ကိုရိုနာဗိုင်းရပ်စ်-ကိုဗစ်ရောဂါကိုအချိန်ကြာကြာ ခံခဲ့ရတဲ့လူနာတွေ

ရေးသားသူ ဒေါမနစ် ဟူးစ်

ကျန်းမာရေး သတင်းထောက်၊ ဘီဘီစီသတင်းဌာန

ဓာတ်ပုံ ပုံစာ,

ဒေးဗစ် သီးသန့်ခွဲနေတဲ့ ဧည့်ခန်းရဲ့ ပြတင်းပေါက်မှန်တစ်ဘက်ကနေ သမီးနဲ့ ဇနီးကို တွေ့နေစဥ်

အသက် ၄၂ နှစ်အရွယ် ဗိသုကာပညာရှင် ဒေးဗစ် ဟယ်ရစ်ရဲ့ ဘဝ ပြိုပျက်သွားသလို ခံစားခဲ့ရတာပါ။

လွန်ခဲ့တဲ့ သီတင်း ၇ ပတ်က ကိုဗစ် ၁၉ ရောဂါလက္ခဏာတွေ သူ့မှာ ဖြစ်ခဲ့ပါတယ်။ ဆိုးဝါးတဲ့ တုပ်ကွေးရောဂါနဲ့ ဆင်တူတယ်လို့ သူက ပြောပါတယ်။

အဲဒီလို ရောဂါလက္ခဏာတွေ စပြတဲ့အချိန်မှာ ဒေးဗစ်ဟာ ဘရစ်စတယ်လ်မြို့က နေအိမ်မှာ သူ့ဇနီး၊ ရင်သွေးငယ် သမီးလေးနဲ့ အတူနေနေရာကနေ အခန်းတစ်ခန်းမှာ သီးသန့် ခွဲနေခဲ့ပါတယ်။

တစ်ပတ်လောက်ကြာတော့ စပြီးသက်သာလာပါတယ်။ ဒါပေမဲ့ နောက်နှစ်ပတ်အကြာမှာ ရောဂါလက္ခဏာတွေ ပြန်ပြလာတဲ့အတွက် အံ့သြခဲ့ရပါတယ်။

အရင်ဖြစ်ခဲ့တဲ့ ရောဂါလက္ခဏာတွေ တစ်ကျော့ပြန်ဖြစ်လာတာ လုံးဝမမျှော်လင့်ခဲ့ဘူး လို့ ဒေးဗစ်က ပြောပါတယ်။

Skip ပေါ့ဒ်ကတ်စ် and continue reading
ပေါ့ဒ်ကတ်စ်
ဘီဘီစီမြန်မာပိုင်း ညနေခင်းသတင်းအစီအစဉ်

နောက်ဆုံးရ သတင်းနဲ့ မျက်မှောက်ရေးရာအစီအစဉ်များ

ပေါ့ဒ်ကတ်စ်အစီအစဉ်များ

End of ပေါ့ဒ်ကတ်စ်

"ဒုတိယတစ်ခေါက်က အများကြီး ပိုဆိုးတယ်၊ အရင်ကလို တုပ်ကွေးလက္ခဏာမျိုးပဲ၊ ဒါပေမဲ့ အသက်ရှူပါ ကြပ်လာတယ်၊ အဲဒီမှာ ငါတော့ ကိုရိုနာဗိုင်းရပ်စ်ရောဂါ ဖြစ်နေပြီလို့ တွက်လိုက်မိတယ်"

"အဲဒီလို နှစ်ပတ် ထပ်ဖြစ်တယ်။ ဒါပြီးတော့ ပြန်သက်သာလာပြီလို့ ထင်ပေမဲ့ လူက မောပြီး နုံးကျန်ရစ်တယ်"

"အဲဒါပြီးတော့ သီတင်း ၇ ပတ်မြောက်တဲ့အချိန်မှာ တတိယအကျော့ ရောဂါလက္ခဏာ ပြလာပြန်တယ်၊ကံသီလို့ အရင်အခေါက်တွေကလောက်တော့ မပြင်းလှဘူး၊ ဒါပေမဲ့ ရောဂါလက္ခဏာက သိသာထင်ရှားနေတုန်းပဲ"

နောင်မှ နောင်တရမယ့်အစား ကြိုတင်ကာကွယ်ဖို့ ပိုသတိထားလုပ်တဲ့ အနေနဲ့ ဒေးဗစ်ဟာ အိမ်သားတွေနဲ့မရောပဲ ဧည့်ခန်းထဲမှာပဲ ဆက်ပြီးသီးသန့် ခွဲနေခဲ့ပါတယ်။ သီးသန့်ခွဲစား၊ ခွဲအိပ်ခဲ့သလို အဝတ်အသန့်လဲပြီးမှ ရေချိုးခန်းနဲ့ ရေအိမ် ဝင်တာမျိုး လုပ်ခဲ့ပါတယ်။

သူ့ရဲ့ ၁၀ လသမီးလေး မီလီ ကို တွေ့ချင်ရင် ဒေးဗစ် သီးသန့်ခွဲနေတဲ့ ဧည့်ခန်းရဲ့ ပြတင်းပေါက်မှန်တစ်ဘက်ကနေ ဇနီးက ခေါ်လာပြပေးပါတယ်။

နေမကောင်းဖြစ်ခဲ့တဲ့အတွက် အားအင်ကုန်ခန်း နွမ်းနယ်နေပြီး နောက်ထပ် ဘာဖြစ်လာအုံးမလဲ ဆိုတာမရေမရာ ဖြစ်ခဲ့ရတယ်လို့ ဒေးဗစ်က ပြောပါတယ်။

"ဘယ်လို အခြေအနေ အဆင့်မျိုးမှာ ဆရာဝန်တွေဆီ အကူအညီ တောင်းရမလဲ ဆိုတာကို မသိတာကစိတ်ညစ်စရာ အကောင်းဆုံး တစ်ခုပါပဲ"

"ကျန်းမာရေးဌာနကိုလည်း တချိန်လုံး လှမ်းအကူအညီ မတောင်းချင်ပါဘူး၊ ကိုယ့်ထက် အများကြီးအခြေအနေ ဆိုးတဲ့သူတွေ ရှိနေတာကိုး၊ ဒါပေမဲ့ မမေးပြန်ရင်လည်း မပြောကောင်းမဆိုကောင်း တစ်ခုခု ဖြစ်သွားခဲ့ရင် အကူအညီမှ လှမ်းမတောင်းတာကိုးလို့ ဖြစ်အုံးမယ်"

"သက်သာလာပြီးမှ နောက်တစ်ကျော့ ပထမဆုံးအကြိမ် ပြန်ဖြစ်ခဲ့တဲ့အချိန်၊ ပထမဆုံးအကြိမ် အခြေအနေ ဆိုးလာတဲ့အချိန်တွေမှာ ဒါ့ထက်များ ပို ဆိုးလာမလား ဆိုတာ မသိတဲ့အတွက် အရမ်းအရမ်းစိုးရိမ်ကြောက်လန့်ခဲ့ရပါတယ်"

"သက်သာသွားပြီလို့ ထင်ထားရာကနေ နောက်တစ်ကျော့ ထပ်ဆိုးလာတော့ အတော့်ကို ကြောက်လန့်မိခဲ့ပါတယ်"

ပြင်းထန်တဲ့ ဝေဒနာခံစားခဲ့ရမှု

လန်ဒန်မြို့က အသက် ၄၉ နှစ်အရွယ် ဖယ်လစ်စီတီ ဆိုရင်လည်း ကိုဗစ် ၁၉ ရောဂါလက္ခဏာတွေနဲ့ စနေမကောင်း ဖြစ်ခဲ့အပြီး အခုပြန်နာလန် ထလာတာ သီတင်း ၆ ပတ်ထဲ ဝင်လာပါပြီ။

ဒါပေမဲ့ ဒေးဗစ်လိုပဲ သူလည်း အကြီးအကျယ် ခံခဲ့ရတာပါ။

"အဆိုးဆုံး ကျော်ဖြတ်ခဲ့ရတဲ့ အချိန်က အရမ်းနာမကျန်း ဖြစ်ခဲ့တဲ့ ပထမ ၁၀ ရက်အချိန်ပါ၊ သက်သာလာပြီလို့ ထင်ထားပြီးမှ တစ်ခါထပ်ပြီး ပိုဆိုးလာခဲ့တာပါ"

ဓာတ်ပုံ ပုံစာ,

ဖယ်လစ်စီတီ ရော၊ ဒေးဗစ် ပါ ကိုဗစ် ၁၉ ရောဂါရှိမရှိ စစ်မကြည့်ရသေးပါဘူး။ ဒါပေမဲ့ သူတို့ နှစ်ဦးစလုံးမှာ ဗိုင်းရပ်စ်ပိုး ရှိခဲ့ပုံရတယ်လို့ ဆရာဝန်တွေက ပြောပါတယ်။

"နေမကောင်းဖြစ်တာ ၅ ပတ်ထဲဝင်လာချိန်မှာ ကျွန်မဗိုက် အရမ်းအောင့်လာပြီး အော်ညည်းနေရတော့ ကျွန်မရဲ့ အမျိုးသားက အရေးပေါ်ဋ္ဌာနကို ဖုန်းဆက် အကူအညီ တောင်းခဲ့ရပါတယ်"

"ဗိုင်းရပ်စ်ကြောင့်လား၊ ကိုယ့်ခံနိုင်ရည် စွမ်းအားရဲ့ တုံ့ပြန်မှုများလား၊ အထဲမှာ ခန္ဓာကိုယ်အစိတ်အပိုင်းတွေ ဆက်ရောင်ရမ်းနေလို့လား ဘာ့ကြောင့်လဲဆိုတာ သိရဖို့ အရမ်းခက်ပါတယ်"

"နေမကောင်းမဖြစ်ခင်က ဗိုက်နဲ့ပတ်သက်လို့ ဘာဝေဒနာမှ မရှိခဲ့ပါဘူး။ နေမကောင်းဖြစ်တာ သီတင်း၅ ပတ်ထဲ ဝင်လာတော့ အရမ်းခံလိုက်ရတာပါ"

ရောဂါရှိမရှိ စစ်မကြည့်ရသေး

ဖယ်လစ်စီတီ ရော၊ ဒေးဗစ်ပါ ကိုဗစ် ၁၉ ရောဂါရှိမရှိ စစ်မကြည့်ရသေးပါဘူး။ ဒါပေမဲ့ သူတို့ နှစ်ဦးစလုံးမှာ ဗိုင်းရပ်စ်ပိုး ရှိခဲ့ပုံရတယ်လို့ ဆရာဝန်တွေက ပြောပါတယ်။

အခုတော့ သူတို့ဆီကနေ ရောဂါမကူးနိုင်တော့ပါဘူးလို့ ဆရာဝန်တွေက အာမခံထားပါတယ်။

ဒါပေမဲ့ ဖယ်လစ်စီတီကတော့ သူခံခဲ့ရတဲ့ ရောဂါလက္ခဏာတွေကို မေ့ပျောက်ပစ်နိုင်ဖို့ မနည်း ကြိုးစားနေရပါတယ်။ သီတင်းပတ်နဲ့ချီ နာမကျန်း ဖြစ်ခဲ့တာကြောင့် အတော့်ကို ဆိုးဆိုးဝါးဝါး ထိခိုက်ခဲ့ရပါတယ်။

"အိပ်ရာထဲမှာ အကြာကြီး လဲနေခဲ့ပြီး ပြန်နာလန်ထူလာဖို့ မနည်းကြိုးစားခဲ့ရပါတယ်"

"နေမကောင်းဖြစ်ခဲ့တာရော ပြန်ကောင်းလာဖို့ မနည်းကြိုးစားခဲ့ရတာရော အဲဒီအတွေ့အကြုံ တစ်ခုလုံးကြောင့် စိတ်ပိုင်းဆိုင်ရာလည်း အကြီးအကျယ် ထိခိုက်ခဲ့ပါတယ်"

အများစုကတော့ မြန်မြန် ပြန်နာလန်ထူနိုင်ခဲ့ကြ

ပြဿနာတစ်ခုက တချို့လူတွေမှာ သိပ်မပြင်းတဲ့ ရောဂါလက္ခဏာနဲ့ ရက်အနည်းငယ်သာ ခံရပေမယ့် ကျန်းမာသန်စွမ်းတဲ့ တခြားသူတွေက သီတင်းပတ်ပေါင်းများစွာ နာမကျန်းဖြစ်ကြရတာ ဘာ့ကြောင့်လဲ ဆိုတာ အပါအဝင် ကိုရိုနာဗိုင်းရပ်စ်အကြောင်း မသိသေးတာတွေ အများကြီး ရှိနေသေးတာပါ။

လူနာအများစုကတော့ မြန်မြန် အပြည့်အဝ နာလန်ပြန်ထူနိုင်ခဲ့ကြတယ်လို့ လန်ဒန်မြို့ အပူပိုင်းဒေသရောဂါ အထူးကုဆေးရုံက သမားတော်ကြီး ဒေါက်တာ ဖိလစ် ဂိုသာ့ဒ်က ပြောပါတယ်။

"တချို့က ချောင်းအဆက်မပြတ် ဆိုးတာ ရှိတယ်၊ အခုဆို ၃၊ ၄၊ ၅ ပတ်၊ ၆ ပတ်လောက်ကို အရမ်းအားနည်း နွမ်းနယ်နေသူတွေ ရှိလာတာ တွေ့နေရပါပြီ၊ ကျန်းမာသန်စွမ်းတဲ့ လူငယ်တွေမှာ ဖြစ်ရင် ဒါမျိုး မကြုံဖူးကြတာမို့ ပိုစိတ်ဓာတ်ကျ တတ်ကြပါတယ်"

"ဒါ့အပြင် ပြန်နာလန်ထူဖို့ အချိန်ကြာတာကလည်း ထိတ်လန့်စရာ ဖြစ်ခဲ့ပါတယ်၊ တစ်ခါ အကြီးအကျယ် နာမကျန်းဖြစ်ရာကနေ ပြန် နာလန်ထူလာပေမယ့် တခြားရောဂါအခံတွေ ရှိထားသူတွေဟာ တဖြည်းဖြည်း ပြန်နာလန်ထူလာနေတုန်းမှာ တစ်နေ့ကောင်းလိုက် တစ်နေ့မကောင်းလိုက် ဖြစ်တတ်ကြပါတယ်"

ရောဂါလက္ခဏာ အကြာကြီးပြနေတဲ့ လူနာတွေ သိသိသာသာ ပိုများလာနေ

ကိုဗစ် လက္ခဏာ လေ့လာတဲ့ အက်ပ် ကနေ ထွက်ပေါ်လာတဲ့ အချက်အလက်တွေအရ လူတစ်ယောက် ဖြည်းဖြည်းချင်း ပြန်နာလန်ထူလာနိုင်ဖို့ ပျမ်းမျှအားဖြင့် ၁၂ ရက်လောက်ကြာတယ်လို့ လန်ဒန်မြို့ King's College တက္ကသိုလ် ကပ်ရောဂါ မျိုးဗီဇဋ္ဌာနက ပါမောက္ခ တင်မ် စပက်တာ က ပြောပါတယ်။

"ဒီကာလထက် အချိန်အတော် ပိုကြာကြာ ရောဂါလက္ခဏာပြတဲ့သူတွေ သိသိသာသာ ပိုများလာတာကိုလည်း တွေ့ရပါတယ်၊ တချို့ဆို ရက် ၃၀ ဒါမှမဟုတ် ဒါ့ထက် ပိုကြာတာ တွေ့ရပါတယ်"

"အခုအခါ အချက်အလက်တွေ ပိုရလာနေသလို စက်ပစ္စည်းနဲ့ လေ့လာမှုတွေ၊ ဉာဏ်ရည်တုပစ္စည်း အသုံးပြုမှုတွေနဲ့ ဆက်လေ့လာနေတဲ့အတွက် လူတစ်ယောက်ကို ဒီလို ကြာကြာ နာမကျန်းဖြစ်စေတဲ့ အချက်တွေက ရောဂါလက္ခဏာလား တခြားရောဂါအရင်းခံတွေကြောင့်လားဆိုတာ သိပ်မကြာခင် ဖော်ထုတ်နိုင်တော့မှာပါ" လို့ သူက ပြောပါတယ်။

ဒေးဗစ်နဲ့ ဖယ်လစ်စီတီ တို့ နှစ်ယောက်စလုံးကတော့ အခုချိန်မှာ သူတို့ လုံးဝပြန်ကောင်းသွားပြီ၊ ပုံမှန်ဘဝကို ပြန်စနိုင်တော့မယ်လို့ မျှော်လင့်ထားပါတယ်။

ဒါပေမဲ့ လသားလေးပဲ ရှိသေးတဲ့ ကိုဗစ် ၁၉ ရောဂါကတော့ လူတွေ မလိုချင်တဲ့ အံ့သြစရာ အသစ်အဆန်းတွေ ဆက်ပေးနေအုံးမှာ ဖြစ်ပါတယ်။