ဗစ်တိုးရီးယားအမှု - သံသယတရားခံ လွှတ်ပေးလိုက်အပြီး ဘာဆက်ဖြစ်မလဲ

ဒက္ခိဏခရိုင်တရားရုံး တရားရုံးသတင်းပြန်ကြားရေး အရာရှိ ဒေါ်ဖြူဝင်းလတ်

ဗစ်တိုးရီးယားအမှုက သံသယတရားခံအဖြစ် စွပ်စွဲခံထားရသူ ကိုအောင်ကြီးကို တရားရှင်လွှတ်ပေးပြီးနောက် အမှုရှေ့ဆက်ဘယ်လိုဖြစ်မလဲဆိုတာနဲ့ ပတ်သက်ပြီး တရားရုံးရဲ့ အမိန့်ကို မကျေနပ်တဲ့သူအနေနဲ့ အဆင်မြင့် တရားရုံးကို တက်ရောက်နိုင်တယ်လို့ ဒက္ခိဏခရိုင်တရားရုံး တရားရုံးသတင်းပြန်ကြားရေး အရာရှိက ပြောပါတယ်။

နေပြည်တော် Wisdom Hill မူကြိုက အသက် သုံးနှစ်မပြည်သေးတဲ့ ကျောင်းသူမိန်းကလေး လိင်အနိုင်ကျင့်ခံရတယ်ဆိုပြီး စွပ်စွဲထားတဲ့ အမှုက သံသယတရားခံကို တရားရှင်လွှတ်ပေးလိုက်ပြီး ဒုတိယမြောက်နေ့မှာ အဲဒီလို ဆုံးဖြတ်လွှတ်ပေးခဲ့တဲ့ နေပြည်တော် ဒက္ခိဏခရိုင်တရားရုံးက သတင်းပြန်ကြားရေးအရာရှိ ဒေါ်ဖြူဝင်းလတ်က မီဒီယာတွေကို အထက်ပါအတိုင်းပြောခဲ့တာ ဖြစ်ပါတယ်။

"နစ်နာတဲ့သူတွေ တရားလိုတို့၊ အမိန့်ကို မကျေနပ်တဲ့သူ ဘယ်သူမဆို အဆင့်မြင့် တရားရုံးကို ဆက်ပြီးတော့ ပြင်ဆင် တက်ရောက်နိုင်ပါတယ်" လို့ ပြောပါတယ်။

ဒီလို ပြင်ဆင်တက်ရောက်တာကို ကန့်သတ်အချိန် နှစ်လ အတွင်း တက်ရောက်နိုင်တယ်လို့ ပြောပါတယ်။

တရားရုံးက ကိုအောင်ကြီးကို လွှတ်ပေးလိုက်ပြီး နောက်တစ်နေ့မှာ ရဲတပ်ဖွဲ့ကတော့ ဒီအမှုကို ဥပဒေနဲ့ အညီ ဆက်လုပ်မယ်လို့ ပြောပါတယ်။

"သက်ဆိုင်ရာ တရားရုံးရဲ့ စီရင်ချက် မရသေးပါဘူး။ စီရင်ချက်ရလို့ရှိရင်တော့ ဥပဒေနဲ့ အညီ ဘယ်လို ဆက်လက်ဆောင်ရွက်မလဲ ဆိုတာကို ဆောင်ရွက်သွားမှာ ဖြစ်ပါတယ်" လို့ မှုခင်းရဲတပ်ဖွဲ့ ညွှန်ကြားရေးမှူး ရဲမှူးကြီးမင်းဟန်က ဗစ်တိုးရီးယားအမှုနဲ့ ပတ်သက်တဲ့ သတင်းစာရှင်းလင်းပွဲမှာ ပြောပါတယ်။

နစ်နာသူ မိသားစုကို ကူညီဆောင်ရွက်ပေးနေတဲ့ ဒေါက်တာဝင်းကိုကိုသိန်းကတော့ မိသားစုက တောင်းဆိုထားတဲ့ ဒီအန်အေကို ပြည်ပပို့ စစ်ပေးဖို့ တောင်းဆိုချက်နဲ့ ပတ်သက်ပြီး "ကျွန်တော်တို့က ဘာမှ တောင်းဆိုလို့ မရတော့ဘူးပေါ့။ ဘာလို့လဲဆိုတော့ တရားခွင်လည်း မရှိတော့ဘူး။ အဲလိုဖြစ်သွားတယ်" လို့ ပြောပါတယ်။

ဒါပေမဲ့ မိသားစုကို ကူညီဆောင်ရွက်ပေးနေတဲ့ အဖွဲ့တော့ ဆက်ရှိနေပြီး အဲဒီရှေ့နေနဲ့တော့ တိုင်ပင်မှုတွေ ဆက်ရှိနေတယ်လို့ ပြောပါတယ်။

ကိုအောင်ကြီးရဲ့ ရှေ့နေ ဦးခင်မောင်ဇော်ကတော့ "ဒီအမှုက ရဲက ပြောသွားတယ် အချိန်စောလွန်းတယ် ဘာညာဆိုတော့ ရက်ပေါင်း ၆၀ အတွင်းမှာတော့ အဖြေပေါ်မှာ မဟုတ်သေးဘူး"

"ဘာလို့ဆိုတော့ မန္တလေးတိုင်း တရားလွှတ်တော်ကနေပြီးတော့မှ စွဲချက်မတင်ခင် လွှတ်ထားတဲ့ ကိစ္စကို ဆက်စစ်ဦး၊ ၂၅၃ (၁) အရ အကုန်ကုန်မှ လွှတ်တာ ဖြစ်စေ၊ စွဲချက်တင်ပြီးတော့မှ အပြီးသတ် အမိန့်ချတာ ဖြစ်စေ လုပ်ဦးဆိုရင် ဒါက ဆက်သွားရမှာ"

"ရက်ပေါင်း ၆၀ အတွင်းမှာ မီးမသေသေးဘူး။ အပေါ်ရုံးက ပြင်ကောင်း ပြင်နိုင်တယ်" လို့ လည်း ရှေ့နေ ဦးခင်မောင်ဇော်က ပြောပါတယ်။

သံသယတရားခံကို တရားရုံးက ပယ်လိုက်တဲ့အတွက် အမှန်တရားကို ရှာဖို့က ရဲတပ်ဖွဲ့ရဲ့ တာဝန်ဖြစ်တယ်လို့လည်း သူက ပြောပါတယ်။

တရားရုံးက ဒီဇင်ဘာ ၂၀ ရက်မှာ မီဒီယာတွေနဲ့ တွေ့ဆုံပြောကြားရာမှာတော့ တရားရုံးက တရားလို အပါအဝင် သက်သေ ၁၉ ယောက် စစ်ဆေးခဲ့တယ်၊ ရုံးခေါ်သက်သေ အနေနဲ့ ကွန်ပျူတာနဲ့ ပတ်သက်တဲ့ သက်သေတွေကိုလည်း စစ်ဆေးခဲ့တယ်၊ အဲဒီသက်သေတွေ စစ်ဆေးပြီးတဲ့အခါမှာ သက်သေတွေက ကိုအောင်ကြီးက ကျူးလွန်နိုင်ဖွယ်ရာ အခွင့်အရေးမရှိဘူးလို့ ထွက်ဆိုထားကြတဲ့အတွက် စွပ်စွဲခံရသူမှာ စွဲချက်တင်နိုင်တဲ့ အထောက်အထား တစ်စုံ တရာမတွေ့ဘူးဆိုပြီး တရားရုံးက ရာဇဝတ်ကျင့်ထုံးပုဒ်မ ၂၅၃ (၂) အရ စွပ်စွဲခံရသူ အောင်ကြီး ခေါ် အောင်ကျော်မျိုးကို စွဲချက်မတင်ခင် လွှတ်ခဲ့တာ ဖြစ်တယ်လို့ ပြောခဲ့ပါတယ်။

ဒီအမှုဟာ မေလလယ်မှာ စတင်ခဲ့တာဖြစ်ပြီး ရုံးချိန်း ၁၃ ချိန်း အပြီးမှာ သံသယတရားခံကို တရားရုံးက လွှတ်ပေးလိုက်တာ ဖြစ်ပါတယ်။

ဆက်စပ် အကြောင်းအရာများ