အာဆာ နဲ့ နယ်ခြားစောင့်တပ် မောင်တောမှာ တိုက်ပွဲဖြစ်

တောင်ပြိုလက်ဝဲမြို့ကို သွားတဲ့လမ်းမှာ လက်နက်ကြီး၊ လက်နက်ငယ်နဲ့ နှစ်နာရီဝန်းကျင်ကြာ တိုက်ခိုက်မှု ဖြစ်ခဲ့ ဓာတ်ပုံ မူပိုင် AFP/Getty Images
Image caption တောင်ပြိုလက်ဝဲမြို့ကို သွားတဲ့လမ်းမှာ လက်နက်ကြီး၊ လက်နက်ငယ်နဲ့ နှစ်နာရီဝန်းကျင်ကြာ တိုက်ခိုက်မှု ဖြစ်ခဲ့

ရခိုင်ပြည်နယ် မြောက်ပိုင်း နယ်စပ်ဒေသ မောင်တောမြို့နယ်မှာ ဖေဖော်ဝါရီ ၁၉ ရက် မနက် ၈ နာရီကျော် လောက်မှာ အာဆာနဲ့ နယ်ခြားစောင့်တပ်တို့ ထိတွေ့တိုက်ပွဲ ဖြစ်ပွားခဲ့ကြတယ်လို့ သတင်းရရှိပါတယ်။

အဲဒီ့တိုက်ပွဲ ဖြစ်ပွားခဲ့တဲ့နေရာဟာ မောင်တောမြို့နယ် မြောက်ပိုင်းဒေသ တောင်ပြိုလက်ဝဲမြို့ကို သွားတဲ့လမ်းမှာ ရှိတဲ့ မီးတိုက်ကျေးရွာအနီး မိုင်တိုင် ၃၉ နဲ့ ၄၀ အကြားမှာ ဖြစ်ပွားခဲ့ကြတာ ဖြစ်တယ်လို့ ဒေသခံတွေဆီက သိရပါတယ်။

လက်နက်ကြီး၊လက်နက်ငယ် ပစ်ခတ်မှုတွေ ရှိခဲ့ပြီး ၁၀ နာရီကျော်လောက်မှာတော့ ပစ်ခတ်သံတွေ ရပ်စဲသွားခဲ့ကြောင်း ဒေသခံတွေရဲ့ ပြောဆိုချက် အရ သိရပါတယ်။

အဲဒီတိုက်ပွဲ ဖြစ်ပွားခဲ့တာနဲ့ ပတ်သက်လို့ မောင်တောခရိုင် အထွေထွေအုပ်ချုပ်ရေးမှူး ဦးစိုးအောင်ဆီကို ဖုန်းဆက်သွယ် မေးမြန်းခဲ့ရာမှာ တိုက်ပွဲဖြစ်ပွားခဲ့ကြောင်း အတည်ပြု ပြောဆိုပေမယ့် ဖြစ်စဉ်နဲ့ ပတ်သက်လို့ အသေးစိတ် မပြောနိုင်သေးဘူးလို့ ပြောပါတယ်။

"ဖြစ်တာတော့ဟုတ်တယ်ဗျ။ ဒီမနက်ပိုင်းက ဖြစ်တာပါ။ နယ်ခြားစောင့်တပ်နဲ့ ဖြစ်တာဆိုတော့ ကျွန်တော်တို့ကလည်း အဲ့ဒီအခြေအနေတွေကို မသိလို့ နယ်ခြားစောင့်ကပဲ ပြောနိုင်မှာဖြစ်ပါတယ်"လို့ ဦးစိုးအောင်က ပြောပါတယ်။

မောင်တောမြို့နယ် လွှတ်တော်ကိုယ်စားလှယ် ဦးမောင်အုန်းကလည်း တိုက်ပွဲဖြစ်ပွားတာ မှန်ကန်ကြောင်းနဲ့ မီးတိုက်ကျေးရွာအနီး နယ်စပ် နေရာတွေမှာ ဖြစ်ပွားခဲ့တယ်လို့ သတင်းရရှိပြီး တခြားအချက်အလက်တွေကို စုံစမ်းလို့ မရနိုင်သေးဘူးလို့ ဆိုပါတယ်။

အာဆာ အကြမ်းဖက်အဖွဲ့ဟာ ဘင်္ဂလားဒေ့ရှ်နယ်စပ်ဒေသ ဖြစ်တဲ့ မောင်တောမြို့နယ်အတွင်းမှာ ဝင်ရောက် လှုပ်ရှားနေတာတွေ ရှိနေပြီး အခုလိုမျိုး ကြိုကြားကြိုကြား တိုက်ပွဲဖြစ်ပွားတာတွေ ရှိလာနိုင်တယ်လို့ ဒေခံတွေက ဆိုပါတယ်။

ဆက်စပ် အကြောင်းအရာများ