ဘူးသီးတောင်မှာ တိုက်ပွဲတွေ ပြင်းထန်လို့ ရွာလုံးကျွတ် ထွက်ပြေးရ

ရခိုင် ဓာတ်ပုံ မူပိုင် Reuters
Image caption တပ်နဲ့ ရဲအရာရှိတွေ AA ဖမ်းဆီးခေါ်ဆောင် ခံရပြီးနောက် ရခိုင်မှာ တိုက်ပွဲ ပြင်းထန်

ရခိုင်ပြည်နယ်မှာ တိုက်ပွဲတွေ ပြင်းထန်နေပြီး မင်းပြားမြို့နယ်မှာ ရဟတ်ယာဉ်သုံးစီးနဲ့ တပ်မတော်က တိုက်ခိုက်ခဲ့သလို ရသေ့တောင်မှာလည်း တိုက်ပွဲတွေ ထပ်မံ ဖြစ်ပွားခဲ့တယ်လို့ ဒေသခံတွေက ပြောပါတယ်။

ဘူးသီးတောင်မှာဆိုရင်လည်း ကျေးရွာတွေထဲကို စစ်သားတွေ ဝင်လာတဲ့အတွက် ဒေသခံတွေ ရွာလုံးကျွတ် ထွက်ပြေးနေကြရပါတယ်လို့ ဒေသခံတွေက ပြောပါတယ်။

ဘူးသီးတောင်မြို့နယ်က စည်တောင်ကျေးရွာကို အောက်တိုဘာလ ၂၈ ရက် မနက်ပိုင်းမှာ တပ်မတော် စစ်ကြောင်းက သေနတ်တွေနဲ့ ပစ်ခတ် ဝင်ရောက်လာခဲ့တဲ့အတွက် အမျိုးသမီးနှစ်ဦး ဒဏ်ရာရရှိပြီး ရွာထဲ ပိတ်မိနေသူတွေရှိတယ်လို့ ဒေသခံတွေက ပြောပါတယ်။

ဒါပေမဲ့ အဲဒီလို ပစ်ခတ်တာမျိုးမရှိဘူးဆိုပြီး တပ်မတော်ဘက်က ပြောပါတယ်။

ဓာတ်ပုံ မူပိုင် Narinjara
Image caption စစ်ကြောင်းတွေ ရွာမ၀င်ခင် လက်နက်ကြီးနဲ့ အရင် ပစ်ခတ်တယ်လို့ဆို

ဒီစစ်ကြောင်း ရောက်မလာခင်မှာ ကျေးရွာနဲ့ တစ်မိုင်လောက် ဝေးတဲ့ စပါးထား ကျေးရွာဘက်ကနေ လက်နက်ကြီးတွေနဲ့ ပစ်ခတ်ပြီး စစ်ကြောင်းက စည်တောင်ကျေးရွာကို ဝင်ရောက် လာခဲ့ရာမှာ ရွာထဲက အိမ်တစ်အိမ်ပေါ် လက်နက်ကြီးကျည် ကျရောက်ခဲ့တာကြောင့် အမျိုးသမီးနှစ်ဦး ထိခိုက်ဒဏ်ရာ ရခဲ့တာ ဖြစ်တယ်လို့ ဒေသခံတွေက ပြောပါတယ်။

ဒဏ်ရာရသူတွေကတော့ အသက် ၇၀ နဲ့ အသက် ၄၅ နှစ်အရွယ် အမျိုးသမီးတွေ ဖြစ်ပါတယ်။

ဒီကိစ္စနဲ့ပတ်သက်လို့ အနောက်ပိုင်းတိုင်း စစ်ဌာနချုပ်ကို ဘီဘီစီက ဆက်သွယ်မေးမြန်းရာမှာ အဲဒီဘက်မှာ တပ်မတော်စစ်ကြောင်းတွေ မရှိသလို ကျေးရွာတွေကို တပ်မတော်က ပစ်ခတ်တာတွေမရှိဘူးလို့ အနောက်ပိုင်းတိုင်း စစ်ဌာနချုပ်က ပြောခွင့်ရ ဗိုလ်မှူးကြီး ဝင်းဇော်ဦးက ပြောပါတယ်။

ဓာတ်ပုံ မူပိုင် Narinjara
Image caption ရဟတ်ယာဉ်နဲ့ ပစ်ခတ် တိုက်ခိုက်မှုတွေ ပိုများလာတယ်လို့ ဒေသခံဆို

"အဲဒီဘက်မှာ တပ်လည်းမရှိဘူး၊ ရွာသားပြောတယ်ဆိုတာ အဲဒီလူတွေက ရွာသားအစစ်မဟုတ်ဘူး၊ အေအေတွေက ရွာသားအမည်ခံပြီးပြောနေတာ ၊ အဲဒီရွာတင် မဟုတ်ဘူး ကျန်တဲ့ရွာတွေလည်း ပြောတာပဲ "လို့ ဗိုလ်မှူးကြီး ဝင်းဇော်ဦးက ပြောပါတယ်။

စည်တောင်ရွာက အမျိုးသမီးနှစ်ယောက် ဒဏ်ရာ ရခဲ့တာနဲ့ ပတ်သက်လို့ အဲဒီဒေသမှာ တိုက်ပွဲဖြစ်တာမရှိတဲ့ အတွက်ကြောင့် သူ့အနေနဲ့ ဒီကိစ္စကို သုံးသပ်ပေးစရာ မလိုဘူးလို့လည်း သူက ပြောပါတယ်။

တပ်မတော်က ကျေးရွာအတွင်းမှာ ဝင်ရောက် ပစ်ခတ်ခဲ့တဲ့အတွက် ကျေးရွာသားတွေ ထွက်ပြေးခဲ့ကြရသလို မသွားနိုင်မလာနိုင်သူတွေ၊ ကျန်းမာရေးမကောင်းသူတွေ၊ ကိုယ်အင်္ဂါချို့တဲ့သူတွေနဲ့ အသက်ကြီးသူတွေ ကျန်နေခဲ့ပြီး အဲဒီကျန်နေသူတွေဟာ ရွာထဲမှာ ပိတ်မိနေတယ်လို့ ဘူးသီးတောင်မြို့နယ် ပြည်နယ်လွှတ်တော်ကိုယ်စားလှယ် ဦးထွန်းအောင်သိန်းက ပြောပါတယ်။

လက်နက်ကြီးကျလို့ အမျိုးသမီးနှစ်ဦး ဒဏ်ရာရတယ်၊ အဆက်အသွယ်မရသေးလို့ သူတို့ကို ကယ်မထုတ်နိုင်သေးဘူး ၊ ရထားတဲ့သတင်းတွေအရ ရွာထဲမှာ ပိတ်မိနေတာ အယောက်၂၀ ကျော်ရှိနိုင်ပြီး ဒီထက်လည်း များနိုင်တယ်လို့ ဦးထွန်းအောင်သိန်းက ဆိုပါတယ်။

ဓာတ်ပုံ မူပိုင် EPA/Nyein Chan Naing
Image caption တိုက်ပွဲကြောင့် သက်ကြီးရွယ်အိုတွေ ရွာထဲ ပိတ်မိနေတယ်လို့ ရွာသားတွေက ပြော

အဲဒီအထဲမှာ အသက် ၂၀ အရွယ် စိတ်ဝေဒနာရှင် တစ်ယောက် ပါတယ် ၊ အသက် ၃၀ ကျော်အရွယ် နေမကောင်းဖြစ်နေတဲ့ ကလေးအမေ တစ်ယောက်လည်း ပိတ်မိနေပြီး ကျန်တာကတော့ အသက် ၅၀ ကနေ ၉၀ အတွင်း ဖြစ်တယ် ၊ ဘယ်သူနဲ့မှ အဆက်အသွယ်မရတဲ့အတွက် နောက်ဆုံးအခြေအနေကို မသိရဘဲ ဖြစ်နေတယ်လို့ ဦးထွန်းအောင်သိန်းက ပြောပါတယ်။

ဒါ့အပြင် အောက်တိုဘာ ၂၈ ရက်နေ့က ကျေးရွာထဲကို တပ်မတော်စစ်ကြောင်းက ဝင်ရောက်လာခဲ့တဲ့အချိန်မှာ တပ်မတော်သား ၂၀၀ ခန့် ပါဝင်ပြီး အဲဒီကျေးရွာအတွင်းမှာ စခန်းချနေထိုင်ခဲ့တယ်၊ အောက်တိုဘာလ ၂၉ ရက် မနက်ပိုင်းမှာ သပြေဆိပ် ကျေးရွာကို တဝက်လောက် ထွက်သွားခဲ့တယ်လို့ အမည်မဖော်လိုတဲ့ ကျေးရွာသားတစ်ဦးက ပြောပါတယ်။

လက်ရှိမှာတော့ စည်တောင်၊ သပြေဆိပ်၊ စပါးထား၊ ဆင်ခုံတိုင်၊ရေခေါင်းချောင်းစတဲ့ အနီးဝန်းကျင်က ကျေးရွာသားတွေ ဟာ ဘေးလွတ်ရာကိုထွက်ပြေးနေကြရတာ ဖြစ်ပြီး နောက်ဆုံးအခြေအနေတွေကို သတင်းတွေအတိအကျမရဘဲ ဖြစ်နေတယ်လို့လည်း သူကဆိုပါတယ်။

တပ်မတော်က လွန်ခဲ့တဲ့ လပိုင်းတုန်းက နွားရုံတောင်ကျေးရွာမှာ နေရာယူ စခန်းချ ထားတာရှိပြီး အခုစစ်ကြောင်းဟာ အဲဒီဘက်ကနေ ထွက်လာခဲ့တာဖြစ်တယ်လို့ ဒေသခံတွေက ပြောပါတယ်။

"ရွာမှာ ကျန်ခဲ့တဲ့သူတွေက တစ်အိမ်နဲ့တစ်အိမ်ကို သွားလို့မရဘူး၊ ကိုယ့်အိမ်မှာပဲ ကိုယ်နေနေရတာဆိုတော့ သတင်းတွေ တိတိကျကျမသိနိုင်ဘူး၊ ဘယ်လောက် ဒဏ်ရာရရလဲ၊ အခြေအနေဘယ်လိုရှိနေလဲ မသိဘူး၊အဆက်အသွယ်လည်း မရဘူး ဖြစ်နေတယ်"လို့ နောက်ထပ် ရွာသားတစ်ဦးက ပြောပါတယ်။

ဓာတ်ပုံ မူပိုင် Narinjara
Image caption အေအေက ဖမ်းဆီး ခေါ်ဆောင်သွားတဲ့ ရေယာဉ်ပေါ်က တပ်နဲ့ ရဲ၀န်ထမ်းတွေ အနက် တချို့ကိုသာ ပြန်လည် ကယ်ထုတ်နိုင်

ကျေးရွာအတွင်းက နေအိမ်တချို့အနက် လူမရှိတဲ့အိမ်တွေမှာ လည်း စစ်ကြောင်းက တံခါးတွေကို ချိုးဖျက်ပြီး ဝင်ရောက်ရှာဖွေမှုတွေ ရှိသလို ကြက်တွေကို ဖမ်းဆီးသတ်စားတာတွေ ရှိနေတယ်လို့ ဖောက်ထွင်းခံလိုက်ရတယ်ဆိုတဲ့ နေအိမ်ပိုင်ရှင်တစ်ဦးက ပြောပါတယ်။

ဒီဖြစ်စဉ်နဲ့ပတ်သက်လို့ တပ်မတော်ဘက်က ငြင်းဆိုထားပါတယ်။

ရွှေနဒီရေယာဉ်က တပ်မတော်သားတွေ၊ ရဲတပ်ဖွဲ့ဝင်တွေနဲ့ လူဦးရေ ၆၀ နီးပါးကို အေအေက ဖမ်းဆီးတာ ခံလိုက်ရပြီး နောက်နေ့မှာ ရေပုတ်ကျေးရွာသား ၁၃ ဦးကို တပ်မတော်စစ်ကြောင်းက ဖမ်းဆီးသွားခဲ့တယ်လို့ ကျေးရွာသားတွေက ပြောဆိုကြ ပေမယ့် ဗိုလ်မှူးကြီးဝင်းဇော်ဦးက ငြင်းဆိုထားပါတယ်။