တောင်ကြီး ခရိုင် ရွာငံမှာ ကားမှောက်လို့ လူ အနည်းဆုံး ၁၅ ဦး သေဆုံး

ဓာတ်ပုံ မူပိုင် Myanmar Fire Service Department
Image caption ဒဏ်ရာ ရရှိ ခဲ့သူတွေ ထဲမှာ ၃ ဦး ရဲ့ အခြေအနေ ဟာ စိုးရိမ် ရတဲ့ အတွက် မန္တလေး ဆေးရုံ ကို တင်ပို့ ကုသ ထား

တောင်ကြီး ခရိုင်၊ ရွာငံ မြို့နယ်၊ ဟန်မြင့်မိုရ် ကားသွားလမ်း ယုန်တောင် ကျေးရွာ အနီးမှာ ခရီးသည်တင် ကား တိမ်းမှောက်မှု ဖြစ်ပွား ခဲ့လို့ ရဟန်းတော် တစ်ပါး အပါအဝင် သေဆုံး သူ ၁၅ ဦး အထိ ရှိခဲ့ပါတယ်။

ဒါ့အပြင် မော်တော်ယာဉ် မတော်တဆမှုကြောင့် လူ အနည်းဆုံး ၁၀ ဦး ထိခိုက် ဒဏ်ရာ ရရှိမှုလည်း ဖြစ်ပွား ခဲ့ပါတယ်။

အောက်တိုဘာလ ၂၈ ရက် ညနေ ခြောက်နာရီလောက်မှာ တောင်ကြီးဘက် ကနေ မောင်းနှင် လာတဲ့ Light Truck အမျိုးအစား အဖြူရောင် ကားဟာ မိုင်တိုင် အမှတ် (၂၈/၃) မှာ အရှိန် မထိန်း နိုင်ဘဲ ချောက် ထဲ ကို ထိုးကျ သွားခဲ့တာ ဖြစ်ပါတယ်။

ဒဏ်ရာ ရရှိ ခဲ့သူတွေ ထဲမှာ ၃ ဦး ရဲ့ အခြေအနေ ဟာ စိုးရိမ် ရတဲ့ အတွက် မန္တလေး ဆေးရုံ ကို တင်ပို့ ကုသ ထားရတယ်လို့ ရွာငံ မြို့နယ် ပြည်သူ့လွှတ်တော် ကိုယ်စားလှယ် ဦးအောင်စိုးမင်း က ဘီဘီစီ ကို ပြောပါတယ်။

ဓာတ်ပုံ မူပိုင် Myanmar Fire Service department
Image caption တောင်ကြီးဘက် ကနေ မောင်းနှင် လာတဲ့ Light Truck အမျိုးအစား အဖြူရောင် ကားဟာ မိုင်တိုင် အမှတ် (၂၈/၃) မှာ အရှိန် မထိန်း နိုင်ဘဲ ချောက် ထဲ ကို ထိုးကျ သွား

တိမ်းမှောက် ခဲ့တဲ့ ကားဟာ ရွှေဘိုမြို့နယ်၊ ပင်လောင်ကြီး ကျေးရွာ ကနေ ဘုရားဖူး လာတဲ့ ကားဖြစ်တယ်လို့လည်း သူက အတည်ပြု ပြောဆို ပါတယ်။

ရွာငံ ဘက်ကနေ ကျောက်ဆည် ကို ဆင်းတဲ့ အဆင်းလမ်းမှာ ကားမှောက်မှု ဖြစ်ပွား ခဲ့တာပါ။

တောင်ဆင်း တောင်တက် လမ်းတွေမှာ အရှိန်မြှင့်တင် မောင်းနှင် ခဲ့တဲ့ အတွက် ကြောင့် အခုလို မတော်တဆမှု ဖြစ်ပွား ခဲ့တာလို့ ယူဆ နိုင်ကြောင်း ပြည်နယ် လွှတ်တော် ကိုယ်စားလှယ် က ဆိုပါတယ်။

အောက်တိုဘာ ၂၈ ရက်၊ တနင်္လာနေ့ ညပိုင်းမှာ ရဲတပ်ဖွဲ့ဝင်တွေ၊ မီးသတ် တပ်ဖွဲ့ဝင်တွေ နဲ့ အတူ ဒေသခံ လူမှုကူညီရေး အသင်း တွေက မော်တော်ယာဉ် တိမ်းမှောက်မှု ကို သွားရောက် ကူညီ ပေးခဲ့ကြပါတယ်။

ထိခိုက်ဒဏ်ရာ ရရှိခဲ့သူတွေ သူတို့ နေထိုင်ရာ ရပ်ရွာတွေမှာ ဆေးကုသမှု ခံယူချင်တယ်ဆိုရင်လည်း ပြန်လည် ပို့ဆောင် ပေးသွားမယ်လို့ လည်း ကူညီ ပေးခဲ့သူတွေက ပြောပါတယ်။

ဆက်စပ် အကြောင်းအရာများ