ကိုရိုနာဗိုင်းရပ်စ် - ကိုဗစ်-၁၉ ကူးစက်ခံရတဲ့ နိုင်ငံတွေကို ဒေါ်လာ ၅၀ ဘီလျံ ပံ့ပိုးဖို့ IMF ကြေညာ

နိုင်ငံပေါင်း ၆၀ ကျော်ကို ဒီဗိုင်းရပ်စ် ရောက်နေပါပြီ။

ဓာတ်ပုံ ရင်းမြစ်, Getty Images

ဓာတ်ပုံ ပုံစာ,

နိုင်ငံပေါင်း ၇၀ ကျော်ကို ဒီဗိုင်းရပ်စ် ရောက်နေပါပြီ။

အမေရိကန်ပြည်ထောင်စု၊ ကယ်လီဖိုးနီးယားပြည်နယ်မှာ ကိုရိုနာဗိုင်းရပ်စ်ကြောင့် လူသေဆုံးမှုရှိလာတဲ့နောက် ပြည်နယ်အခြေအနေကို အရေးပေါ်အခြေအနေကြေညာလိုက်ပါတယ်။

သေဆုံးသူဟာ အသက် ၇၁ နှစ်အရွယ် အမျိုးသားတစ်ဦးဖြစ်ပြီး အပျော်စီးသင်္ဘောတစ်စီးပေါ်မှာလိုက်ပါခဲ့သူဖြစ်တယ်လို့ အာဏာပိုင်တွေကပြောပါတယ်။

အခု ကယ်လီဖိုးနီးယားက သေဆုံးသူဟာ ပြီးခဲ့တဲ့လပိုင်းက ဆန်ဖရန်စစ္စကိုကနေ မက္ကဆီကို ကို လှည့်လည်သွားခဲ့တဲ့ Grand Princess သင်္ဘောခရီးစဉ်ကနေ ကူးစက်ခံရတာဖြစ်နိုင်တယ်လို့ ယုံကြည်ရပါတယ်။

ဓာတ်ပုံ ရင်းမြစ်, AFP

ဓာတ်ပုံ ပုံစာ,

Grand Princess သင်္ဘောဟာ ကမ္ဘာ့အကြီးဆုံးသင်္ဘောတွေထဲက တစ်ခုဖြစ်ပါတယ်။

ဒီသင်္ဘောဟာ ဆန်ဖရန်စစ္စကိုမှာ ပြီးခဲ့တဲ့ဖေဖော်ဝါရီ ၂၁ ရက်က ဆိုက်ကပ်ခဲ့တာဖြစ်ပြီး ခရီးသည်တွေ အတက်အဆင်းပြုလုပ်ခဲ့ပြီးတဲ့နောက် ဟာဝိုင်အီဘက်ကို ခရီးဆက်သွားခဲ့တာဖြစ်ပါတယ်။

ဒါကြောင့် ဟာဝိုင်အီနဲ့ မက္ကဆီကိုခရီးစဉ်က ခရီးသည်ပေါင်း ၆၂ ဦးဟာလည်း အခုချိန်မှာ ဗိုင်းရပ်စ်သံသယနဲ့ စောင့်ကြည့်မှုခံယူနေရပါတယ်။

အခု ဒီသင်္ဘောကို ကယ်လီဖိုးနီးယားကမ်းခြေမှာ ဆိုက်ကပ်ထားစေပြီးတဲ့နောက် ပြည်နယ်အာဏာပိုင်တွေက ခရီးသည် ၁၁ ဦးနဲ့ သင်္ဘောအမှုထမ်း ၁၀ ဦးဟာ ဗိုင်းရပ်စ်ကူးစက်ခံရနိုင်ခြေရှိတယ်လို့ ပြောကြားလာပါတယ်။

အမေရိကန်အစိုးရရဲ့ အိမ်ဖြူတော်ကတော့ ပြီးခဲ့တဲ့ ဗုဒ္ဓဟူးနေ့မှာ ကိုရိုနာဗိုင်းရပ်စ် စမ်းသပ်ရမယ့် ဧရိယာကို တစ်နိုင်ငံလုံး အတိုင်းအတာနဲ့ တိုးချဲ့ခဲ့ပါတယ်။

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

အခုတော့ အမေရိကန်ပြည်ထောင်စုရဲ့ ပြည်နယ် ၁၆ ခုမှာ ကိုရိုနာဗိုင်းရပ်စ် ကူးစက်ခံရသူပေါင်း အနည်းဆုံး ၁၅၀ ရှိနေပြီဖြစ်ပါတယ်။

ဒီဗိုင်းရပ်စ်ကြောင့် အမေရိကန်ပြည်ထောင်စုမှာ စုစုပေါင်း လူ ၁၁ ဦးသေဆုံထားပြီးဖြစ်ပါတယ်။

အဲဒီ ၁၁ ယောက်မှာ ၁၀ ယောက်က ဝါရှင်တန်ပြည်နယ်က ဖြစ်ပြီး တက္ကဆက်ပြည်နယ်နဲ့ နီဘရာစကာပြည်နယ်ဘက်မှာလည်း ဗိုင်းရပ်စ် ကူးစက်မှုနှုန်း မြင့်နေပါတယ်။

ပြီးခဲ့တဲ့ သတင်းပတ်ကလည်း ဝါရှင်တန်ပြည်နယ်ရော ဖလော်ရီဒါပြည်နယ်နှစ်ခုစလုံးက ကိုရိုနာဗိုင်းရပ်စ်ကြိုတင်ကာကွယ်ဖို့အတွက် အရေးပေါ်အခြေအနေကို အသီးသီးကြေညာခဲ့ပါတယ်။

ပြီးခဲ့တဲ့လကပဲ ဂျပန်မှာ ဆိုက်ကပ်ခဲ့ရတဲ့ စိန်မင်းသမီးအပျော်စီးသင်္ဘောပေါ်က ခရီးသည် ခြောက်ရာကျော်ဟာလည်း ဗိုင်းရပ်စ်ကူးစက်ခံခဲ့ရပြီး သေဆုံးသူတချို့ ရှိခဲ့ပါတယ်။

တစ်ကမ္ဘာလုံးက ကိုရိုနာဗိုင်းရပ်စ် အခြေအနေ

တရုတ်ပြင်ပမှာ ဒီဗိုင်းရပ်စ်အဆိုးဆုံးခံနေရတာကတော့ တောင်ကိုရီးယားဖြစ်ပါတယ်။ မတ် ၄ ရက် တစ်ရက်တည်းမှာတင် ကူးစက်သူ ၅၁၆ ဦးရှိခဲ့ပြီး စုစုပေါင်း ကူးစက်သူပေါင်း ၅,၇၆၆ ရှိနေပါတယ်။ သေဆုံးသူပေါင်းကတော့ ၃၅ ဦးဖြစ်ပါတယ်။

ဗိုင်းရပ်စ်ကူးစက်ပျံ့ပွားမှုကို ထိန်းချုပ်ဖို့အားထုတ်တဲ့အနေနဲ့ တောင်ကိုရီးယားဝန်ကြီးချုပ်က နှာခေါင်းစည်းမျက်နှာဖုံးတွေ တင်ပို့ရောင်းချတာတွေ မလုပ်ကြဖို့ သတိပေးထားပါတယ်။

အဲဒီလိုပဲ သြစတြေးလျမှာလည်း တောင်ကိုးရီးယားကနေ လာရောက်မယ့် နိုင်ငံခြားသားတွေကို ပြည်ဝင်ခွင့်တားမြစ်လိုက်ပါတယ်။ သြစတြေးလျမှာတော့ ဒီဗိုင်းရပ်စ်နဲ့ လူနှစ်ဦးသေဆုံးပြီး ကူးစက်ခံရသူ ၅၃ ဦးရှိနေပါတယ်။

တရုတ်မှာတော့ တစ်ရက်တည်း ကူးစက်သူအသစ် ၁၃၉ ဦးရှိခဲ့ပြီး သေဆုံးသူ ၃၁ ဦးရှိခဲ့သလို သူတို့အားလုံးဟာ ဒီဗိုင်းရပ်စ် စတွေ့တဲ့ ဟူဘေးပြည်နယ်က ဖြစ်ပါတယ်။

အီတလီမှာတော့ ကျောင်းတွေကို အနည်းဆုံး ဆယ်ရက်လောက်ထိ ပိတ်ထားမှာဖြစ်ပြီး အီတလီဟာ ဥရောပမှာဆိုရင် ဗိုင်းရပ်စ်ကူးစက်မှု အဆိုးရွားဆုံး အခြေအနေကို ရင်ဆိုင်နေရတာဖြစ်ပါတယ်။

ဗြိတိန်မှာတော့ ဒီကိုရိုနာဗိုင်းရပ်စ်ရဲ့ ရိုက်ခတ်မှုကြောင့် လေကြောင်းလိုင်း Flybe ဟာ ဒေဝါလီခံရမယ့်အရေးရင်ဆိုင်နေရပြီး လေကြောင်းလိုင်း ဝန်ထမ်းပေါင်း ၂၀၀၀ ကျော်ဟာလည်း အလုပ်လက်မဲ့ဖြစ်မယ့်အရေး ရင်ဆိုင်နေရပါတယ်။

ဓာတ်ပုံ ရင်းမြစ်, Reuters

ဓာတ်ပုံ ပုံစာ,

လေကြောင်းလိုင်း Flybe က ခရီးသည်တွေကို တခြားအစားထိုးခရီးစဉ်တွေ စီစဉ်ပေးမယ်လို့ ကြေညာထားပါတယ်။

ဒီကနေ့ မတ်လ ၅ ရက် နေ့မှာတော့ နိုင်ငံတကာငွေကြေးရန်ပုံငွေအဖွဲ့(IMF) က ကိုရိုနာဗိုင်းရပ်စ် ကူးစက်ခံနေရတဲ့ နိုင်ငံတွေကို အမေရိကန်ဒေါ်လာ ၅၀ ဘီလျံ(ယူရို ၃၉ ဘီလျံ) ပံ့ပိုးကူညီမယ်လို့ ကြေညာလိုက်ပါတယ်။

ဒီအရေးကြောင့် ကမ္ဘာ့စီးပွားရေးဖွံ့ဖြိုးတိုးတက်မှုဟာ ပြီးခဲ့တဲ့ ၂၀၁၉ ခုနှစ်ကထက် ၂.၉ ရာခိုင်နှုန်းအောက် ကျဆင်းသွားမယ်လို့ IMFက မျှော်မှန်းထားပါတယ်။

ဗီဒီယို ပုံစာ,

ကိုရိုနာဗိုင်းရပ်စ် မကူးစက်ဖို့ အကောင်းဆုံး လက်ဆေးနည်း