မြောက်ပိုင်းလေးဖွဲ့နဲ့ အစိုးရ၊ တပ်မတော်တို့ တွေ့မယ့် အောက်တိုဘာဆွေးနွေးပွဲ ရွှေ့ဆိုင်း

ရက်ရွှေ့ဆိုင်းထားပေမယ့် နိုဝင်ဘာ ပထမအပတ်အတွင်းမှာ ပြန်လုပ်ဖို့ကိုတော့ နှစ်ဖက်သဘောတူထား၊ တွေ့မယ်နေရာနဲ့ အချိန်အတိအကျကိုတော့ မညှိနှိုင်းထားရသေး ဓာတ်ပုံ မူပိုင် Getty Images
Image caption ရက်ရွှေ့ဆိုင်းထားပေမယ့် နိုဝင်ဘာ ပထမအပတ်အတွင်းမှာ ပြန်လုပ်ဖို့ကိုတော့ နှစ်ဖက်သဘောတူထား၊ တွေ့မယ်နေရာနဲ့ အချိန်အတိအကျကိုတော့ မညှိနှိုင်းထားရသေး

မြောက်ပိုင်းမဟာမိတ်အဖွဲ့တွေနဲ့ အစိုးရဲ့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာန၊ တပ်မတော် တို့တွေ့ဆုံဖို့ သဘောတူထားတဲ့ အောက်တိုဘာ ဆွေးနွေးပွဲကို ရွှေ့ဆိုင်းထားတယ်လို့ ကချင်ငြိမ်းချမ်းရေးအကျိုးဆောင်အဖွဲ့ဝင် ဦးလမိုင်းဂွန်ဂျာက အောက်တိုဘာ ၂၂ရက်မှာ ဘီဘီစီကို ပြောပါတယ်။

တွေ့ဆုံမယ့်အချိန်ရွှေ့ဆိုင်းထားတာကို မြောက်ပိုင်းမဟာမိတ်အဖွဲ့တွေဖြစ်တဲ့ ကချင်၊ တအာင်း(ပလောင်)၊ ရခိုင်နဲ့ ကိုးကန့်အဖွဲ့တို့တွေလည်း သိထားပြီးသွားပြီလို့ သူကပြောပါတယ်။

အောက်တိုဘာမှာတွေ့ဆုံဖို့အတွက်ကို ပြီးခဲ့တဲ့ စက်တင်ဘာ ၁၇ရက်နေ့ ဆွေးနွေးပွဲမှာ နှစ်ဖက် သဘော တူထားခဲ့တာဖြစ်ပါတယ်။

ရက်ရွှေ့ဆိုင်းထားပေမယ့် နိုဝင်ဘာ ပထမအပတ်အတွင်းမှာ ပြန်လုပ်ဖို့ကိုတော့ နှစ်ဖက် သဘောတူထား တယ်လို့လည်း သူကပြောပါတယ်။ ဒါပေမယ့် တွေ့မယ်နေရာနဲ့ အချိန်အတိအကျကိုတော့ နှစ်ဖက် မညှိနှိုင်းထားရသေးဘူးလို့ ဆိုပါတယ်။

အစိုးရဘက်ကတော့ ကျိုင်းတုံမှာပဲ ဆွေးနွေးပွဲလုပ်ဖို့ အဆိုပြုထားပါတယ်။

အောက်တိုဘာ ၂၈၊ ၂၉ ရက်မှာတော့ အပစ်ရပ်လက်မှတ်ထိုးထားတဲ့ အဖွဲ့ ၁၀ ဖွဲ့နဲ့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာနတို့က တွေ့ဆုံကြမှာအပြင်၊ အဲဒီမတိုင်မီ လေ့လာရေးခရီးသွားတာတွေအပါ အဝင် အစရှိတဲ့ ငြိမ်းချမ်းရေးလုပ်ငန်းစဉ်တွေကြောင့်လို့ ဦးလမိုင်ဂွန်ဂျာက ယူဆပါတယ်။

ဆွေးနွေးဖို့ရက်ရွှေ့ဆိုင်းပေမယ့် မြောက်ပိုင်းအဖွဲ့တွေဘက်က အပစ်ရပ်စဲရေးထုတ်ပြန်ထားတာရယ်၊ တပ်မတော်ဘက်ကလည်း ထိန်းသိမ်းဆောင်ရွက်မှုတွေရှိနေတာကြောင့် နှစ်ဘက်ထိတွေ့ တိုက်ပွဲတွေ ဖြစ်ပွားလာနိုင်ဖို့ နည်းပါးတယ်လို့ သူကပြောပါတယ်။

အောက်ခြေတပ်တွေအနေနဲ့တော့ အနည်းအကျဉ်းထိတွေ့မှုတွေတော့ဖြစ်နိုင်ပေမယ့် ကြီးကြီးမားမား တိုက်ပွဲတွေဖြစ်စရာမရှိနိုင်ဘူးလို့ ဦးလမိုင်ဂွန်ဂျာက ပြောပါတယ်။

ဓာတ်ပုံ မူပိုင် BBC Burmese
Image caption အစိုးရတပ်မတော်နဲ့ ရက္ခိုင့်တပ်မတော် အေအေတို့အကြား တစ်နှစ်နီးပါးအကြာ ဖြစ်ပွားနေတဲ့တိုက်ပွဲတွေအတွင်းမှာ အရပ်သားသေဆုံးမှုဟာ ၉၀ နီးပါးထိရှိလာနေပြီး ဒဏ်ရာရရှိသူ ၁၃၀ ကျော်အထိရှိ

နှစ်ဖက် တွေ့ဆုံမှု ၄ ကြိမ်ထိရှိလာပေမယ့်လည်း ဆွေးနွေးနေတဲ့ နှစ်ဖက် သဘောတူ အပစ်ခတ် ရပ်စဲရေး မူကြမ်းထဲက အချက်လက်တွေကို ပြီးပြတ်အောင်ဆွေးနွေးနိုင်တာမရှိသေးသလို၊ တပ်နေရာချ ထားရေး နေရာမှာ နှစ်ဖက် ဆွေးနွေးမှုအကျပ်အတည်းဖြစ်နေပါတယ်။

ရခိုင်ပြည်နယ်အတွင်းမှာ အစိုးရတပ်မတော်နဲ့ ရက္ခိုင့်တပ်မတော် အေအေတို့အကြား တစ်နှစ်နီးပါးအကြာ ဖြစ်ပွားနေတဲ့တိုက်ပွဲတွေအတွင်းမှာ အရပ်သားသေဆုံးမှုဟာ ၉၀ နီးပါးထိရှိလာနေပြီး ဒဏ်ရာရရှိသူ ၁၃၀ ကျော်အထိရှိလာနေပြီဖြစ်ပါတယ်။

ရှမ်းပြည်နယ်မြောက်ပိုင်းဘက်မှာတော့ မြောက်ပိုင်းညီနောင်မဟာမိတ်အဖွဲ့တွေ၊ တအာင်း(ပလောင်) လွတ်လပ်ရေးတပ် အစရှိတဲ့အဖွဲ့တွေနဲ့ တပ်မတော်တို့အကြား တိုက်ပွဲတွေဖြစ်ခဲ့တာကြောင့်လည်း အရပ်သားဆယ်ချီပြီး အသက်ဆုံးရှုံးတာ၊ ထိခိုက်ဒဏ်ရာရတာတွေရှိခဲ့ပါတယ်။

သင့်စက်တွင် ဒီမီဒီယာဖိုင်ကို ဖွင့်၍ မရပါ။
ငြိမ်းချမ်းရေး လုပ်ငန်းစဉ် ကြန့်ကြာနေတဲ့ အကြောင်း

ဒီသတင်းနဲ့ပတ်သက်သမျှ