ပြည်ထဲရေးဝန်ကြီးသစ် ဒုဗိုလ်ချုပ်ကြီး စိုးထွဋ်ဘယ်သူလဲ

စစ်ဘက်ရေး ရာလုံခြုံရေး အရာရှိချုပ် တာဝန်ထမ်းဆောင်နေသူကို ပြည်ထဲရေးဝန်ကြီးသစ်အဖြစ်ခန့်အပ်မယ် ဓာတ်ပုံ မူပိုင် ACDFM 2019
Image caption စစ်ဘက်ရေးရာ ရာလုံခြုံရေး အရာရှိချုပ် တာဝန်ထမ်းဆောင်နေသူကို ပြည်ထဲရေးဝန်ကြီးသစ်အဖြစ်ခန့်အပ်မယ်

ပြည်ထဲရေးဝန်ကြီး ဒုတိယ ဗိုလ်ချုပ်ကြီး ကျော်ဆွေ စစ်ဘက်တာဝန်တွေ ပြန်လည် ထမ်းဆောင်မှာ ဖြစ်လို့ သူ့နေရာမှာ အစားထိုးဖို့ ဒုတိယ ဗိုလ်ချုပ်ကြီး စိုးထွဋ်ကို ခန့်အပ်မှာ ဖြစ်ပါတယ်။

ဒီလို ခန့်ထားဖို့အတွက် အခြေခံ ဥပဒေအရ တပ်မတော် ကာကွယ်ရေး ဦးစီးချုပ်က အမည်စာရင်း ပေးပို့ခဲ့သူကို ပြည်ထောင်စုလွှတ်တော်ရဲ့ သဘောတူညီချက် ရယူဖို့ သမ္မတက လွှတ်တော်ကို တင်သွင်းခဲ့ပါတယ်။

ဒုတိယဗိုလ်ချုပ်ကြီးစိုးထွဋ်က အသက် ၅၉ နှစ်နဲ့၉ လရှိသူဖြစ်ပြီး တပ်မတော်မှာ စစ်ဘက်ရေးရာ လုံခြုံရေး အရာရှိချုပ် တာဝန်ထမ်းဆောင်နေသူ ဖြစ်ပါတယ်။

သူဟာ ဗိုလ်သင်တန်းကျောင်း OTS အမှတ်စဉ် ၆၄ သင်တန်းဆင်း တစ်ဦးဖြစ်ပါတယ်။

စစ်တိုင်းမှူးတာဝန်တွေကို တောင်ပိုင်းတိုင်း၊ အရှေ့ ပိုင်းတိုင်းနဲ့အလယ်ပိုင်းတိုင်းတို့မှာ ထမ်းဆောင်ခဲ့ပါတယ်။

ဒါ့အပြင် စစ်ဥပဒေချုပ်၊ ကာကွယ်ရေးဝန်ကြီးဌာန ကစထ ၆ စစ်ဆင်ရေး အထူးအဖွဲ့မှူး တာဝန် တွေလည်း ထမ်းဆောင်ခဲ့သူပါ။

စစ်ဘက်ရေးရာ လုံခြုံရေး အရာရှိချုပ် ရာထူးကိုတော့ ၂၀၁၆ ခုနှစ်က စတင်တာဝန်ယူခဲ့တာဖြစ်ပါတယ်။

သူဟာ၂၀၀၁ ခုနှစ် ရဟတ်ယာဉ်ပျက်ကျတဲ့ ဖြစ်စဉ်မှာ ဒုတိယ ဗိုလ်ချုပ်ကြီးတင်ဦးနဲ့အတူ ကွယ်လွန်သွားသူ ဗိုလ်မှူးချုပ်လွန်းမောင်ရဲ့ သားဖြစ်ပါတယ်။

ဓာတ်ပုံ မူပိုင် AFP/Getty Images
Image caption ဒေါ်အောင်ဆန်းစုကြည်နဲ့ တပ်မတော်က ခန့်အပ်တဲ့ ဝန်ကြီးတွေ။ ဒုတိယဗိုလ်ချုပ်ကြီး ကျော်ဆွေ(ညာအစွန်)

ဒုတိယဗိုလ်ချုပ်ကြီး စိုးထွဋ် ပြည်ထဲရေး ဝန်ကြီးအဖြစ် နယ်ဘက်တာဝန်တွေ ထမ်းဆောင်ချိန်မှာတော့ လက်ရှိ စစ်ဘက်တာဝန်တွေ ဆက်ထမ်းဆောင်တော့မှာ မဟုတ်ဘူးလို့ တပ်မတော် သတင်းမှန် ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ် ဇော်မင်းထွန်းက ဘီဘီစီကို ပြောပါတယ်။

ဒါကြောင့် ပြည်ထောင်စုလွှတ်တော်က သူ့ကို အတည်ပြုခန့်အပ်ပြီးတဲ့နောက်မှာတော့ လစ်လပ်သွားတဲ့ စစ်ဘက်ရေးရာ လုံခြုံရေး အရာရှိချုပ်နေရာကို အစားထိုး ခန့်အပ်သွားဖို့ရှိတယ်လို့လည်း ဗိုလ်မှူးချုပ် ဇော်မင်းထွန်းက ပြောပါတယ်။

ရွေးကောက်ပွဲ ကျင်းပမယ့် နှစ်ထဲမှာ ပြည်ထဲရေး ဝန်ကြီး အပြောင်းအလဲ လုပ်တာနဲ့ ပတ်သက်ပြီး နိုင်ငံရေး လေ့လာသူ ဒေါက်တာရန်မျိုးသိမ်းက တစ်ဖက်က ကြည့်ရင် ထူးခြားသလို ထင်ရပေမဲ့ သမားရိုးကျ ဖြစ်ရိုးဖြစ်စဉ်လို့ပဲ မြင်တယ်လို့ ပြောပါတယ်။

"သေချာတာ တစ်ခုကတော့ ၂၀၂၀ အလွန် အစိုးရအဖွဲ့မှာ ပြည်ထဲရေးဝန်ကြီး တာဝန်ပေးဖို့အတွက် ရည်ရွယ်ထားတဲ့ အကြောင်း ရှိလိမ့်မယ်လို့ သုံးသပ်ပါတယ်"လို့ သူက ပြောပါတယ်။

ပြည်ထဲရေးဝန်ကြီးအဖြစ် တာဝန်ထမ်းဆောင်ခဲ့သူ ဒုတိယဗိုလ်ချုပ်ကြီးကျော်ဆွေကို ဖေဖော်ဝါရီလ ၄ ရက်နေ့ကစပြီး မူလ စစ်ဘက်တာဝန်တွေ ပြန်လည်ထမ်းဆောင်ဖို့သမ္မတက ခွင့်ပြုခဲ့ပါတယ်။

သမ္မတက အဆိုပြုလာတဲ့သူကို လွှတ်တော်က ကန့်ကွက်သူမရှိရင် ဖေဖော်ဝါရီလ ၁၀ ရက်နေ့တနင်္လာနေ့မှာ ပြည်ထဲရေး ဝန်ကြီးဌာန ပြည်ထောင်စုဝန်ကြီးအဖြစ် အတည်ပြု ခန့်အပ်မှာ ဖြစ်ပါတယ်။

ဖွဲ့စည်းပုံ အခြေခံ ဥပဒေအရ ပြည်ထဲရေးဝန်ကြီး အနေနဲ့နိုင်ငံတော်သမ္မတကို တာဝန်ခံ ဆောင်ရွက်ရပေမဲ့ ဝန်ကြီးအသစ်နဲ့ အစိုးရကြား ဆက်ဆံရေးကိုတော့ နိုင်ငံရေးလေ့လာသူတွေက စိတ်တဝင်တစား စောင့် ကြည့်နေကြပါတယ်။

ဒုတိယဗိုလ်ချုပ်ကြီး ကျော်ဆွေ ပြည်ထဲရေး ဝန်ကြီး တာဝန်ထမ်းဆောင်နေစဉ် NLD အမျိုးသား ဒီမိုကရေစီ အဖွဲ့ချုပ် အစိုးရနဲ့ တပ်မတော် အကြားဆက်ဆံရေးနဲ့ ပတ်သက်ပြီး၂၀၁၈ စင်ကာပူ ခရီးစဉ်မှာ ဒေါ်အောင်ဆန်းစုကြည်က သူတို့ အစိုးရ အဖွဲ့ထဲမှာ တပ်မတော်က ဗိုလ်ချုပ်ကြီး သုံးယောက်ရှိနေပြီး သူတို့တွေက တော်တော်လေး သဘောထားကောင်းကြပါတယ်လို့ ပြောထားဖူးပါတယ်။