ရတနာပုံတက္ကသိုလ်ကျောင်းသား လုယက်အသတ်ခံရမှု ကျူးလွန်သူကို ထောင်ဒဏ် နှစ် ၃၀ ချမှတ်

အမိန့်ချတဲ့နေ့မှာ တိုင်းအစိုးရရုံးရှေ့ ဆန္ဒဖော်ထုတ်ခဲ့ကြသူများ ဓာတ်ပုံ မူပိုင် Ba Chit
Image caption အမိန့်ချတဲ့နေ့မှာ တိုင်းအစိုးရရုံးရှေ့ ဆန္ဒဖော်ထုတ်ခဲ့ကြသူများ

မန္တလေးတိုင်း အမရပူရမြို့နယ် တောင်သမာန်ကန်ပတ်လမ်းမှာ ရတနာပုံတက္ကသိုလ် ကုန်ထုတ်ဓာတုကျောင်းသား ကိုစိုးမိုးဟိန်းကို လုယက် သတ်ဖြတ်ခဲ့တဲ့ တရားခံကို လူသတ်မှုပုဒ်မ ၃၀၂၊ လုယက်မှုပုဒ်မ ၃၉၄ တို့နဲ့ မန္တလေးခရိုင်တရားရုံးက ဒီဇင်ဘာ ၂၃ ရက်နေ့မှာ ထောင်ဒဏ် အနှစ် ၃၀ ချမှတ်လိုက်တယ်လို့ အမရပူရမြို့နယ် ရဲတပ်ဖွဲ့က ပြောပါတယ်။

" အမှန်တကယ် ကျူးလွန်ခဲ့တဲ့ တရားခံကို အမိန့်ချလိုက်တာပါ၊ လူသတ်မှုနဲ့ ထောင်ဒဏ် အနှစ် (၂၀)၊ လုယက်မှုက ထောင်ဒဏ် ၁၀ နှစ်" လို့ အမရပူရမြို့နယ်ရဲတပ်ဖွဲ့မှူး ရဲမှူး ကျော်နိုင်က ပြောပါတယ်။

တရားရုံးအမိန့်ဟာ ကိုစိုးမိုးဟိန်း အသတ်ခံရပြီး ၁ နှစ်လောက်ကြာမှ ကျူးလွန်တဲ့ တရားခံကို တရားရုံးက အမိန့်ချတာလည်း ဖြစ်ပါတယ်။

ရတနာပုံတက္ကသိုလ်က ကုန်ထုတ်ဓာတုဗေဒ နောက်ဆုံးနှစ်ကျောင်းသား ကိုစိုးမိုးဟိန်းဟာ ၂၀၁၈ ခုနှစ် ဒီဇင်ဘာ ၂၅ ရက်နေ့တုန်းက ရတနာပုံတက္ကသိုလ်အနီး တောင်သမာန်ကန်ပတ်လမ်းမှာ ရည်းစားဖြစ်သူနဲ့ အတူထိုင်နေတုန်း အမည်မသိ လူတစ်စုက ဆိုင်ကယ် ၂ စီးနဲ့ ရောက်လာပြီး ပိုက်ဆံအိတ်ကို လုယူ ပြီးနောက် ကိုစိုးမိုးဟိန်းကိုလည်း ဓားနဲ့ထိုးခဲ့လို့ အသက်ဆုံးရှုံးခဲ့ရတာ ဖြစ်ပါတယ်။

ဓာတ်ပုံ မူပိုင် SOE PAING
Image caption သတ်ဖြတ်ခံခဲ့ရတဲ့ ကျောင်းသား ကိုစိုးမိုးဟိန်း

အမိန့်ချတဲ့နေ့မှာ ရတနာပုံတက္ကသိုလ် ကျောင်းသားများသမဂ္ဂက ကျောင်းသား ကျောင်းသူ အယောက် ၅၀ လောက်ဟာ တိုင်းအစိုးရ အဖွဲ့ရုံးရှေ့နဲ့ တရားရုံးရှေ့ ဆိုင်းဘုတ်တွေကိုင်ပြီး လာရောက် ဆန္ဒဖော်ထုတ်ခဲ့ကြပါတယ်။

အမှုဖြစ်စဉ်မှာ တရားခံ ၁ ယောက်ပဲ ရဲတပ်ဖွဲ့က ဖမ်းဆီးနိုင်ပြီး ကျန်တဲ့ တရားခံ ၃ ဦးကို မဖမ်းဆီး နိုင်သေးတဲ့အပေါ် ကျောင်းသားများသမဂ္ဂကလည်း ကန့်ကွက်စာ ထုတ်ပြန်ခဲ့ပါတယ်။

ရဲတပ်ဖွဲ့ကတော့ ဒီအမှုမှာ ကျူးလွန်သူက ၃ ဦးပဲ ရှိပြီး အခု အမိန့်ချတာကလည်း ဓားနဲ့ထိုးခဲ့တဲ့ တရားခံကို ချမှတ်လိုက်တာလို့ ပြောပါတယ်။

" ၄ ဦးဆိုတာက ပထမတုန်းက ကောင်မလေးက ဘယ်နှစ်ဦးမှန်း မသိဘူး၊ ဒါကြောင့် သူက မှန်းပြီးထွက်ဆိုတာ၊ ကျွန်တော်တို့ စစ်ဆေးပေါ်ပေါက်ချက်အရ ၃ ဦးပဲ၊ အခု အမိန့်ချတဲ့သူက အဓိက ကျူးလွန်သူ၊ သူကလည်း တရားရုံးမှာ ဖြောင့်ချက်ပေးတယ်၊ အမှန်တကယ် ၃ ယောက်ပဲ ပါတာ" လို့ အမရပူရမြို့နယ်ရဲတပ်ဖွဲ့မှူး ရဲမှူး ကျော်နိုင်က ပြောပါတယ်။

ရတနာပုံ ကျောင်းသားများသမဂ္ဂကတော့ ဒီအမှုမှာ ကျန်ရှိနေတဲ့ တရားခံတွေ အမြန်ဆုံးဖမ်းဆီးပေးပါ ဆိုပြီးတော့လည်း တရားရုံးရှေ့မှာ တောင်းဆိုခဲ့ကြပါတယ်။

ဒီအပေါ် အမရပူရမြို့နယ်ရဲတပ်ဖွဲ့မှူး ရဲမှူး ကျော်နိုင်က "လွတ်မြောက်နေဆဲ ကျန်တဲ့ ၂ ယောက်ကိုလည်း တရားခံပြေးအနေနဲ့ ဝရမ်းထုတ်ထားပြီး ၂ ဦးလုံးကိုလည်း လူသတ်မှု၊ လုယက်မှု ပုဒ်မ ၂ ခုနဲ့ စွဲချက်ထားတယ်" လို့ ပြောပါတယ်။

ဆက်စပ် အကြောင်းအရာများ