ကသည်းလက်နက်ကိုင်အကြောင်း မေးခွန်းမေးဖူးတဲ့ အမတ်အိမ် လက်ပစ်ဗုံးပစ်ခံရ

ဦးမောင်မောင်လတ်နေအိမ် ဓာတ်ပုံ မူပိုင် ကဘော်ဆုသန်း
Image caption အမျိုးသားလွှတ်တော်ကိုယ်စားလှယ် ဦးမောင်မောင်လတ်နေအိမ်

အိန္ဒိယ-မြန်မာနယ်စပ် တမူးမြို့ ဈေးတန်း ၂ ရပ်ကွက်က အမျိုးသားလွှတ်တော်ကိုယ်စားလှယ် ဦးမောင်မောင်လတ်နေအိမ်ကို ဒီဇင်ဘာလ ၃ရက် ညနေ ၇ နာရီ ခန့်က လက်ပစ်ဗုံးပစ်ခံရတယ်လို့ တမူးဒေသခံ တစ်ဦးက ပြောပါတယ်။

" ဗုံးက မကွဲတော့ ဘယ်သူမှတော့ ထိခိုက်မှုမရှိဘူး။ တပ်က လာသိမ်းသွားတယ်" လို့ အခင်းဖြစ်တဲ့ နေရာကို ရောက်ခဲ့တဲ့ တမူးမြို့ ဒေသခံက ပြောပါတယ်။

လက်ပစ်ဗုံးကို နေအိမ်ခြံဝင်းအတွင်း ခြံစည်းရိုးနဲ့ ၈ပေ လောက်အကွာမှာ တွေ့ရပြီး 91 အမျိုးအစားလက်ပစ်ဗုံး တစ်လုံးနဲ့ ၃ပေ လောက် အကွာမှာ လက်ပစ်ဗုံး ကလစ်ကို တွေ့ရှိခဲ့တယ်လို့ ရဲတပ်ဖွဲ့က မှတ်တမ်းယူသွားတယ်လို့ သူက ပြောပါတယ်။

အဲဒီနေ့မှာ ဦးမောင်မောင်လတ်က အမျိုးသားလွှတ်တော် အစည်းအဝေး တက်ရောက်နေလို့ အိမ်မှာ မရှိဘဲ အမေနဲ့ ညီမ ဖြစ်သူတို့ပဲ ရှိတယ်လို့ သိရပါတယ်။

တမူးနဲ့ ကသည်းသူပုန်

ဓာတ်ပုံ မူပိုင် ကဘော်ဆုသန်း
Image caption တမူးမြို့ပေါ်မှာ ပေါက်ကွဲမှု တွေမကြာခဏ ဖြစ်လေ့ရှိ

တမူးမြို့ပေါ်နဲ့ အနီးအနား ကျေးရွာတွေမှာ ကသည်းသူပုန်တွေ နေထိုင်နေတဲ့ အတွက် ရပ်ရွာ လုံခြုံရေး ပျက်ပြားရပြီး ဒေသခံတွေအတွက် အန္တရာယ် ကြီးကြီးမားမား ဖြစ်ပေါ် စေတယ်လို့ တမူး အခြေစိုက် ကူကီး တိုင်းရင်းသား အရပ်ဘက်အဖွဲ့တွေက ဇွန်လတွင်းက ပြောခဲ့ပါတယ်။

တမူးမြို့ပေါ်မှာ ပေါက်ကွဲမှု တွေမကြာခဏ ဖြစ်လေ့ရှိပြီးတော့ အဲဒီ ပေါက်ကွဲမှုတွေဟာ ကသည်းသူပုန် တွေနဲ့ ဆက်စပ်မှုတွေ ရှိတယ်လို့ မြို့ခံတွေက ဆိုပါတယ်။

အခု လက်ပစ်ဗုံး အပစ်ခံရတဲ့ အမျိုးသားလွှတ်တော်ကိုယ်စားလှယ် ဦးမောင်မောင်လတ်ဟာ ၂၀၁၇ ခုနှစ်တုန်းက တမူးမှာ ကသည်းလက်နက်ကိုင်တွေ အခြေချ နေထိုင်နေတာနဲ့ ပတ်သက်ပြီး လွှတ်တော်ထဲမှာ မေးခွန်း မေးခဲ့သူဖြစ်ပါတယ်။

ကသည်း လက်နက်ကိုင် အုပ်စုကွဲတွေကြား အနီးအနား တောတောင်တွေ၊ ကားလမ်းမပေါ်တွေမှာ တိုက်ခိုက်တာမျိုးတွေ ၂ဝဝဝ ပြည့်ကျော် ကာလတွေမှာ မကြာခဏ ဆိုသလို ပေါ်ပေါက်ဖူးတယ်လို့ ဦးမောင်မောင်လတ်က ဘီဘီစီကို ပြောခဲ့ပါတယ်။

အိန္ဒိယနဲ့ မြန်မာ နှစ်ဘက် စစ်တပ်ကြား ဆက်ဆံရေး ကောင်းပြီး၊ အိန္ဒိယ ဘက်ကလည်း သူတို့ကို ဆန့်ကျင်တဲ့ သူပုန်တွေ မြန်မာဘက်ထဲ အခြေမချစေဖို့ အမြဲပဲ အိန္ဒိဘက်က အမြဲတောင်းဆိုလေ့ ရှိပါတယ်။

ဆက်စပ် အကြောင်းအရာများ