ဗစ်တိုးရီးယားအမှု - ရဲဇာနည်ကို တရားစွဲဖို့ စာရေးဆရာထင်လင်းဦးကို ကိုယ်စားလှယ်လွှဲ

ဦးထင်လင်းဦး ဓာတ်ပုံ မူပိုင် Htin Lin Oo fb
Image caption ဦးထင်လင်းဦး

ရဲတပ်ဖွဲ့ရဲ့ သတင်းတွေတင်တဲ့ ရဲဇာနည်ဖေ့စ်ဘွတ်ခ် စာမျက်နှာကနေ ဗစ်တိုးရီးယားနဲ့ မိသားစု အချက်အလက်တွေကို ထုတ်ဖော်ခဲ့တာကို ဆက်သွယ်ရေးဥပဒေ ပုဒ်မ ၆၆ (ဃ)နဲ့ တရားစွဲဆိုဖို့အတွက် ဗစ်တိုးရီးယားအမှု အမှန်တရား တောင်းဆိုရေး ကော်မတီက စာရေးဆရာ ထင်လင်းဦးကို ဗစ်တိုးရီးယား မိသားစုက ကိုယ်စားလှယ်လွှဲစာ ပေးခဲ့ပါတယ်။

နေပြည်တော်မှာ ဒီဇင်ဘာလ ၂၇ ရက်က ဗစ်တိုးရီးယားရဲ့ ဖခင်က စာရေးဆရာ ထင်လင်းဦးကို ကိုယ်စားလှယ်လွှဲစာပေးခဲ့တာ ဖြစ်ပါတယ်။

"သမီလေးရဲ့ အဖေက ကျွန်တော့်ကို ကိုယ်စားလှယ် လွှဲပါတယ်။ သက်သေ နှစ်ယောက်ပါပါတယ်။ ၂ ရက်နေ့မှာ ကိုယ်စားလှယ်လွှဲစာ ကျွန်တော့်လက်ထဲ ရောက်မယ်။ ပြီးတာနဲ့ တရားစွဲဆိုမှု စပါပြီ" လို့ စာရေးဆရာ ထင်လင်းဦးက ပြောပါတယ်။

ဗစ်တိုးရီးယားအမှု အမှုမှန်ပေါ်ပေါက် ရေးအတွက် ရှေ့နေတွေ၊ ဥပဒေပညာရှင်တွေနဲ့ လုပ်ငန်းရှင်တွေ ပါတဲ့ ကော်မတီကို ဒီဇင်ဘာလ ၂၂ ရက်က ဖွဲ့စည်းခဲ့ပြီး အမှုမှန်ပေါ်ပေါက်ရေးနဲ့ ကလေးရဲ့နစ်နာမှုတွေ အတွက် ထိုက်သင့်တဲ့တာဝန်ယူမှု တာဝန်ခံမှုတွေကို ဖော်ဆောင် နိုင်ဖို့ အတွက် ဒီကော်မတီက လုပ်သွားမယ်လို့ ဗစ်တိုးရီးယားအတွက် အမှန်တရား တောင်းဆိုမှု ကော်မတီက ထုတ်ပြန်ထားပါတယ်။

သံသယ တရားခံ ကိုအောင်ကြီးကို တရားရှင် လွှတ်လိုက်ပြီး နောက်တစ်နေ့ ဒီဇင်ဘာ ၁၉ ရက်မှာ ရဲတပ်ဖွဲ့က သတင်းစာရှင်းလင်းပွဲ လုပ်ခဲ့ပြီး ဗစ်တိုးရီးယားနဲ့ မိသားစုဘယ်သူဆိုတာ ကို သတင်းစာ ရှင်းလင်းပွဲ မှာရော ရဲဇာနည် ဖေ့စ်ဘွတ်ခ် စာမျက်နှာမှာ ပါ ဖော်ပြခဲ့တာဖြစ်ပါတယ်။

Image caption ဗစ်တိုးရီးယားနာမည်နဲ့ မိသားစုအချက်အလက်တွေကို ရဲတပ်ဖွဲ့သတင်းစာရှင်းလင်းပွဲမှာထုတ်ပြော

"ပုဒ်မ ၂ ခုပေါ့နော် တစ်ခုက ၆၆ (ဃ) ဆက်သွယ်ရေးပုဒ်မ နဲ့ ကျွန်တော် က ရဲဇာနည် ဖေ့စ်ဘွတ်ခ် စာမျက်နှာကို စွဲမှာ၊ နောက်တစ်ခုက ကလေးအဖေက သတင်းစာရှင်းလင်းပွဲ က တာဝန်ရှိသူတွေကို ကလေးသူငယ် အခွင့် အရေးဆိုင်ရာ ပုဒ်မ နဲ့ စွဲမှာပါ "လို့ ဦးထင်လင်းဦးက ပြောထားပါတယ်။

ဆက်သွယ်ရေး ဥပဒေနဲ့ တရားစွဲဆိုမှုကို နေပြည်တော်မှာ စွဲဆိုမယ်လို့ ပြောပါတယ်။

အဲဒီအမှုအတွက် အကျိုးဆောင်ရှေ့နေအဖြစ် မြန်မာနိုင်ငံလွတ်လပ်သော ရှေ့နေများအသင်း (ILAM) က ဆောင်ရွက်မှာ ဖြစ်ပြီး အဲဒီအဖွဲ့က အမှုအတွက် ပြင်ဆင်နေပြီလို့ စာရေးဆရာ ထင်လင်းဦးက ပြောပါတယ်။

တရားစွဲဆိုရာ ရဲဇာနည်စာမျက်မှာကို ကိုင်တွယ်တဲ့ (admin) တာဝန်ရှိသူကို စွဲဆိုမှာ ဖြစ်တယ်လို့ ပြောပါတယ်။

"အဟန့်အတား တစ်ခုလည်း ဖြစ်အောင်၊ ထိရောက်တဲ့ အရေးယူမှုလည်း ဖြစ်အောင် တရားစွဲရမှာ ဖြစ်ပါတယ်" လို့ သူက ပြောပါတယ်။

ဗစ်တိုးရီးယားအမှုဟာ နေပြည်တော် Wisdom Hill မူကြိုက အသက် သုံးနှစ်မပြည့်သေးတဲ့ ကျောင်းသူ လိင်မတရားပြုကျင့်ခံရတယ်လို့ တိုင်ကြားထားတဲ့အမှုဖြစ်ပြီး စတင်တိုင်ကြားချိန် မေလလယ်ကနေ ဒီဇင်ဘာလလယ်အထိ တရားရုံးချိန်း ၁၃ ချိန်း စစ်ဆေးအပြီးမှာ သံသယတရားခံကို တရားရုံးက တရားရှင်လွှတ်ပေးလိုက်လို့ တရားခွင် ပြီးဆုံးခဲ့ပါတယ်။

ဆက်စပ် အကြောင်းအရာများ