အခြေခံပညာကျောင်းတွေရဲ့စာသင်ကာလကို မတ်လကုန်ထိ တိုးမြှင့်လိုက်တဲ့အပေါ် ပြန်လည်သုံးသပ်ပေးဖို့ ဆရာများအဖွဲ့ချုပ်တောင်းဆို

စာသင်ချိန်တိုးမြှင့်တဲ့အပေါ် ပြန်သုံးသပ်ပေးဖို့ ဆရာများအဖွဲ့ချုပ်တောင်းဆို ဓာတ်ပုံ မူပိုင် NICOLAS ASFOURI/AFP via Getty Images)
Image caption စာသင်ချိန်တိုးမြှင့်တဲ့အပေါ် ပြန်သုံးသပ်ပေးဖို့ ဆရာများအဖွဲ့ချုပ်တောင်းဆို

ဒီနှစ် ၂၀၁၉ -၂၀၂၀ ပညာသင်နှစ်ကစပြီး အခြေခံပညာကျောင်းတွေရဲ့ စာသင်ချိန်ကာလကို မတ်လကုန်အထိ တိုးမြှင့်သွားမယ်လို့ ပညာရေးဝန်ကြီးဌာန၊ အခြေခံပညာဦးစီးဌာနက အသိပေးထုတ်ပြန်ထားတဲ့အပေါ် ပြန်လည်သုံးသပ်ပေးဖို့ မြန်မာနိုင်ငံလုံး ဆိုင်ရာ ဆရာ၊ဆရာများ အဖွဲ့ချုပ်က ဒီဇင်ဘာ ၂၂ ရက်နေ့မှာ အချက် ၇ချက်ပါ သဘောထားကြေညာချက်ထုတ်ပြန်ပြီးတောင်းဆိုလိုက်ပါတယ်။

ဒီနှစ်ပညာသင်နှစ်ကစပြီး အခြေခံပညာ အတန်းအသီးသီးရဲ့ ကျောင်းတွင်းစစ်စာမေးပွဲတွေကို တက္ကသိုလ် ဝင်တန်းစာမေးပွဲတွေဖြေဆိုပြီးတော့မှသာ ပြုလုပ်တော့မှာလည်းဖြစ်ပါတယ်။

' 'ဆရာများအဖွဲ့ချုပ်အနေနဲ့ နယ်တွေက ဆရာ၊ဆရာမတွေဆီက မှတ်ချက်တွေ၊ ပြီးတော့ ဆရာတွေက တဆင့် ကျောင်းသားမိဘတွေရဲ့ မှတ်ချက်တွေကို တောင်းခံပြီးမှ ဒီသဘောထားထုတ်ပြန်ချက်ကို ထုတ် တာပါ။ ထုတ်ပြန်ချက် ၇ ချက်ထဲမှာ အဓိက အချက် ၃နဲ့ ၅ ကတော့ တော်တော်များများတင်ပြကြတယ်။ မတ်လအထိ တက်ရမယ်ဆို ကျောင်းသားတွေအတွက်လည်း အဆင်မပြေသလို ဆရာ၊ ဆရာမတွေအတွက်လည်း အဆင်မပြေဘူး''လို့ မြန်မာနိုင်ငံလုံးဆိုင်ရာ ဆရာ၊ဆရာများ အဖွဲ့ချုပ်အတွင်းရေးမှူးဖြစ်သူ ဒေါက်တာ ဇော်မျိုးလှိုင်ကပြောပါတယ်။

မြို့ နဲ့ နယ်ဒေသတွေမှာပါရှိကြတဲ့ ဆရာများအဖွဲ့ချုပ် ဆရာ၊ဆရာမအများစုထံက တင်ပြလာတဲ့ အချက်တွေထဲမှာ မတ်လအတွင်း အတန်းအသီးသီးမှာ သင်ကြားရေးတာဝန်တွေကို ထမ်းဆောင်ရသလို စတုတ္ထ တန်း၊ အဋ္ဌမတန်း နဲ့ တက္ကသိုလ်ဝင်တန်း စာမေးပွဲတွေ ကျင်းပဖို့အတွက် စာမေးပွဲခန်း ပြင်ဆင်ရတာ၊ စာမေးပွဲခန်းကြီးကြပ်တာ၊ အဖြေလွှာစစ်ဆေးတာ၊ အောင်စာရင်းပြုစုရတာ စတဲ့တာဝန်တွေကို ပါလုပ်ရတော့မှာဖြစ်တဲ့အတွက် ဆရာ၊ ဆရာတွေအတွက် ဝန်ပိတာ( ဒါမှမဟုတ်) ဆရာအင်အား မလုံလောက်တာမျိုး ဖြစ်စေနိုင် တယ်လို့ ပါပါတယ်။

ဓာတ်ပုံ မူပိုင် AUNG THU/AFP via Getty Images
Image caption မတ်လကုန်အထိ တက်ရမယ့်အပေါ် သဘောမကျတဲ့ ကျောင်းသားမိဘအချို့လည်းရှိ

ဒီအချက်နဲ့ပတ်သက်ပြီး အဖွဲ့ဝင် ၂သိန်းဝန်းကျင်ရှိတဲ့ တိုင်းနဲ့ပြည်နယ်အသီးသီးက ကျောင်းဆရာ၊ဆရာမ တွေပါဝင်တဲ့ လူမှုကွန်ရက်ပေါ်က ဆရာ၊ဆရာများဆိုင်ရာ ဂရုမှာတော့ အလားတူ သဘောထားမျိုးရှိနေကြောင်း ရေးသားမျှဝေနေကြတာကိုတွေ့ရပါတယ်။

ဒါ့အပြင် မြန်မာနိုင်ငံရဲ့ရာသီဥတုအခြေအနေအရ မတ်လဟာ အပူရှိန်ပြင်းတဲ့အချိန်ကာလလည်းဖြစ်တာ ကြောင့် အခြေခံပညာ ကျောင်းများတွင် (အထူးသဖြင့် ကျေးလက်ဒေသမှ) ကလေးသူငယ်အရွယ် ကျောင်းသား၊ ကျောင်းသူတွေနဲ့ အသက်အရွယ်ကြီးရင့်တဲ့ ဆရာကြီး၊ ဆရာမကြီးတွေအတွက်တော့ မလိုလားအပ်တဲ့ ကျန်းမာရေး အန္တရာယ်တွေနဲ့ ရင်ဆိုင်ရဖွယ် ရှိတယ်လို့လည်း ဆရာများအဖွဲ့ချုပ်ရဲ့ သဘောထား ကြေညာချက်မှာပါပါတယ်။

ဆရာ၊ ဆရာမတွေနည်းတူ ကျောင်းသားမိဘတွေဘက်ကလည်း အပူရှိန်ပြင်းတဲ့ကာလအထိ ကျောင်းတက် ရမယ့်အပေါ် စိုးရိမ်ပူပန်တဲ့မိဘအချို့လည်းရှိနေပါတယ်။

'' အစိုးရကျောင်းအများစုမှာ စာသင်ခန်းတွေက ကျဉ်းပြီး ပန်ကာမရှိ အဲကွန်းမရှိတဲ့ကျောင်းတွေက များပါတယ်။ မတ်လဆိုရင် အပူရှိန်ကလည်းပြင်းပြီ။ ရာသီဥတုကပူပူနဲ့ ကလေးတွေ ချွေးထွက်လွန်မှာ မခံနိုင်မှာကို စိတ်ပူတယ်။''လို့ သာကေတမြို့နယ်အတွင်းမှာ နေထိုင်တဲ့ ကျောင်းသားမိခင်တစ်ဦးကသူ့ရဲ့အမြင်ကို ပြောပြ ပါတယ်။

ဓာတ်ပုံ မူပိုင် YE AUNG THU/AFP via Getty Images
Image caption တက္ကသိုလ်ဝင်တန်းတွေဖြေဆိုပြီးမှ ကျန်တဲ့ ကျောင်းတွင်းစစ်စာမေးပွဲတွေကို စစ်ဆေးမှာဖြစ်

ရာသီဥတုပူပြင်းတဲ့အတွက် မတ်လအထိ ကျောင်းတက်ရတဲ့အခါ ကျောင်းသားကျောင်းသူအတွက် ကျန်းမာရေးထိခိုက်နိုင်ခြေရှိတဲ့အချက်ကိုတော့ ခြွင်းချက်အနေနဲ့ ထည့်စဉ်းစားပေးဖို့ရှိတယ်လို့ အခြေခံပညာဦးစီးဌာန ညွှန်ကြားရေးမှူးချုပ်ဖြစ်သူ ဦးကိုလေးဝင်းက တုံ့ပြန်ပြောဆိုပါတယ်။

' ' ကျောင်းတိုင်းတော့ မဟုတ်ဘူး။ ဥပမာ ရှမ်းပြည်လိုဒေသမျိုးဆိုရင်တော့ ရာသီဥတုပူတယ်လို့ အကြောင်းပြလို့မရဘူး။ တခြားပူပြင်းတဲ့ဒေသတွေက ကျောင်းကလည်း ကလေးတွေအတွက် ကျန်းမာရေးကို ထိခိုက်နိုင်တယ်ဆိုတာ သေချာတဲ့ကျောင်းမျိုးဆိုရင်တော့ တင်ပြလာရင် အဲဒီကျောင်းတွေကို ခြွင်းချက်အနေနဲ့ စဉ်းစားပေးဖို့ရှိတယ်။ နွေရာသီမှာ ရေရှားတဲ့ဒေသကကျောင်းမျိုးဆိုရင်လည်း သောက်ရေအတွက်ပံ့ပိုးပေးတာမျိုး ဒါမျိုးတွေလုပ်ပေးသွားဖို့ရှိတယ်။''လို့ ဦးကိုလေးဝင်းက ဘီဘီစီကိုပြောပါတယ်။

နယ်ဒေသအချို့မှာတာဝန်ကျတဲ့ ဆရာများအဖွဲ့ချုပ်ကထောက်ပြထားတဲ့အချက်တွေထဲမှာ မိသားစုဝင်ငွေ အရ နွေရာသီကျောင်းပိတ်ချိန် တစ်ဖက်တစ်လမ်းက မိဘတွေကိုကူပြီး လုပ်ကိုင်ရတဲ့ မိသားစုမျိုးက ကျောင်းသားကျောင်းသူတွေဆိုရင်တော့ ဒီလို စာသင်ချိန် တစ်လတိုးမြှင့်လိုက်တာဟာ ကျောင်းထွက်တာမျိုးတွေ (Drop out)ဖြစ်လာနိုင်တယ်ဆိုတဲ့အချက်လည်းပါပါတယ်။

ဒါပေမယ့် ဒီအကြောင်းပြချက်ဟာ မဖြစ်နိုင်တဲ့အပေါ် အခြေခံပြီးပြောဆိုတာလို့ အခြေခံပညာဦးစီးဌာန ညွှန်ကြားရေးမှူးချုပ်ဦးကိုလေးဝင်းကတုံ့ပြန်ပြောဆိုပါတယ်။

အခုလို ဆရာဆရာမတွေဘက်က တောင်းဆိုတာတွေရှိလာပေမယ့်လည်း စာသင်ချိန်တိုးမြှင့်မယ် ဆိုတာဟာ ပညာသင်နှစ်မစခင်တည်းက အခြေခံပညာဦးစီးဌာနကသာမကဘဲ စာစစ်ဦးစီးဌာန ခရိုင်၊ တိုင်း ပညာရေးမှူးတွေ ကျောင်းအုပ်ကိုယ်စားလှယ်တွေ ကျောင်းသား မိဘကိုယ်စားလှယ်တွေကနေ သဘောထားကောက်ခံပြီးမှ ကြိုတင်အသိပေးခဲ့တာဖြစ်တယ်လို့လည်း ဦးကိုလေးဝင်းကပြောပါတယ်။

မတ်လကုန်အထိ စာသင်ချိန်တိုးမြှင့်ဖို့ကို မကြာခင်မှာ စီမံခန့်ခွဲမှုကော်မတီရဲ့ သဘောတူညီချက်နဲ့ ညွှန်ကြားချက်ကျလာပါကလည်း တရားဝင်ထုတ်ပြန်ကြေညာသွားဖို့ရှိတယ်လို့ အခြေခံပညာဦးစီးဌာန ညွှန်ကြားရေးမှူးချုပ် ဦးကိုလေးဝင်းကပြောပါတယ်။

ဆက်စပ် အကြောင်းအရာများ