တပ်ချုပ်နဲ့ သွားတွေ့တဲ့ ရခိုင်ဝန်ကြီးကို ပါတီက စစ်ဖို့ရှိနေ

ရခိုင် တိုင်းရင်းသားရေးရာဝန်ကြီး ဦးဇော်အေးမောင်

ဓာတ်ပုံ ရင်းမြစ်, U Zaw Aye Mg FB

ဓာတ်ပုံ ပုံစာ,

ရက်ပိုင်းအတွင်း စိစစ် အရေးယူဖို့ စီစဉ်နေတယ်လို့ ရခိုင်အမျိုးသားပါတီကနေ သိရ

ရခိုင်အမျိုးသားပါတီ ANP ခွင့်ပြုချက် မယူဘဲ တပ်မတော် ကာကွယ်ရေး ဦးစီးချုပ်နဲ့ သွားရောက် တွေ့ဆုံခဲ့တဲ့ ရန်ကုန်တိုင်း ရခိုင်တိုင်းရင်းသားရေးရာ ဝန်ကြီး ဦးဇော်အေးမောင်ကို ၁၅ ရက်အတွင်း အရေးယူဖို့ စီစဉ်နေ တယ်လို့ ရခိုင်အမျိုးသားပါတီက ဘီဘီစီကို ပြောပါတယ်။

ရန်ကုန်တိုင်းဒေသကြီး ရခိုင် တိုင်းရင်းသားရေးရာဝန်ကြီး ဦးဇော်အေးမောင်ဟာ စစ်တွေက ရပ်မိ ရပ်ဖတွေကို ဦးဆောင်ပြီး ဖေဖော်ဝါရီ ၁၃ ရက်နေ့က နေပြည်တော်မှာ ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် အပါအဝင် တပ်မတော် အရာရှိကြီးတွေနဲ့ တွေ့ဆုံခဲ့တာပါ။

ခုလို တွေ့ဆုံတဲ့ အပေါ် ဝန်ကြီးဦးဇော်အေးမောင်ကို ရခိုင်အမျိုးသားပါတီ ဗဟိုက ခေါ်ယူ စစ်ဆေးသွားမယ်လို့ ဆိုပါတယ်။

"ဒီလို ခေါ်ယူစစ်ဆေးရတာဟာ ပါတီရဲ့ စည်းကမ်းဖြစ်တဲ့ ဗဟိုအလုပ်အမှုဆောင် ကော်မတီရဲ့ ခွင့်ပြုချက်မ ရဘဲ ဘယ်အဖွဲ့အစည်းကိုမှ မတွေ့ရဘူး ဆိုတဲ့စည်းကမ်း ကိုမလိုက်နာလို့ပါ၊ ကာကွယ်ဦးစီးချုပ်ကို တွေ့လို့ရယ် မဟုတ်ပါဘူး"လို့ ပါတီရဲ့ နိုင်ငံရေးမူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က ဘီဘီစီ ကိုပြောပါတယ်။

ရခိုင် တိုင်းရင်းသားရေးရာဝန်ကြီး ဦးဇော်အေးမောင်ကတော့ စစ်တွေမြို့က ရပ်မိရပ်ဖတွေနဲ့ စစ်တွေမြို့မှာ တည်ဆောက်နေတဲ့ သာသနာ အာဇာနည် အရှင် စန္ဒြမဏိဆရာတော် ရုပ်တု ဗိမာန်တော် မြေနေရာ အချို့ဟာ တပ်မတော် ကာကွယ်ရေး ဦးစီးချုပ်က လှူဒါန်းထားတာမို့ အဲဒီ မြေကိစ္စနဲ့ သွားရောက် တွေ့ဆုံခဲ့တာ ဖြစ်တယ်လို့ ဆိုပါတယ်။

ဒီလို တွေ့ဆုံခဲ့တာနဲ့ ပတ်သက်လို့ ပါတီက စိစစ်အရေးယူမယ့်အပေါ် ဝန်ကြီး ဦးဇော်အေးမောင်က ခံယူသွားမယ်လို့ ပြောပါတယ်။

အဲဒီနေ့က ရခိုင်ဝန်ကြီး ဦးဇော်အေးမောင်ဦးဆောင်တဲ့ ကိုယ်စားလှယ် အဖွဲ့ဟာ ရခိုင်ပြည်နယ် ဖွံ့ဖြိုးတိုးတက်ရေး၊ ပညာရေး၊ ကျန်းမာရေး၊ စီးပွားရေးနဲ့ လူမှုဘဝ ဖွံ့ဖြိုးရေး၊ ဒေသငြိမ်းချမ်းရေး စတဲ့ လိုအပ်တဲ့ ကိစ္စရပ်တွေကို တပ်မတော် ကာကွယ်ရေး ဦးစီးချုပ်နဲ့ တွေ့ဆုံ ဆွေးနွေးခဲ့ကြတယ်လို့ လည်း ကာကွယ်ရေး ဦးစီးချုပ်ရုံးက ထုတ်ပြန်တဲ့ သတင်းမှာ ဖော်ပြခဲ့ပါတယ် ။

ရခိုင် တိုင်းရင်းသားရေးရာဝန်ကြီး ဦးဇော်အေးမောင်ဟာ ရန်ကုန်တိုင်းဒေသကြီး အစိုးရအဖွဲ့မှာ အစိုးရ နှစ်ဆက်တိုင် ရခိုင် တိုင်းရင်းသားရေးရာဝန်ကြီးအဖြစ် တာဝန် ထမ်းဆောင်ခဲ့သူ ဖြစ်ပါတယ်။

သူဟာ ရခိုင်အမျိုးသားပါတီ ANP မှာ ဗဟို အလုပ်အမှုဆောင်အဖွဲ့ဝင် တစ်ဦး ဖြစ်သလို ရန်ကုန်တိုင်း ဥက္ကဋ္ဌလည်း ဖြစ်ပါတယ်။

ပါတီက ဆုံးဖြတ်တဲ့အတိုင်း ခံယူဖို့ အသင့်ပါပဲလို့ ဦးဇော်အေးမောင်က ဘီဘီစီကိုပြောပါတယ်။