မော်လမြိုင်က ပျောက်ဆုံးသွားတဲ့ ဆရာဝန်သားအဖကို ဘယ်လို ပြန်ရှာတွေ့ခဲ့လဲ

ပျောက်ဆုံးပြီး ၁၉ ရက် အကြာမှာ ပြန်တွေ့ ဓာတ်ပုံ မူပိုင် Khettar Non
Image caption ပျောက်ဆုံးပြီး ၁၉ ရက် အကြာမှာ ပြန်တွေ့

မော်လမြိုင်မြို့က ပျောက်ဆုံးသွားပြီး ၁၉ ရက်အကြာမှာ အတ္တရံမြစ်ထဲက သေဆုံးလျက် ပြန်တွေ့ခဲ့တဲ့ ဆရာဝန်သားအဖ နှစ်ဦးကို သူတို့ သွားတဲ့ လမ်းက စီစီတီဗီတွေကို ခြေရာခံပြီးနောက် မြစ်ထဲကို ရေငုပ်သမားတွေနဲ့ ရှာဖွေခဲ့ရာက ပြန်တွေ့ခဲ့တာ ဖြစ်တယ်လို့ သူတို့ကို ရှာဖွေရာမှ ပါခဲ့တဲ့ လူမှုကူညီရေး အဖွဲ့ထံက သိရိပါတယ်။

"စီစီတီဗီတွေ ရှိပေမဲ့ တချို့နေရာတွေက စီစီတီဗီက မပေးဘူးလေ။ ပေးတဲ့နေရာတွေကို လိုက်ကြည့်ရင်းနဲ့မှ တဖြည်းဖြည်း ကွင်းဆက် မိသွားတာပါ။ ရဲတွေက ရေငုပ်သမားတွေကို ငှားပြီး သူတို့ စမ်းကြည့်မယ်ပေါ့။ ဒီဘက်ကတော့ သူတို့ အလားအလာ ရှိသလား ဆိုပြီးတော့ပေါ့"

"ဒီမနက်က စပြီး ရေငုပ်တာပေါ့။ စတာကတော့ ၇ နာရီခွဲက စတာပဲ။ တွေ့တာကတော့ ၁၀ နာရီ မတ်တင်းလောက်က ကားကို စမ်းမိတယ်ပေါ့"

"အခုမှပဲ လုပ်နေတုန်းဆိုတော့ ပြီးစီးတဲ့ အချိန်တော့ မရောက်သေးဘူးပေါ့။ ကလေးအလောင်းရော လူကြီးအလောင်းရော နှစ်လောင်းလုံးပဲ" လို့ ဘယ်လို ရှာဖွေတွေ့ခဲ့တယ် ဆိုတာကို ပြောပါတယ်။

ဓာတ်ပုံ မူပိုင် Myint Soe
Image caption ဆေးခန်းပိတ်ပြီး မိတ်ဆွေတွေနဲ့ တွေခဲ့ပြီးနောက် ပျောက်ဆုံးသွားခဲ့

မွန်ပြည်နယ်၊ မော်လမြိုင်မြို့၊ ဇေယျာသီရိနယ်မြေ၊ ဗြဟ္မစိုရ်ဆေးခန်းက ဒေါက်တာအေးဇော်ထွန်းဟာ ၃နှစ်ခွဲအရွယ် သားငယ်နဲ့အတူ ကားနဲ့ထွက်သွားရာကနေ ဒီဇင်ဘာ ၅ရက် ကတည်းက ပျောက်ဆုံးခဲ့တာဖြစ်ပြီး ၁၉ ရက်အကြာမှာမှ အတ္တရံမြစ်ထဲကနေ သူတို့ရဲ့ကားကို ရှာဖွေတွေ့ရာက ဆယ်ယူနိုင်ခဲ့တာ ဖြစ် ပါတယ်။

သူတို့သားအဖ ၂ဦးကို ပျောက်ဆုံးသွားပြီးနောက်မှာ မိသားစုဝင်တွေနဲ့ မိတ်ဆွေသူငယ်ချင်းတွေဟာ ရဲတပ်ဖွဲ့ကို အကြောင်းကြားပြီး ရဲတပ်ဖွဲ့ဝင်တွေအပြင် လူမှုကယ်ဆယ်ရေးအဖွဲ့တွေကပါ နေရာအနှံ့ လိုက်လံ ရှာဖွေခဲ့ပေမယ့် ရက်အတန်ကြာ ရှာမတွေ့ခဲ့ပါဘူး။

ဒီဇင်ဘာ ၂၄ ရက်နေ့ မနက်ပိုင်းမှာတော့ အတ္တရံမြစ်ထဲမှာ သူတို့ကို ပြန်လည်တွေ့ရှိခဲ့တယ်လို့ မော်လမြိုင်အခြေစိုက် ဘိုဘိုဝင်း လူမှုကယ်ဆယ်ရေး အသင်းသားတစ်ဦးက ဘီဘီစီကို ပြောပါတယ်။

ဒေါက်တာအေးဇော်ထွန်းဟာ ဒီဇင်ဘာ ၅ ရက် ည ၈နာရီ ဆေးခန်းပိတ်ချိန်မှာ သူ့ရဲ့မိတ်ဆွေသုံးဦးနဲ့ တွေ့ဖို့ သားငယ်ကိုပါ ခေါ်ပြီး နေအိမ်ကနေ ကားနဲ့ ထွက်သွားခဲ့ရာက ည ၁၁ နာရီနောက်ပိုင်းကစပြီး မိသားစုက ဆက်သွယ်မရခဲ့ဘဲ အခုလို သေဆုံးလျက် ပြန်တွေ့ခဲ့ရတာ ဖြစ်ပါတယ်။

ဓာတ်ပုံ မူပိုင် Myint Soe
Image caption မှုခင်းဆရာဝန်က စစ်ဆေးနေဆဲ

သူတို့ ဘာကြောင့်သေဆုံးခဲ့တယ်ဆိုတာကို မှုခင်းဆရာရဲ့ စစ်ဆေးချက် ထွက်လာပြီးမှ အခြေအနေကို သိရမယ်လို့ သူတို့ရဲ့မိတ်ဆွေ ဒေါက်တာမိုးသန်းထိုက်အောင်က ဘီဘီစီကို ပြောပါတယ်။

"မှုခင်းဆရာဝန်က အဖြေမထွက်သေးဘူးလေ။ ဘာကြောင့်သေဆုံးတယ်ဆိုတာ ဘာမှ မထွက်သေးဘူး။ ဘာလုပ်မလဲဆိုတော့ လောလောဆယ်တော့ ဘာ plan မှ မရှိသေးဘူးဗျ။ လုပ်သင့်လုပ်ထိုက်တာတော့ လုပ်သွားမှာပေါ့" လို့ ပြောပါတယ်။

"သူ့ဘာသာသူ သဘာဝအတိုင်းဆို သဘာဝအတိုင်းပေါ့။ သွေးရိုးသားရိုး ဟုတ်မဟုတ် ကျွန်တော်တို့ ပြောလို့တော့ မရသေးဘူး အဲလိုတွေ ဖြစ်နေတာ။ မနက်ဖြန်ကျ ရင်ခွဲစစ်ဆေးတဲ့ အဖြေသိပြီးမှပဲ ရဲတွေပဲ လုပ်သွားလိမ့်မယ့် ကိစ္စလို့တော့ ကျွန်တော်တို့ ပြောလို့ရတယ်ပေါ့" လို့ ပြောပါတယ်။

ဒေါက်တာအေးဇော်ထွန်းနဲ့ အသက် ၃နှစ်ခွဲအရွယ် သားဖြစ်သူတို့ ဟာ သူတို့စီးနင်းသွားတဲ့ကားနဲ့အတူ ရက်အတန်ကြာ ပျောက်ဆုံးနေခဲ့တဲ့အပေါ် တွေ့ရှိသူတွေအနေနဲ့ သတင်းပေးဖို့ မိတ်ဆွေဆရာဝန်တွေက ဆိုရှယ် မီဒီယာကတဆင့် ဖော်ပြအကူအညီတောင်းခဲ့ရာက မော်လမြိုင်မြို့က သာမကဘဲ တခြားမြို့ တွေမှာ နေထိုင်သူတွေကပါ စိတ်ဝင်တစား ဝိုင်းဝန်းစုံစမ်း သတင်းပေး စောင့်ကြည့်ခဲ့ကြပါတယ်။

ဆက်စပ် အကြောင်းအရာများ