ဒေါ်အောင်ဆန်းစုကြည်-တိုင်းမ် မဂ္ဂဇင်းရဲ့ ရာစုနှစ်တွင်း ကမ္ဘာ့သြဇာအလွှမ်းမိုးဆုံး အမျိုးသမီး ၁၀၀ စာရင်းမှာ ပါဝင်

ဒေါ်အောင်ဆန်းစုကြည်ဟာ ၁၉၉၀ ပြည့်နှစ်မှာ တိုင်းမ်ရဲ့ တစ်နှစ်တာ သြဇာအရှိဆုံးပုဂ္ဂိုလ်အဖြစ် ဖော်ပြခံခဲ့ရပါတယ်။
ဓာတ်ပုံ ပုံစာ,

ဒေါ်အောင်ဆန်းစုကြည်ဟာ ၁၉၉၀ ပြည့်နှစ်မှာ တိုင်းမ်ရဲ့ တစ်နှစ်တာ သြဇာအရှိဆုံးပုဂ္ဂိုလ်အဖြစ် ဖော်ပြခံခဲ့ရပါတယ်။

တိုင်းမ်မဂ္ဂဇင်းက ရွေးချယ်ထားတဲ့ ရာစုနှစ်အတွင်း ကမ္ဘာပေါ်မှာ သြဇာအလွှမ်းမိုးဆုံး အမျိုးသမီး ၁၀၀ စာရင်းမှာ နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပါဝင်နေပါတယ်။

သူ့ကို ဘာကြောင့် ရာစုနှစ်အတွင်း အမျိုးသမီး ၁၀၀ စာရင်းမှာ ဖော်ပြရလဲ ဆိုတာကို တိုင်းမ်မဂ္ဂဇင်းက ခုလို ရေးသားထားပါတယ်။

မြန်မာနိုင်ငံမှာ ၁၉၈၈ ခုနှစ် နွေရာသီမှာ တော်လှန်ရေး လှုပ်ရှားမှုစိတ်ဓာတ်တွေ လွှမ်းမိုးခဲ့ပါတယ်။

နိုင်ငံလွတ်လပ်ရေး ကြိုးပမ်းမှုရဲ့ သူရဲကောင်း ဗိုလ်ချုပ်အောင်ဆန်းရဲ့ သမီး ဒေါ်အောင်ဆန်းစုကြည်ဟာ အတိုက်အခံ အင်အားစုတွေနဲ့ ပူးပေါင်းပြီး စစ်အာဏာရှင်စနစ်ကို စတင်တွန်းလှန်ခဲ့တယ်လို့ တိုင်းမ်က ရေးသားပါတယ်။

စစ်တပ်က လူထောင်ပေါင်းများစွာကို နှိမ်နင်းသတ်ဖြတ်ခဲ့ပြီး သွေးထွက်သံယိုမှုတွေနဲ့ အဆုံးသတ်ခဲ့တဲ့ အဲဒီတော်လှန်ရေးလှုပ်ရှားမှု နောက်ပိုင်းမှာ ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီအဖွဲ့ချုပ် ပါတီ ထွက်ပေါ်လာခဲ့ပြီး အဲဒီပါတီက တက်ကြွလှုပ်ရှားသူတွေ၊ ပါတီဝင်တွေ ဖမ်းဆီးထောင်ချခံရခဲ့ပါတယ်။

ပါတီ ဦးဆောင်သူ တစ်ဦးဖြစ်တဲ့ ဒေါ်အောင်ဆန်းစုကြည်ကိုလည်း နေအိမ်အကျယ်ချုပ်နဲ့ ထိန်းသိမ်းခဲ့ပါတယ်။

ဒါပေမဲ့ ဒေါ်အောင်ဆန်းစုကြည်ဟာ ဒီမိုကရေစီရေးအတွက် ဇွဲရှိရှိနဲ့ မဆုတ်မနစ် ဆက်လက်ကြိုးပမ်းတိုက်ပွဲဝင်ခဲ့တာပါ။ ၁၉၉၀ အထွေထွေရွေးကောက်ပွဲ လုပ်တော့လည်း အန်အယ်လ်ဒီက တောင်ပြိုကမ်းပြို နိုင်ခဲ့ပေမယ့် စစ်အစိုးရက အာဏာလွှဲပြောင်းမပေးခဲ့ပါဘူး။

အဲဒီနောက် ဒေါ်အောင်ဆန်းစုကြည်ဟာ ၂၀၁၀ အထိ ဆယ်စုနှစ် တစ်ခုကျော်ကြာအောင် နေအိမ်အကျယ်ချုပ် ကျခံခဲ့ရပါတယ်။

ဓာတ်ပုံ ပုံစာ,

ဆယ်စုနှစ်တစ်ခုကျော်ကြာ နေအိမ်အကျယ်ချုပ်နေခဲ့ရပြီး ၂၀၁၀ ခုနှစ် နိုဝင်ဘာမှာတော့ ပြန်လည်လွတ်မြောက်ခဲ့ပါတယ်။

၂၀၁၅ ခုနှစ်မှာ ဒေါ်အောင်ဆန်းစုကြည် ဦးဆောင်တဲ့ အရပ်သားအစိုးရ အာဏာရလာပြီး အတိုင်ပင်ခံပုဂ္ဂိုလ်အဖြစ် တိုင်းပြည်ကို လက်တွေ့ဦးဆောင်မှု ပေးတဲ့ ခေါင်းဆောင် ဖြစ်လာပါတယ်။

ဒါပေမဲ့ မကြာခင်မှာပဲ စစ်တပ်က လူနည်းစု ရိုဟင်ဂျာတွေအပေါ်မှာ ပြုမူဆက်ဆံခဲ့တာတွေအပေါ် ခုခံကာကွယ် ပြောဆိုဖို့ ပျက်ကွက်ခဲ့တဲ့အတွက် ပြည်ပက သူ့ကို ထောက်ခံသူတွေ စိတ်ပျက်လာခဲ့ကြပါတယ်။

နိုင်ငံတကာတရာရုံး အိုင်စီဂျေမှာလည်း ဂမ်ဘီယာရဲ့ တရားစွဲထားမှုကို ကိုယ်တိုင် သွားရောက် ခုခံချေပခဲ့တဲ့အပေါ် ပြည်တွင်းမှာ ထောက်ခံမှုတွေ ရခဲ့ပေမယ့်လို့ နိုင်ငံတကာအသိုင်းအဝိုင်းရဲ့ ပစ်ပယ်မှုကို ခံခဲ့ရတယ်လို့ တိုင်းမ်မဂ္ဂဇင်း က ဖော်ပြထားပါတယ်။

ဒေါ်အောင်ဆန်းစုကြည်ဟာ တိုင်းမ်မဂ္ဂဇင်းရဲ့ တစ်နှစ်တာအတွင်း သြဇာလွှမ်းမိုးမှုအရှိဆုံးပုဂ္ဂိုလ်အဖြစ် ၁၉၉၀ ပြည့်နှစ်က ဖော်ပြခံခဲ့ရတာဖြစ်ပါတယ်။

ဓာတ်ပုံ ပုံစာ,

၁၉၉၀ အစောပိုင်းကာလတွေက ဒေါ်အောင်ဆန်းစုကြည်

ဒေါ်အောင်ဆန်းစုကြည်အပြင် နိုင်ငံတော်သမ္မတ(ငြိမ်း) ဦးသိန်းစိန်လည်း တိုင်းမ်မဂ္ဂဇင်းရဲ့ အဲဒီလူပုဂ္ဂိုလ် ၁၀၀ စာရင်းမှာ ၂၀၁၂ ခုနှစ်က ဖော်ပြခံခဲ့ရ ပါတယ်။

စစ်ဗိုလ်ချုပ်ကြီးဟောင်း တစ်ဦးဖြစ်တဲ့ ဦးသိန်းစိန်ကတော့ ရွေးကောက်ပွဲစနစ်နဲ့ ထွက်ပေါ်လာတဲ့ အစိုးရကို ဦးဆောင်ပြီး ဒီမိုကရေစီရေးနဲ့ ပြုပြင် ပြောင်းလဲရေးတွေကို လုပ်ဆောင်ခဲ့တာကြောင့် ထည့်သွင်း ဖော်ပြခဲ့တာ ဖြစ်တယ်လို့ တိုင်းမ်က ဆိုပါတယ်။

တိုင်းမ်မဂ္ဂဇင်းရဲ့ တစ်နှစ်တာ သြဇာလွှမ်းမိုးမှုအရှိဆုံးသူ (Man of the Year) ကို ၇၂ နှစ်ကြာအောင် ဖော်ပြခဲ့ပြီး အများစုက အမြဲတမ်းလိုလို အမျိုးသားတွေ ဖြစ်နေခဲ့ပါတယ်။

၁၉၉၉ ခုနှစ်ကစလို့ Man of the year အစား တစ်နှစ်တာ သြဇာလွှမ်းမိုးမှုအရှိဆုံး ပုဂ္ဂိုလ် (Person of the Year) အဖြစ် ပြောင်းလဲ ဖော်ပြခဲ့တာဖြစ်ပါတယ်။

ဒီနှစ်မှာတော့ တိုင်းမ်က တစ်နှစ်တာအတွင်း သြဇာလွှမ်းမိုးမှုအရှိဆုံး အမျိုးသမီး ၁၀၀ စာရင်းနဲ့အတူ ရာစုနှစ်အတွင်း သြဇာလွှမ်းမိုးမှုအရှိဆုံး အမျိုးသမီး ၁၀၀ ကိုပါ စုစည်းဖော်ပြခဲ့တာဖြစ်ပါတယ်။

ဓာတ်ပုံ ပုံစာ,

အတိုက်အခံဘဝတစ်လျှောက်လုံး နိုင်ငံတကာအသိုင်းအဝိုင်းရဲ့ ထောက်ခံမှုကို ရရှိခဲ့ပါတယ်။

အဲဒီထဲမှာ ဒေါ်အောင်ဆန်းစုကြည် ပါဝင်ခဲ့တာ ဖြစ်ပါတယ်။

ဒါ့အပြင် အဲဒီစာရင်းမှာ အာရှဒေသက ဒေါ်အောင်ဆန်းစုကြည်အပြင် ၁၉၉၂ ခုနှစ်က တရုတ်ကွန်မြူနစ်ပါတီ အမျိုးသမီးအဖွဲ့ဝင် စီယန်ကျင်းယု၊ အာဖဂန်နစ္စတန်ဘုရင် မိဖုရား ဆုယာရာတာဇီ၊ အိန္ဒိယရဲ့ ပထမဆုံး အမျိုးသမီးဝန်ကြီး အမ်ရစ်ကာအာ၊ ဖိလစ်ပိုင်သမ္မတဟောင်း အကွီနိုရဲ့ ဇနီး ကိုရာဇန်အကွီနို၊ ပါကစ္စတန်က နိုဘယ်လ်ဆုရှင် မာလာလာ ယူဆွစ်ဇိုင် စတဲ့ အာရှဒေသတွင်းက အမျိုးသမီးတွေလည်း ပါဝင်ပါတယ်။

အခုလို ရာစုနှစ် သြဇာအရှိဆုံး စာရင်းမှာ ပါဝင်ခဲ့ပေမယ့် လက်ရှိမှာ ဒေါ်အောင်ဆန်းစုကြည်ဟာ ရိုဟင်ဂျာအရေးမှာ လူ့အခွင့်အရေးချိုးဖောက်မှုတွေကို ကာကွယ်ပြောဆိုဖို့ ပျက်ကွက်တဲ့အတွက် သူရရှိထားတဲ့ နိုင်ငံတကာ ဆုတံဆိပ်တချို့ ပြန်လည်ရုပ်သိမ်းခံနေရပါတယ်။

ဆုနဲ့ပတ်သက်လို့ သိပ်အလေးမထားပေမယ့် မိတ်ဆွေနိုင်ငံတွေအဖြစ် သတ်မှတ်ထားသူတွေရဲ့ ဆက်ဆံရေးနဲ့ပတ်သက်လို့ စိတ်မကောင်းဖြစ်မိတယ်လို့ ဒေါ်အောင်ဆန်းစုကြည်က မှတ်ချက်ပြုထားပါတယ်။