အကျဉ်းသား နှစ်သောင်းကျော် ပြစ်ဒဏ်လွတ်ငြိမ်းခွင့်ပြု၊ ကပ်ရောဂါကြောင့် သင်္ကြန်ပျော်ခွင့်မရတဲ့အပေါ် သမ္မတ စိတ်မကောင်း အပါအဝင် ဧပြီ ၁၇ ရက် မနက်ခင်း ထိပ်တန်းသတင်းများ

ကပ်ရောဂါဆိုးကို အမျိုးသားရေးတာဝန်တစ်ရပ်အဖြစ် အားလုံး စည်းလုံးညီညွတ်စွာနဲ့ တုံ့ပြန်ဖြေရှင်းဖို့ သမ္မတ တိုက်တွန်း

ဓာတ်ပုံ ရင်းမြစ်, Myanmar President Office

ဓာတ်ပုံ ပုံစာ,

ကပ်ရောဂါဆိုးကို အမျိုးသားရေးတာဝန်တစ်ရပ်အဖြစ် အားလုံး စည်းလုံးညီညွတ်စွာနဲ့ တုံ့ပြန်ဖြေရှင်းဖို့ သမ္မတ တိုက်တွန်း

(၁) ကိုရိုနာဗိုင်းရပ်စ်ကြောင့် သင်္ကြန်မှာ ပျော်ခွင့်မရကြတဲ့အပေါ် စိတ်မကောင်းကြောင်း သမ္မတပြော

ကမ္ဘာလုံးဆိုင်ရာ ကပ်ရောဂါ ကိုရိုနာဗိုင်းရပ်စ် Covid-19 ကြောင့် ဒီနှစ် အတာသင်္ကြန်မှာ လွတ်လပ်စွာပျော်ရွှင်ခွင့်မရကြတာကို များစွာစိတ်မကောင်း ဖြစ်မိတယ်လို့ နိုင်ငံတော်သမ္မတ ဦးဝင်းမြင့်က ပြောပါတယ်။

သမ္မတ ဦးဝင်းမြင့်ဟာ ဧပြီ ၁၇ ရက် မြန်မာနှစ်ဆန်းတစ်ရက်နေ့မှာ အများပြည်သူကို နှစ်သစ်ကူးနှုတ်ခွန်းဆက်စကားပြောကြားခဲ့တာဖြစ်ပါတယ်။

ကိုဗစ်-၁၉ ကာကွယ်၊ ထိန်းချုပ်၊ ကုသရေးလုပ်ငန်းစဉ်တွေမှာ တာဝန်ကျေပွန်စွာထမ်းဆောင်ကြတဲ့ ဝန်ထမ်းတွေ၊ အလှူရှင်တွေ၊ အရပ်ဖက် အဖွဲ့အစည်းတွေ၊ ဝိုင်းဝန်းထောက်ပံ့ပေးတဲ့ အသိပညာရှင်အတတ်ပညာရှင်တွေ၊ ထောက်ပံ့ကူညီတဲ့ မီဒီယာတွေနဲ့ ကျန်းမာရေးအသိပညာပေးနှိုးဆော်ချက်တွေကို တိတိကျကျလိုက်နာကြတဲ့ နိုင်ငံသူ နိုင်ငံသားတွေ စတဲ့ လူထုလူတန်းစား အလွှာအသီးသီးက မိဘပြည်သူတွေကို အထူးကျေးဇူးတင်တယ်လို့ သမ္မတက ပြောပါတယ်။

ဒီကမ္ဘာလုံးဆိုင်ရာ ကူးစက်ပျံ့နှံ့တဲ့ ကပ်ရောဂါဆိုးကို အမျိုးသားရေးတာဝန်တစ်ရပ်အဖြစ် အားလုံး စည်းလုံးညီညွတ်စွာနဲ့ တုံ့ပြန်ဖြေရှင်းဖို့ကိုလည်း သမ္မတက မေတ္တာရပ်ခံပါတယ်။

ကိုရိုနာဗိုင်းရပ်စ် ကပ်ရောဂါဆိုးနဲ့ ပတ်သက်ပြီး လူထုရဲ့ ကျန်းမာရေးဆိုင်ရာကိစ္စရပ်တွေကို ဘက်ပေါင်းစုံကနေ ကြိုတင်ပြီး စနစ်တကျစီမံဆောင် ရွက်နေတယ်လို့ သမ္မတက ဆိုပါတယ်။

တစ်ဖက်မှာလည်း တရားဥပဒေစိုးမိုးရေး၊ ပြည်သူတွေရဲ့ လူမှုစီးပွားဘ၀ မြင့်မားတိုးတက်ရေး၊ အမျိုးသားပြန်လည်သင့်မြတ်ရေးနဲ့ ပြည်တွင်းငြိမ်းချမ်းရေး၊ ဒီမိုကရေစီဖက်ဒရယ်ပြည်ထောင်စု တည်ဆောက်ရေးတို့ကို ဆက်လက်ဆောင်ရွက်နေတယ်လို့ သမ္မတက ဆိုပါတယ်။

ကဏ္ဍအသီးသီးမှာ ပြုပြင်ပြောင်းလဲမှုတွေလုပ်နေပြီး အစိုးရရဲ့ဆောင်ရွက်မှုတွေဟာ ပြည်သူတွေကြား မြင်သာထင်သာရှိတာတွေရှိသလို မတွေ့မမြင် မကြားမသိနိုင်တဲ့ မြင်သာထင်သာမရှိတဲ့ ပြုပြင်ပြောင်းလဲမှုတွေလည်း ရှိတယ်လို့ သမ္မတက ပြောပါတယ်။

ဒါပေမဲ့ အဲဒါတွေက ဘယ်လိုကိစ္စရပ်တွေလဲဆိုတာကိုတော့ သမ္မတမိန့်ခွန်းမှာ အသေးစိတ်ဖော်ပြထားခြင်းမရှိပါဘူး။

မိန့်ခွန်းအဆုံးသတ်မှာတော့ ကိုယ့်ကံကြမ္မာအလှည့်အပြောင်းကို ကိုယ်တိုင် ဖန်တီးနိုင်စွမ်းရှိတဲ့ အခွင့်အရေးရခိုက် အစိုးရနဲ့ အတူ လက်တွဲမဖြုတ်စတမ်း ပူးပေါင်းပါဝင်ဖို့ အလေးအနက်ပန်ကြားအပ်ပါတယ်လို့ ပြောကြားသွားပါတယ်။

(၂) အကျဉ်းသား နှစ်သောင်းကျော်ကို ပြစ်ဒဏ်လွတ်ငြိမ်းခွင့်ပြု၊ တချို့ကို ပြစ်ဒဏ်ပြောင်းလဲလျှော့ပေါ့

ဓာတ်ပုံ ရင်းမြစ်, Khin Mg Win

ဓာတ်ပုံ ပုံစာ,

အင်းစိန်ထောင်ကနေ လွတ်ငြိမ်းချမ်းသာခွင့်နဲ့ ပြန်လွတ်လာမယ့် အကျဉ်းသားတွေကို လာရောက်စောင့်ဆိုင်းနေကြတာဖြစ်

မြန်မာ့နှစ်သစ်ကူးအချိန်မှာ လူထုစိတ်နှလုံးအေးချမ်းစေရေးနဲ့ လူသားချင်းစာနာထောက်ထားမှုကိုအလေးထားတဲ့အနေနဲ့ ဖွဲ့စည်းပုံအခြေခံဥပဒေ ပုဒ်မ ၂၀၄၊ ပုဒ်မခွဲ (က) အရ အကျဉ်းသားအကျဉ်းသူစုစုပေါင်း ၂၄,၈၉၆ ဦးကို စည်းကမ်းသတ်မှတ်မထားဘဲ ပြစ်ဒဏ်လွတ်ငြိမ်းခွင့်ပေးလိုက်ကြောင်း သမ္မတရုံးက ဒီကနေ့ ဧပြီ ၁၇ ရက် နေ့စွဲနဲ့ ထုတ်ပြန်လိုက်ပါတယ်။

အဲဒီထဲမှာ နိုင်ငံခြားသား အကျဉ်းသားအကျဉ်းသူ ၈၇ ဦးလည်း ပါဝင်ပါတယ်။

ဒါ့အပြင် ဒီနှစ်မြန်မာနှစ်ဆန်း ၁ရက်နေ့ ဖြစ်တဲ့ ဧပြီ ၁၇ ရက်မတိုင်ခင် ကျူးလွန်ခဲ့တဲ့ ပြစ်မှုတစ်ခုခုအတွက် ပြစ်ဒဏ်ချမှတ်ခံထားရသူတွေကိုလည်း သမ္မတက ပြစ်ဒဏ်ကနေ လျှော့ပေါ့လွတ်ငြိမ်းခွင့်တွေပေးခဲ့ပါတယ်။

သေဒဏ်ကျခံနေရသူတွေကို လွတ်ရက်မရှိ(ထောင်ဒဏ်တစ်သက်) ကို ပြောင်းလဲကျခံစေမှာဖြစ်ပါတယ်။

ဓာတ်ပုံ ရင်းမြစ်, Khin Mg Win

ဓာတ်ပုံ ပုံစာ,

လွတ်ငြိမ်းချမ်းသာခွင့်နဲ့ ပြန်လွတ်လာမယ့်သူတွေကို ကြိုဆိုစောင့်ဆိုင်းနေကြ

နှစ်အကန့်အသတ်မရှိနဲ့ ထောင်တစ်သက်ကျခံနေရသူတွေကို ထောင်အနှစ် ၄၀ သို့ လျှော့ပေါ့ကျခံစေမှာ ဖြစ်ပါတယ်။ ဒီလျှော့ပေါ့မှုမှာတော့ အရင် လွတ်ငြိမ်းချမ်းသာခွင့်ရထားတဲ့သူတွေ ပါဝင်မှာမဟုတ်ပါဘူး။

နောက်ပြီး ထောင်အနှစ် ၄၀ အထက် ကျခံနေရသူတွေကို နှစ် ၄၀ အထိ လျှော့ပေါ့ကျခံစေမှာ ဖြစ်ပါတယ်။

နောက်ဆုံးတစ်ခုကတော့ ထောင် အနှစ် ၄၀ နဲ့ အောက် ကျခံနေရသူတွေကို သူတို့ကျခံနေရတဲ့ ထောင်ဒဏ်ရဲ့ လေးပုံတစ်ပုံပဲ လျှော့ပေါ့ကျခံစေမှာ ဖြစ်တယ်လို့ သမ္မတ ဦးဝင်းမြင့်က ဒီကနေ့ ဧပြီ ၁၇ ရက်မှာ လက်မှတ်ထိုး ထုတ်ပြန်ခဲ့တဲ့ကြေညာချက်မှာ ဖော်ပြထားပါတယ်။

(၃) အိန္ဒိယမှာ ကိုရိုနာတိုက်ဖျက်ရေးရှေ့တန်းရောက် အမျိုးသမီးကျန်းမာရေးလုပ်သားတွေ အခက်တွေ့

ဓာတ်ပုံ ပုံစာ,

အစိုးရဟာ ကိုရိုနာဗိုင်းရပ်စ်ကာကွယ်ရေး အောက်ခြေမှာ လုပ်ကိုင်ရတဲ့သူတွေကို တစ်လ ရူပီး တစ်ထောင် (အမေရိကန် ၁၃ ဒေါ်လာ) ပေးပါတယ်

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

အိန္ဒိယမှာ ကိုဗစ်-၁၉ တိုက်ဖျက်ရေး ရှေ့တန်းက ဆောင်ရွက်နေတဲ့ ကျန်းမာရေး လုပ်သားတွေထဲက ကိုးသောင်းလောက်ဟာ အမျိုးသမီးကျန်းမာရေး လုပ်သားတွေဖြစ်ပါတယ်။

ဒါပေမဲ့ သူတို့ဟာ လုပ်ခလစာနည်းပါးတာ၊ ကြိုတင်ပြင်ဆင်ထားမှု အားနည်းပြီး တိုက်ခိုက်ခံရနိုင်တဲ့အခြေအနေနဲ့ လူမှုရေးဆိုင်ရာအခက်အခဲတွေကို ကြုံနေရတယ်လို့ ဆိုပါတယ်။

"အစိုးရလုပ်ပုံအရဆို ကျွန်မတို့အသက်ဟာ ရူပီး ၃၀ (အမေရိကန်တစ်ဒေါ်လာအောက်) ပဲတန်ပါတယ်" လို့ ဒေသန္တရ ကျန်းမာရေး လုပ်သားတစ်ဦးဖြစ်တဲ့ အယ်လ်ကာနာလာဝတီက ပြောပါတယ်။

"အစိုးရဟာ ကိုရိုနာဗိုင်းရပ်စ်ကာကွယ်ရေး အောက်ခြေမှာ လုပ်ကိုင်ရတဲ့သူတွေကို တစ်လ ရူပီး တစ်ထောင် (အမေရိကန် ၁၃ ဒေါ်လာ) ပေးပါတယ်။ဒါကြောင့် အန္တရာယ်တွင်းထဲအလုပ်လုပ်ရတဲ့ သူတို့ဘဝတွေအတွက် နေ့စဉ် ရူပီး ၃၀ ပဲ ရနေတာပါ" လို့ သူက ဆက်ပြောပါတယ်။

အိန္ဒိယမှာ ကိုရိုနာဗိုင်းရပ်စ် ကာကွယ်ကုသရေး အတွက် နှာခေါင်းစည်းနဲ့ လက်သန့်ဆေးရည်လို ပစ္စည်းပစ္စယတွေ မလုံလောက်ပါဘူး။ ရောဂါကာကွယ်ရေးဝတ်စုံ PPE တွေ ပြတ်လပ်နေပြီး ဆရာဝန်နဲ့ သူနာပြုတွေတောင်မှ အကာအကွယ်မရှိဘဲ ဆေးကုသမှုနဲ့ လူနာပြုစုတာတွေ လုပ်နေရတဲ့အနေအထားပါ။

ကွင်းဆင်းလုပ်ကိုင်ရတဲ့ ကျန်းမာရေးဝန်ထမ်းများစွာက ဘီဘီစီကို ပြောကြားချက်အရ သူတို့ဟာ ချည်သားနဲ့ ပြုလုပ်ထားတဲ့ နှာခေါင်းစည်းတွေကို အသုံးပြုနေရပြီး နေ့တိုင်း ဒါကို ပြန်လျှော်ပြီးသုံးနေရတယ်လို့ ဆိုပါတယ်။ လက်သန့်ဆေးရည်အတွက်ဆိုလည်း ရေတွေရောထားတဲ့ လက်သန့်ဆေးရည်ပုလင်းကိုဆောင်ထားရတယ်လို့ ဆိုပါတယ်။

ဓာတ်ပုံ ပုံစာ,

အိန္ဒိယမှာ ကိုရိုနာဗိုင်းရပ်စ် ကာကွယ်ကုသရေး အတွက် နှာခေါင်းစည်းနဲ့ လက်သန့်ဆေးရည်လို ပစ္စည်းပစ္စယတွေ မလုံလောက်ပါဘူး။

ကျန်းမာရေးဝန်ထမ်းတွေထဲကတစ်ယောက်ဖြစ်တဲ့ ကရုဏာသျှင်းဒီကတော့ သွားလေရာ ခေါင်းစည်းပဝါကို ဆောင်ထားပြီး နှာခေါင်းစည်းအဖြစ် အသုံးပြုတယ်လို့ ဆိုပါတယ်။

ဒီလိုဘေးကင်းလုံခြုံစေတဲ့ပစ္စည်းတွေ မပြည့်စုံဘူးဆိုတဲ့အခါတိုင်း ဒေသန္တရအာဏာပိုင်တွေကို ဒါတွေဖြည့်တင်းဖို့ ညွှန်ကြားတယ်လို့ မဟာရာစ်ထရာပြည်နယ်ရဲ့ ကျန်းမာရေးဝန်ကြီးကပြောပါတယ်။

ဒီဒေသမှာ ကျန်းမာရေးလုပ်သားတွေဟာ မဖြစ်စလောက်လစာလေးနဲ့ အသက်စွန့်လုပ်နေရတာဖြစ်ပြီး သူတို့ကို အကာအကွယ်ပေးသင့်သလို သူတို့ကို ထောက်ပံ့ဖို့ အစိုးရမှာ တာဝန်ရှိတယ်လို့လည်း သူက ဆက်ပြောပါတယ်။

ဒီအခြေအနေက ကျန်းမာရေးလုပ်သားတွေရဲ့ မိသားစုတွေအပေါ်မှာလည်း ရိုက်ခတ်နေပါတယ်။

"ကျွန်မယောက်ျားဆိုရင် ကျွန်မကို အလုပ်မသွားသင့်ဘူးလို့ အခိုင်အမာပြောတယ်။ သူက သူနာပြုတွေ ၊ ဆရာဝန်တွေက လစာတွေလုံလုံလောက်လောက်ရနေတာပဲ။ သူတို့ အဲဒါတွေလုပ်ပစေပေါ့ လို့ ပြောတယ်"လို့ မစ္စ သျှင်းဒီက ပြောပါတယ်။

ကျန်းမာရေးဝန်ထမ်းတွေ ရာဂါကူးစက်ခံရမှာကို မိသားစုက ကြောက်ရွံ့တဲ့အပြင် သူတို့ရဲ့ဘေးကင်းလုံခြုံရေးအတွက်ကိုလည်း စိုးရိမ်နေကြပါတယ်။

အိန္ဒိယရဲ့ ပြည်နယ်တချို့မှာ ကျန်းမာရေးစစ်ဆေးပေးဖို့လာတဲ့ ဝန်ထမ်းတွေကို တိုက်ခိုက်တာတွေရှိနေတာကြောင့်ပါ။

လယ်အလုပ်လုပ်ရင်တောင် တစ်နေ့လုပ်အားခက ဒီလစာရဲ့ ဆယ်ဆ ရှိတယ်လို့ မစ္စ နာလာဝတီက ပြောပါတယ်။

"ဒီရူပီး ၃၀ နဲ့ ကျွန်မတို့ အိမ်စရိတ်ကို ဘယ်လိုဖြည့်ဆည်းနိုင်မှာလဲ။ တကယ်လို့ ကျွန်မတို့ ဗိုင်းရပ်စ် ကူးခံလိုက်ရရင်ရော ဘာလုပ်ရမလဲ။ ဘယ်သူတွေက ကျွန်မတို့ကို စောင့်ရှောက်မှာလဲ။ ဒီ ရူပီး ၃၀ နဲ့ ကျွန်မတို့ ကုလို့ရမှာလား" လို့ သူက မေးခွန်းထုတ်ပါတယ်။

သူတို့ဟာ ဒီလောက်ခက်ခဲ့တဲ့အခြေအနေကို ရင်ဆိုင်ပြီး လုပ်နေပေမယ့် အသိအမှတ်ပြုမှုလည်း မရရှိဘူးလို့ ဆိုပါတယ်။

ဝန်ကြီးချုပ်ကအစ အစိုးရထိပ်ပိုင်းခေါင်းဆောင်တွေ အဆုံး လူတိုင်းနီးပါးဟာ ဆရာဝန်တွေနဲ့ ရဲအရာရှိတွေကိုပဲ အားပေးချီးမြှောက်နေကြတယ်လို့ လည်း ဆိုပါတယ်။

အိန္ဒိယမှာ ဧပြီ ၁၇ မနက်ပိုင်းထိ ကိုရိုနာဗိုင်းရပ်စ် ကူးစက်ခံရသူ ၁၂,၇၀၀ ကျော်၊ သေဆုံးသူ ၄၂၀ နဲ့ ပြန်လည်သက်သာလာသူ ၁,၅၀၀ ကျော်ရှိပါတယ်။