မြေပုံမြို့နယ်မှာ ဈေးသည်လင်မယားနှစ်ဦး ပစ်ခတ်ခံရ ကိုယ်ဝန်သည် အမျိုးသမီးသေဆုံး

ရခိုင်ပြည်နယ် မြောက်ပိုင်းဒေသက စစ်ရေးပဋိပက္ခတွေကြား ဒေသခံတွေ သေဆုံးတာ တိုးလာနေ
Image caption ရခိုင်ပြည်နယ် မြောက်ပိုင်းဒေသက စစ်ရေးပဋိပက္ခတွေကြား ဒေသခံတွေ သေဆုံးတာ တိုးလာနေ

ရခိုင်ပြည်နယ် မြေပုံမြို့နယ် ယိုးချောင်းအထက်ပိုင်းက ရွာသာယာကျေးရွာမှာ နိုဝင်ဘာ ၁၀ ရက်နေ့မနက်ပိုင်း ၉ နာရီလောက်က ငါးလာရောင်းတဲ့ ဈေးသည်လင်မယားနှစ်ဦးကို သေနတ်ထိမှန်ခဲ့ရာမှာ အမျိုးသမီးတစ်ဦးသေဆုံး သွားတယ်လို့ ဒေသခံတွေကပြောပါတယ်။

အဲ့ဒီပစ်ခတ်မှုဟာ ဘယ်လိုဖြစ်ပွားခဲ့လဲဆိုတာကို အနောက်ပိုင်းတိုင်း စစ်ဌာနချုပ် တိုင်းဦးစီး ပထမတန်း ဗိုလ်မှူးကြီးဝင်းဇော်ဦးကို ဘီဘီစီက ဆက်သွယ်မေးမြန်းခဲ့ရာမှာတော့ သူ့အနေနဲ့ ဒီဖြစ်စဉ်ကို မသိရှိသေးဘူးလို့ ပြောပါတယ်။

"ကျွန်တော် အဲ့ဒါမသိသေးဘူး။ သိရတော့ ပြန်ပြော ပေးပါမယ်"လို့ ဗိုလ်မှူးကြီးဝင်းဇော်ဦးက ပြောပါတယ်။

ပစ်ခတ်မှုဖြစ်ပွားခဲ့တဲ့ ယိုးချောင်းကျေးရွာဟာ အနောက်ပိုင်းတိုင်း စစ်ဌာနချုပ်တည်ရှိတဲ့ အမ်းမြို့နယ်နဲ့ မြေပုံမြို့တို့အကြားမှာ တည်ရှိနေတဲ့ ဒေသတစ်ခုဖြစ်ပြီး အဲ့ဒီနယ်မြေအတွင်းမှာ အခုရက်ပိုင်းအတွင်း တပ်မတော်စစ်ကြောင်းတွေက နယ်မြေလုံခြုံရေးအတွက် ကျေးရွာတွေကို ဝင်ရောက်စစ်ဆေးမှုတွေ ပြုလုပ်နေတာရှိတယ်လို့လည်း ဒေသခံတွေကပြောပါတယ်။

အဲ့ဒီလင်မယားနှစ်ယောက်ဟာ သူတို့နေထိုင်တဲ့ ဝက်ရူးကျေးရွာကနေ မနက်ပိုင်းမှာ ယိုးချောင်းအထက်ပိုင်း ကျေးရွာတွေကို ငါးရောင်းဖို့အတွက် စက်တပ်လှေငယ်လေးနဲ့ ထွက်လာခဲ့ကြတာဖြစ်ပြီး ၉ နာရီလောက်မှာ ရွာသာယာကျေးရွာဆိပ်ကမ်းကို အရောက်မှာ တပ်မတော်စစ်ကြောင်း ရောက်နေတဲ့အတွက် လှည့်ပြန်လာခဲ့ရာမှာ ရွာထဲကနေ သေနတ်နဲ့ပစ်ခတ်လိုက်တာဖြစ်တယ်လို့ မြေပုံမြို့နယ် ပြည်သူ့လွှတ်တော်ကိုယ်စားလှယ် ဦးဖေသန်းက ဘီဘီစီကို ပြောပါတယ်။

ဘူးသီးတောင် တိုက်ပွဲ ရွာသားတစ်ဦးသေဆုံး၊ ရွာတချို့ မီးလောင်

ပလက်ဝကို ညမထွက်ရ အမိန့် ဘာကြောင့် ထုတ်တယ်လို့ အစိုးရ ပြောသလဲ

Image caption အောက်တိုဘာ လတုန်းက မီးဝဆရာတော်ရဲ့ ညာဘက် ရင်အုံမှာ လက်နက်ကြီး ကျည်စ မှန်

သေနတ်ကျည်ဆံကြောင့် အသက် ၃၁ နှစ်အရွယ် ဝက်ရူးကျေးရွာက ဒေါ်ဦခင်သန်းရဲ့ ဘယ်ဘက်ရင်အုပ်ပေါ်ကို ကျည်ထိမှန်က လှေပေါ်မှာပဲ သေဆုံးသွားခဲ့တာဖြစ်ပြီး သူ့အမျိုးသားရဲ့ပေါင်မှာလည်း ရှပ်ထိဒဏ်ရာရရှိသွားခဲ့တယ်လို့ ဒေသခံတွေရဲ့ပြောဆိုချက်အရ သိရကြောင်း ဦးဖေသန်းကပြောပါတယ်။

သေဆုံးသူအမျိုးသမီး ဒေါ်ဦးခင်သန်းရဲ့ ဗိုက်ထဲမှာ ကိုယ်ဝန် ၄ လပါရှိပြီး နှစ်နှစ်အရွယ် သမီးငယ်လေးတစ်ယောက်ကျန်ခဲ့ တယ်လို့ လည်းသူကပြောပါတယ်။

ဒေသခံတွေဟာ တောတောင်နဲ့ မြစ်ချောင်းတွေကို အမှီပြုပြီး သစ်ခုတ်ဝါးခုတ်၊ ငါးရှာဟင်း လုပ်ကိုင်စားသောက်နေကြရသူတွေဖြစ်ပြီး အခုလိုမျိုးဖြစ်စဉ်တွေ ဖြစ်လာနေတဲ့အတွက် စားသောက်နေထိုင်ရေးတွေလည်း ပိုမိုပြီးတော့ အခက်အခဲတွေ ဖြစ်လာနေတယ်လို့ ဝက်ရူးကျေးရွာက အမည်မဖော်လိုသူတစ်ဦးက ပြောပါတယ်။

အဲ့ဒီသေဆုံးသူရဲ့ အလောင်းကို မြေပုံမြို့ရဲစခန်းကိုယူဆောင်ပြီး ဆရာဝန်ရဲ့ ဆေးစစ်ချက်တွေကိုရယူထားဖို့အတွက် အကြံပြုထားကြောင်း ဦးဖေသန်းက ပြောပါတယ်။

"စစ်တပ်ရွာထဲကိုရောက်ပြီဆိုရင် ကျေးရွာလူကြီးတွေကလည်း ရှောင်ပြေးသွားတယ်။ အဓိကတော့ သူတို့လည်းစိုးရိမ်တာပေါ့နော်။ သူတို့ကို တစ်ခုခုခိုင်းမလား။ အရေးယူမလား။ အကြပ်ကိုင်မလား။ ရွာလူကြီးတွေကလည်း ကြောက်တာပေါ့။ ဘယ်သူမှ သွားမတွေ့ဘူး။ သူတို့ကလည်း သူတို့ကိုမကူညီဘူး။ ဟိုဘက်ကိုကူညီတယ်လို့ ထင်ကေင်းထင်မယ်။ ဆိုလိုတာကတော့ အောက်ခြေမှာ အုပ်ချုပ်ရေးယန္တရားပျက်နေတယ်။ စစ်တပ်ကလည်း စစ်ဆင်ရေးဧရိယာထဲရောက်လာပြီဆိုရင် ဘယ်သူ့ကိုမှ မယုံတော့ဘူး။ အကုန်လုံး သူတို့ကို အနှောင့်အယှက် ပေးမယ်၊ သူတို့သတင်းတွေပို့မယ်လို့ မြင်လာတယ်။ အဲဒါကြောင့် အရပ်သားတွေကို ပိုပြီးတော့ တင်းကျပ်မှုတွေ လုပ်လာတာပေါ့။"လို့ ဦးဖေသန်းကပြောပါတယ်။

ဒါ့အပင် မြေပုံမြို့နယ် ရေခေါင်းချိန်ကျေးရွာကို နိုဝင်ဘာလ ၉ ရက်နေ့မှာ တပ်မတော်စစ်ကြောင်းကရောက်ရှိလာပြီး ရှာဖွေမှု၊ လူစာရင်းစစ်ဆေးတာတွေပြုလုပ်လျက်ရှိနေပြီး ဒေသတွင်းက ငါးရှာ၊ ကဏန်းရှာသမားတွေကို ဆန်အရောင်းအဝယ်လုပ်ပေးနေတဲ့ ဦးအောင်သိန်းခင်ရဲ့နေအိမ်မှာ ဆန်အိတ် တွေကိုတွေ့တဲ့အတွက် ခေါ်ယူစစ်ဆေးခဲ့မှုတွေပြုလုပ်ခဲ့တယ်လို့ဆိုပါတယ်။

ရွာသာယာကျေးရွာ အုပ်ချုပ်ရေးမှူးကလည်း ကျေးရွာအတွင်းမှာ စစ်တပ်ရောက်နေကြောင်းနဲ့ ရွာအဝင်အထွက်တွေကို ပိတ်ထားကြောင်း အတည်ပြုပြောကြားခဲ့တယ်လို့ လွှတ်တော်ကိုယ်စားလှယ်က ဆိုပါတယ်။

လုံခြုံရေးအရ ခေါ်စစ်တာမျိုးမဟုတ်ဘဲ အခုလိုပစ်ခတ်လိုက်တဲ့အပေါ်မှာ နားမလည်နိုင်ဘူးလို့ ဦးဖေသန်းကပြောပါတယ်။

ရခိုင်ပြည်နယ်ကကျေးရွာတွေအနီးမှာ ပစ်ခတ်တိုက်ခိုက်မှုတွေကြောင့် သေဆုံးသူ ၈၀ ကျော်ခန့်ရှိနေပြီ ဖြစ်သလို ထိခိုက်ဒဏ်ရာရရှိသူ အရပ်သား အရေအတွက်ကလည်း ၁၃၀ ဝန်းကျင် အထိ ဖြစ်လာနေပြီလို့ ရခိုင် ပြည်နယ် အခြေစိုက် လူမှုရေး အဖွဲ့တွေနဲ့ ကူညီဆောင်ရွက်နေသူတွေရဲ့ စာရင်းပြုစုချက် အရ သိရပါတယ်။