ကန့်ကွက် ဆန္ဒပြမှုတွေ ကြုံရနိုင်တဲ့ ဒေါ်အောင်ဆန်းစု ကြည်ရဲ့ ဂျပန် ခရီး

နိုင်ငံတော် အတိုင်ပင်ခံ ဓာတ်ပုံ မူပိုင် Getty Images
Image caption ၂၀၁၈ ခုနှစ် မဲခေါင် ဂျပန် ထိပ်သီး အစည်အဝေးအတွက် ဂျပန်နိုင်ငံကို ရောက်နေတဲ့ နိုင်ငံတော် အတိုင်ပင်ခံ

ဒေါ်အောင်ဆန်းစုကြည်ရဲ့ ဂျပန်နိုင်ငံ ခရီးစဉ် အတွင်းမှာ ဂျပန်ရောက် ရခိုင်တိုင်းရင်းသားတွေက ဆန္ဒပြဖို့ စီစဉ်နေတယ်လို့ ဆန္ဒပြ ပွဲကို ဦးဆောင်စီစဉ်သူတစ်ဦးဖြစ်တဲ့ ဦးမောင်သန်းက ဘီဘီစီကို ပြောပါတယ် ။

အောက်တိုဘာလ ၂၁ ရက် မှာ တိုကျိုမြို့က မြန်မာသံရုံးကို ဒေါ်အောင်ဆန်းစုကြည် ရောက်လာချိန်မှာ ဆန္ဒပြမှာ ဖြစ်ပြီးတော့ ဂျပန်ရောက်နေတဲ့ ရခိုင်တိုင်းရင်းသား အနည်းဆုံး အယောက် ၄၀ လောက် ပါဝင်မှာ ဖြစ်သလို ကျန်တဲ့ အဖွဲ့တွေကိုလည်း ပူးပေါင်းဖို့ ဖိတ်ခေါ်ထားတယ်လို့လည်း သူက ပြောပါတယ်။

ဒီဆန္ဒပြပွဲကို ရိုဟင်ဂျာအရေး လူပ်ရှားသူတွေလည်း ပါဝင်ဖို့ရှိပြီး ရက္ခိုင်လူငယ်များ အစည်းရုံးရဲ့ အရင်ဆန္ဒပြပွဲတွေထက် အားကောင်းဖို့ရှိတယ်လို့လည်း ဂျပန်ရောက် မြန်မာ အသိုင်းအဝိုင်းက ပြောပါတယ် ။

ရခိုင်တိုက်ပွဲနဲ့ တိုက်ရိုက် ဆက်စပ်တဲ့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ရဲ့ မကြာခင်ရက်ပိုင်း က ဂျပန်ခရီးစဉ်တုန်းက ဆန္ဒမပြခဲ့တာဘာကြောင့်လဲ ဆိုတာနဲ့ ပတ်သက်လို့ အရပ်သားအစိုးရ ခေါင်းဆောင်ကို သာ ဆန္ဒပြလိုတာဖြစ်ပြီး စစ်ခေါင်းဆောင်ကို ဆန္ဒမပြ လိုတာကြောင့်လို့လည်း ဘီဘီစီကို ပြောပါတယ်။

ဒေါ်အောင်ဆန်းစုကြည် ဂျပန်ကို ဘာကြောင့်လာတာလဲ

ဒေါ်အောင်ဆန်းစုကြည်ဟာဂျပန် ဧကရာဇ် ရဲ့ထီးနန်းဆက်ခံ ပွဲကို တက်ရောက် ဖို့ ဖိတ်ကြားခံရတာဖြစ်ပြီးတော့ အောက်တိုဘာ လ ၂၁ ရက် ကနေ၂၃ ရက် အထိ ၃ရက် ကြာ ခရီးစဉ် ဖြစ်ပါတယ်။

မြန်မာအစိုးရဘက်က သတင်း မထုတ်ပေမယ့် ဂျပန်ဘက် ကတော့ ဒေါ်အောင် ဆန်းစုကြည် ဒီအခမ်းနားကို တက်မယ်ဆိုတာ တော်တော်များများ ကြိုသိနေကြပါတယ်။

အောက်တိုဘာလ ၂၁ ရက် ညနေပိုင်း တိုကျို မြန်မာသံရုံးကို ရောက်လာတဲ့ အချိန်မှာ ဆန္ဒပြ ဖို့စီစဉ်ထားကြတာလည်း ဖြစ်ပါတယ်။

ဒီလို ဆန္ဒပြ မှုကြောင့် ဂျပန်နိုင်ငံမှာနေထိုင်တဲ့ ရခိုင် အဖွဲ့အစည်းအတွက် ဂျပန်အစိုးရဘက် က ဖိအားပေးခံရမှုတွေ မရှိနိုင်ဘူးလို့လည်း ဦးမောင်သန်းက ပြောပါတယ် ။

ဓာတ်ပုံ မူပိုင် Getty Images
Image caption ဂျပန်-မြန်မာ နှစ်နိုင်ငံခေါင်းဆောင်တွေ တွေ့ဖို့ရှိ

ဂျပန် ခရီးစဉ်တွင်းမှာ ဘယ်သူတွေနဲ့တွေ့မှာလည်း

ဒေါ်အောင်ဆန်းစုကြည် ခရီးစဉ်အတွင်းမှာ ဂျပန်စီးပွားရေးလုပ်ငန်းရှင်တွေဟာ ဂျပန်ကို ဒေါ်အောင်ဆန်းစုကြည်ရောက်တဲ့အခါ တွေ့ဆုံဆွေးနွေးနိုင်ဖို့ စာရင်းပေးထားတာတွေလည်း ရှိပါတယ်။

ဒါ့အပြင် တိုကျို မြန်မာသံရုံးကိုလည်းရောက်လာဖို့ ရှိပါတယ်။

၂၀၁၈ ခုနှစ် မဲခေါင် ဂျပန်ထိပ်သီး အစည်အဝေး အတွက် ဂျပန်နိုင်ငံကို နိုင်ငံတော် အတိုင်ပင်ခံ ဒေါ်အောင်ဆန်းစုကြည်ရောက်တုန်းက မြန်မာ အစိုးရရဲ့ ရိုဟင်ဂျာ ပဋိပက္ခ ကိုင်တွယ်ပုံတွေမှာ ပိုပြီး ပွင့်လင်းမှုတွေ ရှိလာစေရမယ် ဆိုပြီး နိုင်ငံခြားရင်းနှီးမြှုပ်နှံမှုတွေကို ဖိတ်ခေါ်ခဲ့ပါတယ်။

ငြိမ်းချမ်းရေးရဖို့ ကြိုးစားရုန်းကန်နေရသလို ရခိုင်နဲ့ ပတ်သက်ပြီး ဖြေရှင်းဖို့မှာလည်း စိန်ခေါ်တာတွေ ရှိနေတာကို ဝန်ခံဖို့ အသင့်ရှိတယ်လို့ ဂျပန် စီးပွားရေး သမားတွေနဲ့ တွေ့ဆုံရာမှာ ဒေါ်အောင်ဆန်းစုကြည်က ပြောခဲ့ပါတယ်။

နိုင်ငံခြား ရင်းနှီးမြှုပ်နှံမှုတွေကို ခေါ်ယူဖို့ အတွက် ငြိမ်းချမ်းတည်ငြိမ်မှုတွေ ရှိဖို့လိုကြောင်း သူသိပါတယ်လို့လည်း အဲ့ဒီဆွေးနွေးပွဲမှာ ပြောကြားခဲ့ပါတယ်။

အခု၂၀၁၉ ခရီးစဉ်မှာ ဒေါ်အောင်ဆန်းစုကြည် ဦးဆောင် တဲ့ မြန်မာ ကိုယ်စားလှယ်အဖွဲ့ မှာ အဖွဲ့ဝင် ၂၀ လောက် လိုက်ပါလာဖို့လည်း ရှိပါတယ်။

ဓာတ်ပုံ မူပိုင် cnds
Image caption တပ်ချုပ် ဂျပန်မှာရှိတဲ့ သံရုံး ဝန်ထမ်းတွေနဲတွေ့

ဒေါ်အောင်ဆန်းစုကြည် ခရီးစဉ် မတိုင်မီ တပ်ချုပ်ဂျပန် ခရီး

တပ်ချုပ်ဟာ ဂျပန်ဧကရာဇ်ရဲ့ ထီးနန်းဆက်ခံပွဲနဲ့ ရက်ကပ်ပြီး ဂျပန်ကိုရောက်သွားခဲ့ပါတယ်။ သူ့ခရီးစဉ်အတွင်းမှာ ဂျပန်ဝန်ကြီးချုပ်နဲ့ တွေ့ခဲ့သလို ဂျပန်မှာရှိတဲ့ မြန်မာသံရုံးဝန်ထမ်းတွေနဲ့ သွားရောက်တွေ့ဆုံခဲ့ပါသေးတယ်။

တပ်ချုပ်ရောက်လာတာကို သိပေမယ့် ၂၀၀၈အခြေခံ ဥပဒေအရ သမ္မတဟာ တပ်ချုပ်ကို အမိန့်ပေးရမှာ ဖြစ်သလို သမ္မတ အထက်က နိုင်ငံတော်အတိုင်ပင်ခံကပိုပြီး တာဝန်ရှိတယ်လို့ ယူဆတဲ့ အတွက် ရခိုင်စစ်ပွဲတွေ ရပ်တန့်ဖို့ နဲ့ ရခိုင် လူမျိုး ဒုက္ခသည်တွေကို ကူညီဖို့ တောင်းဆိုမှာ ဖြစ်တယ်လို့လည်း ဦးမောင်ဦးက ပြောပါတယ်။

ဘာကြောင့်ဒေါ်အောင်ဆန်းစုကြည်ကို ဆန္ဒပြရတာလဲ

ဒေါ်အောင်ဆန်းစုကြည်ကို ရခိုင်တွေ ဆန္ဒပြရတဲ့ အဓိက အကြောင်းအရင်းကတော့ ရခိုင်ပြည်နယ်ကတိုက်ပွဲတွေ နဲ့ ဆက်စပ်ပါတယ် ။

ဒေါ်အောင်ဆန်းစုကြည်ဟာ အေအေ အဖွဲ့ ကိုအမြစ်ဖြတ်ခြေမှုန်းဖို့ အမိန့််ထုတ်ထားတယ်လို့ အခု ဆန္ဒပြမယ့်သူတွေဘက်က ယူဆချက်လည်း ရှိပါတယ်။

ဒါ့အပြင် ရခိုင်ပြည်နယ်က ဒုက္ခသည်တွေ အရေးအပါအဝင် အင်တာနက် အဆက်အသွယ် ဖြတ်တောက်ထားတာ၊ ရခိုင်ပြည်နယ် စစ်ပွဲတွေကို ရပ်တန့်အောင် မလုပ်နိုင်တာတွေနဲ့ ပတ်သက်ပြီး တာဝန်ရှိတဲ့အတွက် ဂျပန်ရောက် ရခိုင်တိုင်းရင်သားတွေက အခုလို ဆန္ဒပြရတာဖြစ်တယ်လို့လည်း ဦးမော်သန်းက ပြောပါတယ်။

ဒေါ်အောင်ဆန်းစုကြည်ကို ထောက်ခံသူ မြန်မာနိုင်ငံသားတွေကတော့ ဆန္ဒပြပွဲ ဟာ လူ ၁၅ ယောက်နဲ့ အယောက် ၂၀ ကြား ဆန္ဒပြပွဲလောက်ပဲ ဖြစ်နိုင်တယ်လို့လည်း သုံးသပ်ကြပါတယ်။

ဘယ်သူတွေပါနိုင် သလဲ

ဒေါ်အောင်ဆန်းစုကြည်ကို ဆန္ဒပြမယ့် ဂျပန်ရောက် ရခိုင်တွေဟာ ဒေါက်တာအေးမောင် အုပ်စုလို့ လူသိများတဲ့ ရခိုင်တွေဖြစ်တယ်လို့လည်း ဂျပန်ရောက် မြန်မာတွေက ပြောပါတယ်။

ဒီအဖွဲ့ ရှိသလို ဒေါ်အောင်ဆန်းစုကြည်ကို ထောက်ခံတဲ့ ဦးအေးသာအောင် အုပ်စုတွေလည်း ဂျပန်မှာရှိတယ်လို့လည်း သူတို့က ပြောပါတယ်။

ဂျပန်မှာ ရခိုင်တွေ နှစ်ဖွဲ့ကွဲနေတာတော့ ဟုတ်တယ် အခု ဆန္ဒပြ မယ့်အဖွဲ့ ကတော့ ဒေါ်အောင်ဆန်းစုကြည်နဲ့ အန်အယ်ဒီကို မထောက်ခံတဲ့ သူတွေပေါ့ဗျာလို့ လည်း ဦးမောင်သန်းက ပြောပါတယ်။

ဒါ့အပြင် ရိုဟင်ဂျာအရေးလူပ်ရှားသူတွေပါ ဆန္ဒပြမယ့် အထဲမှာ ပါလာဖို့ရှိတယ်လို့လည်း ဂျပန်ရောက် မြန်မာတွေက ပြောပါတယ်။