပြီးခဲ့တဲ့ ဇူလိုင်လကလည်း YMBA အနေနဲ့ ဒီဘွဲ့ကို သာသနာရေးဝန်ကြီးဌာန၊ ပြည်ထောင်စုဝန်ကြီး သူရဦးအောင်ကိုကို ပေးအပ်ချီးမြှင့်ခဲ့ပါသေးတယ်။

ဗုဒ္ဓဘာသာကလျာဏယုဝအသင်း YMBA ကို ၁၉ဝ၆ ခုနှစ်ကတည်းက ထူထောင်ခဲ့တာဖြစ်ပြီး အရင်က နိုင်ငံရေးကိစ္စတွေလုပ်ဆောင်ခဲ့ပေမယ့် အခုနောက်ပိုင်းမှာတော့ အမျိုး၊ ဘာသာ၊ သာသနာနဲ့ဆိုင်တဲ့ လုပ်ငန်းတွေကို ဆောင်ရွက်နေတာဖြစ်ပါတယ်။

ဆက်စပ် အကြောင်းအရာများ