ကိုရိုနာဗိုင်းရပ်စ် - မြန်မာက စောင့်ကြည့်ခံရသူလေးယောက် ပိုးမတွေ့၊ ဆေးရုံကဆင်းခွင့်ရ

ရန်ကုန်ဝေဘာဂီဆေးရုံ ဓာတ်ပုံ မူပိုင် MPA
Image caption ရန်ကုန်ဝေဘာဂီဆေးရုံ

ကိုရိုနာဗိုင်းရပ်စ် ကူးစက်မှုရှိမရှိ မြန်မာနိုင်ငံမှာ စောင့်ကြည့်ခံရသူ လေးယောက်ရဲ့ ဓာတ်ခွဲနမူနာတွေကို ထိုင်းကိုပို့စစ်ခဲ့ရာမှာ ရောဂါပိုးမရှိဘူးလို့ အဖြေရခဲ့တဲ့အတွက် သူတို့ကို ဖေဖော်ဝါရီ ၆ ရက်မှာ ဆေးရုံက ဆင်းခွင့်ပေးလိုက်ပြီလို့ ကျန်းမာရေးဝန်ကြီးဌာနက ပြောခွင့်ရသူက ဒေါက်တာခင်ခင်ကြီးက ပြောပါတယ်။

သူတို့လေးယောက်လုံးဟာ တရုတ်ကနေ မြန်မာကို ဝင်ရောက်လာသူတွေ ဖြစ်ပါတယ်။ အဲဒီထဲက သုံးယောက်က တရုတ်နိုင်ငံသားတွေ ဖြစ်ပြီး တစ်ယောက်က မြန်မာနိုင်ငံက ကလေးတစ်ယောက် ဖြစ်ပါတယ်။

သူတို့ကို ကျိုင်းတုံ၊ဝေဘာဂီ၊လွိုင်ကော်နဲ့ နေပြည်တော်ဆေးရုံတွေမှာ စောင့်ကြည့်ခဲ့တာ ဖြစ်ပါတယ်။

ဒါ့အပြင် နောက်ထပ် စောင့်ကြည့်ခံရသူ နှစ်ယောက်ကို ထိုင်းကို ပို့စစ်ထားတာ ဒီနေ့ အဖြေရမှာ ဖြစ်ပါတယ်။

နောက်ထပ် စောင့်ကြည့်ခံရသူ သုံးယောက်ရဲ့ ဓာတ်ခွဲ နမူနာတွေကိုလည်း ဒီနေ့ထိုင်းကို ပို့စစ်မယ်လို့ ဒေါက်တာခင်ခင်ကြီးက ပြောပါတယ်။

အခုလို မြန်မာနိုင်ငံက စောင့်ကြည့်ခံရသူတွေရဲ့ ဓာတ်ခွဲနမူနာတွေကို ကမ္ဘာ့ကျန်းမာရေးအဖွဲ့ WHO က ရည်ညွှန်းတဲ့ ဓာတ်ခွဲခန်းတွေကို ပို့စစ်နေရတာကနေ ပြည်တွင်းမှာ စစ်ဆေးဖို့အတွက် ဓာတ်ခန်းခွဲရှိပေမဲ့ စစ်ဆေးဖို့ Primer နဲ့ Probe တို့လို ပစ္စည်းတချို့လိုအပ်နေတာဖြစ်ပြီး အဲဒါတွေကို WHO အကူအညီနဲ့ ရရှိအောင်လုပ်ဆောင်နေတယ်လို့လည်း ဒေါက်တာခင်ခင်ကြီးက ပြောပါတယ်။

ဓာတ်ပုံ မူပိုင် Getty Images
Image caption ကိုရိုနာဗိုင်းရပ်စ်ကူးစက်မှုက ဝက်သက်ကူးစက်မှုနဲ့ နှိုင်းယှဉ်ရင် ၁၀ ပုံတစ်ပုံပဲရှိတယ်လို့ဆို

ဒါ့အပြင် တရုတ်-မြန်မာနယ်စပ် ကချင်ပြည်နယ် လွယ်ဂျယ်မှာ အလုပ်လုပ်သွားခဲ့ပြီး ဧရာဝတီတိုင်း လပွတ္တာမြို့နယ်ကို ပြန်လာတဲ့ မကျန်းမာတဲ့ ဒေသခံ အမျိုးသမီးကို ဒေသခံတချို့က ကိုနာရိုနာကူးစက်မှု သံသယကြောင့် သူနေထိုင်တဲ့ ပိန္နဲကွင်းရွာထဲကို အဝင်မခံခဲ့တဲ့အတွက် သူ့ကို တာဝန်ရှိသူတွေက လပွတ္တာဆေးရုံမှာ ပို့ပြီး ခွဲထား စောင့်ကြည့်ခဲ့ရပါတယ်။

အဲဒီလို ဖြစ်ပွားခဲ့တာနဲ့ ပတ်သက်ပြီး ကိုရိုနာဗိုင်းရပ်စ် ရောဂါပျိုးချိန်ဟာ ၂ ရက်က ၁၄ ရက် ဖြစ်ပြီး အဲဒီရက်အတွင်းမှာ ရောဂါလက္ခဏာတွေ ပေါ်လာနိုင်တယ်၊ အဲဒီအမျိုးသမီးက သူဆေးရုံတက်ခဲ့တဲ့ လွယ်ဂျယ် ဆေးရုံက သံသယလူနာအဖြစ် သတ်မှတ်ပြီး ဓာတ်ခွဲ စမ်းသပ် စစ်ဆေးခဲ့တယ်၊ နောက် စိတ်ချရလို့ ပေးဆင်းခဲ့တာဖြစ်တယ်၊ သူဆေးရုံက ဆင်းခဲ့တဲ့ ရက်ကနေ အခုဆိုရင် ၁၆ ရက်အထိ ရှိပြီ ဖြစ်လို့ သူက ကူးစက်မှု အန္တရာယ်မရှိသူ ဖြစ်တယ်လို့ ဒေါက်တာ ခင်ခင်ကြီးက ပြောပါတယ်။

ဒါကြောင့် ပြည်သူတွေအနေနဲ့ ကျန်းမာရေး ဝန်ကြီးဌာနက ကြေညာထားတဲ့ ရောဂါကာကွယ်ရေး နည်းလမ်းတွေကို လိုက်နာပြီး အစိုးရိမ်မလွန်ကြဖို့သူက ပြောပါတယ်။

ဒါ့အပြင် ကိုရိုနာ ဗိုင်းရပ်စ်ရောဂါ ကူးစက်မှု အချက်အလက်တွေအရ ဒီရောဂါ ကူးစက်မှုဟာ ဝက်သက်ကူးစက်မှုနဲ့ နှိုင်းယှဉ်ရင် ၁၀ ပုံတစ်ပုံသာရှိကြောင်းနဲ့ ကျန်းမာရေးဌာနက စစ်ဆေးစဉ်မှာ အဖျားမရှိလို့ စောင့်ကြည့်မခံရဘဲ လွတ်နေသူတွေ ဖျားနာ၊ချောင်းဆိုးလာတာ စတဲ့ သံသယလက္ခဏာတွေ ပေါ်လာရင် သံသယလူနာ သတင်းပေးပို့ဖို့ လုပ်ငန်းတွေကိုလည်း ဝန်ကြီးဌာနတွေ ပေါင်းစပ် ဆောင်ရွက်နေတယ်လို့ သူက ပြောပါတယ်။