ဗစ်တိုးရီးယားအမှု - နစ်နာသူ မိသားစုကို ကူညီနေတဲ့ ဒေါက်တာဝင်းကိုကိုသိန်းနဲ့ အင်တာဗျူး

ဒေါက်တာဝင်းကိုကိုသိန်း
ဓာတ်ပုံ ပုံစာ,

ကလေးရဲ့ နစ်နာမှုကြီးလို့ အမှန်တရား ပေါ်မှကို ရမယ်လို့ မိသားစုကို ကူညီနေတဲ့ ဒေါက်တာဝင်းကိုကိုသိန်းပြော

ဗစ်တိုးရီးယားအမှုလို့ လူအများခေါ်ဝေါ်ကြတဲ့ အမှုမှာ ၁၃ ကြိမ်မြောက် ရုံးချိန်းအပြီး သံသယ တရားခံကို တရားရုံးက တရားရှင်လွှတ်လိုက်အပြီး အမှုကို မိသားစုက တုံ့ပြန်ချက်နဲ့ ရှေ့ဆက် ဘယ်လိုဆောင်ရွက်မလဲ ဆိုတာကို မိသားစုကို အကူအညီပေးနေတဲ့ ဒေါက်တာဝင်းကိုကိုသိန်းကို ဘီဘီစီက သီးသန့်မေးမြန်းထားတာကို ဖော်ပြလိုက်ပါတယ်။

ဘီဘီစီ - ဒေါက်တာ ဝင်းကိုကိုသိန်းအနေနဲ့ မိသားစုဘက်မှာ အနီးကပ်နေပြီး ဒီအမှု ဖြစ်စဉ်တစ်ခုလုံးမှာ ပါဝင်ခဲ့သူအနေနဲ့ ဆိုရင် တရားရှင်လွှတ်ပြီး နောက်ပိုင်း အခြေအနေ၊ မိသားစုဘက်က သဘောထား တုံ့ပြန်ချက်၊ ရှေ့အလားအလာ ဆောင်ရွက်ချက်တွေက ဘာတွေ ရှိပါလဲ။

ဒေါက်တာဝင်းကိုကိုသိန်း - တရားရှင် လွှတ်လိုက်တယ် ဆိုတာ ကျွန်တော်တို့ မမျှော်လင့်ထားဘူးပေါ့နော်၊ လုံးဝ ရှော့ခ်ရသွားတာ၊ ရှော့ခ်ရသွားတာ ဆိုတာ ကျွန်တော်တို့က ကိုအောင်ကြီး လွတ်တာကို ဝမ်းမသာလို့ မဟုတ်ဘူးပေါ့လေ။

ဆိုလိုတာ ကျွန်တော်တို့မှာက ဒီတရားရုံး လမ်းစဉ်ပေါ်မှာ ရောက်နေတဲ့အတွက်ကြောင့် တရားရုံးလမ်းစဉ်နဲ့ ကျွန်တော်တို့က ဆက်သွားနေရတာကိုး၊ တရားရုံးလမ်းစဉ်နဲ့ ဆက်သွားနေတာ၊ တရားရှင် လွှတ်လိုက်တဲ့အခါကျတော့ ကျွန်တော်တို့မှာ ဘာလုပ်ရမှန်းမသိတော့ဘူး။ လုပ်စရာ မရှိတော့ဘူး။ တင်စရာလည်း မရှိတော့ဘူး။ အဲလို ဖြစ်နေတယ်။

အဲလို ဖြစ်တဲ့အချိန်မှာ ကျွန်တော်တို့ တိုင်ပင်ကြတယ်ပေါ့နော်။ ဆရာမ ဒေါ်ရွက်နုအောင်တို့နဲ့ တိုင်ပင်ကြတယ်။ ဘာသဘောရလဲ ဆိုရင် ဒီမြန်မာနိုင်ငံ ရဲတပ်ဖွဲ့ရဲ့ သတင်းစာ ရှင်းလင်းပွဲကို အစအဆုံး စောင့်ကြည့်မယ်။ သူတို့တွေ ဘယ်လိုများ တာဝန်ယူမှု တာဝန်ခံမှု ရှိမလဲ ဆိုပြီးတော့ ဒီလိုပဲ ဆုံးဖြတ်ခဲ့ကြပါတယ်။

ဘီဘီစီ - ဒီဇင်ဘာ ၁၉ ရက် နေ့ခင်းပိုင်းမှာ မြန်မာနိုင်ငံ ရဲတပ်ဖွဲ့က သတင်းစာ ရှင်းလင်းပွဲ လုပ်တယ်ပေါ့လေ။ သူတို့ရဲ့ တရားဝင် page ဖြစ်တဲ့ ရဲဇာနည်ကလည်း ဒီဟာကို live တင်ဆက်တယ်ပေါ့။ ဒီတော့ မြန်မာနိုင်ငံ ရဲတပ်ဖွဲ့ရဲ့ ထုတ်ပြန်ချက်ပဲ ပြောပါတော့။ သတင်းစာ ရှင်းလင်းပွဲပါ အချက်တွေနဲ့ ဆိုရင် မိသားစုဘက်က ဘယ်လို သဘောထားရှိသလဲ။

ဒေါက်တာဝင်းကိုကိုသိန်း- မြန်မာနိုင်ငံ ရဲတပ်ဖွဲ့ရဲ့ ထုတ်ပြန်ချက်ကို ကျွန်တော်တို့ နားလည်လိုက်တာက သူတို့က ဥပဒေအတိုင်း ဆက်သွားမယ်ပေါ့နော်။ ဥပဒေအတိုင်း ဆက်သွားမယ် ဆိုတာက သူတို့က ဒီခုနပြောသလို ခရိုင်တရားရုံးမှာ ကိုအောင်ကြီးကို တရားစွဲဆိုထားတာကို သူတို့အနေနဲ့ စောလွန်းတယ် ထင်တယ်။

ဥပဒေအတိုင်း ဆက်သွားမယ် ဆိုတာက ဒါကို တိုင်းတရားရုံးမှာ ဆက်ပြီးတော့မှ ကိုအောင်ကြီးကို အပြစ်ချဖို့အတွက်ပဲ ဆက်သွားဖို့ရာ အတွက် သူတို့ ပြောတယ်လို့ နားလည်တယ်။

တကယ်လို့ တိုင်းတရားရုံးက နေပြီးကာမှ ဒါကို စောစောကအတိုင်းပဲ ၄ ၊ ၅ ၊ ၇ လလောက် ကြာပြီးမှ ပယ်ချလိုက်ပြန်လို့ ရှိရင်လည်း သူက ခုနပြောသလို ဗဟိုထိ ဆက်ပြီးကာမှ သွားမယ်ပေါ့နော်။ ဗဟိုထိ ဆက်သွားတယ် ဆိုတာက သူတို့ အမှန်တရားအတွက် သွားတာ မဟုတ်ဘူး။

သူတို့ကတော့ ကိုအောင်ကြီးကို ဆက်လက် အပြစ်ချရေးအတွက်ပဲ ဆက်သွားကြမယ်လို့ ကျွန်တော်တို့က ဒီလိုပဲ နားလည်တယ်။

ဗီဒီယို ပုံစာ,

ဗစ်တိုးရီးယား အမှုမှာ ကူညီပေးသူနဲ့ ဘီဘီစီတွေ့ဆုံ

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

ဘီဘီစီ - အဲတော့ အချိန်ကာလနဲ့ ဆိုရင်တော့ ဒီနောက်ထပ် ၆ လ၊ ၇ လ လောက်ကြာနိုင်သေးတဲ့ အနေအထား၊ ပြီးခဲ့တုန်းကလည်း ၆ လလောက် ကြာခဲ့ပြီပေါ့လေ။ အဲတော့ မိသားစုက ဒီ ၆ လလောက် ကြာတာ ဆိုရင်ကို ဘယ်လိုမျိုး ကျော်ဖြတ်ခဲ့လဲ။ သူတို့မိသားစုမှာ အခက်အခဲ ဘယ်လောက် ကြုံနေရလဲ။

ဒေါက်တာဝင်းကိုကိုသိန်း- ဟာ အခက်အခဲကတော့ ကြုံတာပေါ့ဗျာ။ အခက်အခဲ ကြုံတယ် ဆိုတာက အထူးသဖြင့်ပေါ့နော်။ သမီးလေးရဲ့ မေမေက တော်တော်လေး စိတ်ထား နူးညံ့တယ်ပေါ့နော်။ သူက နေ့တိုင်းဆိုသလို မျက်ရည်နဲ့ မျက်ခွက် ဖြစ်နေတာ။

ဒီနေ့က ဒီလိုမျိုး ဖြစ်သွားလဲ ဆိုတော့ ငါတို့အတွက် အမှန်တရား ပေါ်ပါတော့မလား။ ဖြစ်ပြီးတဲ့အခါ တောက်လျှောက် ငိုတယ်။ ငိုနေတဲ့အပြင် ဒီနေ့ကျတော့လည်း ခုနက ရဲဇာနည် page မှာ သူတို့က လိုက်ဗ်လွှင့်တော့လည်း သမီးလေး နာမည်ပါလာတယ်။ မေမေ့နာမည် ပါလာတယ်ပေါ့နော်။ နောက်တစ်ခုက document တွေ ထုတ်တဲ့နေရာမှာလည်း မိသားစုရဲ့ ဟိုဟာတွေပါ ပါလာတယ်။

ပါလာတော့ ကျွန်တော်တို့မှာ ဒီမိသားစုလေးကို ဒီသမီးလေး အနာဂတ်အတွက် စိုးရိမ်လို့ ဆိုပြီး ကျွန်တော်တို့က ပိုးမွေးသလို ဥပြီးကာမှ မီဒီယာကအစ ဒီဟာကို ကာကွယ်ပြီး ပြည်သူတွေက ကာကွယ်ပြီး ဥထားခဲ့တဲ့ နာမည်လေးကို ခုနက ပြောသလို သူ့အနာဂတ်ရှေ့ရေးကို သူက ဖျက်ချလိုက်ပြီး ဖော်ပြပစ်လိုက်တယ်။ ဒီဟာကိုကျတော့ ကျွန်တော်တို့မှာ တော်တော် ခံစားရတယ်။

ခံစားရတယ် ဆိုတာက ဒီ ၆ လ၊ ၇ လ ဖြတ်သန်းတဲ့ကိစ္စတောင်မှ ကျွန်တော်တို့မှာလေ တော်တော်ကြီးကို ခက်ခဲပါတယ်။ ခက်ခက်ခဲခဲ ဖြတ်သန်းခဲ့ရတာ။ မိသားစုဆို ပြောမနေနဲ့။

ဒီသာမန် ရုံးဝန်ထမ်းလေး နှစ်ဦးဟာ လစာမဲ့ ခွင့်ယူပြီးကာမှ ဒီတိုင်း ဖြတ်သန်းနေရတဲ့ အချိန်မှာ ကျွန်တော်တို့ ဒီသမီးလေးအတွက် ဆိုပြီး အလှူခံထားတဲ့ ပိုက်ဆံကိုလည်း ကျွန်တော်တို့က ခုနပြောသလို ဒီမြန်မာနိုင်ငံ ရဲတပ်ဖွဲ့ကပဲ ကျွန်တော် အလှူခံတာကို မသမာမှု ရှိလို့ရှိရင် အရေးယူပါ့မယ် ပြောတော့ ကျွန်တော့်မှာ ဒီပိုက်ဆံကို မထုတ်ရဲဘဲ ဒီတိုင်းပဲ ငုံ့ခံထားပြီးကာမှ သူတို့ကို ဒီတိုင်းပဲ ရုန်းကန်သွားလာပြီးတော့ နေရတဲ့အချိန်မှာ ဒီ ၆ လလောက်ကို ဖြတ်သန်းရတာက တကယ့်ကို သူတို့အစား ကျွန်တော် သိပါတယ်။

သူတို့ ဒါအတွက် ဒါ ငရဲတမျှပေါ့နော်။ ဒါကို နောက်ထပ် တိုင်းတက်တော့ နောက်ထပ် ၆ လ သွားဦးမယ်။ ဗဟို တက်တော့လည်း ၇ လ၊ ၈ လ သွားဦးမယ် ဆိုတော့ ဒါသူတို့အတွက် ခံနိုင်ရည် မရှိအောင် လုပ်ပစ်လိုက်တာ အဲလိုမျိုး ခံစားရတယ်။

ဓာတ်ပုံ ပုံစာ,

အသက် ၃ နှစ်အောက် မိန်းကလေးငယ် အဓမ္မ ပြုကျင့်ခံရတယ်ဆိုတဲ့ အမှုမှာ တရားမျှတမှု ရှိဖို့ အများပြည်သူဆန္ဒပြ

ဘီဘီစီ - ဟုတ်ကဲ့ခင်ဗျ နောက်ဆုံးဖြစ်စဉ်ကတော့ ဒီရဲဇာနည် page မြန်မာနိုင်ငံရဲတပ်ဖွဲ့ရဲ့ တရားဝင် ရဲဇာနည် page ကနေပြီးတော့ ဒီသက်သေ အထောက်အထားများ ဆိုပြီးတော့ တင်တဲ့ဟာတွေမှာ အလုပ်အကိုင်တွေ၊ နာမည်တွေပေါ့လေ။ ဗစ်တိုးရီးယား မိသားစုရဲ့ အလုပ်အကိုင်တွေ၊ နာမည်တွေ အတိအကျ ပါခဲ့တဲ့ အပေါ်မှာ ဆိုရင် ဘယ်လို တုံ့ပြန်သွားဖို့ ရှိလဲဗျ။

ဒေါက်တာဝင်းကိုကိုသိန်း- ကျွန်တော်တို့က ဒါလူ့ကျင့်ဝတ် သိက္ခာ အရ မြန်မာနိုင်ငံရဲ့ ဆက်တင် အနေအထားအရ ဒါလေးကို အနာဂတ်၊ ဒီ ၃ နှစ် ကလေးမလေးအတွက် အသာဖုံးအုပ်ထားတာ၊ ကြောက်လို့ မဟုတ်ဘူး။ ဘာမှ ကြောက်စရာအကြောင်းမှ မရှိဘူး။

အခု ကျွန်တော်တို့ကို ဖွင့်ပြီး ဒီလိုလုပ်ချင်ရင် ကျွန်တော်တို့က ဖွင့်သွားရုံပဲ ရှိတယ်။ ဒါသည် ခုနပြောသလို တရားဥပဒေနဲ့ ငြိစွန်းမှု ရှိသလား၊ အထူးသဖြင့် ကလေးသူငယ် အခွင့်အရေး ဥပဒေနဲ့ ငြိစွန်းမှု ရှိသလား၊ ကျွန်တော်တို့ တိုင်ပင်မယ်။ တိုင်ပင်ပြီးကာမှ ဒါနဲ့ပတ်သက်လို့ ကျွန်တော်တို့ ဆက်လုပ်စရာ ရှိတာကို ဆက်လုပ်သွားမယ်။

ဒီလိုမျိုး လုပ်လို့ ကျွန်တော်တို့မှာ ကြောက်သွားပြီး နောက်ဆုတ်သွားမယ်လို့ ဘယ်တော့မှ သည်းမခံနိုင်ဘူး။ ဒါမျိုး လုပ်လို့ ကျွန်တော်တို့ မရဘူး။ ကျွန်တော်တို့သည် ဘယ်မှာ နေရ နေရဗျာ။ ကျွန်တော်ပါ လိုက်ပြီးကာမှ စောင့်ရှောက်ရ စောင့်ရှောက်ရ ဒီမိသားစုလေးကို ရသမျှ ကျွန်တော် ကာကွယ်မယ်။

ကျွန်တော် ဝင်လာခဲ့တာ ဒီမိသားစုပေါ်မှာ ကျွန်တော် ဒီသမီးလေးကို နောက်ထပ် ထိခိုက်မှု မဖြစ်ပါစေနဲ့ ဆိုပြီး ဝင်လာခဲ့တာ၊ တတ်နိုင်သမျှလည်း ကျွန်တော် မီဒီယာကို ကျွန်တော် အုပ်ဆိုင်းခိုင်းတယ်။ ပြည်သူကလည်း အုပ်ဆိုင်းပေးတယ်။ ဒီလို အုပ်ဆိုင်းပေးထားတဲ့ ကြားထဲက ဒီလိုမျိုး လုပ်ချလိုက်တာသည် ကျွန်တော်တို့အတွက်ကတော့ ဘာဘဲပြောပြော မင်းတို့ ဆက်လုပ်ရင် ဒီလိုမျိုး ဖြစ်မယ် ဆိုတာမျိုး လုပ်လိုက်တာပဲလို့ ခံစားရတယ်။

အဲတော့ ကျွန်တော်တို့သည် ဥပဒေကို ကျော်ပြီး ဘာမှ မလုပ်ဘူး။ ဥပဒေဘောင်ထဲကပဲ ရအောင် လုပ်မယ်။ ကျွန်တော် အဲလိုပဲ ခံယူတယ်။

ဓာတ်ပုံ ပုံစာ,

လူမှုကွန်ရက်ပေါ်မှာ ဝေဖန်မှုတွေလည်း မြင့်တက်ခဲ့တဲ့အမှုဖြစ်

ဘီဘီစီ - အမှုဖြစ်စဉ် တစ်ခုလုံးကို ပြန်ကြည့်မယ် ဆိုရင် တရားလိုပြ သက်သေတွေ ထွက်သွားတာ ၁၉ ယောက် ရှိတယ်ပေါ့။ အဲဒီ ၁၉ ယောက် ထွက်သွားပြီးတဲ့ နောက်ပိုင်းမှာ ဒီသံသယ တရားခံကို စွပ်စွဲလောက်အောင် မရှိဘူး ဆိုပြီး လွတ်သွားတယ်ပေါ့လေ။

ဒီအနေအထားကရော ဘယ်လိုကြောင့် ဥပမာ တရားလိုဘက်က တင်ပြတာတွေရဲ့ အားနည်းချက်ကြောင့်လား။ ဘယ်လို အနေအထားတွေကြောင့် ပစ္စည်း၊ လူ အဲဒီလို သက်သေတွေ ဘယ်လို အားနည်းချက်တွေ ရှိလို့ အမှုရုပ်လုံးက ပေါ်မလာသေးတာလဲဗျ။

ဒေါက်တာဝင်းကိုကိုသိန်း- ကျွန်တော်တို့ မြန်မာနိုင်ငံမှာကျတော့ တရားလိုနဲ့ တရားခံ ဆိုတာ တော်တော် ရောတယ်ပေါ့နော်။ သမီးလေးသည် တကယ်တန်းကျတော့ သမီးလေးနဲ့ သူ့ရဲ့ မိသားစုသည် နစ်နာသူ၊ နစ်နာတဲ့အတွက်ကြောင့် ကျွန်တော်တို့က မြန်မာနိုင်ငံ ရဲတပ်ဖွဲ့ကို တိုင်ကြားတယ်။

အဲတော့ မြန်မာနိုင်ငံ ရဲတပ်ဖွဲ့က ခုနပြောသလို အစိုးရက တရားလို လုပ်ပြီး တိုင်ကြားတယ်။ အဲတော့ တရားလိုသည် မြန်မာနိုင်ငံ ရဲတပ်ဖွဲ့ ဖြစ်သွားတာပေါ့နော်။

အဲဒီလို အချိန်မှာ ဆိုလို့ရှိရင် တရားလိုဘက်က တရားလိုပြ သက်သေတွေ သွင်းရတယ်။ ပစ္စည်းသက်သေ၊ လူသက်သေ သွင်းရတယ်။ အဲတော့ ပစ္စည်းသက်သေ နေရာမှာလည်း ပြောစရာတွေ ရှိတယ်။ လူသက်သေနေရာမှာကို ပြောစရာရှိတယ်။

ဥပမာ လူသက်သေအားဖြင့်ဆိုရင် သမီးလေး မိသားစု သက်သေခေါ်တာ ရှိတယ်။ နောက်ပြီးတော့ သူတို့က သက်သေ ဆိုပြီးတော့ Wisdom Hill ကျောင်းဘက်က လူတွေကို ထည့်တာ ရှိတယ်။

ကျောင်းဘက်က ဆရာဆရာမတွေ အားလုံးက အောင်ကြီး မဖြစ်နိုင်ပါဘူး၊ အောင်ကြီးလည်း ဘယ်မှ မဝင်ပါဘူး ဆိုပြီး ပြောနေတယ်။ ဒါဆိုရင် သူတို့ကို တရားလိုပြ သက်သေအဖြစ် ဘာလို့ ထည့်တာလဲ ဘာရည်ရွယ်ချက်နဲ့ ထည့်တာလဲ။ ဒါက လူသက်သေတွေပေါ့။

နောက်တစ်ခုက ပစ္စည်းသက်သေတွေ ကြည့်ရအောင်၊ ပစ္စည်း သက်သေတွေမှာလည်း လိုအပ်ချက်တွေ အများကြီး ရှိတယ်။ ဥပမာအားဖြင့် ကျွန်တော်တို့က ဒီ memory stick နဲ့ ထည့်ပေးလိုက်တဲ့ ဖိုင် ၁၁ဖိုင် ရှိတယ်။ အဲ ၁၁ ဖိုင်ထဲက file name တွေ၊ ဖိုင်နံမည်တွေက ကြည့်လိုက်ရုံနဲ့ပဲ ဖိုင်ရဲ့ အချိန်ကာလ၊ file length ကို သိလို့ ရတယ်။

အဲမှာ ဆိုလို့ ရှိရင် ၁၂ နာရီထိုးကာလမှာ file name အနေနဲ့က တစ်နာရီစာ ရှိတယ်။ file length ကကျတော့ ၄၉ မိနစ်ပဲ ရှိတယ်။ ဒီလိုမျိုး သာမန်လူ တစ်ယောက်ရဲ့ မျက်စိနဲ့ ကြည့်လိုက်ရင်ကို သိသာနေတဲ့ ဟာကြီးကို သူတို့က လွှတ်ပေးပြီးကာမှ ဒါသည် သက်သေပါ ဆိုပြီး တင်လိုက်တယ်။

CCTV မှတ်တမ်း အပြည့်အစုံ ရပါတယ် ဆိုပြီး တင်လိုက်တယ်။ ဒါတစ်ချက် ရှိတယ်။ နောက်တစ်ခုက ကျွန်တော်တို့ သမီးလေး၊ သမီးလေးကို လုပ်တာ ဒီကိုကိုပါ ဆိုပြီးတော့ အောင်ကြီးကို လက်ညှိုးထိုးပြတယ်။ မှန်တယ်။

ကျွန်တော်တို့ ဘယ်တုန်းကမှ မငြင်းခဲ့ဘူးနော်။ ဒါပေမဲ့ အဲဒါကို ရဲချုပ် အောင်နိုင်သူကနေ ပြီးကာမှ ဒါကို သက်သေခံ တင်သွင်းမယ် ဆိုပြီးကာမှ အဲဒီဗီဒီယိုဖိုင် ပါမလာဘူး။ ပါမလာဘဲနဲ့ ဘာပဲ ပါလာလဲ ဆိုတော့ မီးမီးရဲ့ ဖင်ဘု၊ ဒီနေရာကို ဆိတ်တာပါ ဆိုပြီးတော့ သူ့ကိုယ်သူ ညွှန်ပြတဲ့ အပိုင်းကိုပဲ အောင်ကြီးကို ညွှန်ပြတဲ့ ဖိုင်ပါ ဆိုပြီးတင်လိုက်တယ်။

ဆိုလိုတာက တကယ်တမ်း သက်သေခံ ဝင်ပြီးကာမှ တရားရုံးမှာ စစ်ဆေးကြည့်လိုက်တဲ့ အခါကျတော့ ဒီဖိုင်ဟာ အောင်ကြီးက ဒီသမီးလေးကို လုပ်တာ။ ဒီ ကိုကိုပါ ဆိုပြီးတော့ အောင်ကြီးကို ညွှန်ပြတဲ့ ဖိုင်မဟုတ်တော့ဘူး။ အဲတော့ အောင်ကြီးကို ညွှန်ပြချက်သည် သက်သေခံထဲမှာ ဘာမှ ပါမလာဘူး။ မီးမီးရဲ့ ဖင်ဘု ဒီနေရာကို ဆိတ်တာပါ ဆိုတဲ့ ဖိုင်ကိုပဲ သူတို့က သက်သေခံ ဆိုပြီး ထည့်လွှတ်လိုက်တာ။

အဲတော့ ပစ္စည်းသက်သေ၊ လူသက်သေ နေရာတွေပါ၊ ပစ္စည်းသက်သေကလည်း လိုအပ်ချက်တွေ အများကြီး ရှိတယ်၊ Hard Disk ကို မသွင်းခဲ့တာတွေ ရှိတယ်။ အဲတော့ တရားရှင် လွှတ်လိုက်တာသည် ဘာပဲပြောပြော မမှားဘူးလို့တောင် ပြောလို့ရတယ်။

အောင်ကြီး အတွက် အောင်ကြီး ဖြစ်နိုင်ပါတယ် ဆိုတဲ့ ခိုင်လုံသော အထောက်အထားသည် တော်တော့်ကို weak ဖြစ်သွားတယ်။ အဲလိုပဲ သွားတဲ့အတွက် အောင်ကြီးကို တရားရှင် လွှတ်လိုက်တယ်လို့ပဲ ယူဆပါတယ်။

ဗီဒီယို ပုံစာ,

ဘီဘီစီ သီးသန့်ရတဲ့ ဗစ်တိုးရီးယား အမှု စီစီတီဗီ မှတ်တမ်း

ဘီဘီစီ - ဒါကိုပဲ ဆက်ပြီးတော့ ဥပဒေ အရာရှိဘက်က ဖြစ်ဖြစ် ရဲဘက်က ဖြစ်ဖြစ် အထက်တရားရုံးကို တက်မယ်ဆိုတဲ့ သဘောလားဗျ။

ဒေါက်တာဝင်းကိုကိုသိန်း - ဟုတ်ကဲ့။ အဲလို ဆက်တက်မယ်ဆိုလို့ရှိရင် သူက ဘာလဲ ဆိုတော့ အမှန်တရား ရှာဖို့မဟုတ်ဘူး။ အောင်ကြီးကို ဆက်လက်ပြီးတော့ အပြစ်ပေးဖို့အတွက် သူတို့က တိုင်းရုံးကို ဆက်တက်မယ်ဆိုတဲ့ ကျွန်တော်တို့ ဒီလို နားလည်လိုက်တယ်။

ဘီဘီစီ - အဲဒီအချိန်မှာရော ဒီမိသားစုဘက်က တစ်စုံတစ်ရာ တောင်းဆိုခွင့် တောင်းဆိုမှု ဟိုတစ်နေ့က တင်တဲ့ ဒီအန်အေ သက်သေ ပြန်စစ်ပေးဖို့တို့ ဘာတို့ မိသားစုဘက်က တင်ခဲ့တဲ့ဟာတွေကရော ဘယ်လို အခြေအနေရှိပြီလဲ။ ဘယ်တရားရုံးမှာ ဆက်စစ်ကြမလဲ။

ဒေါက်တာဝင်းကိုကိုသိန်း - ကျွန်တော်တို့က အမှန်တရားပေါ်ဖို့ ဆိုရင် သူတို့ဆက်သွားတယ်ဆိုလို့ရှိရင် ကျွန်တော်တို့က ဒီအန်အေ စစ်ဖို့ တောင်းဆိုပေးမှာပဲ။ အဲဒါအောင်ကြီးကို အပြစ်ကျစေချင်လို့ မဟုတ်ဘူး။ အမှန်တရားပေါ်ဖို့အတွက် ဘယ်လမ်းကြောင်းရှိမလဲ။ ရှိတဲ့ လမ်းကြောင်းက ကျွန်တော်တို့လိုက်မယ်။

ဘီဘီစီ - အဲတော့ ဒက္ခိဏ ခရိုင်တရားရုံးမှာ တင်ထားတဲ့ ဒီအန်အေ ကိစ္စတို့ကရော ဘယ်အဆင့်ကို ဆက်ရောက်သွားမှာလဲ။ သူက အဲဒီမှာပဲ ဆက်ကြားနာမှာလား။

ဒေါက်တာဝင်းကိုကိုသိန်း - အဲဒါတော့ ကျွန်တော်တို့ မပြောတတ်ဘူး။ ကျွန်တော်တို့သိတာ ဒီအန်အေ ရနိုင်သောနေရာ နှစ်နေရာ ရှိခဲ့တယ်။ သမီးလေးရဲ့ ဘောင်းဘီအပြာမှာ ရှိခဲ့တယ်။ နောက်တစ်ခုက သမီးလေးရဲ့ ခန္ဓာကိုယ်ထဲက အရည်ကို မှန်ပြားပေါ်မှာ တင်စစ်တာမှာ ရှိခဲ့တယ်။ ဘောင်းဘီကဟာသည် ပျက်သွားပါပြီဆိုပြီး သူတို့ တရားဝင်ထွက်တယ်။

မှန်ပြားပေါ်မှာ တင်ထားတဲ့ဟာသည် သမီးလေးရဲ့ ဒီအန်အေရောရှိတယ်။ ကျူးလွန်သူရဲ့ ဒီအန်အေရောရှိတယ်။ တကယ်လို့ မှန်ပြားပျက်သွားပြီးဆိုလို့ရှိရင်လည်း ကျွန်တော်တို့ကို အပျက်ပေး။ အဲဒီအပျက်ထဲမှာ သမီးလေးရဲ့ ဒီအန်အေပါမပါ စစ်လိုက်မယ်။

စစ်လိုက်လို့ရှိရင် သမီးလေးရဲ့ဒီအန်အေ ပါတယ်ဆိုလို့ရှိရင် ကျူးလွန်သူရဲ့ ဒီအန်အေကို ကျွန်တော်တို့က နိုင်ငံခြားပို့စစ်မယ်။ ဒါက ကျွန်တော်တို့ လိုချင်တဲ့ ဆန္ဒ။ ကျွန်တော်တို့ လိုချင်တဲ့ ဆန္ဒဆိုတာက ပြည်သူသိချင်တဲ့ဆန္ဒ။ ကျွန်တော်တို့သည် ဘာကိုမှ ဥပဒေကို ကျော်လုပ်တာမဟုတ်ဘူး။ အမှန်တရားပေါ်ဖို့ နိုင်ငံခြားပို့ရမယ်ဆိုလည်း ပို့စစ်မယ်။

ဘီဘီစီ - လွန်ခဲ့တဲ့ရက်ပိုင်းက မိသားစုက တင်ခဲ့တဲ့ ဒီအန်အေ ပြန်စစ်ဖို့၊ နိုင်ငံခြားပို့ဖို့ ကိစ္စတွေကရော ဥပဒေ အရာရှိကတဆင့် ဘယ်လို ဆက်လက်ဆောင်ရွက်မယ်ဆိုတာတွေ သိထားတာရှိလား။

ဒေါက်တာဝင်းကိုကိုသိန်း - ကျွန်တော်တို့ကို စပြောကတည်းက ဥပဒေ အရာရှိက တုံ့ပြန်မှု မပေးခဲ့ဘူးပေါ့နော်။ နောက်တစ်ခု လမ်းပျောက်တယ်ဆိုတာ အဲဒါပြောတာ။

ကျွန်တော်တို့က အဲဒါကို မတင်လို့ရှိရင် ကျွန်တော်တို့မှာက တောင်းဆိုပိုင်ခွင့် ရှိသေးတယ်။ အခုဟာက တရားရှင်လွှတ်လိုက်တဲ့နောက်မှာ သူတို့ဘာဆက်လုပ်မလဲ မသိတော့ဘူး။

အဲတော့ ဒီဟာကြီးသည် ဒီတိုင်းကြီး တန်းလန်းကြီး ဖြစ်သွားတာပဲ။

ဓာတ်ပုံ ပုံစာ,

မေလ ၁၆ ရက် ကလေး လိင်မတရားကျင့်ခံခဲ့ရတယ်ဆိုတာ စစ်ဆေးတွေ့ခဲ့ရတယ်လို့ တိုင်ကြားထား

ဘီဘီစီ - အဲတော့ ဒီအန်အေ စစ်ဖို့ ဘာဖို့ ရဲကတော့ ပြန်လုပ်ကောင်းလုပ်မယ်။ ကိုယ့်တောင်းဆိုချက် အနေနဲ့ လုပ်တာတော့ မဟုတ်ဘူးပေါ့။

ဒေါက်တာဝင်းကိုကိုသိန်း - ကျွန်တော်တို့က ဘာမှ တောင်းဆိုလို့ မရတော့ဘူးပေါ့။ ဘာလို့လဲဆိုတော့ တရားခွင်လည်း မရှိတော့ဘူး။ အဲလိုဖြစ်သွားတယ်။

ဘီဘီစီ - မိသားစုဘက်ကတော့ ကူညီဆောင်ရွက်ပေးနေတဲ့ အဖွဲ့တော့ ဆက်ရှိနေတယ်။ အဲဒီရှေ့နေနဲ့တော့ တိုင်ပင်မှုတွေ ဆက်ရှိနေတယ်။

ဒေါက်တာဝင်းကိုကိုသိန်း - ရှိနေပါတယ်။ ကျွန်တော်တို့ ဆက်ရှိနေတယ်။

ဘီဘီစီ - တခြားရှေ့အနာဂတ်မှာပေါ့လေ၊ သမီးရဲ့ ရှေ့ရေးရော၊ အမှန်တရား ဖော်ထုတ်ရေးရော အကြမ်းဖျင်းပြင်ဆင်ထားတာ အခုချိန်မှာ ပြောနိုင်သလောက်ဆိုရင် ဘာတွေရှိသလဲ။

ဒေါက်တာဝင်းကိုကိုသိန်း - ကျွန်တော်တို့က အမှန်တရား ရဖို့အတွက်ဆိုရင်တော့ ရနိုင်တဲ့ အင်အားယူမှာပဲ။ ကူညီနိုင်တဲ့သူ ကူညီကြပါလို့ ပြောတာပဲ။

ဘာလို့တုန်းဆို ကျွန်တော်တို့က သမီးလေးရဲ့ နစ်နာမှုက တော်တော်လေးကြီးသွားတဲ့အတွက်ကြောင့် ဒီဟာသည် အမှန်တရား ပေါ်မှကို ရမယ်။

မပေါ်မချင်း ကျွန်တော်တို့ ရှေ့ဆက်သွားနေမှာပဲ။ ရှေ့မှာ မြင့်မိုရ်တောင်ရှိရှိ ဘာရှိရှိ ကျွန်တော်တို့ သွားမှာ။

အမှန်တရား ပေါ်ပြီးတဲ့နောက်မှ ဒီမိသားစုရဲ့လုံခြုံရေး၊ ဒီမိသားစုရဲ့ဘဝရှေ့ရေး၊ ဒီမိသားစုရဲ့ အနာဂတ်ရေးကို စဉ်းစားမယ်။