ဦးဝှေ့တင်းလွတ်မြောက်ရေး ၀ ဦးဆောင်တဲ့ FPNCC ကို အကူအညီတောင်း

လွှတ်တော်အမတ် ဦးဝှေ့တင်းကို အေအေ ဖမ်းဆီးထားတာ ၂လနီးပါးရှိလာ ဓာတ်ပုံ မူပိုင် ပြည်ထောင်စုလွှတ်တော် FB
Image caption လွှတ်တော်အမတ် ဦးဝှေ့တင်းကို အေအေ ဖမ်းဆီးထားတာ ၂လနီးပါးရှိလာ

ရက္ခိုင့်တပ်တော် (အေအေ)ရဲ့ဖမ်းဆီးထိန်းသိမ်းတာ ခံထားရတဲ့ NLDလွှတ်တော်အမတ် ဦးဝှေ့တင်း ပြန်လည်လွတ်မြောက်ရေးအတွက် မိသားစုဝင်တွေကနေ ' ဝ'ဦးဆောင်တဲ့ ပြည်ထောင်စုနိုင်ငံရေးဆွေးနွေးညှိနှိုင်းရေး ကော်မတီ FPNCC ကိုစာပေးပို့ အကူအညီတောင်းထားတယ်လို့ မိသားစုဝင်တွေဆီကနေ သိရပါတယ်။

၀ အဖွဲ့ဦးဆောင်တဲ့ ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ FPNCC မှာ မြောက်ပိုင်းလက်နက်ကိုင်အဖွဲ့တွေနဲ့အတူ ရက္ခိုင့်တပ်တော် (အေအေ)လည်း ပါဝင်ပါတယ်။

အမျိုးသားဒီမိုကရေစီအဖွဲ့ချုပ်ပါတီဝင်တစ်ဦးလည်းဖြစ် လွှတ်တော်အမတ်တစ်ဦးလည်းဖြစ်တဲ့ ဦးဝှေ့တင်းဟာ ရက္ခိုင့်တပ်တော် အေအေရဲ့ ဖမ်းဆီးတာကို ခံထားရတာအခုဆို ၂လနီးပါးရှိလာပြီ ဖြစ်ပါတယ်။

ဖမ်းဆီးခံထားရတာ လနဲ့ချီကြာလာပြီဖြစ်တဲ့ ဦးဝှေ့တင်းပြန်လည်လွတ်မြောက်ရေးအတွက် မိသားစုဝင်တွေအနေနဲ့ FPNCC ကိုလိပ်မူပြီးအကူအညီတောင်းတဲ့စာကို ဗဟိုဌာနချုပ်ကို ပေးပို့ထားပြီးဖြစ်တယ်လို့ ၀ အဖွဲ့ ရဲ့ ပြောခွင့်ရပုဂ္ဂိုလ် ဦးညီရန်းက ဘီဘီစီကိုအတည်ပြု ပြောဆိုပါတယ်။

ဒါပေမယ့် ဦးဝှေ့တင်းကို ပြန်လွှတ်ပေးဖို့ FPNCCအနေနဲ့ ကြားဝင်ညှိနှိုင်းပေးဖို့ ရှိမရှိကိုတော့ အခုချိန်ထိ မသိရသေးဘူးလို့လည်း ဦးညီရန်းကပြောပါတယ်။

'' အရင်ကတော့ TNLA ကဖမ်းထားတဲ့ နန်းမိုဟွမ်ကိုတော့ ၀ အဖွဲ့ရဲ့ ကြားဝင်ဖျန်ဖြေမှုနဲ့ ပြန်လွတ်လာခဲ့တဲ့ ဖြစ်စဉ်တော့ရှိခဲ့ဖူးတယ်။ အခုဦးဝှေ့တင်းကိစ္စမှာတော့ ဘယ်လိုရှိမလဲမသိသေးဘူး။ တစ်စုံတစ်ရာ ဌာနချုပ်ဘက်က ပြောဆိုတာမျိုးတော့မရှိသေးဘူး''လို့လည်း ဦးညီရန်းကပြောပြပါတယ်။

ဦးဝှေ့တင်း ပြန်လည်လွတ်မြောက်ရေးအတွက် မိသားစုဝင်တွေအနေနဲ့ FPNCCကို စာပေးပို့အကူအညီ တောင်းထားတာဟာ တစ်လနီးပါးရှိသွားပြီလည်းဖြစ်ပါတယ်။

ဓာတ်ပုံ မူပိုင် YE THEIN / FACEBOOK
Image caption အေအေက ဖမ်းဆီးထားတဲ့ NLD ပါတီဝင်ဖြစ်တဲ့ ဦးရဲသိန်းကို လက်နက်ကြီးမှန်လို့ သေဆုံးသွားပြီလို့ ထုတ်ပြန်ခဲ့

ဦးဝှေ့တင်းနည်းတူ ရက္ခိုင့်တပ်တော် အေအေကဖမ်းဆီးထားတဲ့ ဘူးသီးတောင်မြို့နယ် NLD ပါတီဥက္ကဌဖြစ်သူ ဦးရဲသိန်းဟာ လက်နက်ကြီးမှန်လို့ သေဆုံးသွားပြီလို့ အေအေက ပြီးခဲ့တဲ့ရက်ပိုင်းမှာ ထုတ်ပြန်ခဲ့ပါတယ်။

ဒီလိုအခြေအနေတွေကြားမှာ ဦးဝှေ့တင်းရဲ့လုံခြုံရေးနဲ့ပတ်သက်ပြီး မိသားစုဝင်တွေ ဦးရဲသိန်းနည်းတူ ဖြစ်လာမှာကိုတော့ အတော်လေးကြောက်မိတယ်လို့ ဦးဝှေ့တင်းရဲ့ဇနီးဖြစ်သူ ဒေါ်ခင်အိဆင့်က ဘီဘီစီကို ပြောပါတယ်။

ဒီလိုကြောက်ရွံ့မှုတွေရှိနေပေမယ့်လည်း အေအေအနေနဲ့ ဦးဝှေ့တင်းကို ပြန်လွတ်ပေးမယ်လို့ ယုံကြည်နေဆဲဖြစ်တယ်လို့လည်း သူမက ဆိုပါတယ်။

ဦးဝှေ့တင်းဟာ ပြီးခဲ့တဲ့ နိုဝင်ဘာ ၃ရက်နေ့က ရခိုင်ပြည်နယ်နဲ့ ချင်းပြည်နယ်အတွင်းမှာ အိန္ဒိယအစိုးရက လုပ်ကိုင်ဆောင်ရွက်နေတဲ့ ကုလားတန် ဘက်စုံဖွံ့ဖြိုးရေးစီမံကိန်းအတွက် သွားရောက်ရာက အေအေရဲ့ ဖမ်းဆီးမှုကိုခံခဲ့ရတာဖြစ်ပါတယ်။

လတ်တလောမှာ ရက္ခိုင့်တပ်တော် အေအေက ဖမ်းဆီးထားတဲ့ ဓားစာခံအချို့သေဆုံးတာတွေရှိလာချိန်မှာပဲ အေအေအနေနဲ့ ဦးဝှေ့တင်းရဲ့လုံခြုံရေးအပေါ်တတ်နိုင်သမျှကာကွယ်ပေးသွားမှာဖြစ်ပေမယ့် စစ်မြေပြင် ဖြစ်တဲ့အတွက် ဦးရဲသိန်းလိုမဖြစ်ဘူးလို့တော့ အာမခံချက် မပေးနိုင်ဘူးလို့ အေအေရဲ့ပြောခွင့်ရပုဂ္ဂိုလ် ခိုင်သုခက ထုတ်ဖော်ပြောဆိုထားတာတွေလည်းရှိပါတယ်။