ဖွဲ့စည်းပုံပြင်ဆင်ရေးမူကြမ်းပါ တပ်နဲ့သက်ဆိုင်တဲ့ ပြင်ဆင်ချက်တွေကို တပ်ဘက်က ကန့်ကွက်

တပ်နဲ့ အဓိကဆက်စပ်နေတဲ့ ပုဒ်မ ၁၄ ၊ပုဒ်မ ၆ ပုဒ်မ ၈ ၊ ပုဒ်မ ၁၇ (ခ)တို့ကို မပြင်ဘဲ မူလအတိုင်းသာထားရှိဖို့ ဆွေးနွေးသွားခဲ့ကြ ဓာတ်ပုံ မူပိုင် Pyidaungsu Hluttaw
Image caption တပ်နဲ့ အဓိကဆက်စပ်နေတဲ့ ပုဒ်မ ၁၄ ၊ပုဒ်မ ၆ ပုဒ်မ ၈ ၊ ပုဒ်မ ၁၇ (ခ)တို့ကို မပြင်ဘဲ မူလအတိုင်းသာထားရှိဖို့ ဆွေးနွေးသွားခဲ့ကြ

ပြည်ထောင်စုလွှတ်တော်မှာ ဖွဲ့စည်းပုံ အခြေခံဥပဒေကို ဒုတိယအကြိမ်ပြင်ဆင်တဲ့ ဥပဒေမူကြမ်းပါ အချက်တွေကို တင်ပြဆွေးနွေးနေချိန်မှာ တပ်မတော်နဲ့သက်ဆိုင်တဲ့ ပုဒ်မအများစုကို တပ်မတော်သား ကိုယ်စားလှယ်တွေက ကန့်ကွက်ဆွေးနွေးခဲ့ကြပါတယ်။

ဖေဖော်ဝါရီ ၂၅ရက်မှာ ကျင်းပတဲ့ ၁၅ကြိမ်မြောက် ပုံမှန် အစည်း အဝေး ၁၂ ရက်မြောက်အစီအစဉ်မှာ အခုလို ကန့်ကွက်ဆွေးနွေးကြတာ ဖြစ်ပါတယ်။

တပ်မတော်သားကိုယ်စားလှယ်တွေထဲက ဗိုလ်မှူးချုပ် အောင်ဇော်မိုး၊ ဗိုလ်မှူး ထက်လင်း၊ ဗိုလ်မှူးကြီး သန်းထိုက်တို့ ဆွေးနွေးအပြီးမှာတော့ တပ်မတော်နဲ့ အဓိကဆက်စပ်နေတဲ့ ပုဒ်မ ၁၄ ၊ပုဒ်မ ၆၊ ပုဒ်မ ၈ ၊ ပုဒ်မ ၁၇ (ခ)တို့ကို မပြင်ဆင်ဘဲ မူလအတိုင်းသာထားရှိဖို့ ဆွေးနွေးသွားခဲ့ကြပါတယ်။

တပ်ဘက်က ကန့်ကွက်နေတဲ့ ပုဒ်မတွေက ဘာတွေလဲ

တပ်ဘက်ကကန့်ကွက်နေတဲ့ ပုဒ်မ ၁၄ ရဲ့ မူလပြဋ္ဌာန်းချက်တွေကတော့ ဥပဒေပြုလွှတ်တော်တွေမှာ တပ်မတော်သားတွေ ပါဝင်ဖို့ ပြဋ္ဌာန်းထားတာဖြစ်ပါတယ်။

ဒီပုဒ်မကို ပြင်ဆင်ဖို့တင်ပြတဲ့ ဥပဒေမူကြမ်းမှာ လွှတ်တော်သက်တမ်းအလိုက် လွှတ်တော်ကိုယ်စားလှယ် တွေကို ရာခိုင်နှုန်းလျှော့ချသွားဖို့ ပြင်ဆင်ထားတာဖြစ်ပါတယ်။

'' လက်ရှိနိုင်ငံရေး အခြေအနေကို လေ့လာမယ်ဆိုရင် ဒီမိုကရေစီ အသွင်ကူးပြောင်းမှု ဆောင်ရွက်ရာမှာ သက်တမ်းအားဖြင့် ၉နှစ်ခန့်သာရှိသေးပြီး ပြည်တွင်းငြိမ်းချမ်းမှုရရှိအောင် ဆောင်ရွက်နေဆဲကာလ ဖြစ်ပါ တယ်။

ဒီလိုအချိန်မှာ ပြည်တွင်း လက်နက်ကိုင် သောင်းကျန်းမှုများ၊ ပြည်ပ ပယောဂနဲ့ ဝင်ရောက်စွက်ဖက်မှုကြောင့် ဖြစ်ပေါ်လာတဲ့ အကြမ်းဖက် သောင်းကျန်းမှုများ၊ တရားဥပဒေစိုးမိုးရေးနဲ့ လုံခြုံရေးဆိုင်ရာ စိန်ခေါ် မှုများ ရှိနေပြီး နိုင်ငံတော် အချုပ်အခြာအာဏာကို ထိပါးစော်ကားရန် ကြံရွယ်လုပ်ဆောင်မှုများရှိနေတာကို ထင်ထင် ရှားရှားတွေ့ရမှာ ဖြစ်ပါတယ်။

ဓာတ်ပုံ မူပိုင် Pyidaungsu Hluttaw
Image caption တပ်နဲ့ ဆက်စပ်နေတဲ့ ပြင်ဆင်ချက် အများစုကို မူလအတိုင်းထားဖို့ တပ်ဘက်ကဆွေးနွေး

နိုင်ငံတော် ပြိုကွဲလုနီးပါး အခြေအနေဆိုးများ မကျရောက်ဖို့ ထိန်းသိမ်းစောင့်ရှောက်နိုင်ဖို့ အလွန် အရေး ကြီးလှပါတယ်။

အနာဂတ် နိုင်ငံတော်အတွက် နိုင်ငံရေး လိုအပ်ချက်အရ ဒီလိုအချိန်မျိုးမှာ ပုဒ်မ ၁၄ကို ပြင်ဆင်ဖို့ မလို အပ်သေးဘူး''လို့ လည်း တပ်မတော်သားလွှတ်တော် ကိုယ်စားလှယ် ဗိုလ်မှူးထက်လင်းက ဆွေးနွေးပြောဆိုသွားပါတယ်။

လက်ရှိဖွဲ့စည်းပုံပါ ပြဋ္ဌာန်းချက်တွေအရ တပ်မတော်သား ကိုယ်စားလှယ်က ၂၅ ရာခိုင်နှုန်းအထိ ပါဝင် နေတာကို ပြည်ထောင်စုလွှတ်တော် တတိယအကြိမ်သက်တမ်းမှာ ကိုယ်စားလှယ်ဦးရေ စုစုပေါင်းရဲ့ ၁၅ရာခိုင်နှုန်း၊ စတုတ္ထအကြိမ်မှာ ၁၀ ရာခိုင်နှုန်း၊ ပဉ္စမအကြိမ်မှာ ၅ ရာခိုင်နှုန်းစီနဲ့လျှော့ချသွားဖို့ ပြင်ဆင် ချက်မှာတင်သွင်းထားတာ ဖြစ်ပါတယ်။

အလားတူ တပ်မတော်နဲ့သက်ဆိုင်တဲ့ ပုဒ်မ ၆ (စ)၊ ပုဒ်မ ၈၊ ပုဒ်မ ၁၇ (ခ)တို့ကိုပြင်ဆင်ဖို့ ပြင်ဆင်ချက်နဲ့ ပတ်သက်ပြီးတော့လည်း တပ်မတော်သားကိုယ်စားလှယ်တစ်ဦးဖြစ်တဲ့ ဗိုလ်မှူးကြီးသန်းထိုက်က ကန့်ကွက် ဆွေးနွေးသွားခဲ့ပါတယ်။

'' နိုင်ငံအတိတ်သမိုင်းကြောင်း ဆိုးရွားခဲ့တဲ့ ဖြစ်စဉ်များကဲ့သို့ ထပ်မံမဖြစ်ပွားစေရေး တိုင်းရင်းသား လက်နက်ကိုင် အဖွဲ့အစည်းများနဲ့ ပြည်တွင်း ငြိမ်းချမ်းရေးအတွက် ညှိနှိုင်း ဖော်ဆောင်ဆဲကာလ ၊ဒီမိုကရေစီ သက်တမ်းနုနယ်သေးတဲ့ကာလ ဖြစ်နေခြင်းများကြောင့် ပုဒ်မ ၆ (စ)၊ ပုဒ်မ ၈၊ ပုဒ်မ ၁၇ (ခ)ကိုပြင်ဆင်ခြင်း ပယ်ဖျက်ခြင်းမပြုဘဲ မူလအတိုင်းထားဖို့လိုတယ်''လို့လည်း ဗိုလ်မှူးကြီးသန်းထိုက်က ဆွေးနွေးပြောဆိုခဲ့ပါ တယ်။

ဗိုလ်မှူးကြီး သန်းထိုက်ဆွေးနွေးသွားတဲ့ထဲက ပုဒ်မ ၁၇ (ခ)ဟာ မူလပြဌာန်းချက်မှာ ပြည်ထောင်စု တိုင်းဒေသကြီး၊ ပြည်နယ်၊ပြည်ထောင်စုနယ်မြေ ကိုယ်ပိုင်စီရင်စု နဲ့ ခရိုင်အုပ်ချုပ်ရေးတို့မှာ ကာကွယ်ရေး လုံခြုံရေး၊ နယ်စပ်အုပ်ချုပ်ရေး စတဲ့တာဝန်တွေကို ထမ်းဆောင်ရန် တပ်မတော်ကာကွယ်ရေးဦးစီးချုပ်မှ အမည်စာရင်းတင်သွင်းပေးတဲ့ တပ်မတော်သားများပါဝင်သည် လို့ ဖြစ်ပြီး ဒီပြဌာန်းချက်ကို ပယ်ဖျက်ဖို့ တင်သွင်းလာတဲ့အတွက်ကန့်ကွက်ဆွေးနွေးသွားခဲ့တာဖြစ်ပါတယ်။

တပ်နဲ့ NLD ကိုယ်စားလှယ်အကြား အချေအတင်ရှိခဲ့

ဒီကနေ့ အစည်းအဝေးမှာ တပ်မတော်သား ကိုယ်စားလှယ် ဗိုလ်မှူးချုပ် အောင်စန်းချစ် တင်သွင်းထားတဲ့ အခြေခံ ဥပဒေ ဖွဲ့စည်းပုံ ပြင်ဆင်ရေး ဥပဒေကြမ်းပုဒ်မ၂၆၂၊ ပုဒ်မခွဲ(ဋ)အပေါ် ဥပဒေကြမ်းကော်မတီရဲ့ စိစစ်တင်ပြချက်မှာ ပြင်ဆင်ချက် စကားရပ် တချို့ ကျန်နေခဲ့တဲ့အတွက် တပ်ဘက်က ကန့်ကွက်ရာကနေ နောက်ပိုင်း ခဏတာ စကား အချေအတင် ပြောဆိုမှုတွေ ဖြစ်ပေါ်ခဲ့ပါတယ်။

ဓာတ်ပုံ မူပိုင် Pyidaungsu Hluttaw
Image caption ကြမ်းတမ်းတဲ့ ကိုယ်၊ နှုတ်အမူအရာများ မလုပ်ဖို့ တပ်တော်ကိုယ်စားလှယ်ကို လွှတ်တော်နာယကက သတိပေး ပြောဆိုခဲ့

ဒီအပေါ်မှာ ရုန့်ရင်းကြမ်းတမ်းတဲ့ ကိုယ်အမူအရာ၊ နှုတ်အမူအရာများ မပြုလုပ်ဖို့ တပ်မတော်သား လွှတ်တော်ကိုယ်စားလှယ်ကို ပြည်ထောင်စုလွှတ်တော်နာယကက သတိပေး ပြောဆိုခဲ့ပါတယ်။

ဖွဲ့စည်းပုံကို ပြင်ဖို့ ၇၅ ရာခိုင်နှုန်းကျော်ထောက်ခံဖို့လို

အမျိုးသား ဒီမိုကရေစီ အဖွဲ့ချုပ် NLD ပါတီ ဦးဆောင်တဲ့ ကိုယ်စားလှယ်တွေ ဦးဆောင်တင်သွင်းလာတဲ့ ဖွဲ့စည်းပုံအခြေခံဥပဒေ ဒုတိယအကြိမ် ပြင်ဆင်ရေး ဥပဒေမူကြမ်းကို ပြည်ထောင်စုလွှတ်တော်မှာ စတင် ဆွေးနွေးခဲ့တဲ့ ဒီကနေ့ ဖေဖော်ဝါရီ ၂၅ရက်နေ့မှာပဲ ပြင်ဆင်ချက်အများစုကို တပ်ဘက်က ကန့်ကွက် ပြောဆိုသွားကြတယ်လို့ သိရပါတယ်။

တပ်ကိုယ်စားလှယ်တွေ ဆွေးနွေးသွားတဲ့ အချက်တွေထဲမှာ တပ်မတော်နဲ့ ဆက်စပ်နေတဲ့ ပြင်ဆင်ချက် အများစုကို ပြင်ဆင်ခြင်းမပြုဘဲ မူလအတိုင်းထားဖို့ကိုသာ ဆွေးနွေးသွားကြတာကိုလည်း တွေ့ရှိရပါတယ်။

လက်ရှိ ဖွဲ့စည်းပုံပါ ပြဋ္ဌာန်းချက်အရ ဖွဲ့စည်းပုံပြင်ဆင်ရေးအတွက် လွှတ်တော်ကိုယ်စားလှယ် စုစုပေါင်းရဲ့ ၇၅ ရာခိုင်နှုန်းကျော်က သဘောတူလက်ခံမှသာ ပြင်ဆင်ခွင့် ရနိုင်မှာ ဖြစ်ပါတယ်။

ဒီအချက်နဲ့ပတ်သက်ပြီးတော့လည်း မင်းတပ်မဲဆန္ဒနယ် ပြည်ထောင်စုလွှတ်တော် ကိုယ်စားလှယ် ဦးနေလင်း အောင်က ထည့်သွင်း ဆွေးနွေးသွားခဲ့ပါတယ်။

'' ဒီ ၂၀၀၈ ဥပဒေမှာ ပြည်သူရွေးချယ်တင်မြှောက်ခွင့်ရှိသူ ကိုယ်စားလှယ်က ၇၅ ရာခိုင်နှုန်းပဲ ရှိပါတယ်။ ကျန်တဲ့ ၂၅ရာခိုင်နှုန်းက ကာကွယ်ရေးဦးစီးချုပ်က ခန့်တာပါ။ ပြည်သူကရွေးချယ်ထားတဲ့ ကိုယ်စားလှယ် များအားလုံး ပြင်ချင်ရင်တောင် ပြင်လို့မရတဲ့ ဥပဒေ ဖြစ်နေလို့ ပုဒ်မ ၄၃၆ ကို ပြင်သင့်ပါတယ်''လို့ ဦးနေလင်းအောင်က ဆွေးနွေးသွား ခဲ့ပါတယ်။

ဖွဲ့စည်းပုံ အခြေခံဥပဒေ ဒုတိယအကြိမ်ပြင်ဆင်ရေး ဥပဒေ မူကြမ်းကို ဖေဖော်ဝါရီ ၂၅ရက်ကနေ မတ်လ ၅ ရက်နေ့အထိ ပြည်ထောင်စုလွှတ်တော်မှာ ဆက်လက် ဆွေးနွေးဆုံးဖြတ်သွားမှာ ဖြစ်ပါတယ်။

ဒီကနေ့ ဖေဖော်ဝါရီ ၂၅ ရက် နေ့မှာ ပထမရက်အဖြစ် ဆွေးနွေးကြရာမှာ လွှတ်တော်ကိုယ်စားလှယ် ၁၅ ဦး ဆွေးနွေးခဲ့ကြတဲ့အနက် တပ်ကိုယ်စားလှယ် ၅ဦးတို့ ပါဝင်ဆွေးနွေးခဲ့ကြပါတယ်။

ဆက်စပ် အကြောင်းအရာများ