ပလက်ဝကို ညမထွက်ရ အမိန့် ဘာကြောင့် ထုတ်တယ်လို့ အစိုးရ ပြောသလဲ

ရခိုင်မြောက်ပိုင်းမှာ တာဝန်ထမ်းဆောင်နေတဲ့ တပ်မတော်တပ်ဖွဲ့ဝင်တွေ ဓာတ်ပုံ မူပိုင် AFP/Getty
Image caption ရခိုင်မြောက်ပိုင်းမှာ တာဝန်ထမ်းဆောင်နေတဲ့ တပ်မတော်တပ်ဖွဲ့ဝင်တွေ

တပ်မတော်နဲ့ အေအေ ရက္ခိုင့်တပ်တော်တို့ တိုက်ပွဲတွေ ဖြစ်ပွားနေတဲ့ ရခိုင်ပြည်နယ်နဲ့ ထိစပ်နေတဲ့ ချင်းပြည်နယ်က ပလက်ဝမြို့နယ်မှာ ညမထွက်ရ အမိန့်ကို နိုဝင်ဘာလ ၉ ရက်မှာ ထုတ်ပြန်လိုက်ပါတယ်။

ဒီအမိန့်ကြောင့် ညနေ ၆ နာရီကနေ မနက် ၆ နာရီ အထိ အမိန့်တစ်စုံတစ်ရာ မရှိဘဲ လုံခြုံရေး တာဝန်ရှိသူမှအပ သွားလာလို့ ရမှာ မဟုတ်ပါဘူး။

ဒီညမထွက်ရ အမိန့်ဟာ စထုတ်တဲ့နေ့ကနေ နောက်နှစ်လ ကြာမြင့်မှာ ဖြစ်ပါတယ်။ ဒါ့အပြင် နယ်မြေ မအေးချမ်းမချင်း ရက်ထပ်တိုးသွားမယ်လို့လည်း သိရပါတယ်။

ဘာကြောင့် ပုဒ်မ ၁၄၄ - ညမထွက်ရ အမိန့် ကြေညာတာလဲ

"နယ်မြေ လုံခြုံရေးက ပိုမို ဆိုးရွားလာတဲ့အတွက် ဒီကနေ့ကစပြီး 144 ထုတ်ပါတယ်" လို့ ချင်းပြည်နယ် အစိုးရ ပြောခွင့်ရ စည်ပင်သာယာရေးဝန်ကြီး ဦးစိုးထက် ဘီဘီစီကို ပြောပါတယ်။

ဒီအမိန့်ကို မြို့နယ်အဆင့်ကနေ ပြည်ထောင်စုအဆင့်ထိ အဆင့်ဆင့်တင်ပြီး ပြည်ထောင်စုအဆင့်က ခွင့်ပြုချက်ရမှ ထုတ်ခဲ့တာ ဖြစ်တယ်လို့ သူက ပြောပါတယ်။

"နောက် ကျွန်တော်တို့ ချင်းလူမျိုးတွေကိုလည်း ဖမ်းဆီးခေါ်ဆောင်သွားတာတွေ၊ မကြာမကြာ လူတွေ ပျောက်သွားပြီး ပြန်မပေါ်လာတာတွေ၊ အများကြီး ဖြစ်တယ်" လို့ သူက ပြောပါတယ်။

"ပိုပိုပြီးတော့ လုံခြုံရေး အခြေအနေက ဆိုးပြီးတော့ နယ်မြေခံလူထုတွေက သွားရေးလာရေးက အစ တောထဲလည်း သွားလို့မရ၊ မြို့ပေါ်လည်း သွားလို့မရဘူး။ ခရီးသွားလာလို့လည်း မရဘူး။ ရေကြောင်းရော ကုန်းကြောင်းရော အကုန် ပိတ်ဆို့ထားသလိုမျိုး ဖြစ်နေတယ်" လို့ ဦးစိုးထက်က ပြောပါတယ်။

ဓာတ်ပုံ မူပိုင် Kyaw Aung
Image caption တိုက်ပွဲတွေကြောင့် ထွက်ပြေးခဲ့တဲ့ ပလက်ဝမြို့နယ်ထဲက ရွာသားတွေ

"နောက်ဒီကာလ အတွင်းမှာလည်း တောထဲကို တောင်ထဲကို မသွားကြဖို့ ဒေသန္တရ အမိန့်လည်း ထပ်ထုတ်ထားပါတယ်" လို့ ပြောပါတယ်။

ဒါ့အပြင် "နှစ်လပြီးရင်တော့ နယ်မြေ မအေးချမ်းမချင်းကတော့ extension လုပ်သွားမှာပါ" လို့လည်း ဦးစိုးထက်က ပြောပါတယ်။

ပလက်ဝ အနီးတစ်ဝိုက် လက်ရှိ အခြေအနေ

ချင်းပြည်နယ် ပလက်ဝမဲဆန္ဒနယ်က အမျိုးသားလွှတ်တော် ကိုယ်စားလှယ် ဦးဝှေ့တင်း အပါအဝင် ကုလားတန် စီမံကိန်းအတွက် လာတဲ့ အိန္ဒိယနိုင်ငံသား ငါးယောက်၊ ဘာသာပြန်နဲ့ စပိဘုတ်မောင်းသူတွေ စုစုပေါင်း ၁၀ ယောက်ကို နိုဝင်ဘာလ ၃ ရက်မှာ အေအေ အဖွဲ့က ဖမ်းဆီးခဲ့တဲ့ ဖြစ်စဉ် ဖြစ်ခဲ့ပါတယ်။ သူတို့ရဲ့ စပိဘုတ်က ပလက်ဝကနေ ကျောက်တော်အကြားမှာ ဖမ်းဆီးခံရတာပါ။

အဲဒီထဲက အိန္ဒိယ နိုင်ငံသား တစ်ယောက် ဖမ်းဆီးခံရစဉ် သေဆုံးခဲ့ပြီး ကျန်သူတွေကတော့ လွတ်မြောက်လာခဲ့ပါတယ်။ ဒါပေမဲ့ လွှတ်တော် ကိုယ်စားလှယ် ဦးဝှေ့တင်းကတော့ မလွတ်မြောက်သေးပါဘူး။

အဲဒီနောက် လက်ရှိ အခြေအနေနဲ့ ပတ်သက်ပြီး "လွှတ်တော်ကိုယ်စားလှယ် ဖမ်းဆီးခံရတဲ့ နောက်ပိုင်းမှာကို တိုက်ပွဲတွေ ပြင်းပြင်းထန်ထန်နဲ့ ၂ ရက်၊ ၃ ရက် ဆက်တိုက်လောက် ဖြစ်တာရှိတယ်" လို့ ချင်းပြည်နယ် အစိုးရ ပြောခွင့်ရ စည်ပင်သာယာရေး ဝန်ကြီး ဦးစိုးထက်က ပြောပါတယ်။

"အဲဒီမတိုင်ခင်မှာလည်း ပလက်မြို့နယ် အောက်နားလေးမှာပဲ ပလက်ဝနဲ့ ကျောက်တော်ကြားမှာ ကျောက်ဖျာဆိုတဲ့ကြားမှာ လက်နက်ကြီး လက်နက်ငယ်နဲ့ တိုက်ပွဲကြီး နှစ်ရက်လောက် ဆက်တိုက် ဖြစ်ပါတယ်" လို့ ပြောပါတယ်။

"အဲဒီအပြင် ပလက်ဝ ရဲ့ မြို့ပြစီမံကိန်းလုပ်တဲ့ ကျောက်တော်နဲ့ ဆမီးကိုသွားတဲ့ လမ်းဆုံနားမှာ တင်ပဲ ဆွဲမိုင်းတွေ မိုင်းကွဲတာတွေ၊ မိုင်းဖောက်ခွဲတာတွေ လည်းဖြစ်တယ်" လို့ ဆိုပါတယ်။

Image caption ဦးဝှေ့တင်းအပါအဝင်၁၀ ဦး အဖွဲ့ဟာ ပျောက်ဆုံးနေ

"လူတွေလည်း မကြာမကြာ ဖမ်းဆီးခံရတာတွေ ရှိတယ်။ အခုချိန်ထိလည်းဖြစ်နေတုန်းပဲ။ ခေါ်သွားတဲ့ လူတွေလည်း အခုချိန်ထိ ပြန်မလွှတ်ပေးသေးဘူး။ အဲဒီလိုမျိုး အများကြီးဖြစ်တယ်။ နယ်မြေလုံခြုံရေးက တော်တော်ကို စိုးရိမ်ရတဲ့ အခြေအနေ ဖြစ်ပါတယ်" လို့ ပြောပါတယ်။

ဦး ဝှေ့တင်း ဖမ်းဆီးခံထားရတာနဲ့ ပတ်သက်ပြီး သူ့ရဲ့ ပါတီ အမျိုးသားဒီမိုကရေစီ အဖွဲ့ချုပ် ပါတီ အန်အယ်လ်ဒီ ဗဟို အလုပ်အမှုဆောင်အဖွဲ့ဝင် ဦးဉာဏ်ဝင်းကိုယ်တိုင် ဦးဝှေ့တင်းရဲ့ မိသားစုကို နိုဝင်ဘာလ ၉ ရက်မှာ ဖုန်းနဲ့ ဆက်သွယ်ပြီး နှစ်သိမ့်စကား ပြောခဲ့ပါတယ်။

အဲဒီလို ပြောတာနဲ့ ပတ်သက်ပြီး ဦးဝှေ့တင်းရဲ့ ဇနီးဖြစ်သူက "သူတို့က ပြောတာကတော့ သူတို့ရှိတယ်၊ သူတို့လည်း စဉ်းစားပေးတယ်ပေါ့နော်။ ဒါပေမဲ့ ကျွန်မကတော့ ဘယ်သူ့မှ မယုံကြည်ဘူး။ ယုံကြည်မှုတွေ ကင်းမဲ့နေပြီ ။ ကျွန်မ ဘာကိုမှ မယုံကြည်ဘူး။ သူတောင်မှ အသက်ရှင်သေးရဲ့လား အသက်ရှိနေရဲ့လား ဆိုတာ ကျွန်မတို့ မသိရဘူးလေ" လို့ ပြောပါတယ်။

"ကျွန်မလုံးဝ မလုံခြုံဘူး။ ကျွန်မတို့ မိသားစု လုံးဝ မလုံခြုံဘူး။ အဲလိုပဲ ကျွန်မတို့ တစ်မြို့လုံးက လုံးဝ မလုံခြုံဘူး။ အဲလိုပဲ ခံစားရတယ်" လို့ ပြောပါတယ်။

ရခိုင်ပြည်နယ်မှာ တိုက်ပွဲတွေ ပြင်းထန်နေချိန်မှာ အခု ညမထွက်ရ အမိန့်ထုတ်တဲ့ ပလက်ဝ မြို့နယ်အပြင် ရခိုင်ပြည်နယ်က မြောက်ဦး၊ ပုဏ္ဏားကျွန်း၊ ရသေ့တောင်၊ ကျောက်တော်နဲ့ မင်းပြား မြို့နယ်တို့မှာလည်း ပုဒ်မ ၁၄၄ - ည ၉ နာရီကနေ မနက် ၅ နာရီ ညမထွက်ရ အမိန့်ထုတ်ထားပါတယ်။