ဗစ်တိုးရီးယားအမှု ပြင်ဆင်ချက် - မန္တလေးတိုင်း ဥပဒေချုပ်ရုံး ဖြေကြားချက်

မန္တလေး တိုင်းဒေသကြီး ဥပဒေချုပ်ရုံး ဥပဒေအရာရှိ ဦးတင်မြင့်ဦး(ယာ) နဲ့ ရုံးအဖွဲ့မှူး ဦးသိန်းဌေး (ဝဲ) ဓာတ်ပုံ မူပိုင် တာရာ
Image caption မန္တလေး တိုင်းဒေသကြီး ဥပဒေချုပ်ရုံး ဥပဒေအရာရှိ ဦးတင်မြင့်ဦး(ယာ) နဲ့ ရုံးအဖွဲ့မှူး ဦးသိန်းဌေး (ဝဲ)

ဗစ်တိုးရီးယားအမှု မှာ သံသယတရားခံ အောင်ကြီးကို တရားရှင် လွှတ်ခဲ့တဲ့ ဒက္ခိဏခရိုင် တရားရုံးရဲ့ အမိန့်ကို ပြင်ဆင်ပေးဖို့အတွက် ပြင်ဆင်ချက် တင်တာကို မန္တလေးတိုင်း ဥပဒေချုပ်ရုံးက ပယ်ချလိုက်ပါတယ်။

နေပြည်တော်က အသက် သုံးနှစ်မပြည့်သေးတဲ့ ကလေးငယ် လိင်မတရားပြုကျင့်ခံရတယ်ဆိုတဲ့ အမှုရဲ့ သံသယတရားခံကို တရားရုံးက တရားရှင် လွှတ်လိုက်ပြီးနောက် ရက်ပေါင်း ၆၀ အတွင်း ပြင်ဆင်ချက် မတင်ရင် သက်သေခံ ပစ္စည်းတွေကို ဖျက်ဆီးပစ်ရဖို့ ရှိတယ်လို့ ပြောထားပါတယ်။ သံသယတရားခံ အောင်ကြီးကို တရားရုံးက ဒီဇင်ဘာလ ၁၈ ရက်မှာ တရားရှင် လွှတ်ပေးခဲ့တာပါ။

ဒီအမှုအတွက် ပြင်ဆင်ချက်ကို ဒက္ခိဏခရိုင် ဥပေဒရုံးနဲ့ အမှတ်(၁) မှုခင်းတပ်ဖွဲ့မှူးရုံး နေပြည်တော်တို့က တင်ခဲ့တာပါ။

ဒီအကြောင်း မီဒီယာတွေက မေးမြန်းထားတာကို မန္တလေးတိုင်းဒေသကြီး ဥပဒေချုပ်ရုံး ဥပဒေအရာရှိ ဦးတင်မြင့်ဦးနဲ့ ရုံးအဖွဲ့မှူး ဦးသိန်းဌေးတို့က ဒီနေ့ ဖေဖော်ဝါရီ ၁၈ ရက်မှာ မီဒီယာကို တွေ့ဆုံဖြေရှင်းခဲ့ပါတယ်။

မေး - စွပ်စွဲခံရသူ အောင်ကြီးကို တရားရှင်လွှတ်ပေးတဲ့အပေါ် ပြင်ဆင်ချက် တက်ထားတာရှိသလား။

ဖြေ - ဒီအမှုမှာ ဒက္ခိဏခရိုင် ဥပဒေရုံးက ဒီအမှုကို ပြင်ဆင်မှု တက်ရောက်ပေးဖို့ တင်ပြတာ ရှိသလို အမှတ် (၁) မှုခင်းတပ်ဖွဲ့မှူးရုံး နေပြည်တော်ကလည်း ပြင်ဆင်မှု တက်ပေးဖို့ရာ တင်ပြထားကြောင်း သိရှိရပါတယ်။

မန္တလေး တိုင်းဒေသကြီး ဥပဒေချုပ်ရုံးအနေနဲ့ အမှုတွဲရဲ့ အမှု စစ်ဆေး ပေါ်ပေါက်ချက်အရ တရားရုံး အမိန့်ဟာ ဥပဒေအရ မှန်ကန်သင့်မြတ်ကြောင်း သုံးသပ် ရရှိတဲ့အတွက် ပြင်ဆင်မှု တင်သွင်းရန် မသင့်ကြောင်း ဆုံးဖြတ်ခဲ့ပါတယ်။

မေး - နစ်နာသူ ဗစ်တိုးရီးယားဘက်က ဘယ်လို ဆက်လုပ်နိုင်ပါသေးလဲ။

ဖြေ - ခိုင်လုံတဲ့ အထောက်အထားတွေ ရှိတယ်ဆိုရင် တရားလို အနေနဲ့ သီးခြားအရေးယူ ဆောင်ရွက်နိုင်ပါတယ်။

မေး - အောင်ကြီးက တရားခံ မဟုတ်ဘူးဆိုတော့ တရားခံ အစစ်ကို ဖမ်းမိဖို့အတွက် ဥပဒေချုပ်ရုံးဘက်ကနေ ဘယ်လို ဆက်လုပ်ဖို့ ရှိပါသလဲ။

ဖြေ- ဥပဒေရုံးက investigation အာဏာမရှိပါဘူး။ ဒါဟာ investigation စုံစမ်း ထောက်လှမ်းတဲ့ ကိစ္စ ဖြစ်တဲ့အတွက် ဥပဒေချုပ်ရုံးကနေပြီးတော့ ဆက်လက်ဆောင်ရွက်ရန် အကြောင်းပေါ်ပေါက်မှု မရှိပါဘူး။

မေး- တရားခွင်မှာ စစ်ဆေးစဉ်က ကျူးလွန်သူက အောင်ကြီး မဟုတ် တခြား သံသယ ဖြစ်နိုင်သူတွေ ရှိတယ်လို့ သက်သေတွေ ထွက်ဆိုထားတာ ရှိတဲ့အပေါ် ဥပဒေရုံးက ဆက်လက်လုပ်ဆောင်တာမျိုး ရှိပါလား။

ဖြေ - လက်ရှိ အမှုမှာ လက်ရှိ တရားခံနဲ့ ပူးပေါင်း ကျူးလွန်တာ ရှိရင်တော့ နောက်တိုး တရားခံ ထည့်လို့ရပါတယ်။ အဲဒီလို ပူးပေါင်းကျူးလွန်တာမျိုး ပေါ်ပေါက်တာကို မတွေ့ရပါဘူး။ တရားလို အနေနဲ့ လုံလောက်တဲ့ အထောက်အထားတွေ ရှိလို့ရှိရင်တော့ သီးခြားအမှုဖွင့် အရေးယူ ဆောင်ရွက်နိုင်ပါတယ်။

ဆက်စပ် အကြောင်းအရာများ